तितस 1 - याम्फु1 का पावल निवाहाङ्मि योम्बोक ले़ःॽखुबानुङ खिरिस्ट येसुमि एप्पा चोङ्साबाङ निवाहाङ्डे़ॽ से़म्बॽआजिमि बिस्वास, भक्तिनुङ टोङ्इहा खोजिमि चाइबमा निवा इःॽसिॽ का पाङ्इटिङे, 2 मो बिस्वासनुङ निवा चाहिँ ए़ॽसिघे़ॽमे हिङ्मवामि आसबेॽ टुये, मोबा इन्डोक्पेॽसो मे़रेम्डेॽखुबा निवाहाङ्डे़ॽ याक्लोएम्बाङ कानिङ इगो हिङ्मवा पिनिम्ने़ लुनुङ हेन्ज्रुङ ले़ए़टुए। 3 निवाहाङ्डे़ॽ कानिङ्मि मुक्तिदाङ्बामि आग्याडोॽ का जिम्मा पिबॽआ खामि परचारबाङ ठिक बेलाबेॽ खोसे़ॽ मो बचन खाङ्मुसु। 4 इक्को बिस्वासबेॽ टुये के़ए़ चाइबमा पसाडोॽमा तितस, निवाहाङ पाबानुङ मुक्तिदाङ्बा खिरिस्ट येसुबाङ अनुग्रहानुङ सान्ति। केरेटबेॽहा मन्डलिबेॽ तितसमि योम्बोक 5 के़ॽ लुबॽआडोॽ हे़ने़ॽ आक्कोबेॽ एम्बॽआ योम्बोक पुरा ले़ःॽमे़, मोबा चोप सहरबेॽ एल्डरजि युङ्माहाजि, इघा योम्बोकमि लागि के़ॽ हे़न केरेटबेॽ याःॽयाटुङे। 6 मन्डलिबेॽहा अगुवाजि इमाङ आप्टिक मे़ॽनिङ्मा, इक्कोरेॽ फुङ्सया ले़ःॽखुबा, नुबा चाल चलननुङ्बा खोमि पसाजिसो बिस्वास ले़ःॽखुबा, लुबॽआ खा खासिखुबानुङ याॽमिजिडे़ॽ आप्टिक मे़न्टिहेखुबा लिमा खे़ये। 7 मन्डलिबेॽहा अगुवाडे़ॽ निवाहाङ्मि योम्बोकमि जिम्मा लाबॽआसे़ॽ खो इमाङ आप्टिक मे़ॽनिङ्मा याॽमि लिमा खे़ये। खो टाङ्बा खुसि ले़ःॽखुबा, चान्डोनोॽ सुरके़ॽखुबा, इनुङ टोप्टे़ॽवा उङ्खुबा, याॽमिजिनुङ काक्खुबा, मोबा खिक्तुबाङ लिमा फे़न्निबा। 8 खो चाबाङ्जि सेवा ले़ःॽखुबानुङ नुबा योम्बोक नेन्जाखुबा, टाङ्बामि निवा नुबा योम्बोकपेॽ टिघुबा, मे़रेम्डेॽखुबा, चोखो निवानुङ्मा, निवा टिनुङ योम्बोक ले़ःॽखुबा लिमा खे़ये। 9 इगो सिक्छे कानिङे़ॽ इःॽपॽआडोक्नोॽ लिमा खे़ये, मोबा कानिङ बिरोध ले़ःॽखुबाजिमि गल्तिसो खाङ्मुहेमामि लागि टाङ्बे़ॽ चुप्पॽआ चाइबानोक्मा सिक्छेबेॽ राम्खुबानुङ हाइखाजिसो इडोक्मा सिक्छे पिनुङ बोल पिहेखुबा लिमा खे़ये। 10 इन्ढोङ्होङ लुबॽआ मे़ङ्खसिखुबाजि, मे़ॽनोक्हा खा इःखुबाजिनुङ रेम्डेॽखुबाजि ले़म्मे। इडोक्हाजि बेॽलो चाहिँ खतना ले़ःॽमा खे़ये लुघुबाजि टुम्मे। 11 अक्खाजिमि योम्बोक से़क्मानोॽ खे़ये इन्ढोङ्होङ अक्खाजिडे़ॽको इःॽमानोॽ फे़न्निहा खा इःॽनुङ चोप खिमबेॽ खिमाचुमा ए़ङ्इटुजे। इघा चोप खा माहाजिडे़ॽ याङ टोङ्मामि लागिनोॽ इडोॽ ले़ए़टुजे। 12 केरेट लुमे ठाउँबेॽए इक्को अगमबक्ताडे़ॽ इडोॽ लुटुए, “केरेटबेॽहा याॽमिजि चोप रेम्डेम्मे, जिवातडोॽहानुङ पाङ्सुघुबा रोप्किजि ले़म्मे।” 13 इगो चइबानोॽ ले़ये, मोडोगे़ॽ माहाजि मारे योबाजे। मोबा माहाजिमि बिस्वास बोलियो लिरो। 14 मोबा यहुदिजिमि पारलेननुङ चाइबमा खा मे़ङ्खेम्खुबा याॽमिजिमि खा खेम्नोॽ मे़ङ्खेप्सुजिरो। 15 चोखो निवा काप्खुबा याॽमिजिमि लागि चोप चोखो ले़हा। तर मङे़ॽमा निवा काप्खुबानुङ बिस्वास मे़ले़ःॽखुबा याॽमिजिमि लागि चोप थोकनोॽ मङे़ॽमानोॽ ले़हा। हाम्बे नुबा हाम्बे चाहिँ मङे़ॽमा लुनुङ लेमे निवानोॽ काप्टुजिने। 16 माहाजि निवाहाङ लेन्डुङ्मे़गो काम्मे, तर खोजिमि योम्बोकडे़ॽ निवाहाङ सिच्चोन्डुजे। चिक्चि मिॽमारोहानुङ लुबॽआ खा मे़खेम्खुबा याॽमिजि इमाङ्सो नुबा योम्बोक ले़ःॽमा खेन्जोसुजिने। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.