परकास 2 - याम्फुएफिसस मन्डलिमि लागि लम्बवाँ 1 “एफिसस सहरबेॽहा मन्डलि खाङ्खुबा अगुवाजि इगो खा साबे, एच्चि गोटा साङ्गे टाङ्बामि चुप्थिङ हुकपेॽ याङ्घुबानुङ एच्चि गोटा सुनामि कुप्पि युङ्ढाममि रुम्बेॽ राम्घुबाडे़ॽ इडोॽ लुये। 2 हे़निङे़ॽ ले़ःॽपॽआ होप्तिॽवानुङ्हा योम्बोकनुङ सहनसिल लिबॽआ खा के़ॽ लेनुङ्हा। मोबा हे़निङे़ॽ दुस्ट निवानुङ्हा याॽमिजि खाङ्हेसानुम्ने लुनुङ्सो के़ॽ लेनुङे़। माहाजि टाङ्बा एप्पा चोङ्सा कामानिम्मे, तर खोजि एप्पा चोङ्सा ने़ॽनिहाजि लुनुङ जाँच ले़ःॽपॽआ हे़निङे़ॽ लेडोक्इटानुमे लुमे खासो के़ॽ लेनुङे़। 3 हे़निङे़ॽ काबेॽ बिस्वास ले़ःॽपॽआसे़ॽ योङ उःक्नुङ सारो खेः आङ्इटानुमे, मोबा हागोरोसो हे़निङ काबेॽ भरोसा युङ्मे़ॽनिङ्सिन्डानुमे लुमे खासो के़ॽ ले़नुङे। 4 तर हे़निङ्मि बिरोधबेॽ कानुङ इक्को खा टुये। मो खा लुबॽआ चाहिँ हे़निङे़ॽ का याक्लो ले़टिडोॽमा नम्नम ले़ःॽमा लेप्पेटानुमे। 5 हे़निङे़ॽ टाङ्बामि टुम्बेॽ नुरोॽ मिॽखाक्सानुमे, हे़निङ्मि याक्लोए बिस्वासबाङ इन्डोक मिॽमु हेॽयुटानिङे। हागो हे़निङे़ॽ पापि योम्बोक लेॽपेनुङ टेआबानिङे, मोबा याक्लो हे़निङे़ॽ ले़टिडोक्नोॽ ले़टानुमे। मोडोॽ मे़ले़टानुमहोङ्गो का हे़निङ्बेॽ लेन्नुङ हे़निङ्मि सुनामि कुप्पि युङ्ढाम मो ठाउँबाङ सेम्बेनुङे। 6 तर हे़निङ्बेॽ इक्को खा चाहिँ नुबा ले़ये। मो खा लुबॽआ के़ॽ निकोलाइटसजिमि योम्बोक सिॽचाडिनोॽ हे़निङे़ॽसो मो सिॽचान्डानुमे। 7 पबित्रा होङ्निवाडे़ॽ मन्डलि इडोॽ लुये, ने़ए़क काप्खुबाजि चोबे़ॽ खेप्सानुमे। असे़ॽ हेजोन्डुए, मोसे़ॽ निवाहाङ्मि बगैचाबेॽ टुये हिङ्मवामि डाङ्मि चा चोडोक्इन्डुए।” स्मुरना मन्डलिमि लागि लम्बवाँ 8 “मोबा स्मुरनाबेॽए मन्डलि खाङ्खुबा अगुवामि लागि इगो खा साबे, चोप्पाङ याक्लो खोनोॽ टुसे़नुङ चोप्पाङ ए़क्साङ्सो खोनोॽ टुये खो सिघे़ॽनुङ हिङ्बोगा हागोरो खो हिङ्रिक ले़ये। इगो लम्बवाँ चाहिँ परभु येसुमि ले़ये, खोसे़ॽ इडोॽ लुये, 9 के़ॽ हे़निङे़ॽ खेः आङ्मे़ॽनिङ्सिन्डानुमे लुमे खानुङ इमाङ मे़ङ्काप्खुबा गरिब ले़न्डानिङे लुमे खासो लेनुङ्हा। तर चइबानोॽ लुमाबेॽ निवाहाङ्मि पोम्बेॽ हे़निङ काप्चाघुबाजि ले़न्डानिङे। टाङ्बा यहुदि कामानिघुबाजिडे़ॽ हे़निङ्मि बिरोधबेॽ मङे़हा खा इःबॽआसो के़ॽ लेनुङ्हा। माहाजि खोजि टाङ्बा यहुदि कामानिम्मे तर माहाजि यहुदि ने़ॽनिहाजि, अक्खाजिगो सैतानमि याॽमिजि ले़म्मे। 10 हे़निङ्मि हिङ्मवाबेॽ लेङ्सिॽपोरोक्पॽआ खेःबाङ ए़क्किसिडानिङे। खेप्सानुमे, सैतानडे़ॽ हे़निङ इन्डोक जनाजिमि बिस्वास जाँच ले़ःॽमामि तिरिङ्गा खिमबेॽ से़ॽइये। हे़निङ इक्पोङ याकठोकरेॽ चुङ्जामा खेः आङ्मेये, तर हे़निङे़ॽ सिमा सिॽहोङ्सो बिस्वास ले़ःॽमा ए़लेडानुमे। हे़निङे़ॽ बिस्वास ले़ःॽमा मे़लेडानुमहोङ के़ॽ हिङ्मवामि मुकुट पिनिम्ने़। 11 पबित्रा होङ्निवाडे़ॽ मन्डलिबेॽहाजि इमा लुन्डुजे, ने़ए़क काप्खुबा चोबे़ॽ खेप्सानुमे, असे़ॽ हेजोन्डुए, खो ए़क्साङ्ए सिमवाबाङ किस्सिमा पाप्निबा।” परगामम मन्डलिमि लागि लम्बवाँ 12 “मोबा परगाममबेॽए मन्डलिबेॽ खाङ्खुबा अगुवाजि इगो खा साबे, निलामनोॽ धारनुङ्मा फेया काप्खुबा परभु येसुडे़ॽ इडोॽ लुये। 13 सैतानमि पेन्ढाममि के़क्पेॽनोॽ हे़निङ पेङ्इन्डानिङे लुमे खा के़ॽ लेनुङे़। तरसो हे़निङे़ॽ काबेॽ ले़ःॽपॽआ बिस्वास बोलियो ले़ये। साक्छि बोलियो बिस्वासनुङ्मा एन्टिपास सैतानमि पेन्ढाम के़क्पेॽ सेॽनेमाबेॽसो हे़निङे़ॽ बिस्वास मे़लेडानुम। 14 तरसो हे़निङ्मि बिरोधबेॽ कानुङ इक्को खा टुये, हे़निङ्नुङ सोरि पेङ्घुबाजिबेॽ इक्को निप्पाङ याॽमिजिडे़ॽ बालाममि सिक्छेबेॽ बिस्वास ले़न्डुजे। माहाजिडे़ॽ इस्राएलिजि मुरतिबेॽ चेॽटिबॽआ थोक चामेॽनुङ पाप ले़ःॽमेॽमामि, बेभिचार ले़ःॽमेॽमामि बालामडे़ॽ हाङ्बा बालाक इःॽपॽआ ले़टा। 15 इडोक्नोॽ हे़निङ्मि रुम्बेॽहा इन्डोक जनाजिडे़ॽ निकोलाइटस लुमे याॽमिजिमि सिक्छेबेॽसो बिस्वास ले़न्डुजे। 16 मोडोगे़ॽ पापि योम्बोक लेडानुमे, मे़लेडानुमहोङ का चान्डोनोॽ हे़निङ्बेॽ लेङ्इङे़, मोबा याबुकबाङ पे़आप्मिये फेयाडे़ॽ हे़निङ्नुङ ङे ले़नुङे। 17 पबित्रा होङ्निवाडे़ॽ मन्डलिबेॽहा बिस्वासिजि इमाङ लुन्डुजे, ने़ए़क काप्खुबा चोबे़ॽ खेप्सानुमे। असे़ॽ हेजोन्डुए, खो के़ॽ चुम्युङ्बॽआ मन्नाबाङ् ए़डे़ॽवा पिनुङे़, मोबा खो चोङ निङ साप्पॽआ इक्को उथ्रिॽमा रुङ्गोॽवामि पाटिसो पिनुङे़। मो निङ चाहिँ उथ्रिॽमा रुङ्गोॽवामि पाटि चुप्खुबे़ॽरेॽ लेन्डुए।” थिआटिरा मन्डलिमि लागि लम्बवाँ 18 “मोबा थिआटिराबेॽए मन्डलि खाङ्खुबा अगुवा इगो खा साबे, इगो खा निवाहाङ्मि पसाडे़ॽ लुये, खोमि मिक मिमि राप्लवाडोॽ ले़ये, खोमि सराङ पे़ङ्नुङ पोॽइये काँसाडोॽ ले़हा। 19 हे़निङे़ॽ ले़ःॽपॽआ योम्बोक के़ॽ लेनुङ्हा, हे़निङे़ॽ ले़ःॽपॽआ नम्नम, हे़निङ्मि बिस्वासनुङ सेवा, मोबा हे़निङ्मि हुङ्हेमे सक्तिमि टुम्बेॽ के़ॽ लेनुङे़। हे़निङे़ॽ याक्लोएबाङ्सो आयु छना बेॽलो सेवा ले़न्डानुमे लुमे खासो के़ॽ लेनुङ्हा। 20 तर हे़निङ्मि बिरोधबेॽ इक्को खा इःमा टुये, मो खा लुबॽआ हे़निङे़ॽ इजेबेल लुमे मेॽनामिॽमि खा खेम्इन्डानुमे। मोसे़ॽ खोमदाङ्बा अगमबादिनि ले़ङे लुनुङ काङ्मि सेवाकजि बेभिचार ले़ःॽमेन्डुजे, मोबा मुरतिबेॽ चेॽटिबॽआ थोक चामा इःॽनुङ रेम्इन्डुजे। 21 के़ॽ खो पाप ले़ःॽमा लेडे लुसुङ, तर खोसे़ॽ बेभिचार ले़ःॽमा मे़लेडु। 22 मोडोगे़ॽ के़ॽ खो योःक्सिघे़ॽमेनुङे़, मोबा मोनुङ बेभिचार ले़ःॽखुबाजिडे़ॽसो पाप ले़ःॽमा मे़लेडुजिनिहोङ थलोबेॽ खेः आङ्मेनुङ्हाजि। 23 के़ॽ खोमि चोङ्साजि सेॽनेनुङ्हाजि। मोबा मन्डलिजिडे़ॽ इगो खा लेडोक्इन्डुजे, चोपजिमि निवानुङ चुवामि जाँच ले़ःॽखुबानुङ हे़निङ चोबे़ॽ ले़ःॽपॽआ योम्बोकडोॽमा इनाम पिघुबा चाहिँ कानोॽ ले़ङे लुनुङ लेन्डुजे। 24 तर मो मेॽनामिॽमि सिक्छे मे़ङ्खेम्खुबाजिनुङ सैतानमि लेमा छॽइये खा मे़चिङ्घुबा हे़निङ थिआटिरा मन्डलिबेॽहा कोहि याॽमिजि के़ॽ इमाङ्सो कोक खिमेॽनिम्नानि। 25 तर का मे़लेन्ङ्रो हे़निङे़ॽ काबेॽ ले़ःॽपॽआ बिस्वास बोलियो युक्सानुमे। 26 असे़ॽ हेजोन्डुएनुङ के़ॽ नेन्जाबॽआ योम्बोक ए़क्साङ्ठोक ले़टुङ्घे़न्डुए, माहाजि जाति जातिजिसोक्पेॽ सासन ले़ःॽमे अधिकार पिनुङ्हाजि। 27 मोबा हे़निङे़ॽ माहाजिसोक्पेॽ चे़क्चिमि टोङ्इराडे़ॽ सासन ले़न्डानुमेनुङ माहाजि आक्खामामि सुउ पोक्टिडोॽ टुक्रा टुक्रा पोॽइन्डानुमे। के़ॽ पाबाबाङ चुप्पॽआ इगो अधिकार हे़निङ पिनिम्ने़। 28 के़ॽ हे़निङ माक्मिए साङ्गेसो पिनिम्ने़। 29 पबित्रा होङ्निवाडे़ॽ मन्डलिबेॽहा बिस्वासिजि इमाङ लुन्डुजे, ने़ए़क काप्खुबा चोबे़ॽ खेप्सुजिरो।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.