रोमि 16 - याम्फुपावलडे़ॽ सेवा मुबॽआ 1 हागो किङ्किरियाबेॽए मन्डलिबेॽ सेवामि योम्बोक ले़ःॽखुबा कानिङ्मि निसा फिबिमि टुम्बेॽ हे़निङ लुमे़ॽनिङ्सिनुङे। 2 खोसे़ॽ बेॽलो याॽमिजि सहायता ले़ए़टुजे, मोबा कासो बेॽलो सहायता ले़टिङा। मोडोगे़ॽ हे़निङे़ॽसो खो खिरिस्टमि पबित्रा याॽमि ले़टिडोॽ स्वागत ले़टानुमे, खो खाँचो सिॽमाबेॽ हेरो सहायता ले़टानुमे। 3 मोबा याक्लो कानुङ सोरि येसु खिरिस्टमि योम्बोक ले़ःॽखुबा लङ्गामजि पिरिस्किनुङ अकिलाससो काङ्मि सेवा लुबेॽमाजे। 4 खोजिडे़ॽ काङ्मि लागि टाङ्बामि हिङ्मवा खेःबेॽ टिसाजु। खोजिगो के़ॽरेॽनोॽ ने़ॽनि, तर अयहुदि जातिहा चोबे़ॽनोॽ ओहाक पिन्डुजे। 5 खोजिमि खिमबेॽ सुम्नुङ सङ्गति ले़ःॽखुबाजिसो चोप काङ्मि सेवा लुबेॽटानुमे। के़ॽ नम्नम ले़ःॽपॽआ इपेनितस काङ्मि सेवा लुबेॽमाजे, खोगो एसिया ठाउँबेॽ चोप्पाङ याक्लो खिरिस्टबेॽ बिस्वास ले़ःॽखुबा याॽमि ले़ये। 6 हे़निङ्मि लागि बेॽलो निवा टिनुङ सेवामि योम्बोक ले़ःॽखुबा मरियमसो काङ्मि सेवायो लुबेॽमाजे। 7 कानुङ सोरि तिरिङ्गा खिमबेॽ से़क्सिघे़ॽखुबा टाङ्बाङ यहुदि एन्डरोनिकसनुङ युनियससो काङ्मि सेवायो लुबेॽमाजे। मोजि एप्पा चोङ्साजिडोक्नोॽ निङ मुक्पॽआ ले़टाजे। खोजि काबाङ्सो याक्लो खिरिस्टबेॽ बिस्वास ले़ःॽखुबा ले़टाजे। 8 के़ॽ नम्नम ले़ःॽपॽआ परभुबेॽ बिस्वास ले़ःॽखुबा एम्प्लिआतससो काङ्मि सेवा लुबेॽमाजे। 9 खिरिस्टमि लागि कानुङ्सोरि योम्बोक ले़ःॽखुबा उरबानसनुङ के़ॽ नम्नम ले़ःॽपॽआ स्ताखुससो काङ्मि सेवायो लुबेॽमाजे। 10 खिरिस्टमि याॽमि लुमा खेन्जाखुबा अपेल्लेस काङ्मि सेवायो लुबेॽमाजे। मोबा अरिस्तोबुलसमि खिमबेॽहाजिसो काङ्मि सेवायो लुबेॽमाजे। 11 काङ्मि टाङ्बाङ हेरोदियन काङ्मि सेवायो लुबेॽमाजे। परभुबेॽ बिस्वास ले़ःॽखुबा नरकिससमि खिमबेॽहाजिसो सेवायो लुबेॽमाजे। 12 परभुमि योम्बोक निवा टिनुङ ले़ःॽखुबा तुरुफेनानुङ तोरोफोसासो काङ्मि सेवा लुबेॽमाजे। परभुमि योम्बोकपेॽ बेॽलोनोॽ दुःख ले़ःॽखुबा परसिससो काङ्मि सेवा लुबेॽमाजे। 13 परभुडे़ॽ से़न्बॽआ रुफसनुङ खोमि मामा, काङ्मिसो मामाडोॽ ले़टा, खोजिसो काङ्मि सेवायो लुबेॽमाजे। 14 असिङ्किरितस, फ्लेगन, हरमेस, पत्रोबास, हरमासनुङ खोजिनुङ सोरि पेङ्घुबा बिस्वासि निसाजिसो काङ्मि सेवायो लुबेॽमाजे। 15 फिलोलोगस, युलिया, नेरियसनुङ खोमि सम्समा निसा, ओलिम्पासनुङ खोनुङ टुघुबा खिरिस्टमि चोप पबित्रा वावानिसाजिसो काङ्मि सेवायो लुबेॽमाजे। 16 इगोबेॽ टुघुबा चोप खिरिस्टमि मन्डलिबेॽहा बिस्वासिजिडे़ॽ हे़निङ सेवायो लुहाङ्इटामे। मोबा हे़निङ चोबे़ॽ इक्कोसे़ॽ हाइको नम्नमनुङ्मा सेवा ले़ःॽखुसे़ॽचुसानिङे। पावलमि ए़क्साङ्मा अरति 17 वावानिसानुङ नानुसाजि, के़ॽ हे़निङ बिन्ति ले़निम्ने़, हे़निङ्मि रुम्बेॽ खिमवा खा लाप्खुबा मोबा हे़निङे़ॽ चिम्बॽआ धारमिक नियममि बिरोधबेॽ सिक्छे इःॽनुङ हे़निङ्मि बिस्वासबेॽ फाङ्सेॽखुबा याॽमिजिबाङ होसियार ले़टानिङे। हे़निङ आक्टोॽहा याॽमिजिबाङ ओःनोॽ पेनानिङे। 18 इन्ढोङ्होङ इडोक्हा याॽमिजिडे़ॽ खिरिस्ट परभुमि लागि ने़ॽनि, तर खोजिमि रुङ्मामि लागिरेॽनोॽ योम्बोक ले़न्डुजे। मोबा खोजिमि चनुहा चनुहा खाडे़ॽ सिधा सोझो याॽमिजि रेम्इन्डुजे। 19 हे़निङे़ॽ आग्या पालना ले़ःॽपॽआ खामि टुम्बेॽ चोप याॽमिजिडे़ॽ खेम्इटुजे, इगो खा खेम्नुङ का साप्थाङ्इङे। हे़निङ नुबा योम्बोक ले़ःॽचारेघुबाजि लिसानिङे, मोबा मङे़हा योम्बोक चाहिँ ले़ःॽनोॽ मे़ले़ःॽखुबाजि लिसानिङे। 20 सान्तिदाङ्बा निवाहाङ्डे़ॽ चान्डोनोॽ सैतान हेजोन्डुएनुङ मो हे़निङ्मि सराङ्होङ्बेॽ युङ्इन्डुए। कानिङ्मि परभु येसु खिरिस्टमि अनुग्रहा हे़निङ्नुङ सनिङ टुरो। 21 कानुङ सोरि योम्बोक ले़ःॽखुबा काङ्मि लङ्गाम तिमोथिनुङ काङ्मि यहुदि निसा लुकियस, यासोननुङ सोसिपात्रोसडे़ॽसो हे़निङ सेवायो लुटामे। 22 इगो पत्रा साप्खुबा का तरतियसडे़ॽसो परभुमि निङ्बेॽ हे़निङ सेवायो लुनिम्ने़। 23 गायसडे़ॽसो हे़निङ सेवायो लुटे़। का पावल खोमि खिमबेॽनोॽ पेङ्इङे, मोबा खोमि खिमबेॽनोॽ इगो ठाउँबेॽहा बिस्वासिजि सुम्इम्मे। इगो सहरमि याङ्मि हिसाब युङ्खुबा इरास्तसनुङ निसा क्वारटसडे़ॽसो हे़निङ सेवायो लुहाङ्इटे़। 24 [कानिङ्मि परभु येसुमि अनुग्रहा हे़निङ्नुङ सानिङ टुडुङ्घे़ॽरो, आमेन।] 25 हागो कानिङ चोबे़ॽ निवाहाङ्मि आदरनुङ ओहाङ ले़ःॽमा। के़ॽ खिरिस्टमि टुम्बेॽ परचार ले़ःॽपॽआ खानुङ सुसमाचारबाङ खोसे़ॽ हे़निङ बिस्वासबेॽ बोलियो टोङ्हेये। इगो सुसमाचार निवाहाङ्डे़ॽ बेॽलो निङ याक्लोएबाङ चुम्नुङ युङ्बॽआ ले़टा। 26 तर हागो येसु खिरिस्टमि टुम्बेॽहा खा अगमबक्ताजि साप्मेॽनुङ छे़ङ्गै टोङ्इटुए। मोबा इगो सुसमाचारबाङ्नोॽ चोप याॽमिजिडे़ॽ खोबेॽ बिस्वास ले़ःॽनुङ खोमि आग्या पालना ले़टुजिरो लुनुङ इन्डोक्पेॽसो सिघे़ॽनिबा निवाहाङ्डे़ॽ चोप याॽमिजिबेॽ मोबा चोप ठाउँबेॽ इगो सुसमाचार परचार ले़ःॽमामि आग्या ले़टा। 27 इक्कोमानुङ चोप्पाङ बेॽए निवादाङ्बा निवाहाङ्मि ओहाङ येसु खिरिस्टबाङ सानिङ्मु लिरो! आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.