परकास 4 - याम्फुयुहन्नाडे़ॽ थाङ्सिरिमि सेन्जिसेम्माङ चुप्पॽआ 1 मोबा ए़क्साङ के़ॽ थाङ्सिरिबेॽ इक्को राम्डेम हेम्बॽआ खाङ्डोक्टुङ। मोबा के़ॽ याक्लोनोॽ खेम्बॽआ तुरहिमिडोक्मा सेम्ला खेप्सुङ। मोसे़ॽ इडोॽ लुमे़ॽनिङ्सिडुए, “इगिॽटु काडे, के़ॽ हे़न ए़क्साङ लिहा खा खाङ्मुन्ने़।” 2 मोडोक्पेॽनोॽ निवाहाङ्मि पबित्रा होङ्निवा काबेॽ लेस्सा, मोबा के़ॽ सेन्जिसेम्माङ्बेॽ थाङ्सिरिबेॽ इक्को हाङ्पेन्ढाम युङ्बॽआ खाङ्डोक्टुङ मोबेॽ इक्को याॽमि पेम्बॽआ खाङ्डोक्टुङ। 3 खोमि नजिक उथ्रिॽमानुङ पोॽइये हररामा मोनिडोॽ खाङ्मुसा, मो हाङ्पेन्ढाममि खिरिरि पोॽइये पन्नाडोक्मा रङ्मि इक्को अप्पाङ्सु खाङ्मुसा। 4 मो हाङ्पेन्ढाममि खिरिरि हाइखा निबोङ रिउम गोटा हाङ्पेन्ढाम टुसा। मोबेॽ धारमिक गुरुजि सुनामि मुकुटनुङ उथ्रिॽमा चेॽ चाङ्मानुङ निबोङ रिबाङ जना पेम्बॽआ ले़टामि। 5 निवाहाङ पेम्बॽआ हाङ्पेन्ढामबाङ नमसेल्ले़ॽवाडोक्मा पोगा, नम्द्रे़ॽवाडोक्मा सेम्ला खे़म्मुसा। मो हाङ्पेन्ढाममि पोम्बेॽ एच्चि गोटा कुप्पि उमे़ॽनिङ्सिडा। माहा एच्चि कुप्पि लुबॽआ निवाहाङ्मि एच्चि होङ्निवा ले़टामे। 6 मो हाङ्पेन्ढाममि पोम्बेॽ सिसाडोक्मा छे़ङ्गै खाङ्मुये माहोङ्मा टुसा। हाङ्पेन्ढाममि खिरिरि रिउम गोटा हिङ्रिक जिवातजि टुसामि। माहाजिमि हिङाइॽठुप मिक टुसा। 7 याक्लोए जिवात चाहिँ किबाडोक्मा ले़टा, हाइकोमा जिवात चाहिँ गोरुडोक्मा ले़टा, सुम्जिमा जिवातमि चाहिँ याॽमिमिडोक्मा नजिक ले़टा, रिउममा जिवात चाहिँ पेमे़ॽनिङ्सिबॽआ मुवाडोक्मा ले़टा। 8 माहा रिउम गोटा जिवातजिमि चुक्चि चुक्चि गोटा लाप्खे़ॽवा टुसानुङ माहाजिमि खिरिरि मिकरेॽनोॽ टुसा। माहाजि सेन्डा लेन्डा इडोॽ कासाङ सेम्लुमे़ॽनिङ्सिडामि, “चोप्पाङ सक्तिदाङ्बा परमपरभु निवाहाङ पबित्रा, पबित्रा, पबित्रा ले़ये। खो चोप्पाङ याक्लोमा ले़टे़, खो आइसो टुये, खो लेङ्इये।” 9 माहा रिउम हिङ्रिक जिवातजिडे़ॽ हाङ्पेन्ढामबेॽ सानिङ टुडुङ्घे़ॽखुबा महिमा, आदरनुङ ओहाक पिमाबेॽ, 10 माहा निबोङ रिबाङ धारमिक गुरुजिडे़ॽ सानिङ टुडुङ्घे़ॽखुबा, हाङ्पेन्ढामबेॽ पेङ्घुबामि पोम्बेॽ ओप्युनुङ खो सेवा ले़टुजि। मोबा खोजिमि मुकुट हाङ्पेन्ढाम मिॽमु युङ्मानुङ इडोॽ सेम्लुसामि, 11 “हे कानिङ्मि परभु निवाहाङ, हे़न महिमा, आदर मोबा सक्तिमि योम्बोक ले़ःॽमारोमा ले़ये, इन्ढोङ्होङ चोप थोक हे़ने़ॽनोॽ सिरिस्टि ले़ःॽपॽआ ले़हा, हे़ने़ए़ निवाडे़ॽ मिॽपॽआडोक्नोॽ माहा चोप सिरिस्टि लिसा, मोबा माहाजि हिङ्मवा पिटुजे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.