रोमि 6 - याम्फुसिमवानुङ हिङ्मवा 1 मोडोक्होङ कानिङे़ॽ इमाङ लुमे ? इमा निवाहाङ्मि बेॽलो अनुग्रहा चुप्रो लुनुङ कानिङ पाप ले़टुङ्घे़ॽमे़ ? 2 आक्टोॽ ने़ॽनि, कानिङ पापमि लागि सिघे़टिङ्मे, मोडोगे़ॽ हागोसो कानिङे़ॽ इन्ढोङ पाप ले़टुङ्घे़ॽमे़ ? 3 कानिङ चोबे़ॽ खिरिस्ट येसुमि निङ्बेॽ बप्तिस्मा लामाबेॽ खोनुङ्नोॽ सिबेटिङ्मे लुमे खा इमा हे़निङे़ॽ लेसानुम्ने ? 4 मोडोगे़ॽ बप्तिस्मा लामाबेॽ कानिङ्सो खोनुङ्नोॽ सिनुङ हुम्सिघे़टिङ्मा, मोबा निवाहाङ पाबामि महिमामि सक्तिडे़ॽ खिरिस्ट सिबॽआबाङ हिङ्बोगु, मोडोक्नोॽ कानिङ्सो याक्लोमा पापि हिङ्मवा सिनुङ हागो चोङ हिङ्मवाबेॽ खिरिस्टडोक्नोॽ हिङ्इन्डिङ्मे। 5 कानिङ खिरिस्टमि सिमवाबेॽ इक्को लिनुङ सिसिङ्माहोङ्गो मोडोक्नोॽ खो सिबॽआबाङ हिङ्बोक्माबेॽसो कानिङ इक्को लिनुङ हिङ्बोॽइन्डिङ्मे। 6 कानिङे़ॽ लेन्डुङ्मे़, कानिङ्मि याक्लोमा हिङ्मवा खिरिस्टनुङ सोरि काप्सिङ्बेॽ सिसा, इन्ढोङ्होङ कानिङ्मि पापि हिङ्मवा सिरो, मोबा हागोएम्बाङ मिॽयु मो पापमि अधिनबेॽ पेम्मा मे़न्सिॽलो। 7 इन्ढोङ्होङ सिघे़ॽपेबॽआ याॽमि चाहिँ पापमि अधिनबाङ लेॽखे़ॽपेटे़। 8 हागो खिरिस्टनुङ सोरि सिन्डिङ्माहोङ्गो खोनुङ्नोॽ फेरि हिङ्बोइन्डिङ्मे लुनुङ कानिङे़ॽ बिस्वास ले़न्डुङ्मे। 9 कानिङे़ॽ लेन्डुङ्मे़, खिरिस्ट सिघे़ॽनुङ्सो फेरि हिङ्बोइटे़। हागो खो इन्डोक्पेॽसो सिनिबा, मोबा खो सिमवाडे़ॽ अनिधबेॽ युङ्हेसुनिबा। 10 खिरिस्ट चाहिँ चोप पापि याॽमिजिमि लागि इकखेॽपेॽ सानिङ्मि लागि सिसा। मोबा निवाहाङ्मि लागि सानिङ हिङ्इये। 11 इडोक्नोॽ हे़निङ्सो टाङ्बामि पापमि लागि सिबॽआनुङ निवाहाङ्मि लागि खिरिस्टनुङ सोरि हिङ्बोक्पॽआ मिॽमा खे़ये। 12 मोडोगे़ॽ हागोएम्बाङ मिॽयु हे़निङ्मि हिङाडे़ॽ ले़ःॽमा मिॽपॽआ मङे़हा योम्बोक मे़ले़ःॽटोक्टुरो लुनुङ हे़निङ्मि सिघे़ये हिङ्मवाबेॽ पापडे़ॽ अधिन मे़ले़टोक्टुरो। 13 हे़निङ्मि हिङाबेॽहा अङ्ग हागो पापि योम्बोकपेॽ ए़ॽटिसानुमे। मोमि साटो हे़निङ सिबॽआबाङ हिङ्बोक्पॽआ याॽमिडोॽ टाङ्बा निवाहाङ्डे़ॽ नेन्जामे योम्बोकपेॽ टिसानुमे। हे़निङ्मि हिङामि चोप अङ्ग धारमिक योम्बोक ले़ःॽमामि पिबेसानुमे। 14 हागो हे़निङ्बेॽ पापडे़ॽ अधिन ले़टुनिबा, इन्ढोङ्होङ हे़निङ धारमिक नियममि अधिनबेॽ ने़ॽनि अनुग्रहामि अधिनबेॽ टुन्डानिङे। धारमिक खामि सेउते 15 हागो इमान्डे ? कानिङ धारमिक नियममि अधिनबेॽ माॽआडिङ्मा, तर निवाहाङ्मि अनुग्रहाबेॽनोॽ टुन्डिङ्मा लुनुङ सानिङ पाप ले़टुङ्घे़ॽमे़ ? इडोक्को ले़ःॽमानोॽ फे़न्निबा। 16 हे़निङे़ॽ लेन्डानुमे, असामि खा खेम्नुङ खोमि योम्बोक ले़न्डानुम, मोमिन्नोॽ सेउते लिन्डानिङे, मोडोगे़ॽ पापमि सेउते लिसानिङ्होङ हे़निङ सिन्डानिङे, निवाहाङ्मि आग्या पालना ले़टानुमहोङ धरमि लिन्डानिङे। 17 याक्लो इक्खेॽ हे़निङ पापमि सेउते ले़टानिङे, तर हागोगो हे़निङे़ॽ निवाहाङ्मि खा खेम्बॽआसे़ॽ निवाबाङ्नोॽ पालना ले़टानुमे। इगो खामि लागि निवाहाङ ओहाक पिनुङे़। 18 हे़निङ पापमि अधिनबाङ लेॽखे़ॽनुङ निवाहाङ्मि धरमि योम्बोक ले़ःॽखुबा सेउते लिटानिङे। 19 हे़निङे़ॽ लेहेसानुमे लुनुङ्नोॽ के़ॽ हे़निङे़ॽ लेमे खाप्लाबेॽ मायोङ्बानुङ सेउतेमि नमुना पिनुङ लुमे़ॽनिङ्सिनिम्ने़। इन्ढोङ्होङ याक्लो इक्खेॽ हे़निङे़ॽ टाङ्बामि हिङ्मवा चिक्चिमिॽमारोमा योम्बोकपेॽनुङ बेॽलो पापि योम्बोकपेॽ टिनुङ मोमि सेउतेडोॽ लिसानिङे। तर हागोएम्बाङ ए़क्साङ चाहिँ निवाहाङ्मि पोम्बेॽ नुबा योम्बोक ले़ःॽखुबा सेउतेडोॽ लिनुङ खोबेॽ हे़निङ्मि हिङ्मवा पबित्रा लिसाङ पिबेसानुमे। 20 याक्लो हे़निङ पापमि सेउते लिबॽआ बेलाबेॽ धरमि लिमे खामि ले़ख्खो मे़ले़टानुम। 21 मोडोक्पेॽ ले़ःॽपॽआ माहा मङे़हा योम्बोक मिॽनुङ आयु हे़निङ ङेसिन्डानिङे। माहा पापि योम्बोक ले़ःॽनुङ हे़निङे़ॽ इमाङ चुप्टानुमे ? माहा चोप चिक्चिमिॽमारोहा योम्बोकडे़ॽको निवाहाङ्बाङ ओः टोङ्इयेनुङ सिमवा लाजे़न्डुए। 22 तर हागो हे़निङ पापबाङ लेॽखे़ॽनुङ निवाहाङ्मि सेउते लिटानिङे। इगो खाडे़ॽ हे़निङ पबित्रा लिघे़ॽमे टोङ्इटे़ मोबा हे़निङ ए़ॽसिमे हिङ्मवा पिये। 23 इन्ढोङ्होङ पापमि नमयाक चाहिँ सिमवा ले़ये, तर निवाहाङ्डे़ॽ खिरिस्ट येसु परभुबाङ कानिङ मोडोक्नोॽ पिमे बरदान चाहिँ ए़ॽसिमे हिङ्मवा ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.