तितस 2 - याम्फुचोपजिमि लागि चाइबमा सिक्छे 1 तर हे़ने़ॽ चाहिँ टाङ्बे़ॽ चिम्बॽआ चाइबमा खारेॽ इःॽमे। 2 ठाॽपा वडाङ्पसाजि टाङ्बामि निवा अधिनबेॽ युङ्हेघुबा, नुबा लेहेघुबा, मोबा बिस्वासबेॽ पक्कामा, नम्नमनुङ्बा, हुङ्जाहेघुबा लिमे लुनुङ इःडाजे। 3 मोडोक्नोॽ ठाॽमा मेॽनामिॽचिडे़ॽ निवाहाङ ओहाङ ले़ःॽमे हिङ्मवा हिङ्मिरो। खोजिडे़ॽ याॽमिजिमि खा मे़इःजोसुजिरो। माहाजि इनुङ टोप्टे़ॽवाडे़ॽ ए़सेॽखे़ॽमिरो, मोबा माहा मेॽनामिॽचिडे़ॽ नुबा खारेॽनोॽ इःडुजिरो। 4 मोबारेॽ खोजिबाङ पाक्लोक्हा मेॽनामिॽचि खोजिमि ठाॽपानुङ खोजिमि पसाजि नम्नम ले़ःॽमे खामि तालिम पिहेन्डुजे 5 मोबा खोजिबाङ पाःॽइम्मे मेॽनामिॽचि नुबा रामबेॽ राम्हेघुबा, चोखो निवानुङ्मा, नम्नावानुङ्मा, नुरोॽ खिम ले़ःॽचाहेघुबानुङ बनिबामि अधिनबेॽ पेम्मे खा इःॽहेन्डुजे। आक्टोॽ ले़ःॽमाहोङ निवाहाङ्मि टुम्बेॽ आसे़ॽसो सिःक्चाडोक्टुजिने। 6 मोडोक्नोॽ वेन्जाजिसो टाङ्बामि निवा अधिनबेॽ युङ्खुबा लिसानिङे लुमे खा इःडाजे। 7 हे़न आमटाङ्बा चोप नुबा योम्बोकपेॽ खोजिमि लागि नमुना लिसे। मोबा निवादाङ्बानुङ भरोसानुङ्मा लिसे। 8 हे़ने़ॽ इःॽमाबेॽ चाइबमानुङ ठिक खा इःडाजे, मोबा असे़ॽसो सिःक्चाडोक्टुजिने। मोबा कानिङ्मि सतुरजिडे़ॽ कानिङ्मि टेडिघरिक्हा खा इमाङ्सो मे़चुप्नुङ ङेसिमाबेॽ सिॽइम्मे। 9 सेउतेजिसो टाङ्बामि मायोङ्बाडे़ॽ लुडिडोॽ चोप योम्बोक नुरोॽ ले़टानुमे लुनुङ इःडाजे। मोबा याबुक यग्रिङ मे़ङ्कारेॽ खोजिमि अधिनबेॽ पेम्मे खा इःडाजे। 10 माहाजि ए़ॽखुमे़ लुसाजे पुरा भरोसा ले़ःॽहेघुबा लिमा लुसाजे। माहाजिडे़ॽ ले़ःॽपॽआ चोप योम्बोकबाङ कानिङ मुक्ति पिघुबा निवाहाङ्डे़ॽ ओहाङ चुप्टुरो। 11 इन्ढोङ्होङ चोप याॽमिजिडे़ॽ मुक्ति चुप्टुजिरो लुनुङ्नोॽ निवाहाङ्मि अनुग्रहा खाङ्मुटे़। 12 इगो अनुग्रहाडे़ॽ कानिङ अधरमि हिङ्मवानुङ मक्खाम्डेमबेॽहा मङे़हा खाबाङ ओः पेम्मे खा इःॽये। इगोसे़ॽ कानिङ टाङ्बा इगो मक्खाम्डेमबेॽ नुबा रामबेॽ राम्मा, चाइबमानुङ धरमि हिङ्मवा हिङ्माराप्मिये। 13 कानिङे़ॽ ले़ःॽपॽआ आसा पुरा लिमे याकमि राम हुङ्इन्डुङ्मे। मो याक कानिङ्मि महान निवाहाङ्नुङ कानिङ मुक्ति पिघुबा हाङ्बा खिरिस्टडे़ॽ बेॽए मान चुप्मिन्डुए। 14 कानिङ चोप खालहा पापबाङ फाक्मामि लागिनोॽ फाक्खुबा हाङ्बा खिरिस्टडे़ॽ खोमि हिङ्मवा पिटे़। मोबा कानिङ खोमि याॽमि टोङ्मामि लागि चोखो टोक्सानुङ नुबा योम्बोक निवा टिनुङ ले़ःॽमे़ॽमामि इडोॽ ले़टु। 15 हे़ने़ॽ इघा खा पुरा अधिकारनुङ अरति पिमाहाजिनुङ योप्माहाजि, इघा खा इःॽमाबेॽ असे़ॽसो हे़न हेला मे़ले़ःॽहेमिरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.