रोमि 12 - याम्फुहिङ्रिक बलिदान 1 मोडोगे़ॽ के़हा वावानिसानुङ नानुसाजि, निवाहाङ्डे़ॽ हे़निङ बेॽलो नम्नम ले़ःॽपॽआसे़ॽ बिन्ति ले़निम्ने़। हे़निङ टाङ्बामि हिङ्मवा पबित्रानुङ निवाहाङ्डे़ॽ नेन्जामारोमा हिङ्रिक बलिदान चेॽटिसानुमे। हे़निङ्मि होङ्निवाडे़ॽ ले़ःॽमा खे़ये चाइबमा ओहाङ चाहिँ इगोनोॽ ले़ये। 2 हे़निङ मक्खाम्डेमबेॽहा याॽमिजि खाङ्नुङ खोजिडोॽ ए़लिसानिङे, तर टाङ्बामि निवा होङ्सिॽयुरा चोङ लिनुङ याक्लोहा आनिबानि लेडानुमे। मोडोॽ ले़टानुमहोङ निवाहाङ्डे़ॽ हे़निङ्बेॽ ले़ःॽमा नेन्जाबॽआनुङ पक्का योम्बोक इमाङ ले़ये लुनुङ लेहेन्डानुमे। 3 निवाहाङ्डे़ॽ का ले़ःॽपॽआ अनुग्रहाबाङ के़ॽ हे़निङ लुनिम्ने़, हे़निङे़ॽ टाङ्बा इन्डोक्मा मिॽमा खे़ये, मोबाङ बेॽए ए़ॽमिडानुमे, तर निवाहाङबेॽ बिस्वास ले़ःॽखुबाजि पिबॽआ बरदान इन्डोक बेॽलो टुये मोडोक्रेॽ मिडानुमे। 4 कानिङ्मि हिङाबेॽ बेॽलो अङ्ग टुहा, मोबा माहा चोप अङ्गमि योम्बोक इक्कोनोॽ ले़ःॽनिबा। 5 मोडोक्नोॽ कानिङ्सो बेॽलो टुन्डिङ्मा, तरसो खिरिस्टबेॽ इक्को हिङा ले़न्डिङ्मे, कानिङ इक्कोमि अङ्ग हाइकोमिसो अङ्ग ले़न्डिङ्मा। 6 मोडोगे़ॽ निवाहाङ्मि अनुग्रहाडे़ॽ कानिङ पिबॽआ खोरो खोरोहा बरदानमि योम्बोक ले़ःॽमा, अगमबानिमि बरदान चुप्खुबे़ॽ निवाहाङ्डे़ॽ पिबॽआ बिस्वासबाङ अगमबानि ले़टुरो। 7 याॽमिजि सहायोग ले़ःॽमे बरदान चुप्खुबे़ॽ सहायोगमि योम्बोक नुरोॽ ले़टुरो, सिक्छे पिमे बरदान चुप्खुबे़ॽ नुरोॽ सिक्छे पिमे योम्बोक ले़टुरो। 8 अरति पिमे बरदान चुप्खुबे़ॽ नुरोॽ अरति पिसुरो, दान पिमे बरदान चुप्खुबे़ॽ साप्थाङ्मानुङ दान पिसुरो, अगुवामि बरदान चुप्खुबे़ॽ पुरा निवा टिनुङ योम्बोक ले़टुरो, नम्नावा ले़ःॽमे बरदान चुप्खुबे़ॽ साप्थाङ्मानुङ याॽमिजि नम्नावा ले़टुजिरो। चाइबमा नम्नावामि खा 9 हे़निङे़ॽ नम्नम ले़ःॽमाबेॽ याॽमिजि खाङ्मुमामि लागिरेॽनोॽ ने़ॽनि, तर निवा होङ्सिॽयुरा चाइबमा नम्नम ले़टानुमे। हाम्बे खा मङे़हा ले़ये मो लेॽपेनुङ नुबा खाबेॽ सानिङ निवा टिसानुमे। 10 इक्कोसे़ॽ हाइको वावानिसाजि नम्नम ले़टिडोक्नोॽ नम्नम ले़टानुमे। टाङ्बाबाङ्सो बेॽलो हाइखाजि आदर ले़टानुमे। 11 मे़म्पाङ्सुरेॽ सानिङ योम्बोक ले़टानुमे। पबित्रा होङ्निवाबेॽ पाङ्नुमानुङ परभुमि योम्बोक ले़टानुमे। 12 हे़निङे़ॽ निवाहाङ्बाङ चुप्पॽआ आसाबेॽ हाङ्हाङ ले़टानिङे, खेः आङ्मा सिॽमाबेॽ योङ आङ्हेखुबा लिनुङ सानिङ पारथना ले़टानुमे। 13 निवाहाङ्मि योम्बोक ले़ःॽखुबाजि खाँचोबेॽ सिॽमाबेॽ सहायता ले़टानुमे, चाबाङ्जिमि नुरोॽ सेवा ले़टानुमे। 14 हे़निङ चुङ्जाखुबाजि चापहिमामि साटो आसिस पिसानुमे। 15 मोडोक्नोॽ साप्थाङ्घुबाद जिनुङ साप्थाक्सानिङे, हाःप्खुबाजिनुङ हाबानिङे। 16 चोपनुङ टोङ्जासानिङे, असानुङ्सो बेॽए ए़रे़क्सानिङे, चोप याॽमिजिनुङ ए़डेम्मा लिसानिङे मोबा चोप खा लेघुबा ए़रेक्सानिङे। 17 हे़निङ मङे़ॽमा ले़ःॽखुबाजि हे़निङे़ॽसो मोडोक्नोॽ ए़ले़टानुमे। हाम्बे खा चोप याॽमिजिडे़ॽ नुबा ठरबा ले़ए़टुजे मो खाबेॽरेॽनोॽ निवा टिसानुमे। 18 हेःरो चोप याॽमिजिनुङ टोङ्जासानिङे। 19 के़हा वावानिसानुङ नानुसाजि, हे़निङ मङे़हा ले़ःॽखुबाजिनुङ साटो ए़लासानुमे, इगो योम्बोक निवाहाङ्नोॽ ले़ःॽमेॽटानुमे, इन्ढोङ्होङ धारमिक नेॽचिराबेॽ निवाहाङ्डे़ॽ इडोॽ लुये, “साटो लामे योम्बोक काङ्मि ले़ये, के़ॽनोॽ साटो लानुङे।” 20 बोरु, “हे़ने़ए़ सतुरजि साक्मेन्जा टुमिहोङ, खो चामा पिसे, खो वाइॽमे़ॽ सिटुएहोङ योङा उङ्मा पिसे, इन्ढोङ्होङ मोडोॽ ले़टुहोङ हे़ने़ॽ खो ङेसिमाबेॽ सिॽमेन्डुए।” 21 मङे़हा खाडे़ॽ हे़निङ मे़हेजोसुरो, बोरु माहा मङे़हा खा चाहिँ भलाइ ले़ःॽनुङ हेजासानुमे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.