परकास 20 - याम्फुइक्को हजार निङ 1 मोबा ए़क्साङ इक्को थाङ्सिरिदुत बेॽएम्मा चे़क्चिमि कोङ्नुङ अतल कुन्डामि साचो हुकपेॽ याङ्मानुङ थाङ्सिरिबाङ उङ्बॽआ के़ॽ खाङ्डोक्टुङ। 2 मोसे़ॽ मो बेॽएम्मा पुसे़ॽ इक हजार निङ्मि लागि मो चे़क्चिमि साङ्लोडे़ॽ हिगु। इगो पुसे़ॽनोॽ उहिलेमा पुसे़ॽ ले़ये, मोनोॽ दियालस अथबा सैतान ले़ये। 3 इक हजार निङ्ठोक जाति जातिजि मे़रेप्सुजिरो लुनुङ थाङ्सिरिदुतडे़ॽ मो पुसे़ॽ अतल कुन्डाबेॽ राप्ए़न्नुङ राम्डेमबेॽ साँचो टिनुङ से़गु। मो इक हजार निङ पुरा लिनुङ ए़क्साङ इॽछोॽमि लागि मो लेॽमा खे़ये। 4 मोबा के़ॽ बेॽलो हाङ्पेन्ढामनुङ मोबेॽ पेङ्घुबाजि खाङ्डोक्टुङ्जि, न्याय ले़ःॽमे अधिकार माहाजि पिबॽआ ले़टा। येसुमि टुम्बेॽ साक्छि पिमाबेॽनुङ निवाहाङ्मि बचन खेम्मेॽमाबेॽ निन्डवाँ चेन्नुङ सेॽनेबॽआजिमि होङ्निवाजि मोबेॽ टुसामि। माहाजिडे़ॽ मो मङे़ॽमा जिवातनुङ मोमि मुरतिमि पुजा मे़ले़ःॽखुबाजिनुङ जिवातमि छाप तुरुवानुङ हुकपेॽ मे़न्टिमाबेॽ सेॽनेबॽआजिमि होङ्निवा के़ॽ खाङ्डोक्टुङ माहाजि चोप फेरि हिङ्रिक लिसामि, मोबा खोजिडे़ॽ खिरिस्टनुङ सोरि इक्को हजार निङ्ठोक राज्य ले़टुजि। 5 तर सिबॽआ हाइखाजि चाहिँ मो इक्को हजार निङ मे़रुक्खे़ॽलो हिङ्रिक मे़लिसामि। निवाहाङ्डे़ॽ याॽमिजि सिबॽआबाङ हिङ्बोक्पॽआ याक्लोएखेॽ इगोनोॽ ले़ये। 6 इघाजि चाहिँ आसिस चुप्खुबाजिनुङ पबित्रा लिघुबाजि ले़म्मे। इघाजि हाइको सिमवामि सक्तिडे़ॽ इमाङ्सो ले़ःॽहेसुजिनिबा। इघाजि चाहिँ निवाहाङ्मिनुङ येसु खिरिस्टमि पुजा ले़ःॽखुबा याडाङ्बा लिनुङ खिरिस्टनुङ इक हजार निङ्ठोक राज्य ले़न्डुजे। सैतान नासि लिमे याक 7 इक हजार निङ रुक्खे़ॽएम्बाङ सैतान से़क्पॽआबाङ लेक्खे़ये। 8 मोबा मक्खाम्डेमबेॽहा चोप देस, देसबेॽहा याॽमिजि, अथबा “गोगनुङ” “मागोग” लुमे जाति जातिहा याॽमिजि सैतानडे़ॽ रेम्नुङ ङेः ले़ःॽमामि लागि सुम्इन्डुजे। माहाजि ङेः ले़ःॽमामि लागि माहोङ्माबेॽहा रुङ्गुवासे़ॽवाडोक्नोॽ बेॽलो सुम्इम्मे। 9 मक्खाम्डेमबेॽ चोपराजि माहाजिडे़ॽ रुक्टुजि, मोबा निवाहाङ्मि धारमिक याॽमिजि पेन्ढाम ठाउँनुङ खोसे़ॽ नम्नम ले़ःॽपॽआ सहर खिरिरि यिजुप्सुजि, तर थाङ्सिरिबाङ मि हेॽनुङ माहाजि हिॽनेसुजि। 10 माहा जाति जातिजि रेम्खुबा मो सैतान चाहिँ मिनुङ गन्धक हाङ्मे़ॽनिङ्सिबॽआ बेॽएम्मा थाउरुमबेॽ राप्हेक्सु, मोबेॽ मो जिवातनुङ माहा रेम्सिङ अगमबक्ताजिसो हिॽमे़ॽनिङ्सिडामे। मोबेॽ माहाजिडे़ॽ सानिङ लेन्डा सेन्डा दन्डा चुप्मिन्डुजे। ए़क्साङ्मा न्याय 11 मोबा के़ॽ इक्को बेॽए उथ्रिॽमा हाङ्पेन्ढामनुङ मोसोक्पेॽ पेङ्घुबा खाङ्डोक्टुङ। खोमि पोम्बाङ मक्खाम्डेमनुङ नान्द्रुङ्मा चिःॽखडाजि, मोबा मोजि फेरि मे़ङ्खाङ्मुसाजि। 12 मोबा के़ॽ सिघे़ॽपॽआ बेॽहानुङ ए़द्रिहाजि हाङ्पेन्ढाममि पोम्बेॽ येःप्पटिङ्बॽआ खाङ्डोक्टुङ, मोबा हिङ्मवामि नेॽचिरा हेम्बोगा। मोबेॽ हाइखा नेॽचिरासो हेम्बॽआ ले़टा। माहा नेॽचिराबेॽ साप्नुङ युङ्बॽआ नुबानुङ मङे़हा योम्बोक ले़ःॽखुबाजिमिडोक्नोॽ माहाजिमि न्याय लिसा। 13 मोबा माहोङ्माडे़ॽ खोनुङ टुबॽआ सिबॽआजि टेबेॽटुजि, मोबा सिमवानुङ पातालनुङ टुबॽआ सिबॽआजि टेबेॽटुजि। मोबा माहाजि चोपमि टाङ्बा टाङ्बे़ॽ ले़ःॽपॽआ योम्बोकडोक्नोॽ न्याय लिसा। 14 मोबा ए़क्साङ सिमवानुङ पातालसो मिमि कुन्डाबेॽ राप्खडा, इगो मिमि कुन्डा लुबॽआ चाहिँ हाइकोमा सिमवा ले़ये। 15 असा असामि निङ हिङ्मवामि नेॽचिराबेॽ माडा माहाजि चोप मो मिमि कुन्डाबेॽ राप्खडामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.