रोमि 8 - याम्फुसिमवाबाङ लेॽखे़ॽमे 1 मोडोगे़ॽ हागो येसु खिरिस्टबेॽ बिस्वास ले़ःॽनुङ हिङ्घुबाजिमि लागि निवाहाङ्डे़ॽ आप्टिक टिनिबा। 2 धारमिक नियमडे़ॽ कानिङ्मि पाप खाङ्मुनुङ आप्टिकनुङ्मा टोक्सा। तर येसु खिरिस्टबेॽ टुबॽआ चोङ हिङ्मवा पिघुबा पबित्रा होङ्निवामि सक्तिडे़ॽ कानिङ पापनुङ सिमवामि नियममि सक्तिबाङ छुट्कारा पिटे़। 3 याॽमिमि पापि बानि बेहोराडे़ॽ कमजोर लिबॽआसे़ॽ धारमिक नियमडे़ॽसो मे़ले़ःॽहेबॽआ योम्बोक निवाहाङ्डे़ॽ ले़टु, अथबा निवाहाङ्मि पसा पापमि लागि बलि लिमामि पापि याॽमिडोॽ हिङाबेॽ इगो मक्खाम्डेमबेॽ पाक्सु। खो याॽमि लिनुङ माहाजिडे़ॽ ले़ःॽपॽआ पापमि साटो हिङाबेॽ सिनुङ पापमि सक्ति नासि ले़टु। 4 इडोॽ कानिङ पापि बानि बेहोराडे़ॽ लुडिडोॽ ने़ॽनि, धारमिक नियमडे़ॽ ले़ःॽमा लुबॽआ खा कानिङे़ॽ ले़ःॽहेन्डुङ्मा, इन्ढोङ्होङ पबित्रा होङ्निवाडे़ॽ लुडिडोॽ हिङ्इन्डिङ्मा। 5 पापि निवा खिघुबाजिडे़ॽ हिङामि खाबेॽनोॽ निवा टिन्डुजे, तर पबित्रा होङ्निवा खिघुबाजिडे़ॽ होङ्निवाबेॽनोॽ निवा टिन्डुजे। 6 इडोॽ पापि बानि बेहोराबेॽ निवा टिमाबेॽ चाहिँ सिमवाबेॽ रुॽइये, तर पबित्रा होङ्निवाबेॽ निवा टिमाबेॽ चाहिँ हिङ्मवानुङ सान्ति चुप्मिये। 7 इन्ढोङ्होङ पापि निवा खिनुङ राम्खुबा चाहिँ निवाहाङ्मि लागि सतुर लिये। मो याॽमिडे़ॽ निवाहाङ्मि धारमिक नियम पालना ले़टुनिबा, मोसे़ॽ मो खा ले़ःॽनोॽ ले़ःॽहेसुनिबा। 8 पापि बानि बेहोरामि अधिनबेॽ राम्खुबा याॽमिजिडे़ॽ निवाहाङ साप्थाङ्मेॽहेसुनिजि। 9 चइबानोॽ हे़निङ्बेॽ निवाहाङ्मि होङ्निवा टुउहोङ हे़निङ पापि निवामि अधिनबेॽ मान्डानिङे, तर पबित्रा होङ्निवाबेॽ टुन्डानिङे। तर कोहि याॽमिबेॽ खिरिस्टमि निवा माॽआहोङ्गो मो खिरिस्टमि ने़ॽनिबा। 10 तर हे़निङ्बेॽ खिरिस्ट टुहोङ, याक्लोहा पापडे़ॽ हिङा सिहोङ्सो हे़निङ निवाहाङ्मि पोम्बेॽ धरमि ठहरबा लिबॽआसे़ॽ हे़निङ्मि होङ्निवा हिङ्इये। 11 येसु सिबॽआबाङ हिङ्बोक्खुबा निवाहाङ्मि होङ्निवा हे़निङ्बेॽ टुहोङ, मो होङ्निवाडे़ॽ हे़निङ्मि सिघे़ये हिङा हिङ्मवा पिन्डुए। 12 मोडोगे़ॽ वावानिसानुङ नानुसाजि, कानिङ्मि हिङाडे़ॽ मिॽटिडोॽ पापि योम्बोक ले़ःॽमा पाप्निबा। 13 इन्ढोङ्होङ पापि बानिडे़ॽ मिॽटिडोॽ हे़निङे़ॽ ले़न्डानुमहोङ हे़निङ सिन्डानिङे, तर पबित्रा होङ्निवाडे़ॽ लुडिडोॽ हिङामि चोप मङे़हा योम्बोक लेडानुमहोङ हे़निङ हिङ्इन्डानिङे। 14 इन्ढोङ्होङ निवाहाङ्मि होङ्निवाडे़ॽ लुडिडोॽ हिङ्घुबाजिनोॽ खोमि पसाजि लिम्मे। 15 इन्ढोङ्होङ हे़निङे़ॽ फेरि किस्सिमानुङ हिङ्घुबा सेउतेमि होङ्निवा मे़न्चुप्टिॽ, तर हे़निङे़ॽको पसाजि लिमे होङ्निवा चुप्मिटानुमे। मोडोगे़ॽ हागो कानिङे़ॽ निवाहाङ “अब्बा, पाबा” लुनुङ के़न्डुङ्मा। 16 मो लुबॽआ चाहिँ कानिङ निवाहाङ्मि पसाजि ले़न्डिङ्मे लुनुङ पबित्रा होङ्निवाडे़ॽ कानिङ्मि होङ्निवा साक्छि पिटुए। 17 इडोॽ कानिङ निवाहाङ्मि पसाजि ले़न्डिङ्माहोङ्गो हकदारसो ले़न्डिङ्मा, मोबा खिरिस्टनुङ्नोॽ सोरि हकदार लिसिङ्मा। खोनुङ खेः आङ्इन्डुङ्माहोङ्गो कानिङ खोनुङ महिमितसो लिन्डिङ्मा। ए़क्साङ चुप्मिये आदरनुङ सम्मान 18 इगो हिङ्मवाबेॽ आङ्बॽआ दुःख खेःबाङ ए़क्साङ कानिङे़ॽ चुप्मिये महिमा चाहिँ बेॽए ले़ये। 19 सिरिस्टिडे़ॽ सारोनोॽ आसा ले़ःॽनुङ निवाहाङ पाबामि पसाजि खाङ्मुये याक हुङ्मे़ॽनिङ्सिन्डुए। 20 इन्ढोङ्होङ सिरिस्टिनोॽ योम्बोक मे़ॽनिङ्मा लिबॽआ ले़टे़, तर सिरिस्टि खोम्टाङ्बागो इडोॽ लिबॽआ ने़ॽनि, तर सिरिस्टिडे़ॽ निवाहाङ्मि पसाजि खाङ्मुमे याकमि आसा ले़टुङ्घे़ॽटुरो लुनुङ निवाहाङ्डे़ॽनोॽ मोडोॽ ले़ःॽपॽआ ले़ये। 21 सिरिस्टिसो मो नास ले़ःॽखुबामि अधिनबाङ लेॽखे़ॽनुङ निवाहाङ्मि पसाजिमि महिमानुङ्मा छुट्काराबेॽ सोरि साप्थाङ्इये। 22 कानिङे़ॽ लेन्डुङ्मे़, आयुरो कुम्सुमा खेः साबोक्टिडोॽ चोप सिरिस्टि सोकनुङ दुःखडे़ॽ के़म्मे़ॽनिङ्सिये। 23 तर सिरिस्टिरेॽनोॽ ने़ॽनि, पबित्रा होङ्निवाडे़ॽ ए़क्साङ लाजे़न्डुए सुख सम्मानमि लागि कानिङ्सो आसा ले़ःॽसाङ निवाहाङ्मि राम खाङ्साङ होङ्सिॽयु होङ्सिॽयु खेःडे़ॽ किएम्मा सोःक्मा सामे़ॽनिङ्सिये, इन्ढोङ्होङ खोसे़ॽ कानिङ पसा टोङ्नुङ कानिङ्मि हिङा नासि लिमे़ॽटुनिबानुङ थाङ्सिरिमि हिङा टोङ्इये। 24 मो बेॽएम्मा आसामि लागि निवाहाङ्डे़ॽ कानिङ जोगा ले़ए़टे़, मोबा कानिङ मो आसाबेॽ हिङ्मे़ॽनिङ्सिन्डिङ्मे। आसा लुबॽआ चाहिँ कानिङे़ॽ चुप्मामि लागि हुङ्बॽआनोॽ आसा ले़ये। याॽमिडे़ॽ याक्लोनोॽ चुप्पेबॽआ खामि आसा ले़टुनिबा। 25 तर कानिङे़ॽ याक्लो मे़ङ्खाङ्बॽआ खामि आसा ले़न्डुङ्माहोङ, मो खा सारो आसा ले़ःॽनुङ हुङ्इन्डुङ्मे। 26 मोडोक्नोॽ पबित्रा होङ्निवाडे़ॽ कानिङ कमजोर लिमाबेॽ सहायता ले़ये। इन्डोॽ पारथना ले़ःॽमाबेॽ कानिङे़ॽ मे़लेबॽआ खा, पबित्रा होङ्निवाडे़ॽ कानिङे़ॽ लुहेनिबा पाराबेॽ निवाहाङ्नुङ बिन्ति ले़ःॽपिये। 27 मोबा याॽमिजिमि निवाहोङ्सिॽयु टुहा चोप खा लेघुबा निवाहाङ्डे़ॽ पबित्रा होङ्निवामि बिचार लेन्डुए, इन्ढोङ्होङ पबित्रा होङ्निवाडे़ॽ बिस्वासिजिमि लागि निवाहाङ्डे़ॽ मिॽपॽआडोक्नोॽ खोनुङ बिन्ति ले़ःॽपेये। 28 कानिङे़ॽ लेन्डुङ्मे़, निवाहाङ्डे़ॽ नम्नम ले़ःॽपॽआजिनुङ खोमि योम्बोकमि लागि से़म्बॽआ चोप याॽमिजिमि लागि इन्डोॽहोङ्सो खोसे़ॽ भलाइनोॽ ले़न्डुजे। 29 माहाजिबेॽ येसु खिरिस्ट चाहिँ चोप्पाङ टुम्मि लिरो लुनुङ असा असाजि निवाहाङ्डे़ॽ याक्लोएबाङ्नोॽ लेबॽआजि ले़म्मे, खोसे़ॽ माहाजि टाङ्बामि पसाडोक्नोॽ लिमामि लागि से़नुजि। 30 असा असाजि निवाहाङ्डे़ॽ याक्लोएबाङ सेनुजि, माहाजि खोसे़ॽ के़डुजि, मोबा टाङ्बामि पोम्बेॽ माहाजि धरमिसो टोक्सुजि, असा असाजि धरमि टोक्सुजि, माहाजि खोसे़ॽ महिमानुङ्हाजिसो टोक्सुजि। खिरिस्ट येसुबेॽ निवाहाङ्मि नम्नम 31 मोबा कानिङे़ॽ इगो खाबेॽ इमाङ लुहेन्डुङ्मे़ ? निवाहाङ्नोॽ कानिङ्लाम टुहोङ, कानिङ्मि बिरोधबेॽ असाडे टुये ? 32 निवाहाङ्डे़ॽ खोमि इक्कोमा पसानोक्सो मे़युङ्रेॽ कानिङ्मि लागि खो पिबेसा, इमा खोसे़ॽ कानिङ्मि लागि येसुनुङ सोरि चोप थोकसो पिनिबाडे ? 33 निवाहाङ्डे़ॽ से़म्बॽआ याॽमिजि असे़ॽटे आप्टिक टिहेन्डुजे ? असे़ॽसो आप्टिक टिहेसुजिने! इन्ढोङ्होङ निवाहाङ्डे़ॽनोॽ खोजि आप्टिक मे़ॽनिङ्हाजि टोङ्इन्डुजे। 34 मोडोगे़ॽ हे़निङ दन्डामि आग्या पिघुबा असाडे ? हे़निङ्मि लागि सिघुबा येसु खिरिस्ट खो सिबॽआबाङ निवाहाङ्डे़ॽ हिङ्बोगु आयु निवाहाङ्मि चुप्थिङ्लाम टुये, मोबा खोसे़ॽ कानिङ्मि लागि निवाहाङ्नुङ बिन्ति ले़ःॽमे़निङ्सिन्डुए। 35 असे़ॽटे कानिङ निवाहाङ्बाङ फक्खे़ॽहेये ? इमा खेःडे़ॽ ? दुःखडे़ॽ ? चुङ्जामा खेःडे़ॽ ? साकआङ्साडे़ॽ ? इमाङ उक्चुङ्रे़क्टे़ॽ ? अथबा किस्सिमवाडे़ॽ, साङ्लाङ्डे़ॽ ? 36 कानिङे़ॽ दुःख आङ्मा खे़ये लुनुङ्गो धारमिक नेॽचिराबेॽसो साप्पॽआ ले़ये, “हे़नबेॽ बिस्वास ले़ःॽपॽआसे़ॽ कानिङ सानिङ सेॽमा योॽइम्मे। कानिङ चेम्मामि लागि पोरोक्नुङ युङ्बॽआ सामुडोॽ मिॽइम्मे।” 37 तर कानिङ नम्नम ले़ःॽखुबा खिरिस्टमि लामबाङ्नोॽ बिस्वासिजिडे़ॽ इघा चोप खागो हेजाबेटुङ्मे। 38 इन्ढोङ्होङ के़ॽ नुरोॽ लेनुङे़, सिमवाडे़ॽ अथबा हिङ्मवाडे़ॽ, थाङ्सिरिदुतडे़ॽ अथबा मक्खाम्डेमबेॽहा मङे़हा चापजिडे़ॽ, अथबा आयुहा खाडे़ॽ अथबा ए़क्साङ्हा खाडे़ॽ अथबा सक्तिडे़ॽ, 39 मिॽटुहा सक्तिडे़ॽ अथबा मिॽमुहा सक्तिडे़ॽ चोप सिरिस्टिबेॽ टुहा इमाङ खाडे़ॽसो अथबा असे़ॽसो कानिङ बेॽलो नम्नम ले़ःॽखुबा परभु खिरिस्ट येसुमि पाबा निवाहाङ्मि नम्नमबाङ फाक्खे़ॽहेमिने। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.