रोमि 1 - याम्फुपावलडे़ॽ सेवायो लुबॽआ 1 येसु खिरिस्टमि सेउते, खोमि एप्पा चोङ्सा लिमामि लागि के़ःॽपॽआ का पावलडे़ॽ इगो पत्रा साप्मे़ॽनिङ्सिनुङे़, मोबा का निवाहाङ्मि सुसमाचार परचार ले़ःॽमामि लागि से़ङ्इटे़। 2 मो सुसमाचारमि टुम्बेॽ निवाहाङ्डे़ॽ याक्लोएम्बाङ्नोॽ खोमि अगमबक्ताजिबाङ पबित्रा धारमिक नेॽचिराबेॽ हेन्ज्रुङ हे़म्बॽआ ले़टे़। 3 इगो सुसमाचार चाहिँ निवाहाङ्मि पसा खिरिस्टमि टुम्बेॽ टुये। येसु हिङाबेॽ चाहिँ हाङ्बा दाउदमि बङ्सबेॽ टोगा। 4 पबित्रा होङ्निवामि सक्तिडे़ॽ खो निवाहाङ्मि पसा ले़ये लुनुङ खाङ्मुसा। इगो खा येसु सिघे़ॽनुङ्सो हिङ्बोक्पॽआ खाडे़ॽ खाङ्मुये। खोनोॽ कानिङ्मि परभु येसु खिरिस्ट ले़ये। 5 खोबाङ निवाहाङ्डे़ॽ अनुग्रहा ले़ःॽनुङ का खोमि एप्पा चोङ्सा टोङ्इटे़। चोप जातिहा याॽमिजिडे़ॽ बिस्वास ले़ःॽनुङ खोसे़ॽ लुबॽआ खा खसिमिरो लुनुङ खोमि योम्बोकमि टुम्बेॽ परचार ले़ःॽमामि लागि का पाङ्इटिङे। 6 हे़निङ्सो खोजिनुङ सोरि येसु खिरिस्टमि लिमामि लागि के़ए़टे़। 7 रोमबेॽ टुघुबा चोप पबित्रा याॽमिजिमि लागि इगो पत्रा साप्मे़ॽनिङ्सिनुङे। निवाहाङ्डे़ॽ हे़निङ नम्नम ले़ःॽनुङ खोमि याॽमिजि लिमामि के़ःॽपॽआजि, कानिङ्मि पाबा निवाहाङ्नुङ परभु येसु खिरिस्टडे़ॽ अनुग्रहानुङ सान्ति पिरो। पावल सारोनोॽ रोम खे़ॽमा मिम्बॽआ 8 चोप्पाङ याक्लो के़ॽ येसु खिरिस्टबाङ हे़निङ चोपमि लागि निवाहाङ पाबा ओहाक पिनुङे़, इन्ढोङ्होङ हे़निङ्मि बिस्वासमि टुम्बेॽहा खा चोप मक्खाम्डेमबेॽ परचार लिटाहा। 9 काङ्मि चोप निवाबाङ्नोॽ निवाहाङ्मि पसामि टुम्बेॽए सुसमाचार परचार ले़ःॽनुङ खोमि सेवा ले़नुङे। के़ॽ हे़निङ मे़मिन्डेॽटिॽ, तर सानिङ्नोॽ हे़निङ्मि लागि पारथना ले़ःॽमे़ॽनिङ्सिनुङे। इगो खामि लागि निवाहाङ्नोॽ काङ्मि साक्छि टुये। 10 मोबा निवाहाङ्डे़ॽ मिॽटुहोङ इन्डोॽहोङ्सो हे़निङ्नुङ चुप्टोक्मा लुनुङ के़ॽ पारथना ले़ःॽमे़ॽनिङ्सिनुङे। 11 इन्ढोङ्होङ हे़निङ बिस्वासबेॽ बोलियो टोङ्मामि पबित्रा होङ्निवाडे़ॽ पिबॽआ आसिस हे़निङ्नुङ हाःजाहेमा लुनुङ हे़निङ चुप्सिॽ आप्मा सारो मिङ्इटिङे। 12 काङ्मि बिस्वासडे़ॽ हे़निङ, हे़निङ्मि बिस्वासडे़ॽ का बोलियो टोङ्इये। इडोॽ कानिङ इक्कोसे़ॽ हाइको खाङ्नुङ बोल चुप्रो लुनुङ के़ॽ मिॽइटुङे। 13 के़ॽ नम्नम मिॽपॽआ वावानिसानुङ नानुसाजि, का बेॽलोखेॽ हे़निङ्बेॽ आप्मा मिनिङ्रोसो, मे़आप्टोगिङ लुमे खा हे़निङे़ॽसो लेसानुमे मिॽइनुङे। अयहुदि जातिहा याॽमिजिमि रुम्बेॽ निवाहाङ्मि योम्बोक ले़टिडोॽ हे़निङ्मि रुम्बेॽनुङ हाइखा याॽमिजिबेॽ खिरिस्टमि योम्बोक ले़ःॽमा सारो मिॽइटुङे। 14 इन्ढोङ्होङ गिरिकडोॽ लेघुबाजिहोङ्सो अथबा उम्बरिङ्जिहोङ्सो, निवादाङ्बाहोङ्सो अथबा निवा मे़ॽनिङ्हाजिहोङसो चोपजिनोॽ के़ॽ सुसमाचार खेम्मेॽमानोॽ खे़ये। 15 मोडोगे़ॽ रोमबेॽ टुघुबा हे़निङ्सो इगो सुसमाचार खेम्मे़ॽमामि सारो मिॽइटुङे। 16 याॽमिजि सुसमाचार खेम्मेॽमा का ङेसिङानि, इन्ढोङ्होङ बिस्वास ले़ःॽखुबा चोप याॽमिजिबेॽ याक्लो यहुदिजिमि लागि, मोबा अयहुदिजिमि लागिसो इगो सुसमाचार निवाहाङ्मि सक्ति ले़ये। 17 इन्ढोङ्होङ सुसमाचारबाङ्नोॽ निवाहाङ्डे़ॽ खोमि पोम्बेॽ कानिङ इन्डोॽ धरमि टोङ्इये लुमे खा खाङ्मुये। मोबा इगो खा बिस्वासबाङ लेङ्येनुङ बिस्वासबाङ्नोॽ पुरा लिये। धारमिक नेॽचिराबेॽ इडोॽ साप्पॽआ ले़ये, “हाम्बे याॽमि निवाहाङ्मि बिस्वासबेॽ हिङ्इये, मो याॽमिडे़ॽ हिङ्मवा चुप्मिन्डुए।” याॽमिजिसोक्पेॽ निवाहाङ्मि सुरिक 18 निवाहाङ्मि सुरिक याॽमिजिमि पापि योम्बोकनुङ दुस्टा योम्बोकमि बिरोधबेॽ थाङ्सिरिबेॽ खाङ्मुटे़, माहाजिमि दुस्टा योम्बोकडे़ॽ चाइबमा खा टिप्चुम्इटुजे। 19 निवाहाङ्डे़ॽ माहाजि दन्डा पिन्डुजे, इन्ढोङ्होङ निवाहाङ्मि टुम्बेॽ लेहेमे खा निवाहाङ खोमटाङ्बे़ॽ माहाजि छे़ङ्गै खाङ्मुटुए। 20 निवाहाङ्मि सिघे़ॽनिबा सक्तिनुङ खो इन्डोॽ ले़ये लुनुङ कानिङ्मि मिगे़ॽ खाङ्हेसुङ्मानि। तर मक्खाम्डेममि पुःक्मराबाङ्नोॽ खोसे़ॽ टोङ्बॽआ चोप थोक खाङ्नुङ याॽमिजिडे़ॽ निवाहाङ लेहेन्डुजे। मोडोगे़ॽ याॽमिजिडे़ॽ निवाहाङ लेसुङ्मानि लुनुङ काडोक्मिने। 21 इन्ढोङ्होङ माहाजिडे़ॽ निवाहाङ लेनुङ्सो महिमानुङ ओहाङ् मे़म्पिसुजि, बोरु मोमि टेडिघरिक खोजिमि निवानोॽ योम्बोक मे़ॽनिङ्मा लिसा, खोजिमि काङायोङ्बा निवाडे़ॽ चाइबमा खानोॽ मे़लेहेसुजि। 22 खोजिडे़ॽ टाङ्बा निवादाङ्बा मिॽनुङ्सो उम्बरिङ्नोॽ लिसामि। 23 मोबा माहाजिडे़ॽ इन्डोक्पेॽसो नासि मे़लिघुबा निवाहाङ महिमा पिमामि साटो, नासि लिघे़म्मे याॽमिमि, सोङाजिमि, जिवातजिमिनुङ पेरसेॽवा से़ॽटुघुबा जिवातजिमि मुरति टोङ्नुङ ओहाङ ले़टुजि। 24 मोडोगे़ॽ निवाहाङ्डे़ॽ माहाजिमि निवे़ॽ ले़ःॽमा मिॽपॽआडोक्नोॽ ङेसिमा टे़क्टे़क्हा असुद्ध योम्बोक ले़ःॽमामि योङ्मेॽटुजि, मोबा खोजिमि रुम्बेॽ इक्कोसे़ॽ हाइकोनुङ ङेसिमारोहा योम्बोक ले़टुजि। 25 माहाजिडे़ॽ निवाहाङ्मि चाइबमा खा मे़ॽनोक्हा थोकनुङ लेनुजि। चोप थोकमि पुःक्मरादाङ्बानुङ इन्डोक्पेॽसो सिनिबा निवाहाङ लेॽआनुङ खोसे़ॽ टोङ्बॽआ थोकजिमि पुजा ले़टुजि। तर निवाहाङ चाहिँ सानिङ ओहाङ ले़ःॽमारोमा लिडुङ्घे़ॽरो। आमेन। 26 मोडोगे़ॽ निवाहाङ्डे़ॽ माहाजिमि ङेसिमारोहा योम्बोकपेॽ योङ्मेॽटुजि, माहाजिमि मेॽनामिॽचिडे़ॽ खोमबनिबानुङ इम्मा लेॽनुङ, मेॽनामिॽचि मेॽनामिॽचिनुङ्नोॽ इप्सामि। 27 मोडोक्नोॽ वडाङ्पसाजिडे़ॽ टाङ्बामि बनिमानुङ इम्मा लेॽनुङ वडाङ्पसानुङ्नोॽ सारोनोॽ इम्मा मिॽनुङ ङेसिमारोहा योम्बोक ले़टुजि, मोबा टाङ्बामि हिङामि बिरोधबेॽ ले़ःॽपॽआ मङे़ॽमा योम्बोकमि दन्डा खोजिडे़ॽ चुप्टुजि। 28 इडोॽ माहाजिडे़ॽ निवाहाङ आदर पिमा लेॽपेसुजि। मोडोगे़ॽ खोजिडे़ॽ मिॽपॽआडोक्नोॽ मङे़ॽमा योम्बोक ले़टुङ्घे़ॽटुजिरो लुनुङ निवाहाङ्डे़ॽ माहाजि योङ्मेॽटुजि, मोबा खोजिडे़ॽ ले़ःॽमानोॽ फेन्निहा योम्बोक ले़टुजि। 29 माहाजिमि निवा इॽठुप चोप खालहा मङे़हानुङ दुस्टा खा टुहा। माहाजि लोभि ले़म्मे, हाइखाजि सिॽचोन्डुजे, हाइखाजिमि चेजेवा ले़न्डुजे, याॽमि सेॽएन्डुजे, काॽइम्मे, रेम्डेम्मे, मे़ॽनोक्हा खा इम्मेनुङ याॽमि इःजोन्डुजे। 30 याॽमिजि इःजोन्डुजे, निवाहाङ सिॽचोन्डुजे, लुबॽआ खसिमिने, काङायोङ्बा लिम्मे, बेॽहा बेॽहा खा इःम्मे, मङे़हा खा योॽइम्मे, पाबा मामाजिमि खा खेप्सुजिने, 31 उम्बरिङ लिम्मे, ले़न्डुङ्मे लुबॽआ योम्बोक ले़टुजिने। नम्नम मे़ॽनिङ्हाजिनुङ सुरिकयाॽवाजि ले़म्मे। 32 इडोक्मा योम्बोक ले़ःॽखुबाजि सिमा खेम्मे लुमे खा निवाहाङ्मि धारमिक नेॽचिराबेॽ टुहा लुमे खा लेजिङ लेजिङ्सो इडोक्हा मङे़हा योम्बोक ले़न्डुजे, इडोकरेॽ ने़ॽनि मङे़हा योम्बोक ले़ःॽखुबाजि छना बेॽलो मङे़हा योम्बोक ले़ःॽमामि चोम्इन्डुजे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.