फिलिप्पि 3 - याम्फुखिरिस्ट लेमानोॽ चाइबमा धरम ले़ये 1 हागो ए़क्साङ्ए खा वावानिसानुङ नानुसाजि, परभुबेॽ हे़निङ हाङ्हाङ ले़टानिङे। हे़निङ्मि लागि इघा खा सानिङ साप्मा का पाङ्सुङानि, इगो खा हे़निङ्मि बिस्वास जोगा ले़ःॽमामि लागि ले़ये। 2 हुःॽवाजिडोॽ खिघुबाजिनुङ मङे़हा योम्बोक ले़ःॽखुबाजिबाङ होसियार ले़टानिङे मोबा खतना ले़ःॽखुबाजिबाङ होसियार ले़टानिङे। 3 इन्ढोङ्होङ चाइबमा खतना ले़ःॽखुबाजिगो कानिङ्गोरे ले़न्डिङ्मा, कानिङे़ॽ निवाहाङ्मि होङ्निवाबाङ खोमि ओहाङ ले़न्डुङ्मा। खिरिस्टबेॽ गरब ले़न्डिङ्मा मोबा याॽमिडे़ॽ टोङ्बॽआ रितिथितिबेॽ भरोसा ले़टुङ्मानि। चाइबमा खतनानुङ्हा चाहिँ कानिङ ले़न्डिङ्मा। 4 तर याॽमिमि हिङाबेॽ खाङ्मुहा खाबेॽ भरोसा ले़ःॽठाम टुयेहोङ्गो काबेॽको छना बेॽलो टुहा। 5 इन्ढोङ्होङ आक्चि याकपेॽ काङ्मि खतना लिबॽआ ले़ये। का इस्राएलि जातिमा याॽमि, बेन्यामिन कुलमि ले़ङे, जातिबेॽ पक्का हिब्रु ले़ङे, यहुदि धारमिक नियममि टुम्बेॽ लुमाहोङ का इक्को फरिसि ले़टिङ। 6 का यहुदि धारमिक नियम सारो पाङ्नुमानुङ पालना ले़ःॽखुबा ले़टिङेसे़ॽ के़ॽ बिस्वासिजि बेॽलो चुङ्जासुङ्जि, यहुदि धारमिक नियममि पोम्बेॽ आप्टिक मे़ॽनिङ्मा ले़टिङे। 7 तर मो बेला के़ॽ काङ्मि लागि नुबा मिॽपॽआ चोप खा आयु खिरिस्टमि लागि इमाङ्सो ने़ॽनिहा मिॽनुङे। 8 चइबानोॽ लुमाबेॽ खिरिस्ट येसु काङ्मि परभु लेडोक्मा चोप्पाङ बेॽए खा ले़ये, इगो खामि पोम्बेॽ हाइखा चोप थोक के़ॽ योम्बोक मे़ॽनिङ्हा मिॽइनुङे। खिरिस्टमि लागिनोॽ के़ॽ चोप थोक लेॽपेटुङ्हा मोबा खो नुरोॽ लेहेमा लुनुङ्नोॽ हाइखा चोप थोक से़क्चिबाडोक्नोॽ मिॽइनुङ्हा। 9 मोबा का खोमिनोॽ लिहेमा लुनुङ इडोॽ ले़नुङे। यहुदि धारमिक नियम पालना ले़ःॽनुङ का धरमि लिहेङानि। तर के़ॽ खिरिस्टबेॽ बिस्वास ले़ःॽपॽआसे़ॽ हागो निवाहाङ्डे़ॽनोॽ का धरमि टोक्सा। मो धारमिक खा चाहिँ बिस्वास ले़ःॽनुङ चुप्मिये। 10 के़ॽ खिरिस्टनुङ खो हिङ्बोक्मे सक्ति लेहेमा, खोसे़ॽ आङ्बॽआ खेः आङ्मानुङ खोमि सिमवाठोक खोडोक्नोॽ लिमा मिङ्इङे। 11 इन्डोॽहोङ्सो का सिबॽआबाङ्सो हिङ्बोक्हेमा लुनुङ आसा ले़नुङे। निसानालाम पिङघे़ॽमा 12 के़ॽ ले़ःॽमे चोप योम्बोक येप्पेटुङे मोबा का पक्का ले़ङेगो के़ॽ लुसुङ्नि। के़ॽ माहा खा चुप्मामि लागि बोल ले़ःॽमे़ॽनिङ्सिङे, इगोमि लागिनोॽ खिरिस्टडे़ॽ का खोमि टोङ्बेटिङे। 13 के़हा वावानिसानुङ नानुसाजि, के़ॽ चोप चुप्पेटुङेडोॽ काङ्दाङ्बा मिॽटुङ्नि। तर के़ॽ इक्को योम्बोक ले़नुङे, मो चाहिँ याक्लो लिबॽआ खा मिन्डेॽनुङ हागो लेङ्इहा खा चुप्मामि लागि पोम्बेॽ हेरो पिङ्घे़ॽमे़ॽनिङ्सिङे। 14 थाङ्सिरिबेॽ चुप्मिये इनाममि निसानालाम का बोल टिनुङ पोम्बेॽ खे़ॽमे़ॽनिङ्सिङे। निवाहाङ्डे़ॽनोॽ इगोमि लागि खिरिस्ट येसुराम्बाङ का के़ए़टिङे। 15 कानिङ बिस्वासबेॽ पक्का लिबॽआजि चोबे़ॽ इडोक्मानोॽ निवा खिमा खे़ये। हे़निङ्बेॽ खोरो खोरो निवा टुहोङ्सो निवाहाङ्डे़ॽनोॽ हे़निङ मो लेमेये। 16 आइरो इन्डोॽ कानिङ इगोठोक लेङ्इटिङ्मे हागो इडोक्नोॽ बोलियो लिनुङ पोम्बेॽसो खडि। 17 वावानिसानुङ नानुसाजेओ, हे़निङे़सो के़ॽ ले़टिडोक्नोॽ ले़टानुमे। कानिङ हे़निङ्मि पोम्बेॽ नुबा याॽमि लिनुङ हिङ्इटिङ्मे। कानिङ्डोक्नोॽ ले़ःॽनुङ हिङ्घुबाजि खाङ्नुङ हे़निङे़ॽसो चिनानुमे। 18 के़ॽ बेॽलोखेॽ हे़निङ लुबेनिम्ने़, हागो फेरिसो हाःप्मानुङ लुनिम्ने़, बेॽलो याॽमिजि खिरिस्टमि सतुर ले़म्मे लुनुङ खोजिमि चालचलनडे़ॽ खाङ्मुटामे। 19 अक्खाजि ए़क्साङ खेःलोकपेॽ नासि लिम्मे, माहाजिडे़ॽ ले़ःॽमा मिॽपॽआ खानोॽ खोजिमि लागि बेॽए खा ले़ये। ङेसिमाहा खामि टुम्बेॽ छना बेॽए खा इम्मे, मोबा माहाजिमि निवा चाहिँ मक्खाम्डेमबेॽहा खाबेॽरेॽ सानिङ टिन्डुजे। 20 तर कानिङ्गो थाङ्सिरिबेॽहा याॽमिजि ले़न्डिङ्मा। थाङ्सिरिबाङ लेङ्घुबा मुक्तिदाङ्बा, परभु येसु खिरिस्टमि राम हुङ्मे़ॽनिङ्सिन्डुङ्मे। 21 खोसे़ॽ खोमि बोलबाङ चोप थोक खोमि अधिनबेॽ युङ्हेन्डुए। खोमि मो बोलडे़ॽनोॽ कानिङ्मि इगो नासि लिये हिङा खोमिडोॽमानोॽ महिमानुङ्मा टोङ्इन्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.