फिलिप्पि 2 - याम्फु1 इमा खिरिस्टबेॽ टुये हे़निङ्मि हिङ्मवाडे़ॽ हौसला चुप्मिटानुमे ? खोमि नम्नमबाङ हे़निङे़ॽ सान्ति चुप्मिटानुमे ? हे़निङे़ॽ पबित्रा होङ्निवामि सेवा सङ्गति ले़ःॽमे़ॽनिङ्सिन्डानुमे ? इमा हे़निङ इक्कोसे़ॽ हाइको बेॽलो नम्नम ले़ःॽखुसे़ॽचुन्डानिङे ? 2 आक्टोॽहोङ हे़निङ इक्को निवानुङ्हा लिनुङ, इक्कोसे़ॽ हाइको नम्नम ले़ःॽखुसे़ॽचुसानिङे, मोबा इक्को निवानुङ्हा लिनुङ टोङ्जासानिङे, इगो खाडे़ॽ का सारोनोॽ साप्थाङ्मेये। 3 टाङ्बारेॽनोॽ नुबा लिये खा ए़योगानुमेनुङ काङायोङ्बा ए़लिसानिङे, तर ए़डेम्मा लिनुङ इक्कोसे़ॽ हाइको टाङ्बाबाङ बेॽएम्मा मिडानुमे। 4 हे़निङे़ॽ टाङ्बामिरेॽनोॽ नुबा ने़ॽनि, तर हाइखाजिसो नुबा लिये खा मिडानुमे। 5 हे़निङ्बेॽ येसु खिरिस्टमिडोॽमा नुबा निवा टुरो। 6 येसु खिरिस्ट निवाहाङ्नोॽ ले़ःॽनुङ्सो खोसे़ॽ इन्डोक्पेॽसो निवाहाङ्नुङ बराबरि लिमा मे़मिॽटु। 7 तर टाङ्बामि चोप थोक लेप्पेनुङ सेउतेडोॽ लिसा। खो याॽमि लिनुङ मक्खाम्डेमबेॽ टोगा। 8 खो याॽमि लिनुङ मक्खाम्डेमबेॽ लेस्सा मोबा ए़डेम्मा लिनुङ काप्सिङ्बेॽ सिमाठोक आग्या पालना ले़टु। 9 मोडोगे़ॽनोॽ निवाहाङ्डे़ॽ खो चोप्पाङ बेॽए सम्मान चुप्मे ठाउँबेॽ युक्सु, मोबा खो मो निङ पिसु, मो निङ चाहिँ चोप निङ्बाङ मिन्डु टुये। 10 इडोॽ थाङ्सिरि, मक्खाम्डेमनुङ मक्खाम्डेमबाङ मिॽमुहा चोबे़ॽ येसुमि पोम्बेॽ टुम्रुक ठोःक्नुङ खो आदर ले़न्डुजे। 11 मोबा चोबे़ॽ निवाहाङ पाबानोॽ ओहाङ पिमामि लागि येसु खिरिस्टनोॽ परभु ले़ये लुनुङ स्विकार ले़ःॽमा खे़ये। मक्खाम्डेमबेॽ पोॽइये जोति 12 मोडोगे़ॽ के़ॽ नम्नम ले़ःॽपॽआ वावानिसानुङ नानुसाजि, का हे़निङ्नुङ टुमाबेॽ के़ॽ लुबॽआ खा हे़निङे़ॽ ले़टानुम, तर हागो का ओः लिमाबेॽसो हे़निङे़ॽ छना बेॽलो निवाहाङ्मि किस्सिमवे़ॽ योङ्मानुङ हे़निङे़ॽ चुप्पॽआ मुक्ति खेन्जानुये बेबहारनुङ्मा योम्बोक ले़टानुमे। 13 इन्ढोङ्होङ निवाहाङ्डे़ॽ हे़निङ्बेॽ योम्बोक ले़ःॽमे़ॽनिङ्सिङ्डुए। खोसे़ॽनोॽ हे़निङ खोसे़ॽ मिॽपॽआडोॽ ले़ःॽमे निवानुङ बोल पिये। 14 चोप योम्बोक कुनुक कुनुक मे़ङ्कारेॽ अथबा मे़ङ्खिरेॽ ले़टानुमे। 15 मोडोॽ ले़टानुमहोङ हे़निङ चाहिँ सुधोनुङ आप्टिक मे़ॽनिङ्हाजि लिनुङ पापिनुङ मङे़हा याॽमिजिमि रुम्बेॽ निवाहाङ्मि खोट मे़ॽनिङ्हानुङ चोखो पसाजि लिन्डानिङे। हे़निङे़ॽ साङ्गेडे़ॽ सेन्जुगुपेॽ उज्यालो टोङ्डिडोॽ माहाजिमि रुम्बेॽ उज्यालो टोङ्मा खे़ये। 16 मोबा हे़निङे़ॽ चुप्पॽआ हिङ्मवा पिघुबा सुसमाचार निवाबेॽ हुप्नुङ युक्सानुमे। इडोॽ ले़टानुमहोङ के़ॽ खेः आङ्मानुङ ले़ःॽपॽआ योम्बोक मोडोक्नोॽ मे़के़न्डिखडा लुनुङ खिरिस्ट लेङ्इये याकपेॽ के़ॽ गरब ले़टोॽइन्डुङ। 17 हे़निङे़ॽ परभुबेॽ ले़ःॽपॽआ बिस्वासनुङ निवाहाङ्मि योम्बोक चाहिँ बलिदानडोॽ ले़ये, मोबेॽ काङ्मि हिङ्मवामि बलि पिमा सिॽसो का साप्थाङ्इङे। इगो साप्थाङ्मे खाबेॽ हे़निङ्सो कानुङ सोरि साप्थाक्सानिङे। 18 मोडोक्नोॽ हे़निङ्सो कानुङ सोरि साप्थाक्सानिङे मोबा कासो हे़निङ्नुङ साप्थाङ्इङे। तिमोथिनुङ इपाफोरोडिटस 19 परभु येसुडे़ॽ मिॽटुहोङ के़ॽ चान्डोनोॽ तिमोथि हे़निङ्बेॽ पाङ्इनुङे। खोबाङ हे़निङ्मि टुम्बेॽहा खा खेम्डोक्टुङ्होङ कासो साप्थाङ्इङे। 20 हे़निङ्मि लागि चइबानोॽ सुरता ले़ःॽखुबा तिमोथिबाङ हाइखा याॽमि कानुङ असासो माॽआम्मे। 21 हाइखाजिडे़ॽको टाङ्बे़ॽ मिॽपॽआ खामिरेॽ ले़ख्खो ले़न्डुजे, येसु खिरिस्टडे़ॽ मिॽपॽआ खामि ले़ख्खोनोॽ ले़टुजिने। 22 तर हे़निङे़ॽ तिमोथिमि आनिबानि नुबा ले़ये लुनुङ्गो नुरोॽ लेन्डानुमे, खोसे़ॽ इक्को पसाडे़ॽ खोम पाबानुङ योम्बोक ले़टिडोॽ कानुङ सुसमाचारमि योम्बोक ले़ए़टुए। 23 आसा ले़ःॽखाङ्मा काबेॽ इमा इमा सिॽइये! माहा खा लेडोक्मासोरोॽ के़ॽ तिमोथि हे़निङ्बेॽ पाङ्मा मिॽइटुङे। 24 मोबा कासो चान्डोनोॽ लेङ्इङे़ लुनुङ परभुबेॽ बिस्वास ले़ए़टुङे। 25 के़ॽ कानिङ्मि निसा इपाफोरडिटस हे़निङ्बेॽ टेहाङ्मा मिॽइटुङे। काजिङ निप्पाङे़ॽ ङे ले़ःॽखुबा तिरिङ्गाडोॽ सुसमाचारमि रच्छे ले़ःॽमे योम्बोक ले़न्जुङ्मा। खोसे़ॽ कानुङ सोरि योम्बोक ले़टु, मोबा खोसे़ॽ सुसमाचार खेम्मेॽमे योम्बोकपेॽ का सहायता ले़टा। 26 खोसे़ॽसो हे़निङ चुप्मामि बेॽलो मिॽइटुए, खो टुक्पॽआ खा हे़निङे़ॽसो खेम्इटानुमे लुनुङ बेॽलो सुरता मिङ्इटे़। 27 चइबानोॽ खो सारोनोॽ टुगा अडे़ॽवे़ॽ सिघे़ॽपॽआ ले़टे़। तर निवाहाङ्डे़ॽ खो नम्नावा ले़टु, खोरेॽनोॽ ने़ॽनि तर कासोक्पेॽसो खोसे़ॽ नम्नावा ले़टानुङ के़ॽ सोकपेॽ सोक आङ्मा मे़न्सिॽटा। 28 मोडोगे़ॽ हे़निङे़ॽ खो फेरि खाङ्डोक्माबेॽ बेॽलो साप्थाङ्इन्डानिङे लुनुङ के़ॽ खो पाङ्मा बेॽलो मिङ्इटिङे, मोबा काङ्मि सुरतासो चुक्खे़हा। 29 हे़निङ्मि निवा होङ्सिॽयुबाङ साप्थाङ्मानुङ परभुबेॽ निसा मिॽनुङ खो स्वागत ले़टानुमे। खोडोॽमा याॽमि आदर ले़ःॽमानोॽ खे़ये। 30 इन्ढोङ्होङ खोसे़ॽ खिरिस्टमि योम्बोक ले़ःॽमाबेॽ टाङ्बानोॽ ए़डे़ॽवे़ॽ मे़न्सिखडा। हे़निङे़ॽ काङ्मि लागि पुरा मे़ले़ःॽहेबॽआ योम्बोक खोसे़ॽ पुरा ले़टु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.