तितस 3 - याम्फुहाम्बे खा नुबा ले़ये मोडोक्नोॽ ले़ःॽमे़ 1 सरकारनुङ सरकारमि योम्बोक ले़ःॽखुबा याॽमिजिमि अधिनबेॽ पेम्मेनुङ मोबेॽहा याॽमिजिडे़ॽ लुबॽआ खा खेम्मे लुनुङ फेरि इःडाजे। माहाजि सानिङ्नोॽ नुबा योम्बोक ले़ःॽमा पोरोक्मा खे़म्मे। 2 माहाजिडे़ॽ असामिसो मङे़ॽमा खा ए़लुमे मोबा असानुङ्सो ए़ॽखिमे़, तर याॽमिजिमि लागि नुबा ले़ःॽखुबा, चोप याॽमिजिनुङ टोङ्नुङ पेम्मिरो। 3 इन्ढोङ्होङ कानिङ टाङ्बासो याक्लो उम्बरिङ, लुबॽआ मे़ङ्खेम्खुबा, मोबा फाङ्सिघे़ॽपॽआ ले़टिङ्मा। कानिङ मङे़ॽमा खामि अधिनबेॽ टुसिङ्मा मोबा बेभिचारनुङ बेॽलो खालहा मङे़हा सुख बिलास ले़ःॽमा मिनिङ्मे़। कानिङ चेजेवा ले़ःॽमानुङ पेनिङ्मे़। याॽमिजिडे़ॽ सिॽचासामेनुङ कानिङ टाङ्बा सिॽचाघुसे़ॽ चुसिङ्मे़। 4 तर इन्डोक्पेॽ, कानिङ्मि मुक्ति पिघुबा निवाहाङ्मि नम्नावानुङ नम्नम खाङ्मुसा। 5 मोबा खोसे़ॽ कानिङ हिङ्माराप्टा। कानिङ टाङ्बे़ॽ नुबा योम्बोक ले़ःॽपॽआसे़ॽको इडोॽ लिबॽआ ने़ॽनि। तर खोमिन्नोॽ नम्नावाबाङ चुप्पॽआ चोङ हिङ्मवाबेॽ फेङ्घुबा पबित्रा होङ्निवामि सक्तिबाङ कानिङ हिङ्इटिङ्मे। 6 निवाहाङ्डे़ॽ चेघे़ॽलो पबित्रा होङ्निवा कानिङ मुक्ति पिघुबा हाङ्बा खिरिस्ट येसुबाङ कानिङ्बेॽ युङ्बेॽटा। 7 मोबा खोमि अनुग्रहाडे़ॽ कानिङ निवाहाङ्मि पोम्बेॽ धरमि लिहेसिङ्मा। मोबा कानिङे़ॽ आसा ले़ःॽपॽआ ए़ॽसिघे़ॽमे हिङ्मवा चुप्हेघुबाजिसो लिहेसिङ्मा। 8 इगो खा चइबानोॽ ले़ये। निवाहाङ्बेॽ बिस्वास ले़ःॽखुबाजिडे़ॽ नुबा योम्बोक्पेॽ निवा टिसानुमे लुनुङ हे़ने़ॽ इन्डोॽहोङ्सो इःॽपॽआ के़ॽ नेन्जानुङे। इघा नुबा योम्बोक ले़ःॽमाबेॽ हाइखाजिमि लागि सारो नुबानुङ फाइदामि खा लिये। 9 तर योम्बोक मे़ॽनिङ्हा खा, यहुदि टुबालाबाजिमि टुम्बेॽ इःघुसे़ॽचुमेनुङ नियममि टुम्बेॽ खिमा चुमामि खाबाङ ओः पेम्मे। अक्खागो योम्बोक मे़ॽनिङ्हानुङ योम्बोक पिनिहा खा ले़हा। 10 याॽमिजिमि रुम्बेॽ खिमवा फाक्मवा ए़ङ्घुबा याॽमि निघेॽटोॽ नुरोॽ लुमे मोडोॽ लुमाबेॽसो मे़खे़प्सुहोङ मोडोक्मा याॽमिनुङ इमाङ्सो ए़ले़ःॽमे। 11 इगो खा हे़ने़ॽसो लेन्डुए, इडोक्हा याॽमिजि थेत्तार ले़म्मे मोबा इघाजि खोजिटाङ्बामि पापडे़ॽ आप्टिकनुङ्मा लिम्मे। ए़क्साङ्ए सल्लाह 12 के़ॽ अरतिमास अथबा तुखिकस हे़नबेॽ पाङ्इनुङे। खो लेम्मासोरोॽ हे़न चाहिँ इन्डोक ले़ःॽनुङ्सो का चुप्सिॽ निकोपोलिस ठाउँबेॽ आप्मे़। इन्ढोङ्होङ चुङ महिना रुॽखे़ॽलो के़ॽ इगोबेॽनोॽ पेम्मे निवा ले़ए़टुङे। 13 जेनास लुमे वकिलनुङ अपोल्लोस निङ ले़ःॽखुबा याॽमि खे़ॽमाबेॽ मेॽयोङ्ठोक खे़ॽपेॽटाजेनुङ खोजि पाप्मिहा चोप खा हेरो पिसाजे। खोजि रामबेॽ इमाङ खामि खाँचो मे़सिॽलो। 14 कानिङ्मि याॽमिजिडे़ॽ योम्बोक मे़ॽनिङ्मा खाबेॽ हिङ्मवा ए़ॽटिसुजिरो तर नुबा योम्बोक्पेॽ हिङ्मवा टिसुजिरो इडोॽ ले़ःॽमाहोङ खोजिडे़ॽ हाइखाजिसो पिहेन्डुजे। 15 इगोबेॽ कानुङ टुघुबाजिडे़ॽ हे़न सेवायो लुटामे। आक्कोबेॽ कानिङ नम्नम ले़ःॽखुबा बिस्वासि वावानिसाजिसो कानिङ्मि सेवायो लुबेॽटाजे। निवाहाङ्मि अनुग्रहा हे़न्नुङ हाइखाजिबेॽसो सानिङ सोरि टुरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.