परकास 21 - याम्फुचोङ थाङ्सिरिनुङ मक्खाम्डेम 1 मोबा के़ॽ चोङ नान्द्रुङ्मानुङ चोङ मक्खाम्डेम खाङ्डोक्टुङ, इन्ढोङ्होङ मो याक्लोमा नान्द्रुङ्मानुङ मक्खाम्डेम नासि लिघडा, मोबा माहोङ्मागो छना मानोॽ माडा। 2 मोबा के़ॽ निवाहाङ्बाङ नायोङ्बामि लागि नायोङ्माडोक्नोॽ चाक्मानुङ पोरोक्युङ्बॽआ, मो पबित्रा सहर, चोङ यरुसलेम थाङ्सिरिबाङ मिॽमु हेॽउक्मे़ॽनिङ्सिबॽआ खाङ्डोक्टुङ। 3 हाङ्पेन्ढामबाङ इक्को बेॽए सेम्लाडे़ॽ इडोॽ लुबॽआ के़ॽ खेप्सुङ, “खेप्सानुमे, निवाहाङ याॽमिजिनुङ पेम्बोॽइटे़। खो माहाजिनुङ पेङ्इयेनुङ माहा याॽमिजि चाहिँ निवाहाङ्मि याॽमिजि लिम्मे। निवाहाङ खोम्दाङ्बा माहाजिमि निवाहाङ लिनुङ पेङ्इये। 4 निवाहाङ्डे़ॽ माहाजिमि चोप मिॽवा टुःक्पेबेन्डुजे, मोबा फेरि असासो सिघे़ॽमिने, सोकपेॽ सिॽनुङ असे़ॽसो हाःप्मा पाप्निबा, दुःख इमाङ्सो आङ्मा पाप्निबा। इन्ढोङ्होङ याक्लोहा चोप खा रुक्खे़टाहा।” 5 मोबा हाङ्पेन्ढामबेॽ पेङ्घुबा निवाहाङ्डे़ॽ का लुसिङा, “खेप्से, के़ॽ चोप खा चोङ टोङ्इनुङ्हा।” खोसे़ॽ इडोक्सो लुसिङ, “इडोॽ साबे, इघा खा बिस्वासनुङ्मानुङ चाइबमा ले़हा।” 6 मोबा निवाहाङ्डे़ॽ का लुसिङ, “हागो चोप योम्बोक रुक्खे़टाहा। का अल्फानुङ ओमेगा ले़ङे, चोप्पाङ याक्लोमानुङ चोप्पाङ ए़क्साङ्मा कानोॽ ले़ङे। असा असाजि वाइॽमे़ॽ सिन्डुजे, माहाजि के़ॽ हिङ्मवामि योङा पिॽठामबाङ उङ्मा पिनुङ्हाजि। 7 असा असे़ॽ दुस्टा योम्बोक हेजोन्डुजे, माहाजिडे़ॽ काबाङ इघा आसिस चुप्मिन्डुजे, का माहाजिमि निवाहाङ लिङेनुङ खोजि काङ्मि पसाजि लिम्मे। 8 तर किस्सिघुबाजि, बिस्वास मे़ॽनिङ्हाजि, चिक्चिमिॽमारोहा योम्बोक ले़ःॽखुबाजि, याॽमि सेॽखुबाजि, बेभिचार ले़ःॽखुबाजि, चटक ले़ःॽखुबाजि, मुरति पुजा ले़ःॽखुबाजिनुङ रेम्सिङ्जि इघा चोपजि चाहिँ मिनुङ गन्धक हाङ्मे़ॽनिङ्सिबॽआ बेॽए थाउरुमबेॽ सिॽइम्मे। इगो सिमवा चाहिँ निच्चिमा सिमवा ले़ये।” चोङ यरुसलेम 9 मोबा माहा एच्चि बिपत्ति इॽठुपमा एच्चि खोरिया याङ्घुबा एच्चि थाङ्सिरिदुतजिबेॽ इक्को थाङ्सिरिदुत काबेॽ लेन्नुङ इडोॽ लुसिङ, “आबे, के़ॽ हे़न थुमामि नायोङ्मा, खोमि बनिमा खाङ्मुन्ने़।” 10 मोबा पबित्रा होङ्निवाडे़ॽ का इक्को बेॽएम्मानुङ ए़ङ्इये सुम्लाखाबेॽ लाघे़ॽटिङ, मोबा निवाहाङ्बाङ पबित्रा सहर यरुसलेम थाङ्सिरिबाङ मिॽमु उङ्मे़ॽनिङ्सिबॽआ खाङ्मेॽटिङ। 11 मो सहरनुङ चाहिँ निवाहाङ्मि महिमा टुसा, मो सहर बेॽलो याङ सिॽइये रत्न, बिल्लौर स्फटिकडोॽ पोक्पॽआ ले़टा। 12 मोमि खिरिरि बेॽएनुङ ए़ङ्इये गारो टुसा, मोबेॽ बारो गोटा राम्डेम टुसा, माहा चोप राम्डेमबेॽ इक्को इक्को थाङ्सिरिदुत येःबामि, माहा राम्डेमबेॽ इस्राएलमि इक्पोङ निच्चि कुलमि निङ साप्पॽआ ले़टा। 13 नमगेतलाम सुम्जि गोटा राम्डेम, थाङ्गेतलाम सुम्जि गोटा राम्डेम, लाङ्गेतलाम सुम्जि राम्डेम, मोबा नमथालाम सुम्जि राम्डेम टुसा। 14 मो सहरमि परखालमि इक्पोङ निच्चि जग टुसा। माहासोक्पेॽ थुमामि बारो जना एप्पा चोङ्साजिमि निङ साप्पॽआ ले़टा। 15 कानुङ यामुघुबा थाङ्सिरिदुतमि हुकपेॽ सहरनुङ मोमि राम्डेम, मोबा मोमि परखाल सिःक्मामि लागि इक्को सुनामि टाँगा टुसा। 16 मो सहर रिउम कुनानुङ्मा ले़टा, माहा रिउम कुनानोॽ बोरोबोरिहा ले़टा। थाङ्सिरिदुतडे़ॽ मो टाँगाडे़ॽ सिःक्माबेॽ मो सहरमि रिउमलामनोॽ उचाइ, चाउडाइ, लम्बाइनुङ बोरोबरिमा अथबा नि हजार रिउम सये किलोमिटर ले़टा। 17 मोबा थाङ्सिरिदुतडे़ॽ सहरमि परखालसो सिःगु, मो सिःक्माबेॽ मो पइसाठि मिटरमा ले़टा। 18 मो परखाल बिल्लौरडे़ॽ टोङ्बॽआ ले़टा, मो सहर चाहिँ निखुर सुनाडे़ॽ टोङ्बॽआ ले़टा, मोबा मिच्रे़ङ्डोक्नोॽ पोगे़। 19 मो परखालमि जग चाहिँ खाल खालहा बेॽलो मोलनुङ्हा रत्नडे़ॽ टोङ्बॽआ ले़टा, याक्लोमा जग बिल्लौरमि ले़टा, निच्चिमा जग निरडे़ॽ टोङ्बॽआ ले़टा, सुम्जिमा जग चाहिँ हरित रत्नडे़ॽ टोङ्बॽआ ले़टा, रिउममा जग चाहिँ पन्नाडे़ॽ टोङ्बॽआ ले़टा। 20 ङाउममा जग चाहिँ आनिस्कडे़ॽ, चुक्चिमा जग चाहिँ हररमा मनिडे़ॽ, एच्चिमा जग चाहिँ हरदिजिक्पा मनिडे़ॽ, आक्चिमा जग चाहिँ बेरुजडे़ॽ, नोक्चिमा जग चाहिँ पुस्पराजडे़ॽ, इक्पोङ्मा जग चाहिँ लसुनेडे़ॽ, इक्पोङ इक्कोमा जग चाहिँ निलमनिडे़ॽनुङ इक्पोङ निच्चिमा जग चाहिँ कटेलाडे़ॽ टोङ्बॽआ ले़टा। 21 माहा बारो राम्डेम चाहिँ बारो मोतिमि ले़टा। माहा चोप राम्डेम मोतिबाङ टोङ्बॽआ ले़टा। मो सहरमि राम मिच्रे़ङ्डोॽ पोॽइये निखुर सुनामि ले़टा। 22 के़ॽ मो सहरबेॽ इक्कोसो मन्दिर मे़ङ्खाङ्डोक्टुङ, इन्ढोङ्होङ चोप्पाङ सक्तिदाङ्बा परभु निवाहाङ्नुङ थुमानोॽ मो सहरमि मन्दिर ले़टाजे। 23 मो सहर उज्यालो टोङ्मामि लागि नमनुङ ला मे़पाप्टा, इन्ढोङ्होङ निवाहाङ्मि महिमानोॽ मोमि उज्यालो ले़ये। मो सहरमि कुप्पि चाहिँ थुमा खोम्दाङ्बा ले़टा। 24 मक्खाम्डेमबेॽहा चोप जातिहा याॽमिजि निवाहाङ्मि उज्यालोबेॽ किॽयु मिॽयु राम्डुम्मे। मोबा चोप हाङ्बाजिडे़ॽ टाङ्बामि मान सम्मान मोबेॽ लाजे़न्डुजे। 25 मो सहरमि राम्डेम इन्डोक्पेॽसो से़क्निबा, मोबेॽ सेन्डा लिनिबा। 26 जाति जातिहा याॽमिजिडे़ॽ खोजिमि मान सम्मान मो सहर होङ्सिॽयु लाजे़न्डुजे। 27 असुद्ध खा, चिक्चिमिॽमारोहा योम्बोक ले़ःॽखुबाजिनुङ रेम्डेॽखुबाजि असासो मोबेॽ पे़खे़ॽटोक्मिने। तर थुमामि हिङ्मवामि नेॽचिराबेॽ निङ साप्पॽआजिरेॽ पे़खे़ॽडोक्इम्मे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.