परकास 12 - याम्फुमेॽनामिॽनुङ बेॽएम्मा पुसे़ॽ 1 मोबा ए़क्साङ थाङ्सिरिबेॽ इक्को खरिमा चिङ्गा खाङ्मुसा। नमडोॽ पोॽइये चेॽ चाङ्बॽआ इक्को मेॽनामिॽ खाङ्मुसा, खोमि सराङ्होङ्बेॽ ला टुसा, मोसे़ॽ निन्डवाँबेॽ बारो गोटा साङ्गेनुङमा मुकुट ओम्बॽआ ले़टा। 2 मो उक्खाइसुम्मा ले़टा, मोबा कुम्सुमा खेःडे़ॽ वोमे़ॽनिङ्सिडा। 3 मोबा थाङ्सिरिबेॽ हाइको इक्को चिङ्गा खाङ्मुसा, मो चाहिँ एच्चि गोटा निन्डवाँ, इक्पोङ गोटा सजाङ्नुङ निन्डवाँबेॽ एच्चि गोटा मुकुट ओम्बॽआ इक्को बेॽएम्मानुङ हररामा पुसे़ॽ ले़टा। 4 मोमि मिराडे़ॽ थाङ्सिरिमि सुम भागामि इक्को भागा साङ्गेजि फिःक्नुङ मक्खाम्डेमबेॽ राप्ए़न्डु। मोबा मो मेॽनामिॽडे़ॽ ओङे़क टोक्मासोरोॽ रिम्बेमामि मो बेॽएम्मा पुसे़ॽ कुम्सुमा लिसिॽपोरोक्पॽआ मेॽनामिॽमि के़क्पेॽ येःबा। 5 मो मेॽनामिॽडे़ॽ चोप राज्यसोक्पेॽ चे़क्चिमि टोङ्इराडे़ॽ सासन ले़ःॽखुबा इक्को वडाङ्पसा टोगु। मो ओङे़क टोक्मासोरोॽनोॽ निवाहाङ पाबा टुढामबेॽ खोमि हाङ्पेन्ढामबेॽ ठेॽखे़ॽटु। 6 मो मेॽनामिॽ चाहिँ रे़क्रे़क्मा ठाउँबेॽ चिःॽखडा। मोबेॽ इक्को हजार निच्चि सये चुक्चि याकठोक खो कुमामि लागि निवाहाङ्डे़ॽ मो ठाउँ पोरोक्युङ्बॽआ ले़टा। 7 मोबा थाङ्सिरिबेॽ ङेः लिसा। मिखाएलनुङ खोमि दुतजिडे़ॽ मो बेॽएम्मा पुसे़ॽनुङ खोमि दुतजिनुङ ङेः ले़टुजि। 8 तर मो बेॽएम्मा पुसे़ॽनुङ खोमि दुतजिडे़ॽ ङेःबेॽ मे़हेजोसुजि, मोबा माहाजिडे़ॽ थाङ्सिरिबेॽ पेन्ढाम ठाउँ मे़न्चुप्टुजि। 9 मो उहिलेमा बेॽएम्मा पुसे़ॽनुङ मोमि दुतजि थाङ्सिरिबाङ मक्खाम्डेमबेॽ राप्खडामि। मो बेॽएम्मा पुसे़ॽ लुबॽआ चाहिँ मक्खाम्डेमबेॽहा चोप याॽमिजि चाइबमा निवाहाङ्बाङ फाङ्सेॽखुबा मङे़ॽमा चाप अथबा सैतान ले़ये। 10 मोबा थाङ्सिरिबेॽ इडोॽ लुबॽआ के़ॽ खेप्सुङ, “हागो कानिङ्मि निवाहाङ्डे़ॽ छुट्कारा ले़ये, खोसे़ॽ सक्तिनुङमा राज्य ले़न्डुएनुङ खिरिस्टमि अधिकार लेङ्इटे़। हागो कानिङ्मि वावानिसानुङ नानुसाजि लेन्डा सेन्डा निवाहाङ्मि पोम्बेॽ आप्टिक टिघुबा सैतान थाङ्सिरिबाङ राप्खे़टे़। 11 कानिङ्मि वावानिसानुङ नानुसाजिडे़ॽ थुमामि हरिनुङ टाङ्बा सिमानोॽ सिॽहोङ्सो सिमा पोरोक्नुङ बचन परचार ले़ःॽपॽआसे़ॽ मो सैतान हेजोटुजे। 12 मोडोगे़ॽ थाङ्सिरिबेॽ टुघुबाजि साप्थाक्सानिङे, तर मक्खाम्डेमनुङ माहोङ्मा पापुराजियो! इन्ढोङ्होङ सैतान सुरके़ॽमानुङ हे़निङ्बेॽमु लेङ्इटे़, टाङ्बामि बेला रुक्खे़ॽसिॽ पोरोइटे़ लुमे खा मोसे़ॽ लेबेटुए।” 13 मोबा मो बेॽएम्मा पुसे़ॽडे़ॽ टाङ्बा मक्खाम्डेमबेॽ राप्खे़ॽपॽआ लेडोक्नुङ, मो ओङेक वडाङ्पसा टोक्खुबा मेॽनामिॽ यिक्पोगु। 14 तर मो बेॽएम्मा पुसे़ॽडे़ॽ मो मेॽनामिॽ मे़न्चुप्हेसुरो लुनुङ रे़क्रे़क्मा ठाउँबेॽ पेघे़ॽमामि लागि बेॽए अङ्लिॽवामि निच्चि लाप्खे़ॽवा पिबॽआ ले़टे़। मो रे़क्रे़क्मा ठाउँबेॽ सुम निङ चुक्चि महिनाठोक मो मेॽनामिॽ कुमा खाङ्मामि लागि ठाउँ पोरोक्नुङ युङ्बॽआ ले़टा। 15 मो मेॽनामिॽ वाडुमडे़ॽ यिःॽखे़ॽटुरो लुनुङ मो बेॽएम्मा पुसे़ॽडे़ॽ खोमि याबुकबाङ होङ्माडोॽ योङा यिएन्डु। 16 तर मो बेॽएम्मा पुसे़ॽडे़ॽ याबुकबाङ यिएम्बॽआ होङ्मा मक्खाम्डेमडे़ॽ रिम्बेनुङ मेॽनामिॽ जोगा ले़टु। 17 मोबा मो बेॽएम्मा पुसे़ॽ मो मेॽनामिॽनुङ बेॽलो सुरकडा, मोबा मो मेॽनामिॽमि हाइखा पसाजि, निवाहाङ्मि खा खेम्खुबाजिनुङ येसुबेॽ बिस्वास ले़ःॽखुबाजिनुङ काक्सिॽ खडा। 18 मोबा मो बेॽएम्मा पुसे़ॽ माहोङ्मामि के़क्पेॽ येबा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.