रोमि 7 - याम्फुफुङ्सयामि टुम्बेॽ खा 1 वावानिसानुङ नानुसाजि, के़ॽ इगो खा धारमिक नियम लेघुबाजिमि लागि लुमे़ॽनिङ्सिनुङ्हाजि, धारमिक नियमडे़ॽ याॽमि हिङ्रिक लिरोरेॽ खो अधिनबेॽ युङ्इये लुमे खा हे़निङे़ॽ लेसानुम्ने ? 2 इक्को खा इःनुङे, इक्को मेॽनामिॽ खोमि ठाॽपा हिङ्रोरेॽनोॽ फुङ्सयामि बन्धनबेॽ पेङ्इये, तर खोमि ठाॽपा सिघे़ॽहोङ्गो खोम ठाॽपामि बन्धनबाङ लेक्खे़ये। 3 तर खोमि ठाॽपा हिङ्सिमाबेॽ मो मेॽनामिॽ हाइको वडाङ्पसानुङ फुङ्सया लेखे़ॽहोङ खोसे़ॽ बेभिचार ले़ःॽपॽआ लिये। तर ठाॽपा सिघे़ॽहोङ चाहिँ खो मो बन्धनबाङ फुक्का लिये, मोबा खोसे़ॽ हाइकोनुङ फुङ्सया ले़टुहोङ्सो बेभिचार ले़ःॽपॽआ लिनिबा। 4 मोडोगे़ॽ के़हा वावानिसानुङ नानुसाजि, हे़निङ्सो खिरिस्टमि हिङानुङ सोरि धारमिक नियममि अधिनबाङ फुक्का लिटानिङे। हागोएम्बाङ हे़निङ हाइको याॽमि लिटानिङे, अथबा हे़निङ्सो सिबॽआबाङ हिङ्बोक्पॽआ खिरिस्टनुङ इक्को लिनुङ हिङ्बोगानिङे मोबा कानिङ निवाहाङ्मि लागि नेन्जामारोहा याॽमिजि लिमा। 5 याक्लो इक्खेॽ कानिङ्मि हिङाडे़ॽ ले़ःॽमा मिॽपॽआ खामि अधिनबेॽ टुसिङ्मा। मोडोक्पेॽ धारमिक नियमडे़ॽ कानिङ इमाङ योम्बोक ए़ले़ःॽमा लुबॽआ ले़टे़, मोनोॽ कानिङे़ॽ ले़ःॽपॽआसे़ॽ कानिङ्बेॽ सिमवा लेस्सा। 6 हागो कानिङ अधिनबेॽ युङ्खुबा धारमिक नियममि लागि सिघे़टिङ्मे़नुङ धारमिक नियममि अधिनबाङ फुक्का लिटिङ्मे़। इन्ढोङ्होङ कानिङ खिरिस्टनुङ सिघे़ॽपॽआसे़ॽ पुरानो धारमिक नियमडोॽ ने़ॽनि, तर पबित्रा होङ्निवामि चोङ हिङ्मवाडोॽ सेवा ले़न्डुङ्मा। धारमिक नियमनुङ पाप 7 कानिङे़ॽ इमाङ लुमेन्डे ? इमा धारमिक नियमडे़ॽनोॽ पाप लाजे़ॽटुए ? मोडोॽको ने़ॽनि, मो धारमिक नियम माडाहोङ्गो पाप लुबॽआ इमाङ्डे के़ॽ लेनोॽ मे़लेसुङ होला। इन्ढोङ्होङ धारमिक नियमडे़ॽ इडोॽ लुये, “हे़ने़ॽ लोभ ए़ले़ःॽमे” लुनुङ मे़लुमाहोङ्गो के़ॽ लोभ ले़ःॽमा फे़न्नि लुनुङ मे़लेसुङ। 8 पापडे़ॽ मौका चुप्नुङ का चोप खालहा लोभ ले़ःॽमेॽटा। इगो धारमिक नियम माडाहोङ्गो पाप सिबॽआडोक्नोॽ लिसे़। 9 याक्लो इक्खेॽ कानुङ यहुदि धारमिक नियम माडा, ए़क्साङ धारमिक नियम लेमासोरोॽ के़ॽ पाप लेसुङ, मोडोगे़ॽ के़ॽ सिमा सिॽटा। 10 धारमिक नियमडे़ॽको काबेॽ हिङ्मवा लाजे़ॽमा खडे़, तर सिमवारे लाजे़डु। 11 इन्ढोङ्होङ धारमिक आग्याबाङ पापडे़ॽ रेम्नुङ का सिमे रामबेॽ लाघे़ॽटिङ, मोबा के़ॽ सिमा खडा। 12 धारमिक नियमगो पबित्रा ले़ये, मोबा धारमिक आग्यासो पबित्रा ले़येनुङ नुबा योम्बोक ले़न्डुए। 13 इमा मोडोक्होङ इडोक्मा नुबा यहुदि धारमिक नियमडे़ॽ का सेॽनेसिङे ? मोडोॽको ने़ॽनिबा, तर पापडे़ॽ चाहिँ का सेॽनेसिङा। पापडे़ॽ का दोसनुङ खाङ्मुमामि लागि मोसे़ॽ नुबा यहुदि धारमिक नियमबाङ काबेॽ सिमवा लाजे़ॽटु। मोडोगे़ॽ पाप छना दुस्ट ले़ये लुनुङ यहुदि धारमिक नियमबाङ छे़ङ्गै लिसा। याॽमिमि निच्चि खालहा बानिबेहोरा 14 धारमिक नियम निवाहाङ्मि होङ्निवाबाङ पिबॽआ खा ले़ये, इगो खा कानिङे़ॽ लेन्डुङ्मे़। तर का हिङाबेॽ टुङे पापडे़ॽ इम्बॽआ पापमि सेउतेडोॽ ले़ङे। 15 के़ॽ इमा ले़ःॽमे़ॽनिङ्सिनुङे लुमे खा के़ॽनोॽ लेसुङ्नि, इन्ढोङ्होङ के़ॽ ले़ःॽमा फेन्निहा योम्बोक चाहिँ के़ॽ ले़नुङ्हा, तर के़ॽ ले़ःॽमा मिॽपॽआ योम्बोक ले़टुङ्निहा। 16 इडोॽ के़ॽ ले़ःॽमा मे़मिॽपॽआ योम्बोक ले़नुङ्होङ यहुदि धारमिक नियम नुबा ले़ए़ लुनुङ के़ॽ मिॽपॽआ लिये। 17 मोडोगे़ॽ के़ॽ ले़ःॽपॽआ पाप चाहिँ के़ॽ ले़ःॽपॽआ ने़ॽनि, इगोगो का होङ्सिॽयुए पापडे़ॽ ले़ःॽपॽआ ले़ये। 18 काङ्मि पापि निवाहोङ्सिॽयु नुबा खा मानोॽ माॽआये, इन्ढोङ्होङ इमाङ खा चाहिँ नुबा ले़ये, मो खा ले़ःॽमा मिॽइनुङे, तर मो योम्बोक ले़ःॽहेसुङ्नि। 19 इन्ढोङ्होङ के़ॽ ले़ःॽमा मिॽपॽआ नुबा योम्बोक ले़टुङ्निबा, तर के़ॽ ले़ःॽमा मे़मिॽपॽआ मङे़हा योम्बोक चाहिँ ले़टुङ्घे़नुङे। 20 के़ॽ ले़ःॽमा मे़मिॽमाबेॽसो के़ॽ मो योम्बोक ले़नुङ्होङ मो योम्बोक ले़ःॽखुबागो का ने़ॽनि, तर का होङ्सिॽयु टुघुबा पापडे़ॽ ले़न्डुए। 21 इडोॽ इक्को नियमडे़ॽ योम्बोक ले़ःॽपॽआ के़ॽ चुप्मिनुङे। के़ॽ नुबा योम्बोक ले़ःॽमा मिॽमारोनोॽ मङे़हा योम्बोक ले़टिङ्बॽआ चुप्मिनुङे। 22 काङ्मि होङ्निवा चाहिँ निवाहाङ्मि नियमबेॽ साप्थाङ्इये। 23 तर काङ्मि हिङामि अङ्गबेॽ चाहिँ हाइके नियमडे़ॽ योम्बोक ले़ःॽपॽआ चुप्मिनुङे। इगो नियम चाहिँ काङ्मि होङ्निवानुङ काॽइये। मोडोगे़ॽ इगो पापि निवाडे़ॽ का अधिन ले़ये। 24 इँःयो, का इन्डोक्मा दुःखि याॽमि! इगो सिमवामि अधिनबाङ असे़ॽ मुक्ति पिये ? 25 येसु खिरिस्ट कानिङ्मि परभुबाङ्नोॽ निवाहाङ ओहाक लिरो! काङ्मि खिरिस्टडे़ॽ का सिमवामि अधिनबाङ छुट्कारा पिये। मोडोगे़ॽ काङ्टाङ्बामिनोॽ होङ्निवाडे़ॽको निवाहाङ्मि नियममि सेवा ले़न्डुए, तर काङ्मि पापि बानि बेहोराडे़ॽ चाहिँ पापि योम्बोक ले़न्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.