रोमि 2 - याम्फुनिवाहाङ्मि न्याय 1 मोडोगे़ॽ होउ हाइखाजि आप्टिक टिघुबा याॽमिजि, हे़निङ असे़ॽसो काबेॽ आप्टिक माॽआ काडोक्टानिङ्ने। हाइखाजि आप्टिक टिघुबाडे़ॽ खोमटाङ्बासो आप्टिकनुङ्मा लिमे़ॽनिङ्सिये। इन्ढोङ्होङ इमाङ खाबेॽ हाइखाजि आप्टिक टिन्डुए, मो खाबेॽनोॽ खोसो आप्टिकनुङ्मा लिये। 2 निवाहाङ्डे़ॽसो इडोक्हा योम्बोक ले़ःॽखुबा याॽमिजि नुरोॽ दन्डा पिन्डुजे लुनुङ कानिङे़ॽ लेन्डुङ्मे़। 3 मोडोगे़ॽ होउ याॽमिजि, हे़निङे़ॽ इडोक्हा योम्बोक ले़ःॽखुबाजि आप्टिक टिन्डानुमे, तर टाङ्बासो मोडोक्हानोॽ योम्बोक ले़न्डानुमहोङ, इमा निवाहाङ्डे़ॽ हे़निङ दन्डा पिनिबा मिङ्इन्डानिङे ? 4 अथबा निवाहाङ्मि किरपाडे़ॽ हे़निङ पाप योम्बोक लेॽनुङ निवाहाङ्बेॽ टेआप्मिये लुमे खा मे़लेरेॽ इमाङ हे़निङ खोमि नम्नावा, आङ्डुङ्घे़ॽखुबानुङ चान्डोनोॽ सुरके़ॽनिबा लुमे खा ए़डेम्मा मिॽइन्डानुमे ? 5 तरसो हे़निङ लुबॽआ खा मे़ङ्खेम्खुबाजि लिनुङ निवाहाङ्बेॽ मे़न्टेबॽआसे़ॽ बेॽलो सुरके़ॽमेन्डानुम। मोडोगे़ॽ खो सुरिक्पेॽ न्याय ले़ःॽसिॽ लेम्माबेॽ खोबाङ हे़निङे़ॽ बेॽलो दन्डा चुप्मिन्डामे। 6 इन्ढोङ्होङ निवाहाङ्डे़ॽनोॽ चोप याॽमिजि खोजिडे़ॽ ले़ःॽपॽआ योम्बोकमि इनाम पिन्डुजे। 7 इन्डोक जनाडे़ॽ नुबा योम्बोक सानिङ ले़न्डुजेनुङ निवाहाङ्मि महिमा, इजेत, ए़ॽसिमे हिङ्मवा योॽइन्डुजे, माहाजि निवाहाङ्डे़ॽ एॽसिमे हिङ्मवा पिन्डुजे। 8 तर खिमा योक्खुबाजि, चाइबमा खा मे़ङ्खेम्खुबाजि, मङे़हा योम्बोक ले़ःॽसाङ राम्घुबाजिसोक्पेॽ चाहिँ निवाहाङ्मि किस्सिमारोमा दन्डा सिॽइये। 9 मङे़हा योम्बोक ले़ःॽखुबा चोप याॽमिजिसोक्पेॽ बेॽए सङ्कस्ट, खेःनुङ बिपत्ति लेङ्इहा, याक्लो यहुदिजिबेॽ, मोबा ए़क्साङ अयहुदिजिबेॽ लेङ्इये। 10 तर नुबा योम्बोक ले़ःॽखुबा चोपजि याक्लो यहुदिजि मोबा अयहुदिजिसो इजेत, आदरनुङ सान्ति पिन्डुजे। 11 इन्ढोङ्होङ निवाहाङ्डे़ॽ असासो काखानुङ पाखा ले़टुजिनिबा। 12 असा असे़ॽ निवाहाङ्मि धारमिक नियम मे़लेरेॽ पाप ले़ए़टुजे, माहाजि धारमिक नियम मे़ॽनिङ्नोॽ नासि लिघे़म्मे। मोबा धारमिक नियम लेनुङ्सो पाप ले़न्डुजिहोङ माहाजि मो नियमबाङ्नोॽ आप्टिकनुङ्मा लिम्मे। 13 इन्ढोङ्होङ धारमिक नियम खेम्नुङ्रेॽनोॽ निवाहाङ्मि पोम्बेॽ धरमि लिमिने, तर मो धारमिक नियम नुरोॽ पालना ले़ःॽखुबाजि चाहिँ निवाहाङ्मि पोम्बेॽ धरमि लिम्मे। 14 इन्ढोङ्होङ अयहुदि याॽमिजिनुङ यहुदि धारमिक नियम माॽआये, तर खोजिटाङ्बामि निवाडे़ॽनोॽ मो धारमिक नियमडे़ॽ लुडिडोक्नोॽ ले़न्डुजिहोङ, खोजिनुङ धारमिक नियम टुये लुमे खा खाङ्मुये। 15 खोजिमि निवाहोङ्सिॽयु धारमिक नियममि खा साप्मिहा लुनुङ खोजिमि योम्बोकबाङ खाङ्मुन्डुजे, मोडोगे़ॽ खोजिमि नुबानुङ मङे़हा खा लेमे निवाडे़ॽ कोहि बेला टाङ्बा आप्टिक टियेनुङ कोहि बेला टाङ्बा आप्टिक मे़ॽनिङ्मा ले़ङे काम्मे। 16 इघा खा के़ॽ सुसमाचार खेम्मेॽपॽआडोॽ याॽमिजिमि निवाबेॽ चुम्बॽआ खा चाहिँ येसु खिरिस्टबाङ न्याय ले़ःॽमे याकपेॽ खाङ्मुये। यहुदिजिनुङ खोजिमि नियम 17 तर हे़निङ टाङ्बा धारमिक नियमबेॽ भरोसा ले़न्डुङ्मा, मोबा निवाहाङ लेन्डुङ्मा लुनुङ काङायोङ्बा लिन्डानिङ्होङ, 18 निवाहाङ्डे़ॽ नेन्जाबॽआ खा लेन्डुङ्मा, इमाङ ले़ःॽमा ठिक ले़ये लेन्डुङ्मा, धारमिक नियमबाङ चिङ्इटुङ्मा कान्डानिङ्होङ, 19 निवाहाङ्मि राम मे़लेखुबाजि राम लेमेॽखुबा डायोङ्बाजि कान्डानिङे, हे़निङ टाङ्बा सेन्जुगुप्पेॽ टुघुबाजिमि लागि चाइबमा जोति ले़न्डिङ्मा कान्डानिङ्होङ, 20 मोबा उम्बरिङ्जि निवाहाङ्मि टुम्बेॽहा चाइबमा खा इःॽहेन्डुङ्मा, पिच्छाजिडोॽहानुङ इमाङ्सो मे़लेघुबा याॽमिजि सिक्छे पिन्डुङ्मा, धारमिक नियमबेॽहा चोप खा लेन्डुङ्मे़ कान्डानिङ्होङ, 21 इडोॽ हे़निङे़ॽ हाइखा याॽमिजि चाहिँ सिक्छे पिन्डानुमे, तर हे़निङ टाङ्बे़ॽ चाहिँ इन्ढोङ पालना ले़टानुम्ने ? हे़निङे़ॽ हाइखाजि चाहिँ खुमा फे़न्नि लुन्डानुमे, तर हे़निङ टाङ्बा चाहिँ इन्ढोङ खुन्डानिङे ? 22 हे़निङे़ॽ हाइखाजि चाहिँ बेभिचार ए़ले़टानुमे लुनुङ लुन्डानुमे, हे़निङ टाङ्बा चाहिँ इन्ढोङ बेभिचार ले़न्डानिङे ? हे़निङे़ॽ मुरति पुजा सिॽचान्डानुमे, तर मो मुरति पुजाबाङ्नोॽ सक्चाङ चे़न्डानुमे। 23 हे़निङ्नुङ धारमिक नियम टुये लुनुङ काङायोङ्बा लिन्डानिङे, तर निवाहाङ आदर चाहिँ ले़टानुम्नि, इन्ढोङ्होङ हे़निङे़ॽ धारमिक नियमडे़ॽ लुडिडोक्नोॽ ले़टानुम्ने। 24 इन्ढोङ्होङ धारमिक नेॽचिराबेॽ इडोॽ साप्पॽआ ले़ये, “हे़निङे़ॽ ले़ःॽमे़ॽनोॽ अयहुदिजिमि रुम्बेॽ निवाहाङ्मि बेजेत लिटे़।” 25 धारमिक नियम पालना लेन्डानुमेहोङ्गो मो नियमडोॽ खतना ले़ःॽमा नुबानोॽ ले़ये, तर यहुदि धारमिक नियमनोॽ पालना ले़टानुम्निहोङ्गो, हे़निङ खतना मे़ले़ःॽपॽआजिडोक्नोॽ लिन्डानिङे। 26 इडोॽ खतना मे़ले़ःॽपॽआ अयहुदिजिडे़ॽ धारमिक नियममि खा पालना ले़न्डुजिहोङ्गो खोजि निवाहाङ्मि पोम्बेॽ खतना ले़ःॽखुबाजिडोक्नोॽ लिम्मे। 27 मोडोॽगे़ॽ अयहुदिजिडे़ॽ खतना मे़ले़ःॽसो खोजिडे़ॽ खतना ले़ःॽखुबाजि हे़निङ आप्टिक टिम्मे, इन्ढोङ्होङ हे़निङ्नुङ धारमिक नेॽचिरा टुये, मोबा खतनासो ले़न्डानुम, तर मो धारमिक नियम पालना ले़टानुम्नि। 28 याॽमिजिमि पोम्बेॽ यहुदि खाङ्मुनुङ असासो चाइबमा यहुदि लिनिबा, मोडोक्नोॽ हिङाबेॽ खाङ्मुये खतनासो चाइबमा खतना लिनिबा। 29 निवाहोङ्बाङ्नोॽ धारमिक नियम पालना ले़ःॽखुबा चाहिँ चाइबमा यहुदि लिये, मोडोक्नोॽ निवाहोङ्बाङ लिबॽआ खतना चाहिँ चाइबमा खतना ले़ये। इडोक्मा खतना ले़ःॽखुबा याॽमिमि ओहाङ याॽमिजिबाङ ने़ॽनि, निवाहाङ्बाङ लिये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.