रोमि 13 - याम्फुसासकमि अधिनबेॽ पेम्मा 1 चोप याॽमिजि सासकमि अधिनबेॽ पेम्मा खे़ये, चोप अधिकार निवाहाङ्बाङ्नोॽ लेङ्इये। सरकारबेॽ योम्बोक ले़ःॽखुबाजि चोप निवाहाङ्डे़ॽनोॽ युङ्बॽआजि ले़म्मे। 2 मोडोगे़ॽ सासकमि बिरोध ले़ःॽखुबाजिडे़ॽ निवाहाङ्मिनोॽ बिरोध ले़न्डुजे। असा असे़ॽ बिरोध ले़न्डुजे माहाजिडे़ॽ दन्डा चुप्मिन्डुजे। 3 इन्ढोङ्होङ नुबा योम्बोक ले़ःॽखुबाजि सासकबाङ किस्सिमा पाप्निबा, तर मङे़हा योम्बोक ले़ःॽखुबाजि चाहिँ किस्सिमा खे़म्मे। इमा हे़निङ सासकनुङ मे़ङ्किस्सिरेॽ हिङ्मा मिङ्इन्डानिङे ? मोडोॽ मिङ्इन्डानिङ्होङ नुबा योम्बोक ले़टानुमे, मोबा हे़निङे़ॽ माहाजिबाङ ओहाक चुप्मिन्डानुमे। 4 इन्ढोङ्होङ माहा सासकजि हे़निङ्मि लागि नुबा ले़ःॽमामिनोॽ निवाहाङ्डे़ॽ युङ्इटुजे। तर मङे़हा योम्बोक ले़न्डानिङ्होङ चाहिँ खोजिनुङ किस्सिसानिङे, इन्ढोङ्होङ निवाहाङ्डे़ॽ दन्डा पिमे अधिकार खोजि पिटुजे। मङे़हा योम्बोक ले़ःॽखुबा चोपजि दन्डा पिमामि लागि निवाहाङ्डे़ॽ खोजि युङ्इटुजे। 5 मोडोगे़ॽ दन्डाबेॽ ए़सिॽमामि लागिरेॽनोॽ ने़ॽनि, इडोॽ ले़ःॽमा नुबा ले़ये लुनुङ टाङ्बामि निवे़ॽ मिॽनुङ माहा सासकजिमि अधिनबेॽ पेम्मा खे़ये। 6 मोडोगे़ॽसो हे़निङे़ॽ मे़क्चेन फोङ्मे़ॽनिङ्सिन्डानुमे। इन्ढोङ्होङ निवाहाङ्डे़ॽ सासकजि योम्बोक ले़ःॽमामि लागिनोॽ युङ्इटुजे, निवाहाङ्डे़ॽ पिबॽआ योम्बोक माहाजिडे़ॽ ले़ःॽमे़ॽनिङ्सिन्डुजे। 7 फोङ्मा खे़हा चोप खालहा मे़क्चेन फोक्सानुमे। हे़निङ्मि सासक मे़क्चेन फोक्सानुमेनुङ हाइको देसबाङ इन्जे़ॽपॽआ थोकमि मे़क्चेन फोक्सानुमे। मोडोक्नोॽ आदर ले़ःॽमा खे़हा याॽमिजि आदर ले़टानुमे, इजेत ले़ःॽमा खे़हा याॽमिजि इजेत ले़टानुमे। हाइखाजि नम्नम ले़ःॽमे खा 8 हे़निङ्मि रुम्बेॽ इक्कोसे़ॽ हाइको बेॽलो नम्नम ले़ःॽखुसे़ॽचुनुङ नम्नममि सिङि चाहिँ टिसानुमे, तर हाइखा खामि सिङि ने़ॽनि। इन्ढोङ्होङ हाइखाजि नम्नम ले़ःॽखुबाडे़ॽ धारमिक नियम पुरा ले़न्डुए। 9 धारमिक नियमबेॽ “हे़ने़ॽ बेभिचार ए़ले़ःॽमे, हे़ने़ॽ याॽमि ए़सेॽमे, हे़ने़ॽ ए़ॽखुमे़, लोभ ए़ले़ःॽमे” लुनुङ आग्या पिबॽआ ले़ये। इघा चोप आग्या “टाङ्बा नम्नम ले़टिडोक्नोॽ टाङ्बामि पेन्लागामजि नम्नम ले़टानुमे” लुमे आग्याबेॽनोॽ टुये। 10 नम्नम ले़ःॽखुबे़ॽ हाइखाजिमि नोक्सानि ले़टुनिबा, मोडोगे़ॽनोॽ नम्नम ले़ःॽमा लुबॽआ चाहिँ धारमिक नियम पुरा ले़ःॽमे खा ले़ये। 11 इडोक्हा याक लेन्सिॽ पोरोइटहा लुनुङ हे़निङे़ॽ नुरोॽ लेन्डानुम। हागो इम्मासिॽवाबेॽ टुडिडोॽ ए़ले़टानिङे, इन्ढोङ्होङ याक्लो कानिङे़ॽ बिस्वास ले़ःॽपॽआ बेलाबाङ्सो आयु कानिङ्मि मुक्ति के़क्पेॽ लेम्बेटे़। 12 हागो सेन्जुगुप रुक्खे़ॽसिॽ पोरोइटे़, नम टे़ॽसिॽपोरोइटे़। मोडोगे़ॽ माहा सेन्जुगुप्पेॽ ले़ःॽमे योम्बोक लेप्पेनुङ जोतिमि तिरिङ्गाजिडोॽ पोरोक्मा खे़ये। 13 कानिङ उज्यालोबेॽ टुडिडोॽ होसियार ले़ःॽनुङ पेम्मा। टाङ्बा इमाङ ले़ःॽमा मिॽइये मोडोक्नोॽ ले़ःॽखुबा ए़लिमा, इडे़ॽ सेॽखे़ॽखुबा ए़लिमा, बेभिचारि ए़लिसि, नासि लिबॽआ निवानुङ्हा ए़लिसि, काक्खुसे़ॽचुमानुङ चेजेवा ले़ःॽमा लेप्पेसामे। 14 तर हागोएम्बाङ परभु येसु खिरिस्टमि बानि बेहोरानुङ्मा हिङ्मवा हिङ्मा। मोबा कानिङ्मि पापि निवे़ॽ मिॽपॽआ बानिबेहोरा लेॽपेमा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.