रोमि 14 - याम्फुहाइखाजि आप्टिक ए़ॽटिसानुमे 1 बिस्वासबेॽ थोःप्थोप ले़ःॽखुबा बिस्वासिजि आप्टिक मे़न्डिरेॽ नम्नम ले़ःॽनुङ टाङ्बामि सङ्गतिबेॽ स्वागत ले़टानुमे। 2 इन्डोक बिस्वासिजिडे़ॽ चोप थोक चामा नुये लुनुङ बिस्वास ले़न्डुजे, तर बिस्वासबेॽ थोःप्थोपहा ले़ःॽखुबा इन्डोक जना बिस्वासिजिडे़ॽ चाहिँ साःॽवारेॽनोॽ चोन्डुजे। 3 चोप थोक चाघुबाडे़ॽ मो साःॽवारेॽनोॽ चाघुबा सिःक्चामा फे़न्निबा, मोबा साःॽवारेॽनोॽ चाघुबाडे़ॽसो मो चोप थोक चाघुबा आप्टिक टिमा फे़न्निबा, इन्ढोङ्होङ निवाहाङ्डे़ॽको मोजि निप्पाङ्नोॽ खोमि याॽमि लिमामि के़ए़टुजे। 4 हाइकोमि सेउते आप्टिक टिघुबा हे़न असाडे ? मोमि मायोङ्बाडे़ॽ खोमि सेउतेडे़ॽ ले़ःॽपॽआ योम्बोक नुबा ले़येन्डे ले़ःॽनिबा लुनुङ खाङ्इन्डुए। मायोङ्बाडे़ॽनोॽ खोमि सेउतेडे़ॽ नुबा योम्बोक ले़ःॽमामि सहायोग पिन्डुए, इन्ढोङ्होङ परभुडे़ॽ खो ले़ःॽहेमे सक्ति पिन्डुए। 5 इन्डोक याॽमिजिडे़ॽ इक्को याक बेॽए मिॽइन्डुजे, तर इन्डोक याॽमिजिडे़ॽ चोप याक इक्कोनोॽ मिॽइन्डुजे। मोडोगे़ॽ चोप याॽमिजिडे़ॽ टाङ्बा टाङ्बे़ॽ बिस्वास ले़ःॽपॽआ खाबेॽ नुरोॽ लेनुङ्नोॽ ले़ःॽमा खे़ये। 6 इक्को याक बेॽए मिॽखुबे़ॽ निवाहाङ्मि आदरमि लागिनोॽ मिॽइन्डुए, असे़ॽ चोप थोक चोन्डुए, मोसे़ॽ निवाहाङ्मि आदरमि लागिनोॽ चोन्डुए, इन्ढोङ्होङ चोप थोक चाघुबे़ॽ निवाहाङ ओहाक पिनुङ चोन्डुए। मोबा मे़न्चाघुबे़ॽसो निवाहाङमि आदरमि लागिनोॽ मे़न्चानुङ्नोॽ निवाहाङ ओहाङ पिन्डुए। 7 कानिङ असासो टाङ्बामि लागि हिक्सिङ्मानि, मोबा असासो टाङ्बामि लागिनोॽ सिसिङ्मानि। 8 कानिङ हिक्सिङ्माहोङ्सो परभुमि लागिनोॽ हिङ्इन्डिङ्मा, सिसिङ्माहोङ्सो परभुमि लागिनोॽ सिन्डिङ्मा। 9 मोडोगे़ॽ कानिङ सिमाबेॽसो हिङ्माबेॽसो परभुमिन्नोॽ ले़न्डिङ्मा। इगोमि लागिनोक खिरिस्ट सिनुङ फेरि हिङ्बोगा, खो हिङ्रिकजिमिनुङ सिघे़ॽपॽआ चोपजिमि परभु ले़ये। 10 मोडोगे़ॽ हे़निङे़ॽ टाङ्बामि वावानिसानुङ नानुसाजि इन्ढोङ आप्टिक टिन्डानुमे ? मोबा इन्ढोङ टाङ्बामि वावानिसानुङ नानुसाजि सिःक्चान्डानुमे ? न्यायमि याकपेॽ कानिङ चोप निवाहाङ्मि पोम्बेॽ येःप्मानोॽ खे़ये। 11 धारमिक नेॽचिराबेॽ इडोॽ साप्पॽआ ले़ये, “निवाहाङ्डे़ॽ लुये, ‘का चइबानोॽ हिङ्रिक ले़ङे, चोप याॽमिजि काङ्मि पोम्बेॽ टुम्रुक ठोइम्मे, चोबे़ॽ का निवाहाङ लुनुङ ओहाङ ले़म्मे’।” 12 मोडोगे़ॽ कानिङ चोबे़ॽ निवाहाङ्मि पोम्बेॽ टाङ्बामि लेखा पिमा खे़ये। चामे खाबेॽ असासो आप्टिक ए़ॽटिमे़ 13 मोडोगे़ॽ कानिङ असे़ॽसो इक्कोसे़ॽ हाइको आप्टिक ए़ॽटिमा। बोरु बिस्वासि वावानिसानुङ नानुसाजिमि बिस्वासि हिङ्मवाबेॽ ठोःक्सिघे़ॽठामनुङ हाप्सिघे़ॽठाम योम्बोक इमाङ्सो ले़टुङ्मानि लुनुङ बाचा ले़ःॽमा। 14 परभु येसुबेॽ बिस्वास ले़ःॽपॽआसे़ॽ के़ॽ इगो खा चइबानोॽ लेनुङे़, चामाहा खा इमाङ्सो खोम्टाङ्बा असुद्ध ले़ःॽनिबा, तर असे़ॽ मो थोक असुद्ध मिॽइन्डुए मोमि लागि असुद्धनोॽ लिये। 15 हे़ने़ॽ इमाङ चोन्डुए अथबा उङ्इन्डुए मोसे़ॽ हे़ने़ए़ वावानिसा, लङ्गाममि बिस्वासबेॽ बाधा ले़न्डुहोङ हे़ने़ॽ माहाजि नम्नम ले़टुजिने। इन्ढोङ्होङ खिरिस्ट सिनुङ मो निसा हिङ्मवा पिटुए, हे़ने़ॽ चाबॽआ खाडे़ॽ मोमि हिङ्मवा नास मे़लिरो। 16 हे़ने़ॽ नुबा मिॽनुङ ले़ःॽपॽआ खा हाइखाजिडे़ॽ मङे़ॽमा ले़ये मे़लुडोक्जिरो। 17 इन्ढोङ्होङ निवाहाङ्मि राज्य चाहिँ चामानुङ उङ्मे खाबाङ चुप्मे़ ने़ॽनि, बोरु पबित्रा होङ्निवाबाङ निवाहाङ्मि धारमिक खा, सान्तिनुङ हाङ्हाङ लिनुङ पेम्मे खा ले़ये। 18 इडोॽ खिरिस्टमि सेवा ले़ःॽखुबा याॽमि निवाहाङ्डे़ॽ नेन्जोन्डुए, मोबा याॽमिजिबाङ्सो ओहाक चुप्मिन्डुए। 19 मोडोगे़ॽ कानिङे़ॽ इक्कोसे़ॽ हाइको बिस्वासबेॽ वाबुक्माराप्मे खानुङ सान्ति पिमे खाबेॽरेॽ सानिङ निवा टिमा। 20 निवाहाङ्मि योम्बोक चामे उङ्मे खाडे़ॽ नासि ए़ले़टानुमे। चोप चामाहा खा सुद्ध ले़हा, तर कानिङे़ॽ चाबॽआ खाडे़ॽ हाइखाजि निवाहाङ्मि रामबेॽ राम्मामि बाधा मे़ले़टुरो। 21 सा चामाबेॽ, इ उङ्माबेॽ, हाइखा बिस्वासि वावानिसानुङ नानुसाजि निवाहाङ्मि रामबेॽ राम्मामि बाधा पिन्डुएहोङ माहा खा ए़च्चामे़, ए़उङ्मानुङ ए़ले़ःॽमानोॽ नुबा लिये। 22 मोडोगे़ॽ चामे, उङ्मे खामि टुम्बेॽहा खा निवाहाङ्नुङ हे़ने़ए़ रुम्बेॽनोॽ युक्से। टाङ्बे़ॽ नुबा मिॽपॽआ योम्बोक ले़ःॽखुबा याॽमिडे़ॽ टाङ्बा आप्टिक टिसुनिबा, मो याॽमिडे़ॽ आसिस चुप्मिन्डुए। 23 तर असे़ॽ टाङ्बे़ॽ चाबॽआ खाबेॽ सङ्क ले़ःॽसाङ चोन्डुए, खो आप्टिकनुङ्मा लिये, इन्ढोङ्होङ बिस्वास मे़ॽनिङ ले़ःॽपॽआ चोप योम्बोक पाप लिहा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.