परकास 5 - याम्फुथुमामि सेन्जिसेम्माङ 1 मोबेॽ के़ॽ हाङ्पेन्ढामबेॽ पेङ्घुबामि चुप्थिङ हुकपेॽ निलामनोॽ साप्पॽआ साउकमि पत्रामि मुठा खाङ्डोक्टुङ, मो चाहिँ एच्चि गोटा मोहोर टिनुङ यिप्चुम्बॽआ ले़टा। 2 मोबा निवाहाङ्मि इक्को सक्तिदाङ्बा दुत के़ॽ खाङ्डोक्टुङ, मोसे़ॽ बेॽए सेम्लाडे़ॽ इडोॽ सिम्बॽआ खेप्सुङ, “इगो मोहोर पोक्मारोमानुङ साउकमि पत्रामि मुट्ठा हेम्मारोमा असा टुये ?” 3 तर मो साउकमि पत्रामि मुट्ठा हेन्नुङ खाङ्मारोमा थाङ्सिरिबेॽ, मक्खाम्डेमबेॽ, मोबा मक्खाम्डेमबाङ मिम्मु असासो माडामि। 4 मोबा साउकमि पत्रामि मुट्ठा हेन्नुङ खाङ्मारोमा असासो मोबेॽ मे़न्चुप्पॽआसे़ॽ का सारोनोॽ हाःबिङ। 5 धारमिक गुरुजिबेॽ इक्कोसे़ॽ का लुसिङा, “ए़हाःप्ने, खेप्से, यहुदा कुलमि किबानुङ हाङ्बा दाउदमि बङ्समि इक्कोसे़ॽ याक्लो सैतान हेजोबेबॽआसे़ॽ, खो इघा एच्चि गोटा साउकमि मुट्ठा हेम्मारोमानुङ मोहोर पोक्मारोमा ले़ये।” 6 मोबा ए़क्साङ माहा रिउम हिङ्रिक जिवातजिनुङ धारमिक गुरुजिमि रुम्बेॽए हाङ्पेन्ढाममि पोम्बेॽ इक्को थुमाडोॽमा येःप्टिङ्बॽआ के़ॽ खाङ्डोक्टुङ। खो कोहिडे़ॽ याक्लोनोॽ सेॽनेबॽआडोॽ खाङ्मुसा। मोमि एच्चि गोटा सजाङ्नुङ एच्चि गोटा मिक टुसा। माहाजि चाहिँ मक्खाम्डेमबेॽ पाङ्बॽआ निवाहाङ्मि एच्चि होङ्निवाजि ले़म्मे। 7 मो थुमा खे़ॽनुङ हाङ्पेन्ढामबेॽ पेङ्घुबामि चुप्थिङ हुकबाङ मो साउकमि पत्रामि मुट्ठा लासु। 8 मोडोक्पेॽनोॽ माहा रिउम जिवातजिनुङ निबोङ रिबाङ धारमिक गुरुजिडे़ॽ थुमामि पोम्बेॽ पोप्युनुङ ढोग ले़टुजि। माहा चोपजिमि हुकपेॽ इक्को इक्को टेन्जिरा बिनानुङ सुनामि खोरिया टुसा, मो खोरिया इॽठुप नम्जानुहा धुपा टुसा। माहा नम्जानुहा धुपा लुबॽआ चाहिँ निवाहाङ्मि पबित्रा याॽमिजिमि पारथना ले़हा। 9 माहाजिडे़ॽ इडोॽ लुसाङ इक्को चोङ सेम सेम्लुसुजि, “इगो साउकमि पत्रामि मुट्ठा लामारोमा, मोमि मोहोर पोक्मारोमा हे़नरेॽनोॽ टुये, याॽमिजिडे़ॽ हे़न सेॽनेसामिनुङ आम्मि हरिडे़ॽ निवाहाङ्मि लागि चोप कुल, खाप्ला, देसनुङ जातिजिबाङ याॽमिजि छुट्कारा पिसुजि। 10 मोबा निवाहाङ हे़ने़ॽ माहाजि हे़ने़ए़ सेवा ले़ःॽमामि याडाङ्बाजि टोक्सुजि, मोबा माहाजिडे़ॽ मक्खाम्डेमबेॽ राज्य ले़न्डुजे।” 11 मोबा के़ॽ बेॽलो थाङ्सिरि दुतजिमि सेम्ला खेप्सुङ, माहाजि नेॽनोॽ मे़नेॽहेरो टुसामे। माहाजि हाङ्पेन्ढाम, हिङ्रिक जिवातजिनुङ धारमिक गुरुजिमि खिरिरि टुसामि। 12 माहाजिडे़ॽ बेॽए सेम्लाडे़ॽ इडोॽ सेम इःसुजि, “बलि लिबॽआ थुमा महिमा, आदर ले़ःॽमारोमा ले़ये, खोनुङ चोप अधिकार टुहा, खो चोप थोकमि याङ्सरावादाङ्बा ले़ये, खो सक्तिदाङ्बा ले़येनुङ खो निवादाङ्बा ले़ये। मोबा खोमिन्नोॽ ओहाङ ले़ःॽमा।” 13 मोबा थाङ्सिरिबेॽ, मक्खाम्डेमबेॽ, पातालबेॽ, माहोङ्माबेॽ टुघुबा चोप सिरिस्टिडे़ॽ इगो सेम सेम्लुमे़ॽनिङ्सिबॽआ के़ॽ खेप्सुङ, “हाङ्पेन्ढामबेॽ पेङ्घुबानुङ थुमामि सानिङ ओहाङ, आदर, महिमानुङ अधिकार टुडुङ्घे़ॽलो!” 14 मोबा माहा रिउम हिङ्रिक जिवातजिडे़ॽ “आमेन” लुसुजि, मोबा माहा धारमिक गुरुजि उःक्युनुङ निवाहाङ्नुङ थुमा ढोग ले़टुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.