परकास 7 - याम्फुइक लाख रिक्पोङ रिबाङ हजारसोक्पेॽ मोहोर 1 मोबा ए़क्साङ मक्खाम्डेमबेॽ अथबा माहोङ्माबेॽ अथबा सिङ्बुडाङ्बेॽ हिॽवाबा मे़लेङ्रो लुनुङ रिउम थाङ्सिरिदुतजि मक्खाम्डेममि रिउम कुनाबेॽनोॽ हिॽवाबा यिप्मानुङ येःप्टिङ्बॽआ के़ॽ खाङ्डोक्टुङ। 2 मोबा हिङ्रिक निवाहाङ्मि मोहोर याङ्मानुङ इक्को थाङ्सिरिदुत नम्गे़तलामबाङ के़ॽपॽआ के़ॽ खाङ्डोक्टुङ। मक्खाम्डेमनुङ माहोङ्मा नासि ले़ःॽहेमे अधिकार चुप्पॽआ रिउम थाङ्सिरिदुतजि खोसे़ॽ इडोॽ लुसुजि, 3 “कानिङे़ॽ कानिङ्मि निवाहाङ्मि सेउतेजिमि तुरुवाबेॽ मोहोर मे़न्टिसेॽलोरो मक्खाम्डेम, माहोङ्मा अथबा सिङ्बु डाङ इमाङ्सो ए़ले़टानुमे।” 4 “मोबा इडोॽ मोहोर टिबॽआ याॽमिजि इक लाख चवालिस हजार लिबॽआ खा के़ॽ खेप्सुङ। माहाजि चाहिँ इस्राएलिजिमि चोप बङ्सबाङ्हा ले़टामि। 5 मोहोर टिबॽआ इस्राएलि याॽमिजिमि बङ्स इघाजिनोॽ ले़म्मे, यहुदामि बङ्सबाङ इक्पोङ नि हजार, रुबेनमि बङ्सबाङ इक्पोङ नि हजार, गादमि बङ्सबाङ इक्पोङ नि हजार, 6 आसेरमि बङ्सबाङ इक्पोङ नि हजार, नप्तालिमि बङ्सबाङ इक्पोङ नि हजार, मनस्सेमि बङ्सबाङ इक्पोङ नि हजार, 7 सिमियोनमि बङ्सबाङ इक्पोङ नि हजार, लेबिमि बङ्सबाङ इक्पोङ नि हजार, इस्साखारमि बङ्सबाङ इक्पोङ नि हजार, 8 जबुलुनमि बङ्सबाङ इक्पोङ नि हजार, योसेफमि बङ्सबाङ इक्पोङ नि हजार, बेन्यामिनमि बङ्सबाङ इक्पोङ नि हजार जना याॽमिजिबेॽ मोहोर टिसुजि।” उथ्रिॽहा चेॽ चाङ्खुबाजि सुम्नुङ ओहाङ ले़ःॽपॽआ 9 मोबा ए़क्साङ याॽमिजिडे़ॽ नेॽनोॽ नेॽहेनिहा बेॽलो याॽमिजि सुम्बॽआ के़ॽ खाङ्डोक्टुङ। माहाजि चाहिँ चोप बङ्सबाङ, जातिबाङ, देसबाङ्नुङ खाल खालहा खाप्ला यामुखुबाजिबाङ लेम्बॽआ ले़टामि। माहाजि उथ्रिॽहा चेॽ चाङ्मानुङ हुकपेॽ खजुर लुमे सिङ्बु डाङ्मि हक्काम्बा याङ्मानुङ हाङ्पेन्ढामनुङ थुमामि पोम्बेॽ येःप्टिङ्बॽआ के़ॽ खाङ्डोक्टुङ। 10 माहाजि बेॽए सेम्लाडे़ॽ इडोॽ कासामि, “हाङ्पेन्ढामबेॽ पेङ्घुबा कानिङ्मि निवाहाङ्नुङ थुमाडे़ॽ कानिङ्मि उद्धार ले़ये।” 11 मोबा हाङ्पेन्ढाम, धारमिक गुरुजिनुङ रिउम हिङ्रिक जिवातजिमि खिरिरि थाङ्सिरिदुतजि येःप्मे़ॽनिङ्सिडामि। माहा थाङ्सिरिदुतजिडे़ॽ हाङ्पेन्ढाममि पोम्बेॽ उःक्युनुङ इडोॽ कासाङ निवाहाङ्मि ओहाङ ले़टुजि। 12 “आमेन! कानिङ्मि निवाहाङ्मिनोॽ सानिङ ओहाङ, महिमा, निवा, ओहाक, आदरनुङ सक्ति लिरो, आमेन!” 13 धारमिक गुरुजिबाङ इक्कोसे़ॽ का सिप्सिङ, “इघा उथ्रिॽहा चेॽ चाङ्खुबाजि असाजि, हाम्बाङ लेङ्इटामे ?” 14 मोबा के़ॽ खो लुसुङ, “के़ॽको लेसुङ्नि, हे़ने़ॽनोॽ लेन्डुहा।” खोसे़ॽ का लुसिङा, “खोजि चाहिँ बेॽलो चुङ्जामा खेः आङ्नुङ लेङ्इटामे, खोजिडे़ॽ टाङ्बा टाङ्बामि चेॽ थुमामि हरिडे़ॽ वासोक्नुङ उथ्रिॽहा टोङ्इटुजे। 15 मोडोगे़ॽ खोजि निवाहाङ्मि पोम्बेॽ टुम्मे, सेन्डा लेन्डा खोमि मन्दिरबेॽ सेवा ले़म्मे, मो हाङ्पेन्ढामबेॽ पेङ्घुबाडे़ॽ माहाजिनुङ सोरि पेन्नुङ खोजिमि रच्छे ले़न्डुजे। 16 माहाजि इन्डोक्पेॽसो सगे़ॽ सिसुजिनेनुङ वाइॽमे़ॽसो सिसुजिने, नमडे़ॽ अथबा हाइखा कुहाङ्डे़ॽ खोजि हिडुजिने। 17 इन्ढोङ्होङ हाङ्पेन्ढाममि रुम्बेॽ थुमाडे़ॽनोॽ खोजिमि गोठ्ला लिनुङ रच्छे ले़न्डुजे, खोसे़ॽ माहाजि कोमानुङ हिङ्मवामि योङा पिॽठामबेॽ चिॽखे़न्डुजे निवाहाङ्डे़ॽ माहाजिमि मिॽवा टुःक्पेन्डुजे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.