परकास 10 - याम्फु

थाङ्‌सिरिदुतनुङ साउकमि ए़डिॽमा पत्‍रामि मुट्‌ठा

¹ मोबा ए़क्‍साङ के़ॽ हाइको सक्‍तिदाङ्‌बा थाङ्‌सिरिदुत थाङ्‌सिरिॽटुरा उङ्‌बॽआ खाङ्‌डोक्‍टुङ। खोमि हिङा खिम्‍मिॽवाडे़ॽ टे़क्‍पॽआनुङ खोमि निन्‍डवाँ खिरिरि अप्‍पाङ्‌सु टुसा। खोमि नजिक नमडोॽ ले़टा, मोबा खोमि सराङ चाहिँ मिमि खाँबाडोॽहा ले़टा।

² खोमि हुकपेॽ हेम्‍बोक्‍पॽआ ए़डेम्‍मा साउकमि पत्‍रामि मुट्‌ठा टुसा। मोसे़ॽ खोमि चुप्‍थिङ सराङ माहोङ्‌माबेॽ, ए़ङ्‌सिङ सराङ चाहिँ भुमिबेॽ सिक्‍पॽआ ले़टा।

³ मोबा मो थाङ्‌सिरिदुत किबा वोडिडोॽ बेॽएम्‍मा सेम्‍लाडे़ॽ मुक्‍मानुङ कासा, मो वोमासोरोॽ एच्‍चि गोटा नान्‍द्‌रुङ्‌मा मुगा।

⁴ माहा एच्‍चि गोटा नान्‍द्‌रुङ्‌मा मुक्‍मासोरोॽ का साप्‍मामि पोरोगिङ, मोडोक्‍पेॽनोॽ थाङ्‌सिरिबाङ इडोॽ लुबॽआ के़ॽ खेप्‍सुङ, “माहा एच्‍चि गोटा नान्‍द्‌रुङ्‌मा मुक्‍पॽआ खा चुम्‍नुङ युक्‍से, आक्‍को ए़ॽसाबुने।”

⁵ मोबा मो माहोङ्‌मानुङ भुमिबेॽ सिक्‍मानुङ येःप्‍खुबा सक्‍तिदाङ्‌बा थाङ्‌सिरिदुतडे़ॽ थाङ्‌सिरिलाम खोमि चुप्‍थिङ हुक ठेडु,

⁶ मोबा सानिङ हिङ्‌रिक लिघुबा, नान्‍द्‌रुङ्‌मा, माहोङ्‌मा, मक्‍खाम्‍डेमनुङ मोबेॽ टुहा चोप थोक टोङ्‌घुबा निवाहाङ्‌मि निङ्‌बेॽ हेन्‍ज्‍रुङ हे़न्‍नुङ मो थाङ्‌सिरिदुतडे़ॽ लुसु, “हागो ढिलो लिनिबा।

⁷ तर माहा एच्‍चिमा थाङ्‌सिरिदुतडे़ॽ खोमि तुरहि मिःॽसिॽ पोरोक्‍माबेॽ, निवाहाङ्‌डे़ॽ खोमि सेवाक अगमबक्‍ताजि लुबॽआ लेमा छॽइये खा पुरा ले़न्‍डुहा।”

⁸ थाङ्‌सिरिबाङ काबॽआ सेम्‍लाडे़ॽ का फेरि लुसिङा, “खडे, माहोङ्‌मानुङ भुमिबेॽ सिक्‍नुङ येःप्‍खुबा थाङ्‌सिरिदुतमि हुकपेॽ टुये मो हेम्‍बोक्‍पॽआ साउकमि पत्‍रामि मुट्‌ठा लासे।”

⁹ मोबा का मो थाङ्‌सिरिदुतबेॽ खे़ॽनुङ मो ए़डेम्‍मा साउकमि पत्‍रामि मुट्‌ठा ङागुङ। मोबा खोसे़ॽ लुसिङ, “लो इगो लासे, मोबा चोसे। हे़ने़ए़ रुङ्‌माबेॽ इगो सिडुवा लिये, तर याबुकपेॽ चाहिँ खुदोडोॽ रिम्‍इये।”

¹⁰ के़ॽ मो थाङ्‌सिरिदुतमि हुकबाङ ए़डेम्‍मा साउकमि पत्‍रामि मुट्‌ठा लानुङ चासुङ। काङ्‌मि याबुकपेॽ मो खुदोडोॽ रिप्‍सा। तर मो रुङ्‌माबेॽ रुक्‍नुङ सिडुवा लिसा।

¹¹ मोबा का इडोॽ लुसिङा, “हे़ने़ॽ बेॽलो याॽमिजि, जातिजि, खाप्‍ला यामुखुबा याॽमिजिनुङ हाङ्‌बाजि लुमा खे़ये।”