परकास 18 - याम्फुबेबिलोन नासि लिबॽआ 1 मोबाङ ए़क्साङ बेॽए अधिकारनुङ्मा हाइको इक्को थाङ्सिरिदुत थाङ्सिरिबाङ किॽमु उङ्मे़ॽनिङ्सिबॽआ के़ॽ खाङ्डोक्टुङ। खोमि जोतिडे़ॽ मक्खाम्डेम उज्यालो लिसा। 2 मो वोमानुङ इडोॽ कासा, “बेॽएम्मा सहर बेबिलोन नासि लिसा, मो सहर हागो मङे़हा चापजिमि पेन्ढाम, चोप असुद्ध होङ्निवानुङ चोप चिक्चिमिॽमारोहा असुद्ध सोङाजिमि पेन्ढाम हु लिटे़। 3 इन्ढोङ्होङ चोप जातिहा याॽमिजि मो बेस्या मेॽनामिॽमि बेभिचारमि मद्यडे़ॽ सेॽखे़टामे। मोबा मक्खाम्डेमबेॽहा चोप हाङ्बाजिडे़ॽ मोनुङ बेभिचार ले़ए़टुजे, मोबा मोसे़ॽ नेन्जाबॽआनुङ मिॽपॽआडोॽमा हिङ्मवा हिङ्बॽआसे़ॽ मक्खाम्डेमबेॽहा चोप हाङ्बाजि मोमि लालचाडे़ॽ टिप्खे़टुजे।” 4 मोबा ए़क्साङ के़ॽ थाङ्सिरिबाङ इडोॽ लुबॽआ हाइको खा खेप्सुङ, “होउ के़हा याॽमिजि, आक्को सहरबाङ पाखे़ॽयु आबानिङे, आक्कोनुङ सोरि हे़निङे़ॽसो पाप ए़ले़टानुमे आक्कोमि लागि पोरोक्नुङ युङ्बॽआ दन्डाबेॽ हे़निङ्सो ए़सिडानिङे। 5 इन्ढोङ्होङ आक्कोमि पाप थाङ्सिरिठोक नोःक्युङ्घे़टाहा, निवाहाङ्डे़ॽ आक्कोमि मङे़हा योम्बोक मिन्डेडुने। 6 आक्कोसे़ॽ इमा इमा ले़ए़टुए, खोसो मोडोक्नोॽ ले़टानुमे, मोसे़ॽ हे़निङ ले़ःॽपॽआबाङ्सो दोब्बोर बेॽलो खो टेबेॽटानुमे, हे़निङ्मि लागि पोरोक्पॽआ मद्यबाङ्सो दोब्बोर खरोमा मद्य खोमि खोरियाबेॽ ए़म्बेॽटानुमे। 7 मोसे़ॽ इन्डोक सुख बिलास ले़ःॽपॽआ ले़टे़, मोडोक्नोॽ बेॽलो खो खेःनुङ हाःप्मेॽटानुमे। इन्ढोङ्होङ मोसे़ॽ निवाबेॽ लुन्डुए, ‘का बेॽए हाङ्मा लिनुङ पेङ्इङे, का राङ्मिॽमा ने़ॽनि, के़ॽ इन्डोक्पेॽसो दुःख आङ्मा पाप्निबा।’ 8 मोडोगे़ॽ इक्याकपेॽनोॽ मोसोक्पेॽ सोक, साक्आङ्सानुङ सिमवामि बिपत्ति लेङ्इहा, मोबा मिडे़ॽ मो हिॽनुङ खरानि टोङ्इन्डुए, इन्ढोङ्होङ मोमि न्याय ले़ःॽखुबा परमपरभु निवाहाङ चोप्पाङ सक्तिदाङ्बा ले़ये।” 9 मो मेॽनामिनुङ बेभिचार ले़ःॽखुबाजि मक्खाम्डेमबेॽहा हाङ्बाजि मो हिॽसिघे़ॽपॽआ मे़क्खु खाङ्नुङ हाःप्मिम्मेनुङ सोक ले़म्मे। 10 मोसोक्पेॽ सिॽपॽआ दन्डा खाङ्नुङ किस्सिमवे़ॽ माहाजिडे़ॽ ओःनोॽ येःप्मानुङ इडोॽ लुन्डुजे, “सारोनोॽयो! हे़न बेबिलोन सहरबेॽ इमाङ आप्टिक सिॽटे़, इॽछोॽपेॽनोॽ हे़ने़ॽ दन्डा आङ्मा सिॽटा।” 11 मक्खाम्डेमबेॽहा बेपारिजि मोमि लागि हाःप्मिम्मे, बिलौना ले़म्मे, इन्ढोङ्होङ असे़ॽसो माहाजिमि बेपारमि कोक्नाम इनुजिने। 12 अथबा माहाजिमि सुना, सिसे़ङ, रत्न, मोति, मलमलमि चेॽ, बैजनि चेॽ, चहकिलो हररामा चेॽ, खाल खालहा नाम्जानुहा बेॽलो याङ सिॽइहा सिङ्बु, मोबा हात्तिमि के़ङ्बाङ टोङ्बॽआ चोप खालहा कोक्नाम, काँसामि कोक्नाम, चे़क्चिनुङ सिङ्गमरमरमि इमाङ थोकसो याॽमिजिडे़ॽ इनुजिनि। 13 मोबा सम्सुङ, चोप खालहा मसला, नाम्जानुहा धुपा, मुररा, उथ्रिॽमा धुपा, मद्य, केवा, मसिनो खाॽमि, गँहु, साँवा, पिक, सामु, घोडा, रथ, सेउते, सेउतेनिजिसो इनुजिने। 14 माहा बेपारिजिडे़ॽ लुन्डुजे, “होउ बेबिलोन, हे़ने़ए़ निवाडे़ॽ मिॽपॽआ चोप नुबा थोक मे़खडा। हे़ने़हा चोप याङ्सरावानुङ आदर मान नासि लिघे़टहा, हागो हे़ने़ॽ माहा इमाङ्सो चुप्टुनिबा!” 15 मो सहरबेॽ बेपार ले़ःॽनुङ याङ्सरावादाङ्बा लिबॽआ बेपारिजि ओःनोॽ येःप्नुङ मोमि किस्सिमारोमा बिपत्ति खाङ्नुङ किस्सिम्मे। माहाजि हाःप्साङ इडोॽ काम्मे, 16 “इःयो, इगो सहरमि लागि इन्डोॽ किस्सिमारोमा बेला लेस्सायो, इगोसे़ॽको मे़नेक मे़नेक्मा सुतिमि चेॽ, बैजनिनुङ सिन्दुर रङ्मा हररामा चेॽ चाक्सुए, मोबा सुना, रत्ननुङ मोतिमि गहन वे़ःॽमानुङ चागे़। 17 इॽछोॽपेॽनोॽ मोढे़ःॽलोहा बेॽलो याङ्सरावा चोप नासि लिघडा।” चोप योङा जहाजमि कप्तानजि, मोबेॽ साङ्घुबाजि, योङा जहाज खिःक्खुबाजिनुङ माहोङ्माबेॽ बेपार ले़ःॽचाघुबाजि ओःनोॽ येःप्नुङ, 18 मो सहर हिॽखे़ॽपॽआ खाङ्नुङ इडोॽ कासामि, “आक्को बेबिलोन सहरडोॽमा बेॽए सहर हाम्बे टुसे़ ?” 19 मोबा माहाजिडे़ॽ टाङ्बा टाङ्बामि निन्डवाँबेॽ धुलो टुप्मानुङ हाःप्साङ इडोॽ कासामि, “इगो सहरबेॽ इन्डोक्मा बिपत्ति लेस्से़। इगो सहरमि याङ्सरावाबाङ योङा जहाजदाङ्बाजि चोप टाङायोङ्बा लिबॽआ ले़टामे। तर इॽछोॽपेॽनोॽ मो सहर नासि लिसा। 20 हे थाङ्सिरिबेॽ टुघुबाजि साप्थक्सानिङे। होउ निवाहाङ्मि याॽमिजि, एप्पा चोङ्साजि, अगमबक्ताजि हे़निङ चोप साप्थक्सानिङे, इन्ढोङ्होङ मोसे़ॽ हे़निङ चुङ्जासा मोमि साटो निवाहाङ्डे़ॽ खो दन्डा पिटुए।” 21 मोडोक्पेॽ इक्को सक्तिदाङ्बा थाङ्सिरिदुतडे़ॽ बेॽएम्मा लघेडोॽमा रुङ्गोॽवा ठेॽनुङ इडोॽ लुमानुङ माहोङ्माबेॽ राप्ए़न्डु, “इडोक्नोॽ मो बेॽएम्मा बेबिलोन सहरसो राप्खे़ये, मोबा फेरि इन्डोक्पेॽसो खाङ्मुनिबा। 22 मोबा सराङ्गि, बासुरिनुङ तुरहि टेम्बॽआ, मोबा सेम्लुबॽआ हागोएम्बाङ आक्को सहरबेॽ खेम्डोक्निबा। हे़नबेॽ सिपालु याॽमिजि चुप्मिने। मोबा फेरि लघे यिःॽपॽआ मोबेॽ इन्डोक्पेॽसो खेम्डोक्निबा। 23 हागोएम्बाङ कुप्पि उःप्पॽआ उज्यालो हे़नबेॽ पोक्निबा। नायोङ्बा नायोङ्मा साप्थाङ्बॽआ खा हे़ने़ए़ सहरबेॽ इन्डोक्पेॽसो खेम्डोक्निबा। इन्ढोङ्होङ हे़ने़हा बेपारिजि मक्खाम्डेमबेॽहा बेॽहा बेॽहा याॽमिजि ले़टामि, मोबा हे़ने़हा रेम्सिङ चटकडे़ॽ मक्खाम्डेमबेॽहा चोप जातिहा याॽमिजि रेम्सेडुजि। 24 इगो बेबिलोन सहरबेॽनोॽ अगमबक्ताजि, निवाहाङ्मि सेवाकजिनुङ, मक्खाम्डेमबेॽ सेॽनेबॽआ चोप याॽमिजिमि हरि यिःॽपॽआ ले़टा।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.