परकास 1 - याम्फु1 इगो नेॽचिराबेॽ येसु खिरिस्टडे़ॽ युहन्ना पिबॽआ सेन्जिसेम्माङ्मि टुम्बेॽ साप्पॽआ ले़ये। मो खा चाहिँ हागो चान्डोनोॽ लिसिॽपोरोइटे़ लुनुङ निवाहाङ्डे़ॽ खोमि याॽमिजि खाङ्मेॽमामि लागि परभु येसुमि राम्बाङ सेन्जिसेम्माङ पिसु। मोबा येसुडे़ॽ इघा लुमामि लागि, इक्को थाङ्सिरिदुत खोमि एप्पा चोङ्सा युहन्नाबेॽ पाक्सु। 2 युहन्नाडे़ॽ मो सेन्जिसेम्माङ्बेॽ चुप्पॽआ चोप खा अथबा निवाहाङ्मि बचननुङ येसु खिरिस्टडे़ॽ खाङ्मुबॽआ चइबाहा खा इघानोॽ ले़हा। 3 असे़ॽ इगो नेॽचिराबेॽहा अगमबानिमि बचन बेॽए सेम्लाडे़ॽ नेॽएन्डुए, असे़ॽ माहा खेम्इन्डुए मोबा असे़ॽ मोबेॽ साप्पॽआ खा पालना ले़न्डुए, माहाजि आसिस चुप्खुबाजि ले़म्मे, इन्ढोङ्होङ इघा खा चान्डोनोॽ पुरा लिहा। युहन्नाडे़ॽ एच्चि मन्डलिबेॽहा बिस्वासिजि सेवा मुबॽआ 4 का युहन्नाडे़ॽ एसियाबेॽ टुहा एच्चि गोटा मन्डलिबेॽहा बिस्वासिजि सेवा मुनुङे़, निवाहाङ याक्लोएम्बाङ टुसा, आयुसो टुये मोबा ए़क्साङ्सो लेङ्इये, मोबा निवाहाङ पेन्ढाममि पोम्बेॽ टुहा एच्चि गोटा होङ्निवाबाङ हे़निङ अनुग्रहानुङ सान्ति लिरो। 5 बिस्वासनुङ्मा साक्छि मोबा सिघे़ॽनुङ हिङ्बुक्पॽआजिबेॽ याक्लोमा लिघुबा मक्खाम्डेमबेॽहा हाङ्बाजिमि हाङ्बा येसु खिरिस्टबाङ्सो हे़निङ अनुग्रहानुङ सान्ति लिरो। खोसे़ॽ कानिङ नम्नम ले़ये, मोबा खोमि हरिमि बलिडे़ॽ कानिङ पापबाङ छुट्कारा पिसा। 6 खोसे़ॽ खोमि पाबा निवाहाङ्मि राज्यबेॽ सेवामि योम्बोक ले़ःॽखुबा याडाङ्बा कानिङ टोङ्इटे़। खोमि आदरनुङ अधिकार सानिङ टुडुङ्घे़ॽरो। आमेन। 7 खाक्सानुमे, येसु खिम्मिॽवाबेॽ उङ्मे़ॽनिङ्सिये। चोबे़ॽ खो खाङ्डोक्इन्डुजे, खो खाक्खुबाजिडे़ॽसो खाङ्डोक्इन्डुजे, इगो मक्खाम्डेमबेॽहा चोप जातिजिडे़ॽ सोक ले़न्डुजे। इडोक्नोॽ लिरो, आमेन। 8 चोप्पाङ सक्तिदाङ्बा परभु निवाहाङ्डे़ॽ लुये, “कानोॽ अल्फानुङ ओमेगा ले़ङे” इगो लुबॽआ चाहिँ “कानोॽ सिरिस्टिबाङ याक्लोमानुङ कानोॽ चोप्पाङ ए़क्साङ्मासो ले़ङे” याक्लो खो टुसे़, आइसो खो टुये, मोबा ए़क्साङ्सो खो लेङ्इये। युहन्नाबेॽ याॽमिमि पसा खाङ्मुबॽआ 9 खिरिस्टराम्बाङ का हे़निङ्मि वावा युहन्ना ले़ङे। हे़निङे़ॽ आङ्बॽआडोॽमा खेः के़ॽसो आङ्मे़ॽनिङ्सिनुङ्हा, इन्ढोङ्होङ येसु कानिङ्मि हाङ्बा ले़ये, तर खोसे़ॽनोॽ कानिङ योङ आङ्हेमे सक्ति पिये। के़ॽ निवाहाङ्मि बचन परचार ले़ःॽपॽआसे़ॽनुङ येसु खिरिस्टमि टुम्बेॽहा खा याॽमिजि लुबॽआसे़ॽ याॽमिजिडे़ॽ का पत्मोस लुमे योङेॽ यिजुम्बॽआ ठाउँबेॽ से़क्नुङ युङ्बॽआ ले़टे़। 10 परभुमि याकपेॽ का होङ्निवामि अधिनबेॽ टुसिङे, काङ्मि ए़ङ्गुवालाम तुरहि मिटिडोॽमा इक्को बेॽएम्मा सेम्ला के़ॽ खेप्सुङ। 11 मो सेम्लाडे़ॽ इडोॽ लुसा, “हे़ने़ॽ इगोबेॽ इमाङ खाङ्डोक्इन्डुए, माहा चोप खा इक्को नेॽचिराबेॽ साबे, मोबा एफिसस, स्मुरना, परगामम, थिआटिरा, सारडिस, फिलाडेल्फियानुङ लाउडिकिया इघा एच्चि गोटा मन्डलिबेॽ हाङ्बेॽटाजे।” 12 इगो यामुघुबा असाडे मिॽनुङ का ए़ङ्गुवालाम हिङ्घे़ॽनुङ खाङ्माबेॽ एच्चि गोटा सुनामि कुप्पि युङ्ढाम खाङ्डोक्टुङ। 13 माहा एच्चि गोटा सुनामि कुप्पि युङ्ढाममि रुम्बेॽ “याॽमिमि पसाडोॽमा” खाङ्मुसा खो थाङ्सिरिबाङ लेम्बॽआडोॽ ले़टा। खोसे़ॽ सराङ्ठोक किएम्मा चेॽ चाङ्बॽआनुङ हाङ्डाङ्बेॽ खिरिरि सुनामि थोङ्माइ हिःक्पॽआ ले़टा। 14 खोमि निन्डवाँनुङ टाङ उननुङ नाङ्डोॽमा उथ्रिॽमा ले़टा मोबा खोमि मिक मिमि राप्लवाडोॽ ले़टा। 15 खोमि सराङ मिमि भट्टिबेॽ हिॽनुङ पोॽइये कासाँडोॽ पोगा। खोमि सेम्ला चाहिँ बेॽए होङ्माडोॽ मुक्पॽआ ले़टा। 16 खोमि चुप्थिङ हुगे़ॽ एच्चि गोटा साङ्गे राःप्पॽआ ले़टा, खोमि याबुकबाङ निगे़ङ्लामनोॽ वेङ्इये फेया पे़आॽपॽआ ले़टा। खोमि नजिक चाहिँ लेन्डामि नमडोॽ पोक्पॽआ ले़टा। 17 इडोॽ के़ॽ खो खाङ्माबेॽ कागो सिबॽआडोक्नोॽ लिनुङ खोमि सराङ्बेॽ काक्सिङ। मोबा खोसे़ॽ काङ्मि निन्डवाँबेॽ खोमि चुप्थिङ हुक युङ्साङ लुसा, “ए़क्किसिने, याक्लोमानुङ ए़क्साङ्मा कानोॽ ले़ङे। 18 हिङ्रिक लिघुबा चाहिँ कानोॽ ले़ङे। का सिबॽआ ले़टिङे, तर खाक्सानुमे, हागो का सानिङ्मि लागि हिङ्रिक लिटिङे। मोबा सिमवानुङ पाताल से़क्ठाम साँचो कानुङ टुहा। 19 मोडोगे़ॽ हे़ने़ॽ इमा इमा खाङ्इटुहा, हागो लिमे़ॽनिङ्सिबॽआ खानुङ ए़क्साङ लिहा चोप खा साप्युक्से। 20 काङ्मि चुप्थिङ हुकपेॽ खाङ्डोक्पॽआ इघा एच्चि गोटा साङ्गेनुङ एच्चि गोटा सुनामि कुप्पि युङ्ढामडे़ॽ लुमायोक्पॽआ खा चाहिँ इडोॽ ले़हा। एच्चि गोटा सुनामि कुप्पि युङ्ढाम लुबॽआ चाहिँ एच्चि गोटा मन्डलि ले़हा, मोबा एच्चि गोटा साङ्गे लुबॽआ चाहिँ एच्चि गोटा मन्डलि खाङ्घुबा थाङ्सिरिदुतजि ले़म्मे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.