रोमि 10 - याम्फु1 के़हा वावानिसानुङ नानुसाजि, इस्राएलिजिडे़ॽ छुट्कारा चुप्टुजिरो लुनुङ निवाबाङ्नोॽ मिॽइनुङे। मोडोगे़ॽ खोजि हिङ्मिरो लुनुङ सानिङ निवाहाङ्नुङ पारथना ले़नुङे। 2 माहाजिडे़ॽ निवाहाङ्मि सेवागो सारोनोॽ ले़ःॽमा योॽइन्डुजे लुमे खा के़ॽ लेनुङे़, तर इन्डोॽ ले़ःॽमा खे़ये लुमे चाइबमा निवा चाहिँ माॽआये। 3 इन्ढोङ्होङ निवाहाङ्मि पोम्बेॽ इन्डोक्टे धरमि लिमे लुमे खा खोजिडे़ॽ ले़ख्खो मे़ले़टुजि, बोरु खोजिटाङ्बामि पाराबाङ धरमि लिमायोक्माबेॽ निवाहाङ्डे़ॽ नेन्जबॽआ धारमिक लिमे खामि अधिनबेॽ मे़म्पेनामि। 4 खिरिस्टबेॽ बिस्वास ले़ःॽखुबाजि बिस्वासबाङ्नोॽ धरमि लिम्मे लुबॽआसे़ॽ, मो धारमिक नियम खिरिस्टडे़ॽ पुरा ले़टु। चोपमि लागि छुट्कारा 5 “धारमिक नियम पुरा पालना ले़ःॽखुबा याॽमि मोबाङ्नोॽ धरमि लिनुङ हिङ्इये” लुनुङ मोसाडे़ॽ साप्मिटुए। 6 बिस्वासबाङ निवाहाङ्मि पोम्बेॽ धरमि लिम्मे लुमे खामि टुम्बेॽ धारमिक नेॽचिराडे़ॽ इडोॽ लुये, “हे़ने़ॽ निवाहोङ्सिॽयु इडोॽ ए़ॽलुसे, ‘मिन्डु थाङ्सिरिबाङ खिरिस्ट मिॽमु लाःउक्मामि असाडे खे़ॽए़टे़’ ?” 7 मोबा टाङ्बामि निवाबेॽ इडोक्सो ए़क्कासानिङे, “खिरिस्ट मिन्डु लागेॽमामि मिॽमु पातालबेॽ असाडे युटे़ ?” 8 बोरु इडोॽ लुये “निवाहाङ्मि बचन हे़निङ्मि के़क्पेॽनोॽ टुये, हे़निङ्मि याबुकपेॽनोॽ टुये, हे़निङ्मि निवाबेॽनोॽ टुये।” कानिङे़ॽ बिस्वासमि बचनमि टुम्बेॽ लुमायोक्पॽआ सुसमाचार इगोनोॽ ले़ये। 9 मोबा हे़निङे़ॽ येसुनोॽ परभु लुनुङ याबुगे़ॽ लुसानुमहोङ्नुङ खो सिबॽआबाङ निवाहाङ्डे़ॽ हिङ्बोगु लुनुङ टाङ्बामि निवाबाङ बिस्वास ले़टानुमहोङ, हे़निङे़ॽ मुक्ति चुप्मिन्डानुमे। 10 इन्ढोङ्होङ याॽमिडे़ॽ टाङ्बामि निवाबाङ बिस्वास ले़टुहोङ, खो आप्टिक मे़ॽनिङ्मा लिये, मोबा खोसे़ॽ टाङ्बामि याबुगे़ॽ बिस्वास ले़नुङे लुन्डुहोङ मोसे़ॽ मुक्ति चुप्मिन्डुए। 11 धारमिक नेॽचिराडे़ॽ इडोॽ लुये, “असे़ॽ येसु खिरिस्टबेॽ बिस्वास ले़न्डुए खो इन्डोक्पेॽसो ङेसिमाबेॽ सिॽनिबा।” 12 हागो यहुदिजिनुङ अयहुदिजिबेॽ इमाङ्सो खोरो माॽआये। चोपमि निवाहाङ इक्कोनोॽ ले़ये। खोबेॽ बिस्वास ले़ःॽखुबाजि चोप खोसे़ॽ बेॽलो आसिस पिन्डुजे। 13 इन्ढोङ्होङ “परभुमि निङ्मि पुकारा ले़ःॽखुबा चोपजिडे़ॽ मुक्ति चुप्इन्डुजे।” 14 तर निवाहाङ्बेॽ बिस्वास मे़ले़ःॽलेॽ खोमि पुकारा इन्डोक्टे ले़ःॽमे ? असामि टुम्बेॽ इमाङ्सो मे़ङ्खेम्डिॽहोङ खोबेॽ इन्डोक्टे बिस्वास ले़ःॽमे ? खोमि टुम्बेॽ असे़ॽसो परचार मे़ले़ःॽलेॽ इन्डोक्टे खेम्मे ? 15 असे़ॽ मे़म्पाङ्लेॽ इन्डोक्टे परचार ले़ःॽमे ? धारमिक नेॽचिराडे़ॽ लुये, “सुसमाचार परचार ले़ःॽखुबाजिमि सराङ इन्डोक काम्नुहा” 16 तर मो सुसमाचार खेम्घुबाजिबेॽ बेॽलोडे़ॽ बिस्वास मे़ले़टुजि, अगमबक्ता यसैयाडे़ॽ लुटुए, “हे परभु, कानिङे़ॽ परचार ले़ःॽपॽआ खाबेॽ असे़ॽटे बिस्वास ले़टुए ?” 17 बिस्वास चाहिँ खेम्बॽआ खाबाङ्नोॽ लेङ्इये, मो खा चाहिँ खिरिस्टमि परचारबाङ लेङ्इये। 18 मोडोक्होङ इमा माहाजिडे़ॽ सुसमाचार मे़ङ्खेम्डिॽटुजे ? मोडोॽ ने़ॽनि, माहाजिडे़ॽ नुरोॽ खेम्इटुजे। “माहाजिडे़ॽ परचार ले़ःॽपॽआ खा मक्खाम्डेम इॽठुप मुॽइटे़। मोबा माहाजिडे़ॽ परचार ले़ःॽपॽआ बचन मक्खाम्डेममि चोप ठाउँबेॽनोॽ रुॽइटुए।” 19 मोडोक्होङ इमा इस्राएलिजिडे़ॽ इगो सुसमाचार मे़लेसुजे ? लेमागो लेसुजि, तर लेबॽआ खा मे़ले़टुजि। इगो खा निवाहाङ्डे़ॽ मोसाबाङ खोजि लुबॽआ ले़टे़, “असाजि इक्को जातिनोॽ मे़ले़टामे, माहाजि के़ॽ से़नुङ्जिङ के़ॽ हे़निङ माहाजि खाङ्नुङ चेजेवा ले़ःॽमेनुङ्हाजि, उम्बरिङ जातिजिबेॽ इगो मुक्ति खाङ्मुनुङ के़ॽ हे़निङ सुरिक पुःक्मेनिम्ने़।” 20 निवाहाङ्डे़ॽ लुबॽआ खा यसैया अगमबक्ताडे़ॽ हागोसो मे़ङ्किस्सिॽरेॽ लुये, “का योक्मानोॽ मे़योक्खुबाजिडे़ॽ का चुप्मिटामे, मोबा का योक्मानोॽ मे़योक्खुबाजिमि पोम्बेॽ का खाङ्मुसिङ”। 21 तर इस्राएलिजिमि टुम्बेॽ निवाहाङ्डे़ॽ इडोॽ लुये, “के़ॽ लुबॽआ मे़ङ्खसिखुबाजि मोबा काङ्मि बिरोध ले़ःॽखुबा याॽमिजि के़ःॽसाङ खोजिमि लागि के़ॽ लेल्ले हुक खिक्सुङ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.