परकास 9 - याम्फुनासि ले़ःॽखुबा सिगिकचि 1 मोबा ङाउममा थाङ्सिरिदुतडे़ॽ खोमि तुरहि मिडु, मोडोक्पेॽ के़ॽ इक्को साङ्गे नान्द्रुङ्माबाङ मक्खाम्डेमबेॽ हेॽओक्पॽआ खाङ्डोक्टुङ। मो साङ्गेनुङ अतल कुन्डामि साचो टुसा। 2 मोसे़ॽ अतल कुन्डा हेनु, मो कुन्डाबाङ मिमि बेॽएम्मा थाउरुमबाङ पे़आप्मिये मे़क्खुडोॽमा पे़आबा, मोसे़ॽ नमनुङ नान्द्रुङ्मा मक्खुइक टोक्सु। 3 मो मे़क्खुबाङ मक्खाम्डेमबेॽ सिगिकचि लेस्सामि, माहाजि बिच्छिडे़ॽ हे़ःॽमाबेॽ टुक्मेये सक्ति पिबॽआ ले़टा। 4 माहाजि इडोॽ लुबॽआ ले़टामे, “मक्खाम्डेमबेॽहा सिङ्बु रुङ्भु, घासा इमाङ्सो ए़ले़ःॽमे, तर तुरुवाबेॽ निवाहाङ्मि मोहोर मे़न्टिबॽआ याॽमिजि चाहिँ हे़निङे़ॽ चुङ्जामे। 5 माहा याॽमिजि सेॽमा चाहिँ ए़सेॽमाहाजि, तर ङाउम महिनाडोक चुङ्जामाहाजि” लुनुङ खोजि अधिकार पिबॽआ ले़टे़। माहा सिगिकचिडे़ॽ याॽमिजि हे़ःॽमाबेॽ बिच्छिडे़ॽ हे़ःॽटिडोॽ सारोनोॽ टुगे़। 6 मो ङाउम महिनाराजि याॽमिजिडे़ॽ खेः मे़आङ्हेबॽआसे़ॽ सिमा योॽइम्मे, तर सिडोक्मिने। माहा याॽमिजि सिमा मिङ्इम्मे, तर सिमवा चाहिँ खोजिबाङ चिःॽखे़ये। 7 माहा सिगिकचि ङेः ले़ःॽसिॽ खे़ॽमामि पोरोक्पॽआ घोडाजिडोॽ ले़टामि। माहाजिमि निन्डवाँबेॽ सुनामि मुकुटडोॽहा टिबॽआ ले़टा, माहाजिमि नजिक चाहिँ याॽमिमिडोॽ खाङ्मुसा। 8 माहाजिमि टाङ मेॽनामिॽमि टाङ्डोॽ किए़म्मा ले़टा, मोबा माहाजिमि के़ङ चाहिँ किबामिडोॽ ले़टा। 9 मोबा माहा सिगिकचिमि हाङ्डाङ चे़क्चिमि कवजडोॽ ले़टा। खोजिमि लाप्खे़ॽवाबाङ लेम्बॽआ सेम्ला चाहिँ ङेः ले़ःॽसिॽ खे़ॽपॽआ बेॽलो घोडाजिडे़ॽ से़ॽखे़ॽपॽआ बेॽलो रथडोॽ खेम्मुसा। 10 माहाजिमि मिराबेॽए सेन बिच्छिमिडोक्नोॽ ले़टा। माहाजिमि मिराबेॽ ङाउम महिनाठोक याॽमिजि खेः पिहेमे सक्ति पिबॽआ ले़टा। 11 मो अतल कुन्डामि दुत चाहिँ माहा सिगिकचिमि हाङ्बा ले़टे़। हिब्रु खाप्लाबेॽ मोमि निङ एबाड्डोन मोबा गिरिक खाप्लाबेॽ चाहिँ मोमि निङ अपोल्लियोन ले़ये। इगो निच्चि निङ्डे़ॽ लुबॽआ चाहिँ “नासि ले़ःॽमा” ले़ये 12 याक्लोमा बिपत्ति खे़ॽपेसा। मोबा ए़क्साङ फेरि निच्चि बिपत्ति लेङ्सिॽपोरोइटे़। 13 मोबा चुक्चिमा थाङ्सिरिदुतडे़ॽ टाङ्बामि तुरहि मिडु, मोडोक्पेॽ निवाहाङ्मि पोम्बेॽ टुहा सुनामि बेदिमि रिउम कुनाबेॽहा सजाङ्बाङ काबॽआ सेम्ला के़ॽ खेप्सुङ। 14 मो सेम्लाडे़ॽ चुक्चिमा थाङ्सिरिदुत इडोॽ लुबॽआ खेप्सुङ, “बेॽएम्मा यिवा युफ्रेटिसबेॽ हिःक्नुङ युङ्बॽआ माहा रिउम थाङ्सिरिदुतजि लेप्पेबेॽटे।” 15 मोबा माहा रिउम थाङ्सिरिदुतजि लेप्पेसुजि, माहा थाङ्सिरिदुतजि मक्खाम्डेमबेॽहा सुम भागामि इक भागा याॽमिजि सेॽमामि मो बेला, मो याक, मो महिनानुङ मो निङ्मि लागि पोरोक्नुङ युङ्बॽआ ले़टामे। 16 माहा घोडाबेॽ साङ्घुबाजि निबोङ करोड टुसामे लुनुङ के़ॽ खेप्सुङ। 17 मोबेॽ के़ॽ सेन्जिसेम्माङ्बेॽ माक्पॽआ घोडाजिनुङ घोडाबेॽ साङ्घुबाजिमि हेप्सोक्पेॽ चाङ्मे कवज चाहिँ मिडोॽमा, फिरिरिमा गन्धकडोॽ हरदिजिक्पा ले़टा। माहा घोडाजिमि निन्डवाँ किबामि निन्डवाँडोॽ ले़टा। माहाजिमि याबुकबाङ मि, मे़क्खुनुङ गन्धक पे़आबाहा। 18 माहाजिमि याबुकबाङ पे़आप्पॽआ मि, मे़क्खुनुङ गन्धक इघा सुम्जि बिपतबाङ मक्खाम्डेमबेॽहा याॽमिजि सुम भागामि इक भागा सिसामि। 19 इन्ढोङ्होङ माहा घोडाजिमि याबुकनुङ मिराबेॽ सेॽनेमे सक्ति टुसा। माहाजिमि मिरा सिक्चानुङ्मा पुसे़ॽमि निन्डवाँडोॽ ले़टा, मोसे़ॽ याॽमिजि ओगुजे। 20 इघा बिपतबाङ मे़सिबॽआ याॽमिजिडे़ॽ मङे़हा योम्बोक ले़ःॽमा मे़लेडुजि। माहाजिडे़ॽ मङे़हा चापमि मोबा सुनामि, सिसे़ङ्मि, काँसोमि, रुङ्गोॽवामिनुङ सिङ्बुमि टोङ्बॽआ खाङ्हेसुनिबा, खेम्हेसुनिबा, राम्हेनिबा, मुरतिमि पुजा ले़ःॽमा मे़लेडुजि। 21 माहाजिडे़ॽ याॽमि सेॽमा, चटक ले़ःॽमा, बेभिचारि योम्बोक ले़ःॽमानुङ खुजामा मे़ले़डुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.