परकास 13 - याम्फुमाहोङ्माबाङ पे़आप्पॽआ जिवात 1 माहोङ्माबाङ इक्को जिवात पे़आप्पॽआ के़ॽ खाङ्डोक्टुङ, मोमि इक्पोङ गोटा सजाङ्नुङ एच्चि गोटा निन्डवाँ टुसा। मोमि चोप सजाङ्बेॽ इक्को इक्को मुकुट टुसा, मोमि चोप निन्डवाँबेॽ निवाहाङ सिःक्चामे इक्को निङ टुसा। 2 मो जिवात किबाडोॽमा ले़टा, मोमि सराङ माःक्सामिडोॽहा ले़टा, मोमि याबुक किबामिडोॽमा ले़टा। मो बेॽएम्मा पुसे़ॽडे़ॽ खोमि सक्ति, खोमि हाङ्पेन्ढामनुङ खोमि बेॽए अधिकार मो जिवात पिसु। 3 मोमि इक्को निन्डवाँबेॽ चाहिँ बेॽए हुवा खाङ्मुसे़, तर ए़क्साङ मोमि हुवा नुघडा। मोबा मक्खाम्डेमबेॽहा चोप याॽमिजि मो खाङ्नुङ खरि मिम्मानुङ मो जिवातमि चोङ्साजि लिसामि। 4 याॽमिजिडे़ॽ मो बेॽएम्मा पुसे़ॽमि ओहाङ ले़टुजि, इन्ढोङ्होङ मोसे़ॽ टाङ्बामि अधिकार मो जिवात पिबॽआ ले़टा। माहाजिडे़ॽ इडोॽ लुसाङ मो जिवातमि पुजा ले़टुजि, “इगो जिवातडोॽमा हाइखा असा टुम्मे ? इगोनुङ असा काक्हेम्मे ?” 5 मो जिवात काङायोङ्बा लिनुङ निवाहाङ्मि अपमान ले़ःॽमामि मो जिवातडे़ॽ रिक्पोङ नि महिनाठोक अधिकार चुप्टु। 6 मोसे़ॽ निवाहाङ इःजामामि, खोमि पेन्ढाम, मोबा थाङ्सिरिबेॽ पेङ्घुबाजि चोपजि चापहिसु। 7 मोबा मो जिवात चाहिँ निवाहाङ्मि याॽमिजिनुङ काक्नुङ खोजि हेजामे अधिकार पिबॽआ ले़टे़। मोबा चोप बङ्सजि, याॽमिजि, खाल खालहा खाप्लानुङ जातिजिसोक्पेॽ अधिन ले़ःॽमे अधिकार पिबॽआ ले़टे़। 8 मोबा सेॽनेबॽआ थुमाडे़ॽ खोमि हिङ्मवामि नेॽचिराबेॽ मक्खाम्डेम सिरिस्टि लिबॽआबाङ्नोॽ माहाजिमि निङ मे़न्साप्टिॽ। माहाजि चोबे़ॽ मो जिवातमि पुजा ले़न्डुजे। 9 ने़ए़क काप्खुबा चोबे़ॽ खेप्सुजिरो। 10 असा तिरिङ्गा खिमबेॽ से़क्सिघे़ॽमा खे़ये, खो से़क्सिघे़ये। असा फेयाडे़ॽ चेन्नुङ सिमा खे़ये, खो फेयाडे़ॽ चेन्नुङ सेॽनेये। इघा चोपमि लागि निवाहाङ्मि याॽमिजिबेॽ योङ आङ्हेमे सक्तिनुङ बिस्वास टुमा खे़ये। मक्खाम्डेमबाङ पे़आप्पॽआ जिवात 11 मोबा ए़क्साङ के़ॽ मक्खाम्डेमबाङ पे़आप्पॽआ हाइको इक्को जिवात खाङ्डोक्टुङ। मोमिसो थुमामिडोॽमा निच्चि सजाङ टुसा, मोसो मो बेॽएम्मा पुसे़ॽडोक्नोॽ यामुसे़। 12 मोसे़ॽ याक्लोमा जिवातमि पोम्बेॽ मो जिवातमिन्नोॽ अधिकारबाङ्ए सक्तिबाङ चोप ले़टुए। मोसे़ॽ मक्खाम्डेमबेॽहा चोप याॽमिजि मो हुवा नुघे़ॽपॽआ याक्लोमा जिवातमि पुजा ले़ःॽमेॽटुजि। 13 मो हाइकोमा जिवातडे़ॽ याॽमिजिमि पोम्बेॽनोॽ नान्द्रुङ्माबाङ मक्खाम्डेमबेॽ मि हेओक्टु, इडोॽ मो ए़क्साङ्मा जिवातडे़ॽ खरि खरिहा चिङ्गा खाङ्मुसु। 14 याक्लोमा जिवातमि पोम्बेॽ इन्डोक्मा खरिहा चिङ्गा खाङ्मुमे सक्ति इगो जिवात पिबॽआ ले़टे़। मो सक्तिडे़ॽनोॽ खोसे़ॽ मक्खाम्डेमबेॽहा चोप याॽमिजि फाङ्सेडुजि। फेयाडे़ॽ चेन्नुङ सिघे़ॽलो हुवा सिॽनुङ्सो हिङ्बॽआ मो याक्लोमा जिवातमि ओहाङ ले़ःॽमेॽमामि लागि मो ए़क्साङ्मा जिवातडे़ॽ मोमि मुरति माहा याॽमिजि टोङ्मेॽटुजि। 15 मो याक्लोमा जिवातमि मुरतिमि पुजा मे़ले़ःॽखुबाजि सेॽनेमामि लागि मोमि मुरति यामुहेरो लुनुङ सोःक्मा एम्मे अधिकार मो ए़क्साङ्मा जिवात पिबॽआ ले़टे़। 16 मोबा मोसे़ॽ बेॽहानुङ ए़द्रिहा, याङ्सरावादाङ्बानुङ गरिबाजि, सेउतेनुङ फुक्का चोप याॽमिजिमि चुप्थिङ हुकपेॽ अथबा तुरुवाबेॽ छाप टिमेॽटुजि। 17 मो छाप मे़न्टिघुबा असे़ॽसो इमाङ्सो मे़इन्जोडोक्टुजि। मो छाप चाहिँ मो जिवातमि निङ अथबा मोमि निङ्मि अङ्क ले़टे़। 18 इगोसे़ॽ लुमायोक्पॽआ खा निवा टिनुङ लेमा खे़ये। असा निवादाङ्बा ले़ये मोसे़ॽ मो किस्सिमारोमा जिवातमि अङ्क इःसुरो, इन्ढोङ्होङ मो अङ्का इक्को याॽमिमि निङ ले़ये, मो अङ्क चाहिँ ६६६ ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.