रोमि 3 - याम्फुनिवाहाङ बिस्वास ले़ःॽमारोमा ले़ये 1 मोडोक्होङ्गो यहुदि लिमाबेॽ इमाङ नुबा लिसे़ ? इमा खतना लिमा बेॽएम्मा खा ले़ये ? 2 बेॽलो खामि लागि इघा खा नुबा ले़हा। चोपबाङ याक्लो निवाहाङ्डे़ॽ यहुदिजि खोमि पबित्रा बचन पिसुजि। 3 इन्डोक जनाडे़ॽ इगो पबित्रा बचन पालना मे़ले़टुजि, माहाजिडे़ॽ बिस्वास मे़ले़टुजि लुनुङ निवाहाङ बिस्वास ले़ःॽमारोमा ले़ःॽनिबा ? 4 मोडोॽ ने़ॽनि, याॽमिजि बिस्वास मे़ॽनिङ्हाजि ले़ःॽमिहोङ्सो निवाहाङ चाहिँ सानिङ्मु बिस्वासनुङ्मानोॽ ले़ये। खोमि टुम्बेॽ हाङ्बा दाउदडे़ॽ धारमिक नेॽचिराबेॽ इडोॽ लुये, “हे़ने़ॽ लुबॽआ बचनबाङ्नोॽ हे़न चाइबमा ले़ये लुनुङ याॽमिजिडे़ॽ लेन्डुजे, मोबा न्याय लिमाबेॽ हे़ने़ॽनोॽ हेजोन्डुए।” 5 तर कानिङ्मि मङे़ॽमा योम्बोकडे़ॽ निवाहाङ्मि धारमिक खा खाङ्मुन्डुङ्माहोङ्गो, कानिङे़ॽ इमाङ्डे लुमे़ ? इमा कानिङ्नुङ निवाहाङ सुरके़ॽमा फे़न्निबा लुमे़ ? (याॽमिजिडे़ॽ चाहिँ इडोक्नोॽ मिॽइन्डुजे।) 6 इडोक्को ने़ॽनिबा! मोडोक्होङ्गो, निवाहाङ्डे़ॽ मक्खाम्डेमबेॽहा याॽमिजिमि न्याय इन्डोक्टे ले़ःॽहेन्डुए ? 7 तर काङ्मि रेम्सिङ योम्बोकडे़ॽ निवाहाङ्मि चाइबमा महिमामि लागि बेॽलो नुबा लिहोङ, इन्ढोङ का पापिडोॽ न्यायबेॽ सिॽमे़ॽनिङ्सिङे ? 8 इन्डोक याॽमिजिडे़ॽ चाहिँ “कानिङे़ॽ इन्डोक बेॽलो पाप ले़न्डुङ्मा मोडोक्नोॽ नुबा लिये” लुसाङ याॽमिजि इःन्डान्नुम लुनुङ कानिङ आप्टिक टिम्मे। इडोॽ आप्टिक टिघुबा याॽमिजिडे़ॽ खोजि खे़न्जाये दन्डा चुप्मिन्डुजे। याॽमि असासो धरमि माॽआम्मे 9 मोडोक्होङ इमा कानिङ यहुदिजि अयहुदिजिबाङ्सो धरमि ले़न्डिङ्मे़ ? इडोक्को बन्दै ने़ॽनिबा। के़ॽ याक्लोनोॽ लुबेटुङे यहुदिनुङ अयहुदि चोपजिनोॽ पापमि अधिनबेॽ टुम्मे। 10 इडोक्मा खानोॽ धारमिक नेॽचिराबेॽ साप्मिये, “निवाहाङ्मि पोम्बेॽ असासो धरमि माॽआम्मे, इक्कोसो माॽआये। 11 निवाहाङ्मि टुम्बेॽ लेघुबा याॽमि असासो माम्मे, निवाहाङ योक्खुबा याॽमि इक्कोसो माॽआये। 12 चोबे़ॽ मराम फाङ्बेटुजे, चोप योम्बोक मे़ॽनिङ्हाजि लिटामे, नुबा योम्बोक ले़ःॽखुबाजि इक्कोसो माॽआम्मे।” 13 “माहाजिमि खागो मे़न्टे़क्पॽआ येःॽमाबाङ लेङ्इये नम्इये किम्घे़ॽपॽआ खाडोॽ ले़ये, माहाजिडे़ॽ सानिङ रेम्डेॽमा खारेॽनोॽ इःन्डुजे।” “माहाजिडे़ॽ यामुबॽआ खा सिक्चानुङ्मा पुसे़ॽमि सिक्चाडोॽ ले़ये।” 14 “माहाजिडे़ॽ सानिङ चापहिन्डुजेनुङ निवा इॽठुप खिॽवाइङ खा काप्मिन्डुजे।” 15 “अक्खाजि याॽमि सेॽमामि चान्डो पोरोक्पेम्मे। 16 माहाजि हाम्बेॽ हाम्बेॽ खे़म्मे, मोबेॽ मोबेॽ सिमवानुङ खेः याःयान्डुजे। 17 सान्तिमि राम माहाजिडे़ॽ लेनोॽ लेसुजिने।” 18 “माहाजि निवाहाङनुङ किस्सिमिने।” 19 धारमिक नियममि खा चाहिँ नियममि अधिनबेॽ पेङ्घुबाजिमि लागिनोॽ लुबॽआ ले़ये लुनुङ कानिङे़ॽ लेन्डुङ्मे़। मोडोगे़ॽ मक्खाम्डेमबेॽहा चोप याॽमिजि इमाङ बाहाना मे़ॽनिङ योङ उःक्नुङ निवाहाङ्मि पोम्बेॽ न्यायमि लागि येःप्मा खे़ये। 20 मोडोगे़ॽ धारमिक नियम पालना ले़ःॽनुङ असासो निवाहाङ्मि पोम्बेॽ धरमि लिमिने। इन्ढोङ्होङ धारमिक नियमडे़ॽको याॽमिडे़ॽ ले़ःॽपॽआ पापरेॽ लेमेये। निवाहाङ्डे़ॽ याॽमिजि धरमि टोङ्इन्डुए 21 तर हागोगो धारमिक नियम मे़ॽनिङ्नोॽ निवाहाङ्डे़ॽ याॽमिजि धरमि टोङ्इन्डुए लुनुङ खाङ्मुटे़। इगो खानोॽ धारमिक नियमनुङ अगमबक्ताजिडे़ॽ लुटुजे। 22 इडोॽ येसु खिरिस्टबेॽ बिस्वास ले़ःॽखुबा चोपजि निवाहाङ्डे़ॽ धरमि टोङ्इन्डुजे, इन्ढोङ्होङ खोसे़ॽ असासो काखा पाखा ले़टुजिने। 23 इन्ढोङ्होङ चोप याॽमिजिडे़ॽ पाप ले़ए़टुजे, मोबा निवाहाङ्मि महिमाबाङ ओः लिटामे। 24 तर निवाहाङ्मि अनुग्रहाबाङ खिरिस्ट येसुडे़ॽ चोप याॽमिजिमि पापमि साटो दन्डा आङ्नुङ छुट्कारा ले़टुजि, मोबा याॽमिजि मोडोक्नोॽ धरमि टोक्सुजि। 25 निवाहाङ्डे़ॽ खोनुङ सोरि इक्को लिमामि लागि खिरिस्ट येसु बलिदान लिसिॽ पाक्सु, मो बिस्वास ले़ःॽखुबा याॽमिजिमि पापमि आम्लाङ पिये। इगो योम्बोक निवाहाङ्डे़ॽ टाङ्बामि धारमिक खा खाङ्मुमामि ले़टु। निवाहाङ्डे़ॽ खिरिस्ट लेम्मा याक्लो खोमि सुरिक चुम्नुङ युङ्बॽआ ले़टे़नुङ याॽमिजिडे़ॽ ले़ःॽपॽआ पापमि दन्डा मे़म्पिसुजि। 26 निवाहाङ खोमटाङ्बा धरमि ले़ये, येसुबेॽ बिस्वास ले़ःॽखुबाजि खोसे़ॽ धरमि टोङ्इन्डुजे लुमे खा पक्का ले़ःॽमामि लागि खोसे़ॽ इडोक्मा योम्बोक ले़ए़टुए। 27 मोडोगे़ॽ कानिङ इमाङ खाबेॽ काङायोङ्बा लिमे़ ? धारमिक नियममि खाबाङ याॽमिजि धरमि लिहेमिनिहोङ्गो मो खाबेॽ कानिङ इन्ढोङ काङायोङ्बा लिमे ? कानिङ्गो खिरिस्टबेॽ बिस्वास ले़ःॽनुङ्रेॽ धरमि लिहेन्डिङ्मा। 28 मोडोगे़ॽ धारमिक नियम पालना ले़ःॽनुङ ने़ॽनि, खिरिस्टबेॽ बिस्वास ले़ःॽनुङ्रेॽनोॽ याॽमि निवाहाङ्मि पोम्बेॽ धरमि लिहेम्मे। 29 इमा निवाहाङ यहुदिजिमिरेॽ निवाहाङ ले़ये ? इमा अयहुदिजिमि चाहिँ ने़ॽनिबा ? तर मोडोॽको ने़ॽनिबा! खोगो चोप याॽमिजिमि निवाहाङ ले़ये। 30 इन्ढोङ्होङ निवाहाङ इक्कोनोॽ ले़ये। खोसे़ॽ खतना लिबॽआ यहुदिजिहोङ्सो अथबा खतना मे़लिबॽआ अयहुदिजिहोङ्सो माहा चोपजि खोजिमि बिस्वासबाङ्नोॽ धरमि टोङ्इन्डुजे। 31 निवाहाङ्मि पोम्बेॽ कानिङ इगो बिस्वासबाङ धरमि लिन्डिङ्माहोङ इमा धारमिक नियम चाहिँ योम्बोक मे़ॽनिङ्मा लिये ? मोडोॽको ने़ॽनि, बोरु इगो धारमिक नियमबेॽहा खा चाहिँ चाइबमा मिॽनुङ पालना ले़न्डुङ्मा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.