रोमि 11 - याम्फुइस्राएलिजिमि पापनुङ निवाहाङ्मि नम्नावा 1 मोडोक्होङ इमा निवाहाङ्डे़ॽ इस्राएलिजि लेॽपेटुजे ? ने़ॽनि, इन्ढोङ्होङ कासो अब्राहाममिनोॽ पसा ले़ङे, बेन्यामिन कुलमि इक्को इस्राएलि ले़ङे। 2 निवाहाङ्डे़ॽ याक्लोएबाङ्नोॽ लेबॽआ टाङ्बामि याॽमिजि लेडुजिनि। एलियामि टुम्बेॽ पबित्रा धारमिक नेॽचिराबेॽ लुबॽआ खा हे़निङे़ॽ इमा लेसानुम्ने ? खोसे़ॽ इस्राएलिजिमि बिरोधबेॽ निवाहाङ्नुङ इडोॽ लुबॽआ ले़टे़, 3 “हे परभु, हे़ने़हा ओहाङ ले़ठाम थाना योबेटुजे, अक्खाजिडे़ॽ हे़ने़हा अगमबक्ताजि सेॽएटुजे, हागो कारेॽनोॽ एङ्इटिङे, कासो माहाजिडे़ॽ सेॽनेमामि योक्मे़ॽनिङ्सिम्मे।” 4 तर निवाहाङ्डे़ॽ खो लुसु, “के़ॽ एच्चि हजार याॽमिजि काङ्मि लागि कोयुङ्इटुङ्हाजि, माहाजिडे़ॽ बाल निङ्मा चापमि पोम्बेॽ टुम्रुक ठोःक्नुङ सेवा मुसुजिनि।” 5 मोडोक्नोॽ आयुसो निवाहाङ्मि अनुग्रहाबाङ से़न्बॽआ इस्राएलि याॽमिजि हागोसो टुम्मे। 6 इगोगो अनुग्रहाडे़ॽ लिबॽआ ले़ये, धरमि योम्बोक ले़ःॽनुङ लिबॽआ ने़ॽनि, माहाजिडे़ॽ ले़ःॽपॽआ योम्बोकडे़ॽ लिबॽआहोङ्गो अनुग्रहा इनामा लिसे़। 7 मोडोगे़ॽ इडोॽ लुहेन्डुङ्मे़, इस्राएलिजिडे़ॽ निवाहाङ्मि पोम्बेॽ धरमि लिमा योक्माबेॽसो, माहाजि मे़लिहेसामि, तर निवाहाङ्डे़ॽ से़न्बॽआजिरेॽ धरमि लिसामि। हाइखा इस्राएलिजि चाहिँ छॽइये निवानुङ्हा लिसामि मोबा निवाहाङ्मि खा मे़ङ्खेप्सुजि। 8 धारमिक नेॽचिराबेॽसो इडोॽ साप्पॽआ ले़ये, “निवाहाङ्डे़ॽ अक्खाजि इमाङ्सो मे़लेघुबा कुबा होङ्निवा पिटुजे, ए़ॽनिबा मिक पिटुजे, खेम्निबा ने़ॽए़क पिटुजे, चइबानोॽ माहाजि आयुरोसो मोडोक्हाजिनोॽ ले़म्मे।” 9 इडोक्नोॽ हाङ्बा दाउदडे़ॽसो लुटुए, “अक्खाजिमि लागि भोज-भत्तेर यिम्माङ्नुङ चिम्लुङ्डोॽ लिरो। माहाजि खडोलोम्बाबेॽ सिॽमिरो, मो चाहिँ दन्डा पिघुबा खा लिरो। 10 माहाजिमि मिगे़ॽ खाङ्नोॽ मे़ङ्खाङ्हेरोमा सेन्जुगुपडे़ॽ टे़गुजिरो, मोबा माहाजिमि सुम्रिक सानिङ्मि लागि खोक्टिॽखे़ॽलो।” 11 मोडोगे़ॽ के़ॽ हे़निङ सिम्इनिम्ने़, “इमा अक्खाजिमि सराङ ठोःक्नुङ मे़पुक्हेरोनोॽ काङ्इटामे ?” मोडोॽको ने़ॽनि, तर इस्राएलिजिडे़ॽ बिस्वास मे़ले़ःॽपॽआसे़ॽ खोजिडे़ॽ चुप्मा खडे़ मुक्ति अयहुदि जातिजिडे़ॽ चुप्टुजि। मो खाङ्नुङ माहा इस्राएलिजिडे़ॽ चेजेवा ले़टुजिरो लुनुङ इडोॽ लिटे़। 12 तर यहुदिजिडे़ॽ बिस्वास मे़ले़ःॽपॽआसे़ॽ मक्खाम्डेमबेॽ बेॽएम्मा आसिस लेस्सा, मोबा अयहुदिजिडे़ॽ मुक्ति चुप्टुजि, हागो यहुदिजि निवाहाङ्बेॽ बिस्वास ले़टुजिहोङ छना इन्डोक आसिस लेङ्इ होला। अयहुदि जातिजिमि लागि मुक्ति 13 हागो के़ॽ हे़निङ अयहुदि जातिजि लुनिम्ने़, का चाहिँ हे़निङ अयहुदिजिमि लागि से़न्बॽआ खिरिस्टमि एप्पा चोङ्सा ले़ङे। यहुदिजिमि पोम्बेॽ के़ॽ इगो योम्बोक छना बेॽए मिॽइनुङे। 14 इडोक्मा सुसमाचारमि योम्बोकडे़ॽ ले़ःॽमेॽ, के़हा यहुदि जातिजि चेजेवा पुःक्मेॽनुङ माहाजिबाङ कोहि कोहिजिडे़ॽ निवाहाङ्बेॽ बिस्वास ले़न्डुजेन्डे ? 15 इन्ढोङ्होङ यहुदिजि निवाहाङ्बाङ ओः लिमाबेॽ इन्डोक बेॽलो अयहुदिजि निवाहाङ्बेॽ टेआबामि लुनुङ लेसुजिहोङ, यहुदिजि निवाहाङ्बेॽ टेआप्मिहोङ्गो छना सिघे़ॽपॽआबाङ हिङ्बोक्टिडोॽ लिनेन्डे ? 16 चरेपा रेप्मामि चोःक्पॽआ खाॽमिबाङ याक्लोए भाग निवाहाङ्मि थानाबेॽ चेॽटिमाबेॽ माहा चोप खाॽमिनोॽ पबित्रा लिये। मोडोक्नोॽ सिङ्बुमि साम पबित्रा ले़ःॽहोङ मोमि चोप हक्काम्बानोॽ पबित्रा लिहा। 17 मोडोक्नोॽ इन्डोक यहुदि जातिहा याॽमिजि नुबा जैतुनमि डाङ्बाङ चेन्नुङ राप्पेबॽआडोक्नोॽ लिटामे। तर हे़निङ अयहुदिजि चाहिँ नाम्भुङ्लाबेॽए जैतुन ले़टानिङ्सो खिमबेॽ रिःॽपॽआ जैतुनमि हक्काम्बाबेॽ काम्डिबॽआडोॽ लिटानिङे। हागो हे़निङ्सो मो नुबा जैतुनमि राडाङ्बाङ सक्ति पिघुबा हिङ्मवामि योङा चुप्मिन्डानुमे। 18 मो चेन्नुङ राप्पेबॽआ हक्काम्बाडोॽहा यहुदिजिमि पोम्बेॽ हे़निङ काम्डिबॽआ हक्काम्बाजिडे़ॽ बेॽहा खा ए़इःसानुमे। इगो खा लेसानुमे, हक्काम्बा समबाङ बेॽए ने़ॽनिबा, तर समगोरे बेॽए ले़ये। 19 हे़निङ कान्डानिङ होला, “कानिङ कलमि काम्डिडोॽमा लुनुङ्नोॽ माहा हक्काम्बाजि चेम्बॽआ ले़टे़।” 20 इगो खा चाइबमा ले़ये, माहाजिडे़ॽ बिस्वास मे़ले़ःॽपॽआसे़ॽ माहा हक्काम्बाजि चेन्नुङ राप्खडामि। हे़निङे़ॽ चाहिँ बिस्वास ले़ःॽपॽआसे़ॽ निवाहाङ्डे़ॽ कलमि काम्डिटे़। इगो खाबेॽ काङायोङ्बा ए़लिसानिङे, तर होसियार ले़टानिङे। 21 इन्ढोङ्होङ निवाहाङ्डे़ॽ नुबा हक्काम्बानोक्सो राप्पेसुहोङ हे़निङ राप्पेमागो छना इमासो मिॽनिबा। 22 मोडोगे़ॽ निवाहाङ नम्नावानुङ्मासो ले़ये मोबा निवा छॽइयेसो ले़ये लुमे खा लेयुक्सानुमे। खोबेॽ बिस्वास मे़ले़ःॽखुबाजिनुङ नम्नावा मे़ॽनिङ बेबहार ले़न्डुजे। खोबेॽ बिस्वास ले़ःॽखुबाजि नम्नावानुङ्बा बेबहार ले़न्डुजे, ने़ॽनिहोङ हे़निङ्सो मो हक्काम्बाडोक्नोॽ चेन्नुङ राप्पेये। 23 माहा यहुदिजिडे़ॽसो बिस्वास लेःॽनुङ निवाहाङ्बेॽ टेआप्मिहोङ्गो खोसे़ॽ कलमि हिःक्इन्डुजे, इन्ढोङ्होङ निवाहाङ्डे़ॽ मोडोॽ ले़ःॽहेन्डुए। 24 हे़निङ अयहुदिजि चाहिँ नाम्भुङ्लाबेॽहा मङे़ॽमा जैतुनमि हक्काम्बाजिडोॽ ले़न्डानिङ्रोसो निवाहाङ्डे़ॽ नुबा जैतुनमि डाङ्बेॽ कलमि काम्डिटानिङे़। यहुदिजि चाहिँ नुबा जैतुममि हक्काम्बाडोॽ ले़म्मे, मोडोगे़ॽ खोजिगो निवाहाङ्डे़ॽ याक्लोए डाङ्बेॽ छना ने़ःक्चा कलमि हिःक्हेन्डुजे। चोपसोक्पेॽ निवाहाङ्मि अनुग्रहा 25 वावानिसानुङ नानुसाजि, हे़निङ टाङ्बा काङायोङ्बा ए़लिसानिङे लुनुङ इगो इक्को लेमा छॽइये खा लेसानुमे लुमा मिॽइनुङे। मो लेसानुमहोङ हे़निङ टाङ्बामि खाबेॽ काङायोङ्बा ले़टानुम्नि। मो लेमा छॽइये खा लुबॽआ चाहिँ बिस्वासबेॽ इन्डोक लेम्मा खे़म्मे अयहुदिजि मे़लेम्मिरोठोक बेॽलो यहुदिजिमि निवा छाक्मेन्डुजे। 26 मोबा ए़क्साङ चोप इस्राएलि जातिजि हिङ्इम्मे। धारमिक नेॽचिराबेॽ इडोॽ साप्पॽआ ले़ये, “सियोनबाङ मुक्तिदाङ्बा लेङ्इये, याकुबमि बङ्सजि पापि योम्बोकबाङ टेआप्मिन्डुजे।” 27 मोबा परभुडे़ॽ लुये, “माहाजिमि पाप आम्लाङ पिनुङ खोजिनुङ हेन्ज्रुङ पुरा ले़नुङे।” 28 इस्राएलिजि निवाहाङ्मि सतुरजि ले़म्मे, इन्ढोङ्होङ माहाजिडे़ॽ सुसमाचारबेॽ बिस्वास मे़ले़टुजि। मोडोगे़ॽ हे़निङ अयहुदिजिमि लागिगो नुबानोॽ लिसा। हागोरोसो इस्राएलिजि निवाहाङ्डे़ॽ से़म्बॽआ याॽमिजि ले़म्मे, मोबा निवाहाङ्डे़ॽ खोजिमि टुबालाबा अब्राहाम, इसहाक, याकुबनुङ हेन्ज्रुङ हे़म्बॽआसे़ॽ आयुरोसो निवाहाङ्डे़ॽ खोजि बेॽलो नम्नम ले़न्डुजे। 29 इन्ढोङ्होङ निवाहाङ पाबाडे़ॽ पिबॽआ बरदाननुङ के़ःॽपॽआ खा इन्डोक्पेॽसो खोसे़ॽ मिन्डेडुनि। 30 याक्लो इक्खेॽ हे़निङ अयहुदिजिडे़ॽसो इडोक्नोॽ निवाहाङ्मि आग्या पालना मे़ले़टानुम, तर आयु इघा इस्राएलिजिडे़ॽ खोमि आग्या पालना मे़ले़ःॽपॽआसे़ॽ हे़निङे़ॽ निवाहाङ्मि अनुग्रहा चुप्मिटानुमे। 31 मोडोक्नोॽ आइरो इस्राएलिजि चाहिँ लुबॽआ मे़ङ्खेम्खुबा ले़ःॽमिहोङ्सो अयहुदिजिडे़ॽ चुप्पॽआ मो नम्नावा खाङ्नुङ खोजि पाप योम्बोक लेॽनुङ टेआप्इम्मे। 32 इन्ढोङ्होङ चोप याॽमिजिडे़ॽ नम्नावा चुप्टुजिरो लुनुङ निवाहाङ्डे़ॽ माहाजि लुबॽआ मे़ङ्खेम्खुबाजि योङ्मेॽटुजि। निवाहाङ्मि ओहाङ्नुङ आदर 33 चइबानोॽ निवाहाङ्मि निवानुङ सक्ति इन्डोक बेॽलो! मोबा खोमि निवानुङ सक्ति लेमानोॽ छॽइये! खोमि न्याय इन्डोक महान ले़ये खोमि राम लेमा छॽइये। 34 निवाहाङ्मि निवा असे़ॽ लेहेन्डुए ? खो असे़ॽ सल्लाह पिहेन्डुए ? 35 असे़ॽ इन्डोक्पेॽ निवाहाङ इमाङ थोक पिटुए, निवाहाङ्डे़ॽ असामि इमाङ थोक टेबेॽमा खे़ये ? 36 इन्ढोङ्होङ चोप थोकको खोसे़ॽनोॽ टोङ्बॽआ ले़हा। माहा चोप थोक खोबाङ, खोमि लागिनोॽ ले़ये। खोमिनोॽ सानिङ ओहाङ लिडुङ्घे़ॽरो! आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.