परकास 8 - याम्फु

एच्‍चिमा मोहोर

¹ मोबा थुमाडे़ॽ एच्‍चिमा मोहोर हेम्‍माबेॽ सुमबोङ मिनेटडोक थाङ्‌सिरि साङ्‌गासु लिसा।

² मोबा निवाहाङ्‌मि पोम्‍बेॽ येःप्‍खुबा एच्‍चि जना थाङ्‌सिरिदुतजि के़ॽ खाङ्‌डोक्‍टुङ। माहाजि इक्‍को इक्‍को तुरहि पिबॽआ ले़टा।

³ मोबा हाइको इक्‍को थाङ्‌सिरिदुत लेन्‍नुङ सुनामि धुपा इक्‍ठाम याङ्‌मानुङ बेदिमि के़क्‍पेॽ येःबा। हाङ्‌पेन्‍ढाममि पोम्‍बेॽए सुनामि बेदिबेॽ निवाहाङ्‌मि पबित्‍रा याॽमिजिमि बिन्‍ति पारथनानुङ नम्‍जानुहा धुपा चेॽटिमामि लागि खो पिसु।

⁴ माहा धुपामि मे़क्‍खुनुङ सेवाकजिमि बिन्‍ति पारथना थाङ्‌सिरिदुतमि हुकबाङ मिॽटु निवाहाङ्‌बेॽ रुक्‍टु।

⁵ मोबा मो थाङ्‌सिरिदुतडे़ॽ धुपा इक्‍ठाम इॽठुप बेदिमि मि ए़न्‍नुङ मक्‍खाम्‍डेमबेॽ राप्‍एन्‍नुङ ए़क्‍साङ नान्‍द्‌रुङ्‌माडोॽ मुगा, नमसेल्‍लेॽवा पोगा, मोबा रुॽमि खडा।

एच्‍चि तुरहि

⁶ मोबा माहा एच्‍चि गोटा तुरहि खिघुबा एच्‍चि जना थाङ्‌सिरिदुतजि तुरहि मिःॽमामि पोरोगामि।

⁷ याक्‍लोमा थाङ्‌सिरिदुतडे़ॽ तुरहि मिडु, मोबा हरिनुङ ठुबॽआ ओमनुङ मि मक्‍खाम्‍डेमबेॽ हेॽपुगा। मोबा मक्‍खाम्‍डेमबेॽ टुहा सुम भागामि इक्‍को भागा, सिङ्‌बु डाङ्‌मि सुम भागामि इक भागानुङ फिरिरिहा घासामि सुम भागामि इक भागा हिक्‍खडा।

⁸ निच्‍चिमा थाङ्‌सिरिदुतडे़ॽ तुरहि मिडु, मोबा मि हाङ्‌मे़ॽनिङ्‌सिबॽआ इक्‍को बेॽएम्‍मा सुम्‍लाखाडोॽमा माहोङ्‌माबेॽ राप्‍खडा, मोबा माहोङ्‌मामि सुम भागामि इक भागा हरिनोॽ हरि लिसा।

⁹ मोबा मो माहोङ्‌माबेॽ टुबॽआ सुम भागामि इक भागा हिङ्‌रिक जिवातजि सिसामिनुङ सुम भागामि इक भागा योङा जहाजसो नासि लिसा।

¹⁰ मोबा ए़क्‍साङ सुम्‍जिमा थाङ्‌सिरिदुतडे़ॽ टाङ्‌बामि तुरहि मिडु, नन्‍द्‌रुङ्‌मे़ॽटुरा वामिडोॽमा हाङ्‌मे़ॽनिङ्‌सिबॽआ इक्‍को बेॽए साङ्‌गे यिवामि सुम भागाबेॽनुङ योङा पिॽठामबेॽ हेडा।

¹¹ मो साङ्‌गेमि निङ “खिक्‍ले़क” ले़टे़। मोसे़ॽ ले़ःॽमे़ॽ योङामि सुम भागा खिक्‍ले़क लिसा, मो खिॽइये योङा उङ्‌नुङ बेॽलो याॽमिजि सिसामि।

¹² मोबा ए़क्‍साङ रिउममा थाङ्‌सिरिदुतडे़ॽ टाङ्‌बामि तुरहि मिडु, मोडोक्‍पेॽनोॽ नममि, लामि, साङ्‌गेजिमि सुम भागामि इक्‍को भागा सेन्‍जिगुप लिसा। मोडोगे़ॽ लेन्‍डामि सुम भागामि इक भागानुङ सेन्‍डामि सुम भागामि इक भागा जोति चुक्‍खडा।

¹³ मोबा ए़क्‍साङ के़ॽ खाङ्‌माबेॽ, नन्‍द्‌रुङ्‌मे़ॽटु पेमे़ॽनिङ्‌सिबॽआ आङ्‌लिॽवा इडोॽ वोमानुङ कामे़ॽनिङ्‌सिडा, “मिःॽमा एम्‍बॽआ सुम्‍जि थाङ्‌सिरि दुतजिमि तुरहि मिॽमाबेॽ मक्‍खाम्‍डेमबेॽ पेङ्‌घुबा याॽमिजि इनामा! इनामा! इनामा!”