परकास 11 - याम्फुनिच्चि साक्छि 1 मोबा ए़क्साङ सिःक्ठाम टाँगाडोॽमा इक्को इङ्भु का पिनुङ इडोॽ लुसा, येपोक्नुङ निवाहाङ्मि मन्दिरनुङ थाना सिःगे, मोबा मोबेॽ ओहाङ ले़ःॽखुबाजि नेडाजे। 2 तर मन्दिर पाखे़ॽयुए सोॽलुङ चाहिँ ए़ॽसिःगे, इन्ढोङ्होङ मो चाहिँ अयहुदि जातिजिमि लागि पिबॽआ ले़ये, मोबा खोजिडे़ॽ रिक्पोङ निच्चि महिनाठोक मो पबित्रा सहर सिक्नुङ पिजिक्टोॽ टोङ्इन्डुजे। 3 मोबा सिङ्गिमामि चेॽ चाङ्बॽआ निप्पाङ काङ्मि साक्छि पिघुबाजि इक हजार निच्चि सये चुक्चिबोङ अगमबानि ले़ःॽमामि पाङ्इनुङ्हाजि। 4 माहा निच्चि साक्छिजि चाहिँ, मक्खाम्डेमबेॽ परभुमि पोम्बेॽ येःप्टुङ्घे़ॽखुबा निच्चि जैतुनमि सिङ्बुडाङ्नुङ निच्चि सामदान ले़ये। 5 याॽमिजिडे़ॽ खोजि नासि ले़ःॽमा योगुजिहोङ खोजिमि याबुकबाङ पे़आप्पॽआ मिडे़ॽ माहा सतुरजि नास ले़न्डुजे। मोडोक्नोॽ खोजि नास ले़ःॽमा योक्खुबाजि चोप सेॽनेन्डुजे। 6 माहाजिडे़ॽ अगमबानि इःबॽआ याकपेॽ वारि मे़लेङ्रो लुनुङ नान्द्रुङ्मा से़क्हेमे बोल खोजिनुङ टुहा, मोबा योङा हरि टोङ्हेमेनुङ माहाजिडे़ॽ मिॽपॽआ बेलाबेॽ मक्खाम्डेमबेॽ खाल खालहा बिपत्ति लाप्हेमे सक्तिसो खोजिनुङ टुहा। 7 खोजिडे़ॽ टाङ्बामि साक्छिमि योम्बोक येॽनुङ ए़क्साङ अतल कुन्डाबाङ पे़आप्मिये मो जिवातनुङ खोजि काॽइन्जे, मो जिवातडे़ॽ माहा निच्चि साक्छिजि हेजानुङ सेॽनेन्डुए। 8 खोजिमि सिगुयाक मो बेॽएम्मा सहरमि रामराजि अलपत्रा लिहा, मो सहरबेॽ खोजिमि परभु काप्सिङ्बेॽ किङ्नेबॽआ ले़टा। मो सहरगो सदोमनुङ मिस्रा देसडोॽ ले़ये। 9 साढे सुम याक चोप देसबेॽहाजि, बङ्सजि, खाल खालहा खाप्ला यामुखुबा याॽमिजिडे़ॽ खोजिमि सिगुयाक खाङ्इन्डुजे, तरसो माहाजिमि सिगुयाक हुम्मेॽटुजिने। 10 इगो निच्चि साक्छि सेॽनेबॽआ खाबेॽ मक्खाम्डेमबेॽहा याॽमिजि साप्थाङ्इम्मे, याॽमिजि हाङ्हाङ ले़ःॽमानुङ इक्कोसे़ॽ हाइको हुक्सोङ हाङ्घुसे़ॽ चुम्मे। इन्ढोङ्होङ माहा निप्पाङ अगमबक्ताजिडे़ॽ मक्खाम्डेमबेॽहा याॽमिजि सारोनोॽ चुङ्जाबॽआ ले़टे़। 11 साढे सुम याक ए़क्साङ निवाहाङ्बाङ लेम्बॽआ हिङ्मवा पिघुबा सोःक्मा मोजिबेॽ पे़ए़ना, मोबा मोजि येःप्पोगाजि। मोजि खाङ्नुङ याॽमिजि सारोनोॽ किस्सिसामि। 12 मोबा मो निप्पाङ अगमबक्ताजिडे़ॽ थाङ्सिरिबाङ इक्को बेॽएम्मा सेम्लाडे़ॽ “इगिॽटु कडाजे” लुबॽआ खेप्साजु। मोबा चोप सतुरजिडे़ॽ खाङ्येॽ खाङ्येॽनोॽ मोजि खिम्मिॽवाबेॽ थाङ्सिरिॽटु ठेॽपोक्खडाजि। 13 मोडोक्पेॽनोॽ बेॽएम्मा रुॽमि खडा, मो सहरमि इक्पोङ भागा योघडा, इगो रुॽमिबेॽ एच्चि हजार याॽमिजि सिसामि, मोबा हिङ्बॽआ याॽमिजिडे़ॽ बेॽलो किस्सिमानुङ थाङ्सिरिबेॽ पेङ्घुबा निवाहाङ्मि ओहाङ ले़टुजि। 14 निच्चिमा बिपत्ति रुक्खडा। हागो सुम्जिमा बिपत्ति चान्डोनोॽ लेङ्सिॽपोरोइटे़। एच्चिमा तुरहि 15 इगोबाङ ए़क्साङ एच्चिमा थाङ्सिरिदुतडे़ॽ खोमि तुरहि मिडु, मोडोक्पेॽ थाङ्सिरिबेॽ बेॽहा बेॽहा सेम्लानुङ इडोॽ खेम्मुसा, “मक्खाम्डेमसोक्पेॽ राज्य ले़ःॽमे अधिकार हागोएम्बाङ कानिङ्मि परभु निवाहाङ्नुङ खोसे़ॽ से़न्बॽआ खिरिस्टमिनोॽ लिटे़, खोसे़ॽनोॽ सानिङ्मु राज्य ले़न्डुए।” 16 मोबा निवाहाङ्मि पोम्बेॽ टाङ्बा टाङ्बामि हाङ्पेन्ढामबेॽ पेङ्घुबा मो निबोङ रिबाङ धरम गुरुजि निवाहाङ्मि सराङ्बेॽ उःक्युनुङ सेवा मुमानुङ इडोॽ लुसाङ खोमि ओहाङ ले़टुजि। 17 “हे परभु निवाहाङ, चोप्पाङ सक्तिदाङ्बा, हे़न सिरिस्टि लिबॽआबाङ टुसे़नुङ आयुसो टुसिये, कानिङे़ॽ हे़न ओहाक पिन्डुङ्मे, इन्ढोङ्होङ हे़ने़ॽ टाङ्बामि बेॽएम्मा अधिकार लानुङ टाङ्बामि राज्य तरिक्पोॽइटुए। 18 हे़नबेॽ बिस्वास मे़ले़ःॽखुबा याॽमिजि सुरके़टामे, हागोगो हे़न सुरके़ॽमे बेला लेङ्इटे़नुङ सिबॽआजिमि न्याय लिमे याक लेङ्इटे़, मोबा हे़ने़हा सेवाकजि, अगमबक्ताजि, पबित्रा याॽमिजि, हे़ने़ए़ निङ्मि ओहाङ ले़ःॽखुबा बेॽहानुङ ए़द्रिहा चोप याॽमिजि इनाम पिमे बेला लेङ्इटे़, हागो मक्खाम्डेमबेॽ दुस्टा योम्बोक ले़ःॽखुबाजि नासि लिमे याक लेङ्इटे़।” 19 मोबा थाङ्सिरिबेॽ टुघुबा निवाहाङ्मि मन्दिर हेम्बोगानुङ मो होङ्सिॽयुए पबित्रा करारमि सन्दुक खाङ्मुसा। मोबा ए़क्साङ नमसेल्ले़ॽवा पोगा, किस्सिमारो नान्द्रुङ्मा मुगा, रुॽमि खडा, बेॽहा बेॽहा ओम हेडा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.