परकास 22 - याम्फुहिङ्मवामि होङ्मा 1 मोबा मो थाङ्सिरिदुतडे़ॽ का स्फटिकडोॽमा चहकिलो हिङ्मवामि होङ्मा खाङ्मेॽटिङ, मो होङ्मा चाहिँ निवाहाङ्मिनुङ बलि लिघुबा थुमामि हाङ्पेन्ढामबाङ पे़आप्पॽआ ले़टा। 2 मो यिवा सहरमि राममि रुम्बाङ यिःॽखे़ॽमे़ॽनिङ्सिडा। मो यिवामि निगे़ङ्लामनोॽ हिङ्मवामि डाङ टुसा, मो डाङ्बेॽ इक निङ्बेॽ बारो खालहा चा किङ्इये। इक्को महिनाबेॽ इक्को खालमा चा किङ्इये, मो डाङ्मि आॽवा चाहिँ जाति जातिजि नुबोक्मे सिडा ले़टाहा। 3 हागोएम्बाङ मिॽयु मो सहरबेॽ पेङ्घुबाजिबेॽ अथबा इमाङ्बेॽसो निवाहाङ्मि चापहिमा सिॽनिबा। निवाहाङ्मिनुङ थुमामि हाङ्पेन्ढाम मोबेॽ टुये, मोबेॽ खोमि सेवाकजिडे़ॽ सानिङ खोमि ओहाङ ले़न्डुजे। 4 माहाजिडे़ॽ खोमि नजिक खाङ्डोक्इन्डुजे, निवाहाङ्मि निङ खोजिमि तुरुवाबेॽ साप्मिहा। 5 मोबेॽ फेरि इन्डोक्पेॽसो सेन्जुगुप लिनिबा, मोबेॽहा याॽमिजिमि लागि सेन्डा कुप्पि पाप्निबा, लेन्डामि लागि नम पाप्निबा, इन्ढोङ्होङ परमपरभु निवाहाङ्नोॽ खोजिमि लागि उज्यालो ले़ये। मोबा माहाजिडे़ॽ सानिङ्मु राज्य ले़न्डुजे। 6 मो थाङ्सिरिदुतडे़ॽ का लुसिङ, “इघा बचन बिस्वास ले़ःॽमारोहानुङ चइबानोॽहा ले़हा। हागो चान्डोनोॽ लिजाहा खा टाङ्बामि सेवाकजि खाङ्मेॽमामि, अगमबक्ताजि होङ्निवा पिघुबा परमपरभु निवाहाङ्डे़ॽ टाङ्बामि थाङ्सिरिदुत पाङ्इटुए।” येसु चान्डोनोॽ लेम्मे़ॽनिङ्सिये 7 “खेप्से, का चान्डोनोॽ लेङ्इङे़। इगो नेॽचिरामि अगमबानिमि बचन पालना ले़ःॽखुबाजि आसिस चुप्खुबाजि ले़म्मे।” 8 इघा चोप खेम्घुबानुङ खाङ्डोक्खुबा का युहन्ना ले़ङे। इन्डोक्पेॽ के़ॽ इघा खा खेप्सुङ, खाक्सुङ मोडोक्पेॽ इघा खा खाङ्मेॽखुबा थाङ्सिरिदुतमि पोम्बेॽ उःक्युनुङ सेवा ले़ःॽमा योगुङ, 9 तर खोसे़ॽ का लुसिङा, “खाक्से, हे़ने़ॽ का ढोग ए़ले़ःॽङे। कागो हे़न्नुङ अगमबानि इःघुबा हे़ने़हा निसाजिनुङ इगो नेॽचिरामि बचन पालना ले़ःॽखुबा निवाहाङ्मि सेउतेरेॽनोॽ ले़ङे। मोडोगे़ॽ हे़ने़ॽ निवाहाङ चाहिँ ढोग ले़टे।” 10 मोबा खोसे़ॽ का इडोॽ लुसिङा, “इगो नेॽचिरामि अगमबानिमि बचनबेॽ मोहोर ए़ॽटिसे, इन्ढोङ्होङ इघा खा पुरा लिमा बेला के़क्पेॽनोॽ लेम्बेटे़। 11 दुस्टा योम्बोक ले़ःॽखुबाजि मोडोक्नोॽ ले़टिङ्मिरो, चिक्चिमिॽमारोहा योम्बोक ले़ःॽखुबाजि मोडोक्नोॽ ले़टिङ्मिरो, धरमिजिडे़ॽ धरमि योम्बोकनोॽ ले़टिङ्मिरो, पबित्रा याॽमिजि चाहिँ पबित्रानोॽ लिडिङ्मिरो।” 12 “खेप्सानुमे, का चान्डोनोॽ लेम्मे़ॽनिङ्सिङे, चोप याॽमिजिडे़ॽ ले़ःॽपॽआ नुबानुङ मङे़हा योम्बोकमि इनाम कानुङ टुहा। 13 कानोॽ अल्फानुङ ओमेगा, मोबा याक्लोमानुङ ए़क्साङ्ए, पुःक्मारानुङ रुक्मरा (रुक्सिमा, तुरनि) ले़ङे। 14 “हिङ्मवामि डाङ्मि अधिकार चुप्मामिनुङ सहरमि राम्डेमबाङ होङ्सिॽयु पे़खे़ॽटोक्मा लुनुङ टाङ्बामि पापि चेॽ वासोक्खुबाजिडे़ॽ आसिस चुप्मिन्डुजे। 15 तर हुःॽवाडोॽ बेहोरा ले़ःॽखुबाजि, टुनामुना ले़ःॽखुबाजि, बेभिचार ले़ःॽखुबाजि, याॽमि सेॽखुबाजि, मुरति पुजा ले़ःॽखुबाजि, रेम्सिङ खा नेन्जाखुबाजि इडोक्हा चोपजि सहरबाङ पाखे़ॽयुनोॽ सिॽइम्मे। 16 “का येसुडे़ॽ टाङ्बामि दुत हे़निङ्मि मन्डलिबेॽहा चोपजि इगो साक्छि पिमामि लागि पाङ्इटिङे। दाउदमि बङ्समि पसा, मोबा माक्मिए उज्यालोमा साङ्गे कानोॽ ले़ङे।” 17 पबित्रा होङ्निवानुङ नायोङ्माडे़ॽ लुये, “आबे।” असे़ॽ खेम्इन्डुए मोसे़ॽ लुसुरो, “आबे” असा वाइॽमे़ॽ सिटुए, खोसे़ॽ हेरो हिङ्मवामि योङा उक्सुरो। 18 इगो नेॽचिरामि अगमबानिमि बचन खेम्घुबा चोप याॽमिजि का युहन्नाडे़ॽ लुनुङ्हाजि, इगो खाबेॽ हाइखा खा असे़ॽ येडुहोङ निवाहाङ्डे़ॽ मोसोक्पेॽ इगो नेॽचिराबेॽ साप्पॽआ बिपत्तिसो येप्पेन्डुए। 19 मोबा असे़ॽ इगो अगमबानिमि नेॽचिरामि बचनबाङ ए़डेॽवा खासो चुक्पेसुहोङ, इगो नेॽचिराबेॽ साप्पॽआ हिङ्मवामि डाङ्बाङ्नुङ पबित्रा सहरबाङ मोसे़ॽ चुप्मे भागा निवाहाङ्डे़ॽ खोबाङ ङाप्मिन्डुए। 20 इघा खामि साक्छि पिघुबाडे़ॽ लुये, “चइबानोॽ, का चान्डोनोॽ लेङ्इङे़।” आमेन, लेम्बेसे हे परभु येसु। 21 परभु येसुमि अनुग्रहा चोपनुङ सानिङ्मु टुडुङ्घे़ॽरो। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.