परकास 19 - याम्फुछुट्कारामि सेम 1 मोबा ए़क्साङ थाङ्सिरिबाङ बेॽलो याॽमिजि काबॽआडोक्मा सेम्लाडे़ॽ इडोॽ लुमे़ॽनिङ्सिबॽआ के़ॽ खेप्सुङ, “हल्लेलुयाह! मुक्ति, महिमानुङ सक्ति कानिङ्मि निवाहाङ्मि ले़ये। 2 इन्ढोङ्होङ खोमि न्याय ठिकनुङ चाइबमा ले़ये। बेभिचारि योम्बोकडे़ॽ चोप मक्खाम्डेम नासि ले़ःॽखुबा मो बेस्या मेॽनामिॽ निवाहाङ्डे़ॽ ठिक दन्डा पिनुङ खोमि याॽमिजि सेॽनेबॽआ हरिमि साटो लाटुए।” 3 मोबा फेरि माहाजि इडोॽ वोमानुङ लुसुजि, “हल्लेलुयाह! आक्को बेबिलोन सहर हिॽखे़ॽपॽआ मे़क्खु सानिङ मिन्डु खे़ॽए़ये।” 4 मोबा माहा निबोङ रिबाङ धारमिक गुरुजिनुङ माहा रिउम हिङ्रिक जिवातजिडे़ॽ हाङ्पेन्ढामबेॽ पेङ्घुबा निवाहाङ सेवा मुनुङ इडोॽ लुमानुङ खोमि ओहाङ ले़टुजि, “आमेन, हल्लेलुयाह!” थुमामि फुङ्सया 5 निवाहाङ्मि हाङ्पेन्ढामबाङ इक्को इडोॽ लुबॽआ खेम्मुसा, “निवाहाङ्डे़ॽ लुबॽआ खा खसिखुबा ए़द्रिहानुङ बेॽहा हे़निङ चोबे़ॽ निवाहाङ्मि ओहाङ ले़टानुमे।” 6 मोबा ए़क्साङ बेॽलो याॽमिजि सुम्नुङ वोबॽआडोॽ अथबा बेॽए वाडुमडोक्नुङ नान्द्रुङ्मा मुक्पॽआडोक्मा के़ॽ खेप्सुङ, मोसे़ॽ इडोॽ लुमे़ॽनिङ्सिडु, “हल्लेलुयाह! इन्ढोङ्होङ परमपरभु कानिङ्मि निवाहाङ चोप्पाङ बेॽए सक्तिदाङ्बा ले़ये, खोसे़ॽ राज्य ले़न्डुए। 7 कानिङ साप्थाङ्मा, हाङ्हाङ ले़ःॽमा! खोमि महिमा ले़ःॽमा, इन्ढोङ्होङ थुमामि फुङ्सयामि याक लेम्बेटे़नुङ, खोमि नायोङ्मा चाक्नुङ पोरोक्पेटे़! 8 मो नायोङ्माडे़ॽ चाङ्मामि लागि उथ्रिॽमा पोॽइये मलमलमि चेॽ पिबॽआ ले़ये।” मो उथ्रिॽमा पोॽइये मलमलमि चेॽ लुबॽआ चाहिँ निवाहाङ्मि याॽमिजिमि धारमिक योम्बोक ले़हा। 9 मोबा मो थाङ्सिरिदुतडे़ॽ का लुसिङ, “इगो सबे, माहाजि चोप आसिस चुप्खुबाजि ले़म्मे असा असे़ॽ थुमामि फुङ्सयामि भत्तेरबेॽ निम्तो चुप्मिटुजे।” मोसे़ॽ फेरिसो का लुसिङ, “निवाहाङ्मि चाइबमा बचन इघानोॽ ले़हा।” 10 मोबा खो सेवा ले़ःॽसिॽ का खोमि सराङ्बेॽ पोप्युसिङ, तर खोसे़ॽ का लुसिङा, “हे़ने़ॽ का सेवा ले़ःॽमा फे़न्निबा। कासो हे़न्नुङ हे़ने़हा वावा निसाजिडोॽ येसुमि टुम्बेॽहा साक्छि पिघुबा निवाहाङ्मि सेउतेरेॽ ले़ङे। ओहाङ्गो निवाहाङ पिमा खे़ये, इन्ढोङ्होङ परभु येसु खिरिस्टडे़ॽ ले़ःॽपॽआनुङ लुबॽआ चाइबमा खाडे़ॽनोॽ अगमबक्ताजि सक्ति पिन्डुजे।” उथ्रिॽमा घोडासोक्पेॽ सवारि लिघुबा 11 के़ॽ थाङ्सिरि हेम्बोक्पॽआनुङ मोबेॽ इक्को उथ्रिॽमा घोडा खाङ्डोक्टुङ। मो घोडासोक्पेॽ सवारि लिघुबामि निङ “बिस्वासनुङमानुङ” “चाइबमा” लुये। खोसे़ॽ ठिक न्याय ले़न्डुएनुङ ङेः ले़न्डुए। 12 खोमि मिक मिमि राप्लवाडोक्हा ले़टा, खोमि निन्डवाँबेॽ बेॽलो मुकुट टुसा। खोमि इक्को निङ साप्पॽआ ले़टा, मो निङ चाहिँ खोसे़ॽरेॽनोॽ लेसुए। 13 खोसे़ॽ चाङ्बॽआ चेॽ हरिबेॽ वाडप्पॽआडोॽ ले़टा। खोमि निङ चाहिँ “निवाहाङ्मि बचन” ले़टा। 14 उथ्रिॽहा चेॽ चाङ्नुङ उथ्रिॽहा घोडासोक्पेॽ साङ्घुबा थाङ्सिरिबेॽहा तिरिङ्गाजि खोमि ए़ङ्गुवा ए़ङ्गुवा ए़नामि। 15 मक्खाम्डेमबेॽहा जाति जातिहा याॽमिजि हेजामामि लागि खोमि याबुकबाङ फेया पे़आबा। खोसे़ॽ चे़क्चिमि टोङ्इराडे़ॽ माहाजिसोक्पेॽ नम्नम मे़ॽनिङ सासन ले़न्डुए। अङ्गुर कोलबेॽ ए़न्नुङ यिम्डिडोॽ चोप्पाङ बेॽए सक्तिदाङ्बा निवाहाङ्मि सुरिकमि कोलबेॽ माहाजि यिम्इन्डुजे। 16 खोमि चेॽनुङ सब्रे़कपेॽ “हाङ्बाजिमि हाङ्बानुङ परभुजिमि परभु” लुमे निङ साप्पॽआ ले़टा। 17 मोबा ए़क्साङ इक्को थाङ्सिरिदुत नमसोक्पेॽ येःप्मे़ॽनिङ्सिबॽआ खाङ्डोक्टुङ। मोसे़ॽ नान्द्रुङ्माबेॽ पेमे़ॽनिङ्सिबॽआ चोप सोङाजि वोमानुङ इडोॽ लुसुजि, “आबानिङे, निवाहाङ्मि बेॽएम्मा भत्तेरबेॽ चासिॽ सुप्सानिङे। 18 हे़निङे़ॽ हाङ्बाजि, तिरिङ्गाजिमि एप्पाजि, सक्तिदाङ्बा याॽमिजि, घोडाजि, मोबा माहासोक्पेॽ सवारि लिघुबाजि, फुक्का याॽमिजि, सेउते सेउतेनिजि, बेॽहानुङ ए़द्रिहा चोपजिमि सा हे़निङे़ॽ चासानुमे।” 19 मोबा मो जिवात, मक्खाम्डेमबेॽहा हाङ्बाजि, खोजिमि तिरिङ्गाजि, घोडाबाङ सवारि लिघुबा मोबा खोमि तिरिङ्गाजिनुङ ङेः ले़ःॽमामि सुम्बॽआ के़ॽ खाङ्डोक्टुङ। 20 मोबा मो जिवातनुङ मोमि पोम्बेॽ खरिहा योम्बोक ले़ःॽखुबा मे़ॽनोक्मा अगमबक्ता निप्पाङ्नोॽ कैदि लिसाजि। इघा खरिहा योम्बोकबाङ मो रेम्सिङ अगमबक्ताडे़ॽ मो जिवातमि छाप टिघुबाजिनुङ मोमि मुरतिमि पुजा ले़ःॽखुबाजि रेम्बॽआ ले़टामे। हाङ्मे़ॽनिङ्सिबॽआ गन्धकमि बेॽएम्मा थाउरुमबेॽ मोजि हिङ्रिकनोॽ राप्ए़न्डुजि। 21 मोबा एम्बॽआजि चाहिँ घोडासोक्पेॽ सवारि लिघुबामि याबुकबाङ पे़आप्पॽआ फेयाडे़ॽ सेॽनेसुजि, मोबा चोप सोङाजिडे़ॽ माहाजिमि सिगुयाक उक्खरो चोसुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.