परकास 17 - याम्फुमेॽनामिॽनुङ जिवात 1 माहा एच्चि गोटा खोरिया खिघुबा थाङ्सिरिदुतजिबाङ इक्को काङ्मि के़क्पेॽ लेन्नुङ लुसिङ, “इगिॽयु आबे, के़ॽ हे़न मो निङ मुक्पॽआ बेस्या मेॽनामिॽडे़ॽ इन्डोक्मा दन्डा चुप्मिन्डुए मो खा खाङ्मुन्ने़, मो मेॽनामिॽ बेॽलो यिवामि के़क्पेॽ टुबॽआ बेॽए सहर ले़ये। 2 मोनुङ मक्खाम्डेमबेॽहा चोप हाङ्बाजिडे़ॽ बेभिचार ले़ए़टुजे, मोबा मक्खाम्डेमबेॽहा याॽमिजि मोमि बेभिचारमि निसाडे़ॽ सेॽखे़टुजे।” 3 मोबा थाङ्सिरिदुतडे़ॽ पबित्रा होङ्निवाबेॽ इक्को रे़क्रे़क्मा ठाउँबेॽ का लाघे़ॽटिङ। मोबेॽ के़ॽ हररामा जिवातसोक्पेॽ इक्को मेॽनामिॽ पेम्बॽआ खाङ्डोक्टुङ। मो जिवातमि एच्चि गोटा निन्डवाँनुङ इक्पोङ गोटा सजाङ टुसा, मोबा मोमि हिङाइॽठुप निवाहाङ इःजाघुबा निङ साप्पॽआ ले़टा। 4 मो मेॽनामिॽडे़ॽ बैजनि रङ्मानुङ हररामा पोॽइये चेॽ चाङ्बॽआ ले़टा, खो सुना, रत्ननुङ मोति वे़ःॽमानुङ चाक्पॽआ ले़टा। मोसे़ॽ हुकपेॽ इक्को खोरिया याङ्बॽआ ले़टा, मो खोरिया इॽठुप चिक्चिमिॽमारोहा बेभिचारमि खा टुसा। 5 मोमि तुरुवाबेॽ लेमा छॽइये इक्को निङ साप्पॽआ ले़टा, “बेॽए सहर बेबिलोन, मक्खाम्डेमबेॽ बेभिचार ले़ःॽखुबाजिमिनुङ चिक्चिमिॽमारोहा खामि मामा।” 6 मोबा मो मेॽनामिॽ चाहिँ निवाहाङ्मि याॽमिजिनुङ येसु खिरिस्टमि साक्छि पिघुबाजिमि हरि उङ्नुङ सेॽखे़ॽपॽआ खाङ्डोक्नुङ। मो खाङ्नुङ का सारोनोॽ खरि मिनिङ। 7 मोबा मो थाङ्सिरिदुतडे़ॽ का लुसिङ, “हे़न इन्ढोङ खरि मिङ्इये ? मो मेॽनामिॽ खिघुबा एच्चि निन्डवाँनुङ इक्पोङ सजाङ्नुङ्बा जिवातमि लेमा छॽइये खा हे़न इःबेन्ने़। 8 हे़ने़ॽ खाङ्बॽआ मो जिवात याक्लो इकखेॽ टुसे़, तर आयु माॽआये। मो सानिङ्मि लागि नासि लिमामि अतल कुन्डाबाङ मिॽटु के़ॽसिॽपोरोइटे़। मोबा मक्खाम्डेम सिरिस्टि लिबॽआबाङ हिङ्मवामि नेॽचिराबेॽ निङ मे़साप्पॽआजिडे़ॽ मो सिघे़ॽपॽआ जिवात फेरि हिङ्रिक लिबॽआ खाङ्नुङ खरि मिङ्इम्मे। इन्ढोङ्होङ मो याक्लो हिङ्रिक ले़टे़, तर आइ माॽआये सिघे़टे़, फेरि खाङ्मुये। 9 “इगो खा लेमामि लागि निवा पाप्मिये। मो जिवातमि एच्चि निन्डवाँ लुबॽआ चाहिँ एच्चि सुम्लाखा लुनुङ लेमा खे़ये। मोसोक्पेॽ मो मेॽनामिॽ पेङ्इटे़। 10 माहाजि एच्चि हाङ्बाजिसो ले़म्मे, माहाजिबेॽ ङाबाङ हाङ्बाजि चाहिँ याक्लोनोॽ नासि लिघे़पेटामे। इक्को चाहिँ टुसिये, इक्को चाहिँ हागोसो मे़लेन्डिॽ। मो लेङ्येनुङ मोसे़ॽ इॽछोॽरेॽनोॽ राज्य ले़न्डुए। 11 मोबा मो जिवात, इक्खेॽ हिङ्रिक टुसे़, तर हागो माॽआये, मो आक्चिमा हाङ्बा चाहिँ माहा एच्चि हाङ्बाजिबेॽएनोॽ इक्को ले़ये, तर मोसो नासि लिघे़ये। 12 “हे़ने़ॽ खाङ्बॽआ माहा इक्पोङ सजाङ चाहिँ इक्पोङ हाङ्बाजि ले़म्मे, माहाजि आयुरोसो हाङ्बा मे़लिडिॽ, तर माहाजिडे़ॽ मो जिवातनुङ्नोॽ इॽछोॽमि लागि हाङ्बा लिनुङ अधिकार ले़टोक्इन्डुजे। 13 माहा इक्पोङ हाङ्बाजि इक्कोनोॽ योम्बोक ले़ःॽमामि लागि इक्को निवानुङ्हाजि ले़म्मे। मोबा माहाजिडे़ॽ खोजिमि सक्तिनुङ अधिकार मो जिवात पिन्डुजे। 14 अक्खाजि थुमामि बिरोधबेॽ ङेः ले़न्डुजे, तर अक्खाजि थुमाडे़ॽ हेजोन्डुजे, इन्ढोङ्होङ खो परभुजिमि परभुनुङ हाङ्बाजिमि हाङ्बा ले़ये। खोनुङ सोरि टुघुबाजि चाहिँ के़ःॽपॽआजि, से़न्बॽआजिनुङ बिस्वासनुङ्हाजि ले़म्मे।” 15 मो थाङ्सिरिदुतडे़ॽ का लुसिङ, “हे़ने़ॽ खाङ्बॽआ माहा योङा, मोसोक्पेॽ मो बेस्या मेॽनामिॽ पेम्बॽआ ले़ये, मो लुबॽआ चाहिँ खाल खालहा जातिजि, देस, खाप्लानुङ याॽमिजि ले़म्मे। 16 मोबा हे़ने़ॽ खाङ्बॽआ इक्पोङ सजाङ्नुङ मो जिवातडे़ॽ मो बेस्या मेॽनामिॽ सिॽचोन्डुजे, मोमि चोप थोक ङाप्नुङ खो उक्चुङ्रे़क टोङ्इन्डुजे। मोबा माहाजिडे़ॽ मोमि सा चोन्डुजेनुङ मोमि एम्बॽआ हिङा मिबेॽ हिॽइन्डुजे। 17 इन्ढोङ्होङ निवाहाङ्मि बचन पुरा मे़ल्लिसेॽलो खोसे़ॽ मिॽपॽआडोक्नोॽ ले़ःॽमे निवा माहा इक्पोङ हाङ्बाजिडे़ॽ चुप्मिटुजे। माहाजिडे़ॽ इक्कोनोॽ निवा लिनुङ राज्य ले़न्डुजे, मोबा माहाजिडे़ॽ मो किस्सिमारोमा जिवात खोजिमि सक्ति पिन्डुजे। 18 हे़ने़ॽ खाङ्बॽआ मो बेस्या मेॽनामिॽ लुबॽआ चाहिँ मक्खाम्डेमबेॽहा चोप हाङ्बाजिसोक्पेॽ अधिन ले़ःॽखुबा बेॽएम्मा सहर ले़ये।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.