रोमि 9 - याम्फुनिवाहाङ्डे़ॽ से़न्बॽआ जाति 1 हागो के़ॽ खिरिस्टमि निङ्बेॽ चाइबमा खा इःमे़ॽनिङ्सिनुङे़, रेम्डेॽपॽआ ने़ॽनि। पबित्रा होङ्निवामि पोम्बेॽ टुये काङ्मि नुबानुङ मङे़ॽमा खा लेघुबा निवाडे़ॽ इगो खामि साक्छि पिये। 2 के़ॽ नम्नम मिॽपॽआ इस्राएलि वावानिसानुङ नानुसाजिमि खा मिॽनुङ काङ्मि निवा बेॽलो टुक्नुङ हाःप्मिये। 3 काङ्मि इस्राएलि वावानिसानुङ नानुसाजिडे़ॽ मुक्ति चुप्मामि लागि काबेॽ चापहिमा सिॽनुङ के़ॽ खिरिस्टबाङ हाःघे़ॽमा सिॽहोङ्सो का इमाङ मिङ्ङानि। खोजिडे़ॽ मुक्ति चुप्टुजिरो लुनुङ सारो मिॽइटुङे। 4 इघा इस्राएलिजि निवाहाङ्डे़ॽ खोमि पसाजि लिमे अधिकार पिसुजि। खोमि महिमामि सेन्जिसेम्माङ, हेन्ज्रुङ हे़नु, यहुदि धारमिक नियम पिसुजिनुङ, मन्दिरबेॽ ओहाङ ले़ःॽमे भाग पिसुजि। 5 इस्राएलिजि चाहिँ टुबालाबा अब्राहाम, इसहाकनुङ याकुबमि पसाजि ले़म्मे, खिरिस्टसो खोजिमि जातिबाङ्नोॽ लेस्सा। खोनोॽ चोपसोक्पेॽ राज्य ले़ःॽखुबा निवाहाङ ले़ये, खोमि सानिङ्मु ओहाङ लिरो। आमेन 6 तर निवाहाङ्डे़ॽ ले़ःॽपॽआ हेन्ज्रुङमि योम्बोक मे़ॽनिङ्मा लिबॽआडे ? इगोगो ने़ॽनि! इन्ढोङ्होङ इस्राएलि जातिबाङ टोक्पॽआजि चोप इस्राएलिजि ने़ॽनिहाजि। 7 अब्राहाममि निप्पाङ पसाजि इसहाकनुङ इस्माएल टुसाजिसो निवाहाङ्डे़ॽ धारमिक नेॽचिराबेॽ लुबॽआ ले़ये, “इसहाकबाङ टोक्पॽआजिरेॽ हे़ने़हा पसाजि लिम्मे।” 8 इडोॽ लुबॽआ चाहिँ, अब्राहाम खोमटाङ्बे़ॽ हिङाबाङ टोक्पॽआ चोप पसाजि निवाहाङ्मि सन्तान ने़ॽनिहाजि, तर निवाहाङ्मि हेन्ज्रुङ्बाङ टोक्पॽआजिरेॽनोॽ अब्राहाममि पसाजि ले़म्मे। 9 मो हेन्ज्रुङ्डे़ॽ इडोॽ लुये, “के़ॽ लुबॽआ बेलाबेॽ का टेजाङे, मोडोक्पेॽ हे़ने़ए़ बनिमा साराडे़ॽ इक्को पसा टोॽइन्डुए।” 10 मोडोॽरेॽ ने़ॽनि, कानिङ्मि टुबा इसहाकमि बनिमा रेबिकाडे़ॽ काप्सबा पसाजि टोगु। 11-13 तर माहा पसाजि टोक्मा याक्लोनोॽ, खोजिडे़ॽ नुबा मङे़ॽमा योम्बोक ले़ःॽमा याक्लोनोॽ, निवाहाङ्डे़ॽ रेबिका इडोॽ लुबॽआ ले़टा, “टुम्मिडे़ॽ से़पामि सेवा ले़न्डुए” धारमिक नेॽचिराबेॽ निवाहाङ्डे़ॽ लुबॽआ खा इडोॽ साप्पॽआ ले़ये, “के़ॽ याकुब नम्नम ले़टुङ, एसाब सिॽचोसुङ। निवाहाङ्डे़ॽ याॽमिमि योम्बोक खाङ्नुङ ने़ॽनि, खोसे़ॽ मिॽपॽआडोॽ ले़ःॽमेन्डुजे लुमे खा इगोबेॽ छे़ङ्गै खाङ्मुटे़।” 14 मोडोक्होङ हागो कानिङे़ॽ इमाङ लुमे ? इमा निवाहाङ्डे़ॽ नुरोॽ न्याय ले़ःॽलेसुनि ? मोडोॽको ने़ॽनि! 15 निवाहाङ्डे़ॽ मोसा लुसु, “असा के़ॽ नम्नम ले़ःॽमा मिॽइनुङे, मो के़ॽ नम्नम ले़नुङे। असा के़ॽ नम्नावा ले़ःॽमा मिॽइनुङ, मोनोॽ के़ॽ नम्नावा ले़ए़नुङे।” 16 मोडोगे़ॽ याॽमिजिडे़ॽ मिॽपॽआसे़ॽ ने़ॽनि, तर निवाहाङ्मि नम्नावाडे़ॽ चोप खा से़न्इन्डुहा। 17 धारमिक नेॽचिराबेॽसो हाङ्बा फारो इडोॽ लुबॽआ ले़ये, “के़ॽ हे़न सोक्पेॽ के़ए़ सक्ति खाङ्मुनुङे मक्खाम्डेमबेॽ काङ्मि निङ लेमेॽमामि के़ॽ हे़न हाङ्बा टोङ्इटुङे।” 18 मोडोगे़ॽ निवाहाङ्डे़ॽ असा नम्नावा ले़ःॽमा मिॽइन्डु खो नम्नावा ले़न्डुए, असा निवा छाक्मेॽमा मिॽइन्डु मोमि निवा छाक्मेन्डुए। सुॽउ टोङ्घुबानुङ सुॽउ 19 कोहिडे़ॽ इडोॽ लुन्डु होला, “मोडोक्होङ्गो निवाहाङ्डे़ॽ याॽमिजि इन्ढोङ आप्टिक टिन्डुजे ? निवाहाङ्मि निवामि खा असे़ॽ बिरोध ले़ःॽहेन्डुए ?” 20 होउ याॽमि, निवाहाङ्मि बिरोधबेॽ काखुबा हे़न असाडे ? इमा सुॽउडे़ॽ “का इन्ढोङ इडोक्मा टोक्सिङे़” लुनुङ खो टोङ्घुबा लुहेन्डुए ? 21 इक्कोनोॽ खालमा आक्खमाबाङ सुॽउ टोङ्खुबाडे़ॽ इक्को बेॽए योम्बोकमि लागि, हाइको चाहिँ ए़डेम्मा योम्बोकमि लागि टोङ्इन्डुए। इडोॽ ले़ःॽमे अधिकार सुॽउ टोङ्घुबानुङ माॽआयेन्डे ? 22 मोडोक्नोॽ निवाहाङ्मि सुरिगे़ॽनुङ सक्तिडे़ॽ नास ले़ःॽमे़ अधिकार टुये, तरसो नासि लिसिॽपोरोक्पॽआ याॽमिजिमि लागि खो सारोनोॽ सहनसिल लिनुङ योङ्मेन्डुहोङ, कानिङे़ॽ इमा ले़ःॽमे़ ? 23 मोबा निवाहाङ्डे़ॽ कानिङ बेॽए सक्तिनुङ महिमामि याङ्सरावा खाङ्मुमा मिॽटु। कानिङ खोमि नम्नावा चुप्खुबा सुॽउ लिसिङ्मा। खोसे़ॽ कानिङ खोमि नम्नावा चुप्खुबाजि टाङ्बामि बेॽए आदरमि लागि पोरोगा। 24 निवाहाङ्डे़ॽ के़ॽपॽआ याॽमिजि चाहिँ कानिङ्नोॽ ले़न्डिङ्मा। खोसे़ॽ यहुदिजिरेॽनोॽ ने़ॽनि तर अयहुदिजिसो के़डुजि। 25 निवाहाङ्डे़ॽ लुबॽआ खा होसे लुमे अगमबक्ताडे़ॽ इडोॽ साप्मिटुए- “असाजि के़हा याॽमिजि मे़ले़टामि, माहाजिनोॽ के़ॽ काङ्मि याॽमिजि टोङ्इनुङ्हाजि। असाजि के़ॽ नम्नम मे़ले़टुङ्जिङ माहाजिनोॽ ‘के़ॽ नम्नम लेनुङ्हाजि’।” 26 “मोबा मो ठाउँबेॽनोॽ निवाहाङ्डे़ॽ माहाजि इडोॽ लुटुए, ‘हे़निङ काङ्मि याॽमिजि मे़ले़टानिङ तर हागो हिङ्रिक निवाहाङ्मि पसाजि लिटानिङे’।” 27 मोबा यसैया निङ ले़ःॽखुबा हाइको अगमबक्ताडे़ॽ इस्राएलिजिमि टुम्बेॽ इडोॽ लुटुए, “इस्राएलि याॽमिजि माहोङ्माबेॽहा रुङ्गुवासे़ॽवाडोक्नोॽ बेॽलो टुम्मे, तर माहा याॽमिजिबेॽ ए़डे़ॽवा याॽमिजिमिरेॽ छुट्कारा लिम्मे। 28 इन्ढोङ्होङ परभुडे़ॽ इगो मक्खामडेमबेॽहा याॽमिजिसोक्पेॽ चान्डोनोॽ न्याय लेन्डुए।” 29 यसैयाडे़ॽ इडोक्सो लुटुए, “चोप्पाङ सक्तिदाङ्बा निवाहाङ्डे़ॽ कानिङ्मि लागि, इक्को निप्पाङ पसाजि मे़युङ्बॽआ ले़टाहोङ सदोमनुङ गमोरा सहर नासि लिडिडोक्नोॽ कानिङ्सो नासि लिसिङ्मे़।” यहुदिजिडे़ॽ बिस्वास मे़ले़ःॽपॽआ 30 कानिङे़ॽ लुमायोक्पॽआ खा चाहिँ इगो ले़ये, धारमिक नियम पालना मे़ले़ःॽखुबा अयहुदिजिडे़ॽ निवाहाङ्बेॽ बिस्वास ले़ःॽपॽआसे़ॽ निवाहाङ्डे़ॽ खोजि धरमि टोक्सुजि। 31 तर इस्राएलिजिडे़ॽ धारमिक नियम पालना ले़ःॽनुङ निवाहाङ्मि पोम्बेॽ धरमि लिमा योक्माबेॽसो धरमि मे़लिहेसामि। 32 यहुदिजि इन्ढोङ धरमि मे़लिहेसामे ? इन्ढोङ्होङ खोजि चाहिँ बिस्वास ले़ःॽनुङ धरमि ठहरबा लिमा मे़योगामि, तर बेॽलो धारमिक योम्बोक ले़ःॽनुङ धरमि लिमा योगामि, मोडोगे़ॽ रुङ्गोॽवाबेॽ सराङ रोःक्नुङ काक्सामि, मो रुङ्गोॽवा चाहिँ खिरिस्ट ले़ये। 33 मोबा खिरिस्टमि टुम्बेॽ निवाहाङ्डे़ॽ लुडिडोक्नोॽ धारमिक नेॽचिराबेॽसो इडोक्नोॽ साप्पॽआ ले़ये, “खाक्सानुमे के़ॽ सियोनबेॽ इक्को रुङ्गोॽवा युङ्इनुङे, मोबेॽ बेॽलो याॽमिजिमि सराङ रोःक्नुङ काङ्इम्मे। तर खोबेॽ बिस्वास ले़ःॽखुबाजि असासो ङेसिमाबेॽ सिॽमिनिबा।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.