परकास 16 - याम्फुनिवाहाङ्मि सुरिकमि एच्चि खोरिया 1 मोबा एच्चि थाङ्सिरिदुतजि मन्दिरबाङ बेॽए सेम्लाडे़ॽ इडोॽ कामे़ॽनिङ्सिबॽआ के़ॽ खेप्सुङ, “खे़ॽनुङ निवाहाङ्मि सुरिकमि एच्चि खोरिया मक्खाम्डेमबेॽ ओप्ए़न्डानुमे।” 2 मोबा याक्लोमा थाङ्सिरिदुत खे़ॽनुङ मक्खाम्डेमसोक्पेॽ खोमि खोरिया ओप्ए़न्डु। मोडोगे़ॽ मो जिवातमि छापनुङ्हानुङ मोमि पुजा ले़ःॽखुबाजि चोप याॽमिबेॽ चिक्चिमिॽमारोहा टुॽइहा हुवा लिसा। 3 हाइकोमा थाङ्सिरिदुतडे़ॽ खोमि खोरिया माहोङ्माबेॽ ओप्ए़न्डु, मोबा माहोङ्मामि योङा चाहिँ सिबॽआ याॽमिजिमि हरिडोक्नोॽ लिसानुङ मो योङाबेॽहा चोप हिङ्रिक जिवातजि सिसामि। 4 मोबा सुम्जिमा थाङ्सिरिदुतडे़ॽ चोप होङ्मानुङ योङा पिॽठामबेॽ खोमि खोरिया ओप्ए़न्डु, माहा चोप योङा हरि लिबेसा। 5 मोबा ए़क्साङ योङासोक्पेॽ अधिन ले़ःॽखुबा थाङ्सिरिदुतडे़ॽ इडोॽ लुबॽआ के़ॽ खेप्सुङ, “हे पबित्रा निवाहाङ हे़न याक्लोसो टुसे़, आयुसो टुये, हे़ने़ॽ नुरोॽ न्याय ले़टु। 6 इन्ढोङ्होङ हे़ने़हा अगमबक्ताजिनुङ हे़ने़हा याॽमिजि खोजिडे़ॽ सेॽनेसुजि, मोबा हे़ने़ॽ माहाजि हरि उङ्मेटुजि, अक्खाजिडे़ॽ चुप्मा खडे़ दन्डानोॽ चुप्मिटुजे।” 7 मोबा थानाबाङ इडोॽ लुमे़ॽनिङ्सिबॽआ के़ॽ खेप्सुङ, “हे, परमपरभु निवाहाङ चोप्पाङ सक्तिदाङ्बा, हे़ने़ॽ ले़ःॽपॽआ न्याय चाइबमानुङ धारमिक ले़ये।” 8 मोबा ए़क्साङ रिउममा थाङ्सिरिदुतडे़ॽ खोमि खोरिया नमसोक्पेॽ ओप्ए़न्डु, मोबाङ नमडे़ॽ याॽमि हिॽमे सक्ति चुप्टु। 9 नम सारोनोॽ राःक्पॽआसे़ॽ मो कुहाङ्डे़ॽ याॽमिजि हिडुजि, मोडोक्पेॽ छना माहा याॽमिजिडे़ॽ इडोक्हा बिपत्ति लाजे़ॽहेघुबा निवाहाङ चापहिसुजि। मोबा खोजिडे़ॽ पाप ले़ःॽमासो मे़लेडुजि, निवाहाङ्मि आदरसो मे़ले़टुजि। 10 मोबा ङाउममा थाङ्सिरिदुतडे़ॽ खोमि खोरिया मो जिवातमि पेन्ढामबेॽ ओप्ए़न्डु, मोबा मोमि राज्य सेन्जुगुप लिसा, मो खेःबेॽ याॽमिजि के़ङ इगामि। 11 माहाजिमि हुवा टुक्पॽआसे़ॽ निवाहाङ चापहिसुजि। तर हागोसो खोजिडे़ॽ टाङ्बामि पापि योम्बोक ले़ःॽमा मे़लेडुजि। 12 मोबा चुक्चिमा थाङ्सिरिदुतडे़ॽ खोमि खोरिया युफ्रेटिस लुमे बेॽएम्मा यिवाबेॽ ओप्ए़न्डु, मोडोक्पेॽनोॽ मो यिवामि योङा हेघे़ॽपेसा, मो चाहिँ नमगेतबाङ लेङ्घुबा हाङ्बाजिमि लागि राम लिरो लुनुङ मोडोॽ लिसा। 13 मोबा के़ॽ बेॽए पुसे़ॽमि याबुकबाङ, मो जिवातमि याबुकबाङ्नुङ रेम्सिङ अगमबक्तामि याबुकबाङ पयाकडोॽहा सुम्जि चिक्चिमिॽमारोहा होङ्निवाजि पे़आप्पॽआ खाङ्डोक्टुङ। 14 माहाजि खरि खरिहा चिङ्गा ले़ःॽखुबा मङे़हा होङ्निवाजि ले़म्मे। खोजि चोप्पाङ सक्तिदाङ्बा निवाहाङ्मि बेॽएम्मा याकपेॽ ङेः ले़ःॽमामि मक्खाम्डेमबेॽहा चोप हाङ्बाजि सुम्सिॽ खे़ए़म्मे। 15 “खाक्सानुमे, का खुसुबाङ्डोॽ लेङ्इङे़। असा मे़इम्रेॽ पेङ्इयेनुङ टाङ्बामि धारमिक चेॽ जोगा ले़न्डुए, मोसे़ॽ आसिस चुप्मिन्डुए। मोडोगे़ॽ खो उक्चुङ्रे़क सिॽनिबा, मोबा याॽमिजिमि पोम्बेॽ ङेम्मा सिॽनिबा!” 16 मोबा मङे़हा होङ्निवाजिडे़ॽ हाङ्बाजि इक्को ठाउँबेॽ सुप्सुजि। मो ठाउँमि निङ हिब्रु खाप्लाबाङ आर मागेड्डोन लुन्डुजे। 17 एच्चिमा थाङ्सिरिदुतडे़ॽ खोमि खोरिया हिॽवाबाबेॽ ओप्ए़न्डु, मोबा मन्दिरबाङ इक्को बेॽए सेम्लाडे़ॽ इडोॽ काबॽआ खेम्मुसा, “हागो रुक्खडा।” 18 मोबा नमसेल्ले़ॽवा पोक्मानुङ नान्द्रुङ्मा मुगा, बेॽएम्मा रुॽमि खडा। मोढे़ॽलो बेॽएम्मा रुॽमिगो याॽमिजि सिरिस्टि लिबॽआबाङ आयुरोठोक मे़ङ्खे़ॽटिॽ। 19 मो बेॽएम्मा बेबिलोन सहर सुम फे़क लिसा। चोप देसबेॽहा चोप सहर योघडा, मोडोक्पेॽ निवाहाङ्डे़ॽ मो बेॽएम्मा बेबिलोन सहर मिडु, मोबा किस्सिमारोमा सुरिक इॽठुप्मा मो खोरिया मो सहरसोक्पेॽ ओप्ए़न्डु। 20 मोबा योङाडे़ॽ यिजुम्बॽआ चोप पोङ्पोङ्मानुङ सुम्लाखा मे़खडा। 21 मोबा नान्द्रुङ्माबाङ बेॽहा बेॽहा रिबोङ ङाबोङ किलोडोक्हा ओम याॽमिजिसोक्पेॽ हेडा। माहा याॽमिजिडे़ॽ मो खेः आङ्मा सिॽमाबेॽ निवाहाङ चापहिसुजि, इन्ढोङ्होङ चइबानोॽ इगो ओममि बिपत्ति चाहिँ सारोनोॽ किस्सिमारोमा ले़टा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.