परकास 3 - याम्फुसारडिसमि मन्डलिमि लागि लम्बवाँ 1 “सारडिसमि मन्डलि खाङ्खुबा अगुवाजिमि लागि इगो लम्बवाँ साबे इगो लम्बवाँ निवाहाङ्मि एच्चि होङ्निवानुङ एच्चि साङ्गे हुकपेॽ याङ्घुबाडे़ॽ इडोॽ लुये। हे़ने़ए़ योम्बोक के़ॽ लेनुङे़, हे़न हिङ्रिक ले़ये लुमे निङ्गो टुये, तर हे़निङ्गो सिघे़टानिङे़। 2 होसियार ले़टानिङे, हे़निङ्नुङ एम्बॽआ ए़डेॽवा बिस्वाससो बोलियो टोक्सानुमे। इन्ढोङ्होङ निवाहाङ्मि पोम्बेॽ हे़निङ्हा योम्बोक के़ॽ पुरा लिबॽआ मे़चुप्टि। 3 मोडोगे़ॽ हे़निङे़ॽ इमाङ खा खेम्नुङ बिस्वास ले़टानुमे मो नुरोॽ मिॽखाक्सानुमे। हे़निङे़ॽ चिम्बॽआ खा नुरोॽ पालना ले़टानुमे, मोबा पापि आनिबानि लेडानुमे। हे़निङे़ॽ मोडोॽ मे़ले़टानुमहोङगो हे़निङे़ॽ मे़मिॽपॽआ बेलाबेॽ का खुसुबाङ्डोॽ हाजोक्टोॽ लेङ्इङे़। का इन्डोक्पेॽ हे़निङ्बेॽ लेङ्इङे़ मो खा हे़निङे़ॽ लेसानुम्नि। 4 तर सारडिसबेॽ हे़निङ्मि रुम्बेॽ इन्डोक जना बिस्वासिजिडे़ॽ निवाहाङ्मि पोम्बेॽ हे़निङ्मि चेॽ असुद्ध मे़न्टोङ्डिॽटानुमे। माहाजिनोॽ चोखो चेॽ चाङ्मानुङ कानुङ सोरि राम्इम्मे, इन्ढोङ्होङ माहाजि कानुङ सोरि राम्मा खेन्जोन्डुजे। 5 असे़ॽ हेजोन्डुए, माहाजिनोॽ के़ॽ उथ्रिॽहा चेॽ चाङ्मेनुङ्हाजिनुङ हिङ्मवामि नेॽचिराबेॽ माहाजिमि निङ सानिङमि लागि साप्नुङ युङ्बेनुङ्हाजि। के़ॽ माहाजिमि निङ पाबा निवाहाङ्मिनुङ खोमि दुतजिमि पोम्बेॽसो लुनुङे। 6 पबित्रा होङ्निवाडे़ॽ इमा लुये, ने़ए़क काप्खुबा चोबे़ॽ खेप्सानुमे।” फिलाडेल्फिया मन्डलिमि लागि लम्बवाँ 7 “मोबा फिलाडेल्फियाबेॽए मन्डलि खाङ्घुबा अगुवामि लागि इगो लम्बवाँ साबे खो चाइबमानुङ पबित्रा ले़ये, दाउदमि साचो राःप्खुबाडे़ॽ राम्डेम हेनुहोङ, असे़ॽसो से़क्हेसुनि, खोसे़ॽ से़गुहोङ असे़ॽसो हेङ्हेसुनि। खोसे़ॽ इडोॽ लुये। 8 हे़निङे़ॽ ले़ःॽपॽआ योम्बोक के़ॽ लेनुङ्हा। खाक्सानुमे, के़ॽ हे़निङ्मि पोम्बेॽ राम्डेम हेङ्इटुङे, इगो असे़ॽसो से़क्हेसुनिबा। हे़निङ थोःप्थोप्हा ले़टानिङ्रोसो के़ॽ लुबॽआ खा खेप्सानुम, मोबा काबेॽ बिस्वास ले़ःॽमा मे़लेडानुम। 9 खेप्सानुमे, हे़निङ्मि रुम्बेॽ इन्डोक जना यहुदिजिडे़ॽ सैतानमि ओहाङ ले़न्डुजे। माहाजि टाङ्बा निवाहाङ्मि याॽमिजि कामानिम्मे, अक्खाजि रेम्डेॽमे़ॽनिङ्सिम्मे, इन्ढोङ्होङ अक्खाजि यहुदिजि ने़ॽनिहाजि। के़ॽ खोजि हे़निङ्मि पोम्बेॽ लाजे़नुङ्हाजि, माहाजि उःक्युनुङ हे़निङ सेवा ले़ःॽमेॽनुङ्हाजि, मोबा के़ॽ हे़निङ इन्डोक नम्नम ले़ःॽनिम्ने़ लुमे खा माहाजिडे़ॽ लेडोक्इन्डुजे। 10 हे़निङे़ॽ चोप खालहा खेः आङ्मा सिॽमाबेॽसो बचन पालना ले़ःॽपॽआसे़ॽ, इगो मक्खाम्डेमबेॽहा चोप याॽमिजिमि जाँच ले़ःॽसिॽ लेङ्इये बेॽएम्मा खेःबाङ के़ॽ हे़निङ जोगा ले़न्निम्ने़। 11 खेप्सानुमे, का चान्डोनोॽ लेङ्इङे़, हे़निङ्मि लागि युङ्बॽआ मुकुट असे़ॽसो मे़नाप्खे़ॽहेसुरो लुनुङ हे़निङ्नुङ टुहा बिस्वास नुरोॽ जोगा ले़ःॽयुक्सानुमे। 12 असे़ॽ हेजोन्डुए, मोनोॽ के़ए़ निवाहाङ्मि मन्दिरमि इक्को खाँबा टोङ्इनुङे, मोबा सानिङ्मि लागि मो मोबेॽए लिये, मोबेॽ निवाहाङ्मि निङ, मोबा थाङ्सिरिबाङ उङ्इये चोङ सहर यरुसलेममि निङ्नुङ टाङ्बामि चोङ निङ्सो मोबेॽ साप्मिनुङे।” 13 “निवाहाङ्मि पबित्रा होङ्निवाडे़ॽ चोप मन्डलिबेॽहाजि इमाङ लुमे़ॽनिङ्सिन्डुजे, ने़ए़क काप्खुबाजि चोबे़ॽ खेप्सुजिरो।” लाउडिकिया मन्डलिमि लागि लम्बवाँ 14 “मोबा लाउडिकिया मन्डलि खाङ्खुबा अगुवामि लागि इगो लम्बवाँ साबे निवाहाङ्मि सिरिस्टिमि मुल, बिस्वास ले़ःॽमारोनुङ चइबमा साक्छिनुङ आमेन लुघुबाडे़ॽ इडोॽ लुये। 15 के़ॽ हे़निङ्हा चोप योम्बोक लेनुङ्हा। हे़निङ येम्जुवासो ले़टानिङ्नि कुजुवासो ले़टानिङ्नि। हे़निङ येम्जुवा अथबा कुजुवा ले़टानिङ्होङ्सो नुडे़। 16 तर हे़निङ बिस्वासबेॽ कुजिक कुजिकरेॽनोॽ ले़न्डानिङे, हे़निङ येम्जुवासो ने़ॽनि, कुजुवासो ने़ॽनि मोडोगे़ॽ के़ए़ याबुकबाङ राप्पेनुङे। 17 कानिङ याङ्सरावादाङ्बा ले़न्डिङ्मा, कानिङ इमाङ खामिसो खाँचो सिॽनिबा कान्डानिङ। तर चइबानोॽ लुमाबेॽ हे़निङ्गो सारोनोॽ दुःखि, इमाङ मे़ॽनिङ्हाजि नम्नम मिॽमारोहाजि, मिक्सुरुम्बानुङ उक्चुङ्रे़क ले़न्डानिङ, इगो खा हे़निङे़ॽ लेनोॽ मे़लेडिॽटानुमे। 18 मोडोगे़ॽ हे़निङ याङ्सरावादाङ्बा ले़न्डानिङ्होङ सुना से़ङ्से़ङ, उक्चुङ्रेक टे़क्मामि उथ्रिॽमा चेॽ, मोबा मिक ए़ःॽमामि लागि सिडा काबाङ इनानुमे लुनुङ सल्लहा पिनिन्ने़। 19 के़ॽ नम्नम ले़ःॽपॽआ याॽमिजि, के़ॽ योप्नुङ दन्डा पिनुङ्हाजि। मोडोगे़ॽ नुबा योम्बोक ले़ःॽमामि लागि साप्थाक्सानिङे, मोबा पापि योम्बोक लेप्पेनुङ टेसानिङे। 20 खेप्सानुमे, का राम्डेमबेॽ येःप्नुङ ढकढक रोःइनुङे। सेम्ला खेम्नुङ राम्डेम हेनानुमहोङ का होङ्सिॽयु लेङ्इङे़, हे़निङ्नुङ सोरि पेन्नुङ चामा चाङे, मोबा हे़निङ्सो कानुङ सोरि पेन्नुङ चान्डानुमे। 21 के़ॽ हेजानुङ पाबानुङ खोमि पेन्ढामबेॽ सोरि पेन्डोक्टिडोॽ, हेजाघुबा का पेन्ढामबेॽ सोरि पेम्मे अधिकार पिनुङे़। 22 पबित्रा होङ्निवाडे़ॽ मन्डलिजि इमाङ लुये, ने़ए़क कप्खुबाजि चोबे़ॽ खेप्सुजिरो।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.