रोमि 5 - याम्फुनिवाहाङ्मि पोम्बेॽ धरमि ठरबा लिमा 1 मोडोगे़ॽ बिस्वास ले़ःॽनुङ निवाहाङ्मि पोम्बेॽ धरमि ठरबा लिटिङ्मे़ मोबा कानिङ्मि परभु येसु खिरिस्टमि लामबाङ निवाहाङ्नुङ चुप्मिटिङ्मे। 2 मोबा खोसे़ॽ कानिङ बिस्वासबाङ निवाहाङ्मि अनुग्रहाबेॽ लाजे़टे़। आइ कानिङे़ॽ मो अनुग्रहाबाङ आम्लाङ चुप्मिटुङ्मे, मोबा निवाहाङ्मि महिमाबेॽ सोरि लिडोक्इन्डिङ्मा लुमे आसाबेॽ कानिङ साप्थाङ्इन्डिङ्मे़। 3 मोडोॽरेॽनोॽ ने़ॽनि, खेः आङ्माबेॽसो कानिङ साप्थाङ्इन्डिङ्मे़, इन्ढोङ्होङ मोसे़ॽ हाइखा बेॽलो खेः आङ्हेमे बोल पिये लुमे खा कानिङे़ॽ लेन्डुङ्मे़। 4 योङ आङ्हेमे बोलडे़ॽ कानिङ नुबा बानि बेहोराबेॽ परिपक्का टोङ्इये, मोबा मोसे़ॽनोॽ कानिङ्बेॽ मुक्तिमि आसा लेङ्इये। 5 मोबा कानिङे़ॽ चुप्पॽआ मो आसाडे़ॽ निरास टोङ्निबा, इन्ढोङ्होङ निवाहाङ्डे़ॽ कानिङ पिबॽआ पबित्रा होङ्निवाबाङ खोमि नम्नम कानिङ्मि निवा इॽठुप युङ्बेटे़। 6 कानिङ याॽमिजि पापबाङ मुक्ति चुप्मामि कानिङ टाङ्बे़ॽ इमाङ्सो मे़ले़ःॽहेमाबेॽनोॽ पापि याॽमिजिमि लागि खिरिस्ट ठिक बेलाबेॽ सिबेॽटा। 7 धारमिक याॽमिमि लागि सिमा पोरोक्खुबा याॽमिसो चुप्मा छॽइये, मोबा नुबा याॽमिमि लागि सिमा मिॽखुबाजिसो चुप्मा छॽइये। 8 तर निवाहाङ्डे़ॽ खोमि नम्नम कानिङ्मि लागि इडोॽ खाङ्मुसु, कानिङ पापि टुमाबेॽनोॽ खिरिस्ट कानिङ्मि लागि सिबेॽटा। 9 मोडोगे़ॽ खोमि बलिमि हरिडे़ॽ आयु कानिङ धरमि ठरबा लिबॽआसे़ॽ छना बेॽलो निवाहाङ्मि सुरिकबाङ खिरिस्टडे़ॽ जोगाबा ले़ये लुमे खा कानिङे़ॽ लेटुङ्मे। 10 इन्ढोङ्होङ कानिङ निवाहाङ्मि सतुर ले़ःॽमाबेॽनोॽ खोमि पसा खिरिस्टमि बलिबाङ निवाहाङ्नुङ कानिङ चुप्मिटिङ्मे़, चइबानोॽ हागोगो कानिङ खोमि याॽमि लिबॽआसे़ॽ खोसे़ॽ कानिङ रच्छे ले़ये। 11 इडोक्रेॽनोॽ ने़ॽनि, कानिङ्मि परभु येसु खिरिस्टडे़ॽ ले़ःॽमे़ॽ कानिङ निवाहाङ्मि ओहाङ ले़ःॽसाङ साप्थाङ्इन्डिङ्मा, खिरिस्टडे़ॽ कानिङ निवाहाङ्नुङ चुप्मेॽनुङ खोमि याॽमिजि टोङ्इटे़। आदमनुङ खिरिस्ट 12 चोप्पाङ याक्लो सिरिस्टि ले़ःॽपॽआ याॽमि आदमबाङ मक्खाम्डेमबेॽ पाप लेस्सा, खोमि पापडे़ॽ ले़ःॽमे़ॽ चोप याॽमिजिडे़ॽ सिमा सिॽटा, इन्ढोङ्होङ चोप याॽमिजि पापि लिसामि। 13 निवाहाङ्डे़ॽ धारमिक नियम पिमा याक्लोनोॽ मक्खाम्डेमबेॽ पाप टुसा, तर मोडोक्पेॽ धारमिक नियम माॽआडेन्से़ॽ पापमि लेखा जोखा मे़लिसा। 14 आदमबाङ धारमिक नियम साप्खुबा मोसाठोक सिमवाडे़ॽ याॽमिजिसोक्पेॽ अधिन ले़टु। माहा याॽमिजिडे़ॽ आदमडे़ॽ ले़ःॽपॽआडोॽमा पाप ले़ःॽपॽआगो मे़ले़टा, तरसो माहाजि सिमा खडामि। आदमडे़ॽ ले़ःॽपॽआ पापि योम्बोकमि दन्डा चोबे़ॽ चुप्टिडोॽ खिरिस्टडे़ॽ ले़ःॽपॽआ योम्बोकबाङ्ए मुक्तिसो चोबे़ॽ चुप्मिन्डुजे। मो आदम चाहिँ खिरिस्टमि नमुना ले़ये। 15 निवाहाङ्बाङ मोडोक्नोॽ चुप्पॽआ बरदाननुङ आदममि पाप इक्कोनोॽ ले़ःॽनिबा। इन्ढोङ्होङ इक्को याॽमिमि पापडे़ॽ ले़ःॽमे़ॽ बेॽलो याॽमिजि सिसामि, तर मोबाङ्सो बेॽलो निवाहाङ्मि अनुग्रहाडे़ॽ येसु खिरिस्टबाङ मोडोक्नोॽ चुप्पॽआ बरदानडे़ॽ बेॽलो याॽमिजि हिक्सामि। 16 याङ मे़ॽनिङ चुप्मिये बरदान चाहिँ मो इक्को याॽमि आदममि पापडोॽमा ने़ॽनि, मो इक्कोमि पापडे़ॽ सिमे दन्डामि आग्या लेस्सा, तर बेॽलो पापमि लागि मोडोक्नोॽ चुप्पॽआ बरदानडे़ॽ आप्टिक मे़ॽनिङ टोक्सा। 17 इडोॽ इक्को याॽमिडे़ॽ ले़ःॽपॽआ पापडे़ॽ चोप याॽमिजिबेॽ सिमवा लेस्सा, मोडोक्नोॽ निवाहाङ्डे़ॽ बेॽलो नम्नम ले़ःॽनुङ धरमि टोङ्बॽआ चोप याॽमिजिबेॽ इक्को याॽमि येसु खिरिस्टबाङ हिङ्मवाडे़ॽ राज्य ले़न्डुए। 18 इडोॽ इक्को याॽमिमि पापडे़ॽ ले़ःॽमे़ॽ चोप याॽमिजिबेॽ सिमवा लेस्सा, मोडोक्नोॽ इक्को याॽमिबाङ चोप याॽमिजि निवाहाङ्मि पोम्बेॽ धरमि ठरबा ले़ःॽनुङ हिङ्मवा चुप्टुजि। 19 इन्ढोङ्होङ इक्को याॽमिडे़ॽ आग्या पालना मे़ले़ःॽपॽआसे़ॽ बेॽलो याॽमिजि पापि लिसामि, मोडोक्नोॽ इक्को याॽमिडे़ॽ आग्या पालना ले़ःॽमाबेॽ बेॽलो याॽमिजि निवाहाङ्मि पोम्बेॽ धरमि ठरबा लिसामि। 20 धारमिक नियम लेस्सा, मोबा पाप छना बेॽलो लिसा, तर इन्डोक पाप बेॽलो लिसा, मोडोक्नोॽ निवाहाङ्मि अनुग्रहासो बेॽलो लिसा। 21 मोडोक्पेॽनोॽ पापडे़ॽ याॽमिजिबेॽ सिमवा लेस्सा, मोसे़ॽ याॽमिजिबेॽ अधिन ले़टिडोक्नोॽ आइ निवाहाङ्मि अनुग्रहाडे़ॽ अधिन ले़ःॽमे़ॽनिङ्सिन्डुए। मो अनुग्रहाडे़ॽ कानिङ निवाहाङ्मि पोम्बेॽ धरमि ठरबा ले़ःॽनुङ परभु येसु खिरिस्टबाङ सिघे़ॽनिये हिङ्मवा चुप्मिन्डुङ्मे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.