परकास 14 - याम्फुथुमानुङ खोमि याॽमिजि 1 मोबा के़ॽ खाङ्माबेॽ सियोन टोक्टोक्माबेॽ थुमा येःप्मे़ॽनिङ्सिबॽआ खाङ्डोक्टुङ। खोनुङ सोरि इक्को लाख रिक्पोङ रिउम हजार याॽमिजि टुसामि, माहाजिमि तुरुवाबेॽ थुमामिनुङ खोमि पाबामि निङ साप्पॽआ ले़टा। 2 मोबा बेॽए योङामि छाँगाडोॽमानुङ नान्द्रुङ्मा मुक्पॽआडोॽ के़ॽ खेप्सुङ। के़ॽ खेम्बॽआ मो सेम्ला बिना टेङ्घुबाजिडे़ॽ टेम्मे़ॽनिङ्सिबॽआ सेम्लाडोॽसो खेम्मुसा। 3 इक्को लाख रिक्पोङ रिउम हजार याॽमिजिडे़ॽ मो हाङ्पेन्ढाम, माहा रिउम हिङ्रिक जिवातजिनुङ यहुदि धारमिक गुरुजिमि पोम्बेॽ इक्को चोङ सेम सेम्लुमे़ॽनिङ्सिडुजि। इगो चोङ सेम चाहिँ इक्को लाख रिक्पोङ रिउम हजार याॽमिजिडे़ॽरेॽ चिन्डोक्टुजि। इन्ढोङ्होङ माहाजिरेॽ मक्खाम्डेमबाङ छुट्कारा चुप्पॽआजि ले़टामि। 4 माहा याॽमिजि असानुङ्सो लसपस मे़लिबॽआ चोखो ले़टामि। थुमामि ए़ङ्गुवा ए़ङ्गुवा राम्घुबाजि चाहिँ इघाजिरेॽनोॽ टुसामि। माहाजि निवाहाङ्नुङ थुमामि लागि चेॽटिबॽआ याक्लोमा चाडोॽ ले़टामि। इघाजि मक्खाम्डेमबेॽहाजिबाङ छुट्कारा ले़ःॽपॽआजि ले़टामि। 5 माहा याॽमिजि इन्डोक्पेॽसो मे़रेम्डेॽखुबा, आप्टिक मे़ॽनिङ्हाजि ले़म्मे। सुम्बाङ थाङ्सिरिदुतजि 6 मोबा के़ॽ हाइको इक्को थाङ्सिरिदुत थाङ्सिरिनुङ नान्द्रुङ्मामि रुम्बेॽ पेमे़ॽनिङ्सिबॽआ खाङ्डोक्टुङ। मोनुङ मक्खाम्डेमबेॽहा चोप जातिजि, बङ्सजि, खाप्लाहा याॽमिजिनुङ देसबेॽहा याॽमिजि खेम्मेॽमामि लागि अनन्त सुसमाचार टुसा। 7 मोसे़ॽ वोमानुङ लुसु, “निवाहाङ्नुङ किस्सिसानिङे खोमि ओहाङ ले़टानुमे। इन्ढोङ्होङ खोसे़ॽ याॽमिजिमि न्याय ले़ःॽमे बेला लेम्बेटे़। थाङ्सिरि, मक्खाम्डेम, माहोङ्मानुङ योङा पिॽठाम टोङ्खुबा निवाहाङ्मि पोम्बेॽ उःक्युनुङ सेवा मुसानुमे।” 8 मोबा हाइको इक्को थाङ्सिरिदुत वोमानुङ इडोॽ कासा “बेॽए सहर बेबिलोन नासि लिसा! मोसे़ॽ जाति जातिहा याॽमिजि नसाडे़ॽ सेॽखे़ॽपॽआडोॽ खोमि बेभिचारनुङ सुरिकमि मद्य उङ्मेॽनुङ सेॽखे़ॽमेॽटुजि।” 9 मोबा ए़क्साङ सुम्जिमा थाङ्सिरिदुत लेन्नुङ वोमानुङ इडोॽ कासा, “असा असे़ॽ मो जिवात अथबा मोमि मुरति पुजा ले़न्डानुमनुङ तुरुवा अथबा हुकपेॽ मोमि छाप टिन्डानुम, 10 माहाजिडे़ॽसो निवाहाङ्मि सुरिकनुङ्मा दन्डा आङ्मा खे़ये। माहाजिडे़ॽ पबित्रा थाङ्सिरि दुतजिनुङ थुमामि पोम्बेॽ मिनुङ गन्धकमि कुहाङ्बेॽ खेः आङ्मा खे़ये। 11 माहाजि बेॽलो हिॽखुबा मिमि मे़क्खु सानिङ्मु मिन्डु खे़ए़हा। मो जिवातमि आदर ले़ःॽखुबानुङ मोमि निङ्मि छाप टिघुबाजिडे़ॽ इन्डोक्पेॽसो नाजाडोक्टुजिने।” 12 निवाहाङ्मि आग्या पालना ले़ःॽनुङ खोबेॽ बिस्वास ले़ःॽखुबा पबित्रा याॽमिजिनुङ येसुबेॽ बिस्वास ले़ःॽखुबाजि सानिङ बिस्वासबेॽ बोलियो लिमा खे़ये। 13 मोबा ए़क्साङ थाङ्सिरिबाङ इडोॽ लुबॽआ के़ॽ खेप्सुङ, “इगो खा साबे, हागोएम्बाङ परभुबेॽ बिस्वास ले़ःॽनुङ सिघुबाजिडे़ॽ आसिस चुप्मिन्डुजे।” पबित्रा होङ्निवाडे़ॽ लुये, “चइबानोॽ माहाजिडे़ॽ टाङ्बामि योम्बोकबाङ नाजाडोक्इन्डुजे, इन्ढोङ्होङ खोजिडे़ॽ ले़ःॽपॽआ चोप योम्बोक खोजिनुङ सोरि खे़ये।” मक्खाम्डेमबेॽहा बालि हे़क्मे बेला लिबॽआ 14 मोबा ए़क्साङ के़ॽ खाङ्माबेॽ उथ्रिॽमा खिम्मिॽवासोक्पेॽ याॽमिमि पसाडोॽमा इक्को पेम्बॽआ ले़टा, खोमि निन्डवाँबेॽ सुनामि मुकुट ओम्बॽआ ले़टा, मोबा खोमि हुकपेॽ इक्को वे़ङ्इये खोॽइ टुसा। 15 मोबा हाइको इक्को थाङ्सिरिदुत मन्दिरबाङ पाखे़ॽयु आप्नुङ मो खिम्मिॽवासोक्पेॽ पेङ्घुबा बेॽए सेम्लाडे़ॽ लुसु, “हे़ने़ए़ खोॽइ हुकपेॽ याङ्नुङ बालि हे़गे, इन्ढोङ्होङ मक्खाम्डेमबेॽहा चोप बालि टुम्नुङ हे़क्मा बेला लिघे़टा।” 16 इडोॽ मो खिम्मिॽवासोक्पेॽ पेङ्घुबाडे़ॽ टाङ्बामि खोॽइ याङ्नुङ मक्खाम्डेमबेॽहा बालि हे़गु। 17 मोबा फेरि थाङ्सिरिमि मन्दिरबाङ हाइको इक्को थाङ्सिरिदुत पाखे़ॽयु आबा। मोमि हुकपेॽसो इक्को वे़ङ्इये खोॽइ टुसा। 18 मोबा बेदिबाङ हाइको इक्को थाङ्सिरिदुत आबा, मोनुङ मिसोक्पेॽ अधिन ले़ःॽहेमे सक्ति टुसा। मोसे़ॽ मो खोॽइ याङ्घुबा बेॽए सेम्लाडे़ॽ इडोॽ लुसु, “हे़ने़ॽ याङ्बॽआ आक्को वे़ङ्इये खोॽइडे़ॽ मक्खाम्डेमबेॽहा अङ्गुरमि सोङ्राबेॽ किङ्इटहा अङ्गुर हे़क्नुङ सुप्से, इन्ढोङ्होङ अक्खा चोप टुम्घे़टहा।” 19 मोबा मो थाङ्सिरिदुतडे़ॽ खोमि मो वे़ङ्इये खोॽइडे़ॽ मक्खाम्डेमबेॽहा अङ्गुर चोप हे़क्नुङ सुप्सु, मोबा अङ्गुर यिम्ढाम कोलडोॽमा निवाहाङ्मि सुरिकमि कोलबेॽ राप्ए़न्डु। 20 मोबा सहरमि पाखे़ॽयुए कोलबेॽ माहा अङ्गुर सराङेॽ सिक्मानुङ यिप्सुजि, मोबा मो कोलबाङ हरि यिआबा। मो हरि घोडामि लगामठोक मिॽटु टोम्नुङ सुम्जि सये किलोमिटर ओःठोक हरि यिःॽखडा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.