रोमि 15 - याम्फुहाइखाजिमि ले़ख्खो ले़ःॽमा 1 कानिङ बिस्वासबेॽ बोलियो याॽमिजिडे़ॽ टाङ्बामि निवे़ॽ नुबा मिॽपॽआ खारेॽ ले़ःॽमा फे़न्निबा। बिस्वासबेॽ थोःप्थोपहा याॽमिजि सहायता ले़ःॽमा खे़ये। 2 कानिङ चोबे़ॽ माहा बिस्वासबेॽ थोःप्थोप याॽमिजि बोलियो लिमिरो लुनुङ खोजि साप्थाङ्मेॽमा खे़म्मे। 3 इन्ढोङ्होङ खिरिस्टडे़ॽसो टाङ्बा साप्थाङ्मामि लागि योम्बोक मे़ले़टु। धारमिक नेॽचिराबेॽसो इडोॽ साप्पॽआ ले़ये, “परभु इःजाघुबाजिडे़ॽ कासो इःजामे़ॽनिङ्सिम्मे।” 4 याक्लो याक्लो साप्पॽआ धारमिक नेॽचिराबेॽहा खाडे़ॽ चाहिँ कानिङ सिक्छे पिमामि लागि साप्पॽआ ले़टा। धारमिक नेॽचिराबाङ कानिङे़ॽ आङ्हेमे बोलनुङ हौसला चुप्मिहा, मोबा निवाहाङ्डे़ॽ हे़म्बॽआ हेन्ज्रुङ पुरा लिये लुनुङ कानिङे़ॽ खोबेॽ आसा ले़न्डुङ्मा। 5 निवाहाङ्डे़ॽनोॽ हे़निङ आङ्हेमेनुङ बोलियो लिमे सक्ति पिये। मोबा येसु खिरिस्टनुङ इक्को लिनुङ बिस्वास ले़ःॽखुबाजिमि रुम्बेॽ इक्को निवा लिनुङ हिङ्हेसानिङे, 6 मोबा इक्कोनोॽ सेम्लाडे़ॽ कानिङ्मि परभु येसु खिरिस्टमि पाबा निवाहाङ्मि ओहाङ हे़निङे़ॽ ले़ःॽहेसानुमे लुनुङ के़ॽ येसु खिरिस्टमि निङ्बेॽ पारथना ले़नुङे। अयहुदिजि साप्थाङ्मे लम्बवाँ 7 निवाहाङ्मि महिमामि लागि खिरिस्टडे़ॽ कानिङ स्विकार ले़टिडोॽ हे़निङे़ॽसो इक्कोसे़ॽ हाइको स्विकार ले़टानुमे। 8-9 इन्ढोङ्होङ के़ॽ हे़निङ लुनिन्ने़, निवाहाङ चाइबमा ले़ये, मोबा कानिङ्मि टुबालाबाजिनुङ ले़ःॽपॽआ हेन्ज्रुङ पुरा ले़ःॽमा खोसे़ॽ मिन्डेडुनिबा। इगो लेमेॽमामि लागिनुङ अयहुदि जातिजिडे़ॽसो निवाहाङ्मि नम्नम लेनुङ खोमि ओहाङ ले़टुजिरो लुनुङ खिरिस्टडे़ॽ यहुदिजिमि सेवा ले़टु। धारमिक नेॽचिराबेॽ इडोॽ साप्पॽआ ले़ये, “मोडोगे़ॽ अयहुदिजिमि रुम्बेॽ के़ॽ हे़ने़ए़ ओहाङ ले़नुङे, मोबा हे़ने़ए़नोॽ निङ्मि ओहाङ्मि सेम सेम्लुनुङे।” 10 फेरि इडोक्सो साप्पॽआ ले़ये, “होउ अयहुदिजि, निवाहाङ्डे़ॽ से़म्बॽआ याॽमिजिनुङ सोरि साप्थाक्सानिङे।” 11 मोबा फेरि हाइको ठाउँबेॽ इडोॽ साप्पॽआ ले़ये, “होउ अयहुदिजि, परभुमिन्नोॽ ओहाङ ले़टानुमे, चोप जातिहा याॽमिजि, परभुमिन्नोॽ ओहाङ ले़टानुमे।” 12 फेरि अगमबक्ता यसैयाडे़ॽ खिरिस्टमि टुम्बेॽ इडोॽ लुटुए, “यिसैमि पसा हाङ्बा दाउदमि बङ्सबाङ इक्को पसा लेङ्इये, खोसे़ॽ अयहुदिजिसोक्पेॽ राज्य ले़न्डुए, मोबा अयहुदिजिडे़ॽ खोबेॽनोॽ आसा ले़न्डुजे।” 13 आसा पिघुबा निवाहाङ्डे़ॽ हे़निङ्मि बिस्वासबाङ हाङ्हाङ्नुङ सान्ति बेॽलो येॽपेॽरो। मोडोक्नोॽ पबित्रा होङ्निवामि सक्तिडे़ॽ हे़निङ्मि आसा छना वाबोक्लो। पावलडे़ॽ अयहुदिजिमि रुम्बेॽ योम्बोक ले़ःॽपॽआ 14 के़हा वावानिसानुङ नानुसाजि, हे़निङ टाङ्बासो भलाइ निवा खिघुबा ले़न्डानिङे लुनुङ के़ॽ लेनुङे़, मोबा बेॽलो निवादाङ्बा लिनुङ इक्कोसे़ॽ हाइको इःॽहेन्डानुमे। 15 तरसो इन्डोक खा चाहिँ हे़निङ फेरि मिॽमेॽमामि लागि के़ॽ बेॽए सहासनुङ्मा लिनुङ पत्राबेॽ साप्मे़ॽनिङ्सिनुङे। निवाहाङ्मि अनुग्रहाबाङ का अयहुदिजि सुसमाचार परचार ले़ःॽमे सेवाक टोक्सिङ। 16 इक्को याडाङ्बाडे़ॽ निवाहाङ्मि पोम्बेॽ नेन्जामारोमा भेटि चेॽटिबॽआडोॽ के़ॽसो माहा अयहुदि याॽमिजि सुसमाचार खेम्मेॽनुङ, पबित्रा होङ्निवाबाङ चोखो टोङ्नुङ निवाहाङ्डे़ॽ नेन्जोन्डुए भेटिडोॽ खोमि पोम्बेॽ लाजे़टुङ्हाजि। 17 मोडोगे़ॽ निवाहाङ्मि लागि के़ॽ ले़ःॽपॽआ योम्बोकबाङ खिरिस्ट येसुबेॽ गरब ले़नुङे। 18 इन्ढोङ्होङ, अयहुदि जातिजि निवाहाङ्मि आग्या पालना ले़ःॽखुबाजि टोङ्मामि लागि बचननुङ योम्बोकबाङ खिरिस्टडे़ॽ काबाङ इमाङ इमाङ योम्बोक ले़ए़टुहा माहा खाबाङ हाइखा इमाङ खामि लागिसो लुमा आँट ले़टुङ्निबा। 19 इघा खरिहा योम्बोकनुङ सक्तिनुङ्हा चिङ्गा पबित्रा होङ्निवामि सक्तिडे़ॽ ले़ए़टुङे। इडोॽ के़ॽ यरुसलेमबाङ इल्लुरिकन देसठोक चोप ठाउँ खिरिस्टमि टुम्बेॽ नुरोॽ सुसमाचार परचार ले़ए़टुङे। 20 हाइखा याॽमिजिडे़ॽ तरिक्पॽआ जगबेॽ खिम टोङ्खुबाडोॽ का लिमा मिङ्ङानि। मोडोगे़ॽ खिरिस्टमि निङ्नोॽ मे़ङ्खेम्बॽआनुङ हाइखाजिडे़ॽ परचारनोॽ मे़ले़ःॽपॽआ ठाउँबेॽ निवा टिनुङ सुसमाचार परचार ले़ःॽमा सारोनोॽ मिॽइटुङे। 21 धारमिक नेॽचिराबेॽसो इडोॽ साप्पॽआ ले़ये, “खोमि टुम्बेॽ इन्डोक्पेॽसो मे़इःबॽआ याॽमिजिडे़ॽ खो खाङ्डोक्इन्डुजे, मोबा खोमि टुम्बेॽ इन्डोक्पेॽसो मे़ङ्खेम्खुबाजिडे़ॽ खो लेन्डुजे।” पावल रोम खे़ॽमामि पक्का ले़ःॽपॽआ 22 के़ॽ हाइखा चोङ ठाउँबेॽ खिरिस्टमि सुसमाचार परचार ले़ःॽमा सिॽपॽआसे़ॽ बेॽलोखेॽ हे़निङ्बेॽ आप्मा मिॽनुङ्सो मे़आप्टोगिङ। 23 तर हागो इघा ठाउँराजि सुसमाचार परचारमि योम्बोक येप्पेटुङ्हा। मोबा बेॽलो निङ्बाङ हे़निङ चुप्सिॽ आप्मा मिनिङे। 24 का हे़निङ्मि ठाउँ लिसाङ स्पेन देस खे़ॽमाबेॽ हे़निङ चुप्मे आसा ले़ए़टुङे। हे़निङ्नुङ इक्याक नियाक सेवा सङ्गति ले़ःॽसाङ हाङ्हाङ ले़ःॽमानुङ पेम्मासो मिङ्इटिङे। हे़निङ्बाङ हाघे़ॽमाबेॽ हे़निङे़ॽ का सहायतासो ले़न्डानिङ होला मिॽइटुङे। 25 तर का याक्लो यरुसलेमबेॽहा खिरिस्टमि पबित्रा याॽमिजि सहायता ले़ःॽसिॽ खे़ॽमे़ॽनिङ्सिङे। 26 इन्ढोङ्होङ यरुसलेमबेॽ टुघुबाजि असा असा खाँचोबेॽ सिॽखुबाजिमि लागि, अखैयानुङ माकेडोनियाबेॽहा बिस्वासिजिडे़ॽ भेटि पाङ्इटुजे। 27 इघा भेटि खोजिडे़ॽ साप्थाङ्मानुङ सुम्इटुजे, चइबानोॽ लुमाहोङ माहा पिघुबा बिस्वासिजिडे़ॽ इघा यरुसलेमबेॽहा पबित्रा याॽमिजि पिमासो खे़ये, इन्ढोङ्होङ माहाजिबाङ लेम्बॽआ होङ्निवाबाङ पिबॽआ आसिस इघा अयहुदिजिडे़ॽ चुप्इटुजे। इडोक्नोॽ हाइखा याॽमिजिडे़ॽसो खाँचोबेॽ सिॽपॽआजि सहायता पिमा खे़म्मे। 28 मोडोगे़ॽ इघा भेटि माहाजिबेॽ लाडियासाङ हे़निङ चुप्आनुङ स्पेन खे़ए़ङे। 29 का हे़निङ्बेॽ लेम्माबेॽ खिरिस्टबाङ चुप्पॽआ चोप आसिसनुङ लेङ्इङे़। 30 वावानिसानुङ नानुसाजि, कानिङ्मि परभु येसु खिरिस्टनुङ खोमि होङ्निवाडे़ॽ पिबॽआ नम्नमबाङ निवाहाङ्नुङ काङ्मि लागि हे़निङे़ॽसो बेॽलो पारथना ले़ःॽपेॽमाजे लुनुङ हे़निङ्नुङ बिन्ति ले़निम्ने़। 31 यहुदिया सहरबेॽ टुघुबा अबिस्वासि याॽमिजिबाङ का जोगा ले़ःॽमामि लागि, मोबा यरुसलेमबेॽहा पबित्रा याॽमिजिमि लागि के़ॽ याङ्घे़ॽपॽआ सहायोगमि भेटि खोजिडे़ॽ साप्थाङ्मानुङ लासुजिरो लुनुङ पारथना ले़ःॽपेॽमाजे। 32 मोबा ए़क्साङ निवाहाङ्डे़ॽ मिडुहोङ का साप्थाङ्मानुङ हे़निङ्बेॽ लेङ्इङे़, मोबा सोरि सङ्गति ले़ःॽनुङ हाङ्हाङ ले़टि। 33 सान्तिदाङ्बा निवाहाङ हे़निङ चोपनुङ सानिङ टुरो, आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.