रोमि 4 - याम्फुअब्राहाममि टुम्बेॽहा खा 1 मोडोक्होङ्गो हागो कानिङ्मि टुबा अब्राहाममि टुम्बेॽ चाहिँ इमाङ लुमे ? खो निवाहाङ्मि पोम्बेॽ इन्डोॽ धरमि ठरबा लिसे़। 2 मोबा अब्राहाम चाहिँ योम्बोकबाङ धरमि लिबॽआ ले़टाहोङ खोसे़ॽ काङायोङ्बा लिडोक्टुए, तर निवाहाङ्मि पोम्बेॽ खो काङायोङ्बा लिमे इमाङ खासो मॽआडा। 3 इन्ढोङ्होङ पबित्रा धारमिक नेॽचिराडे़ॽ लुये, “अब्राहामडे़ॽ निवाहाङ्बेॽ बिस्वास ले़टु। खोमि बिस्वासडे़ॽनोॽ खो निवाहाङ्मि पोम्बेॽ धरमि लिसा।” 4 इक्को याॽमिडे़ॽ योम्बोक ले़ःॽपॽआ नमयाक चुप्मिन्डुए, मो चाहिँ असे़ॽसो पिबॽआ दान ने़ॽनि, मोगो खोमि हक ले़ये। 5 कोहि याॽमिडे़ॽ धरमि योम्बोक ले़ःॽनुङ ने़ॽनि, तर दोसनुङ्हा याॽमिजि आप्टिक मे़ॽनिङ्हाजि ठरबा ले़ःॽखुबा निवाहाङ्बेॽ बिस्वास ले़ःॽनुङ, मो याॽमि निवाहाङ्मि पोम्बेॽ धरमि ठरबा लिये। 6 हाङ्बा दाउदडे़ॽसो धरमनुङ योम्बोकबाङ ने़ॽनि, तर निवाहाङ्बाङ धरमि लिबॽआ याॽमिमि टुम्बेॽ इडोॽ लुये, 7 “माहा याॽमिजि आसिस चुप्पॽआ याॽमिजि ले़म्मे, निवाहाङ्डे़ॽ खोजिमि अधरमबाङ आम्लाङ पिबेटुजे खोजिमि पाप टे़क्पेबेटुजे।” 8 “माहा याॽमिजि आसिस चुप्पॽआ याॽमिजि ले़म्मे, माहाजिमि पाप निवाहाङ्डे़ॽ मिॽयुक्सुनिबा।” 9 इमा दाउदडे़ॽ लुबॽआ इगो आसिस खतना ले़ःॽखुबाजिमि लागिरेॽनोॽटे, खतना मे़ले़ःॽखुबाजिमि लागिसो ले़ये ? अब्राहामडे़ॽ निवाहाङ्बेॽ बिस्वास ले़ःॽपॽआसे़ॽ धरमि ठरबा लिसा लुबॽआ ले़ये। 10 खो इन्डोक्पेॽ धरमि ठरबा लिसे़ ? खतना ले़ःॽमा याक्लोडे, खतना ले़ःॽनुङ ए़क्साङ ? खोमि खतना ले़ःॽमा याक्लोनोॽ खो धरमि ठरबा लिबॽआ ले़टा। 11 मोडोगे़ॽ खतना चाहिँ खोमि बिस्वासडे़ॽ निवाहाङ्बाङ धरमि ठरबा लिबॽआ चिङ्गा ले़टा। इडोॽ अब्राहाममि खतना ले़ःॽमा याक्लोनोॽ निवाहाङ्बेॽ ले़ःॽपॽआ बिस्वासडे़ॽनोॽ धरमि लिनुङ अयहुदि जातिजिमिसो टुबा लाबा लिरो लुनुङ इडोॽ लिसा। 12 खोगो माहा खतना ले़ःॽखुबाजिमि पाबा ले़ये, तर अब्राहाममिडोक्नोॽ बिस्वास ले़ःॽखुबा याॽमिजिमिसो अब्राहाम टुबा ले़ये, मो बिस्वास खतना लिमा याक्लोएम्बाङ कानिङ्मि टुबा अब्राहामबेॽ टुसे़। निवाहाङ्मि हेन्ज्रुङ बिस्वास ले़ःॽनुङ चुप्मिये 13 अब्राहामडे़ॽ धारमिक नियम पालना ले़ःॽपॽआसे़ॽ ने़ॽनि, तर निवाहाङ्बेॽ बिस्वास ले़ःॽनुङ धरमि ठहरबा लिबॽआसे़ॽनोॽ खोनुङ खोमि पसाजि मक्खाम्डेमबेॽ हकदार टोङ्इनिम्ने़ लुनुङ निवाहाङ्डे़ॽ अब्राहामनुङ हेन्ज्रुङ हे़नु। 14 मोबा धारमिक नियम पालना ले़ःॽखुबाजिनोॽ हकदार लिसामिहोङ्गो, इगो बिस्वासनुङ हेन्ज्रुङ चाहिँ इनामा लिसा होला। 15 इन्ढोङ्होङ धारमिक नियम पालना मे़ले़ःॽखुबाजि सोक्पेॽ निवाहाङ्मि सुरिक सिॽइये। तर धारमिक नियम माडाहोङ्गो, पाप लुबॽआ इमाङ्डे लुनुङ लेनोॽ मे़लेसा। 16 इडोॽ इगो हेन्ज्रुङ चाहिँ बिस्वासबाङ लेङ्इये, मोबा इगो कानिङे़ॽ इमाङ मे़ले़ःॽलेॽ मोडोक्नोॽ निवाहाङ्मि अनुग्रहाबाङ चुप्मिटुङ्मे। इगो हेन्ज्रुङ अब्राहाममि चोप पसाजिमि लागि पक्का ले़ए़टुए। इगो हेन्ज्रुङ चाहिँ धारमिक नियम पालना ले़ःॽखुबाजिमि लागिरेॽनोॽ ने़ॽनि, तर अब्राहाममिडोक्नोॽ बिस्वास ले़ॽखुबा चोपजिमि लागि हेन्ज्रुङ हे़म्बॽआ ले़ये, इन्ढोङ्होङ अब्राहाम चाहिँ बिस्वास ले़ःॽखुबा चोपमि टुबा ले़ये। 17 धारमिक नेॽचिराबेॽ निवाहाङ्डे़ॽ अब्राहाम इडोॽ लुबॽआ ले़ये, “के़ॽ हे़न बेॽलो जातिजिमि पाबा टोङ्इटुङे।” मोबा अब्राहामडे़ॽ निवाहाङ्बेॽ बिस्वास ले़टु। निवाहाङ्मि पोम्बेॽ अब्राहाम चाहिँ कानिङ चोपजिमि पाबा ले़ये। मो निवाहाङ्डे़ॽ सिघे़ॽपॽआजिसो हिङ्मवा पिन्डुजे, मोबा खोमि याबुकमि बचनडे़ॽनोॽ माॽआहा थोकजिसो सिरिस्टि ले़हेन्डुए। 18 अब्राहाम ठाॽपा लिघे़ॽमाबेॽसो अब्राहामडे़ॽ का बेॽलो जातिजिमि पाबा लिङे लुनुङ निवाहाङ्बेॽ बिस्वास ले़टु। इन्ढोङ्होङ निवाहाङ्डे़ॽ खो इडोॽ लुबॽआ ले़टे़, “हे़ने़हा पसाजि साङ्गेजिबाङ्सो बेॽलो लिम्मे।” 19 मोडोक्पेॽ अब्राहाम सय निङ रुक्सिॽपोरोक्पॽआ ले़टे़, खोमि ठाॽमा सारा सरुक्मा ले़टारोसो खो बिस्वासबेॽ कमजोर मे़लिसा। 20 खोसे़ॽ निवाहाङ्डे़ॽ पिबॽआ हेन्ज्रुङ्मि खाबेॽ इक्कोसो सङ्क मे़ले़टु, तर खो बिस्वासबेॽ छना बोलियो लिनुङ निवाहाङ ओहाङ पिमानुङ पेना। 21 मोबा निवाहाङ खोमदाङ्बे़ॽ ले़ःॽपॽआ हेन्ज्रुङ खोसे़ॽ इन्डोॽहोङ्सो पुरा ले़न्डुए लुमे खाबेॽ अब्राहाम पुरा भरोसाबेॽ टुसे़। 22 इगो बिस्वासडे़ॽ ले़ःॽमे़ॽनोॽ अब्राहाम निवाहाङ्मि पोम्बेॽ धरमि याॽमि ठरबा लिसा। 23 इगो “धरमि ठरबा लिमे खा” अब्राहाममि लागिरेॽनोॽ साप्पॽआ ने़ॽनिबा, 24 तर कानिङ्मि लागिसो साप्पॽआ ले़ये। कानिङ्मि परभु येसु सिबॽआबाङ हिङ्बोक्हेखुबा निवाहाङ्बेॽ कानिङे़ॽ बिस्वास ले़ए़टुङ्मे़। इगो बिस्वासडे़ॽ कानिङ्सो निवाहाङ्मि पोम्बेॽ धरमि याॽमि ठरबा लिटिङ्मे़। 25 येसु कानिङ्मि पापमि लागि सिमा खडा, मोबा कानिङ धरमि ठरबा ले़ःॽमामि लागि खो निवाहाङ्डे़ॽ हिङ्बोगु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.