फिलिप्पि 1 - याम्फु1 फिलिप्पि सहरबेॽ टुघुबा पबित्रा याॽमिजि, मन्डलि रेखदेख ले़ःॽखुबा अगुवाजि, डिकनजिनुङ बिस्वासिजिमि लागि काजिङ येसु खिरिस्टमि सेउतेजि पावलनुङ तिमोथिडे़ॽ इगो पत्रा साप्हाङ्मे़ॽसिन्जुङे। 2 कानिङ्मि पाबा निवाहाङ्नुङ परभु येसु खिरिस्टडे़ॽ हे़निङ अनुग्रहा सान्ति पिरो। पावलमि पारथना 3 हे़निङ मिॽमाबेॽ सानिङ काङ्मि निवाहाङ ओहाक पिनुङे़। 4 के़ॽ पारथना ले़ःॽमाबेॽ सानिङ हे़निङ चोपमि लागि साप्थाङ्मानुङ पारथना ले़नुङे। 5 इन्ढोङ्होङ हे़निङ याक्लोएबाङ आयुरोसो सुसमाचार परचार ले़ःॽमे योम्बोकपेॽ कानुङ सोरि टुन्डानिङ। 6 मोबा निवाहाङ्डे़ॽ हे़निङ्बेॽ मुक्तिमि योम्बोक तरिक्इटुए। येसु खिरिस्ट फेरि लेङ्इये याकठोक्पेॽ निवाहाङ्डे़ॽ मो नुबा योम्बोक येॽएन्डुए लुनुङ के़ॽ चइबानोॽ बिस्वास ले़नुङे। 7 हे़निङ चोपमि टुम्बेॽ मोडोॽ मिॽमा के़ॽ नुबा मिॽटुङ, इन्ढोङ्होङ हे़निङ काङ्मि निवाहोङ्सिॽयु युङ्इटुङे। आयु का तिरिङ्गा खिमबेॽ से़क्सिघे़ॽमाबेॽसो, याक्लो सुसमाचार पक्का ले़ःॽमाबेॽसो इगो निच्चि बेलानोॽ निवाहाङ्मि अनुग्रहाबेॽ हे़निङ कानुङ सोरि येःबानिङे। 8 चइबानोॽ के़ॽ हे़निङ्नुङ चुप्मानुङ सोरि पेम्मा सारोनोॽ मिॽपॽआ खा निवाहाङ्डे़ॽ लेन्डुए, इन्ढोङ्होङ खिरिस्ट येसुडे़ॽ हे़निङ नम्नम ले़टिडोक्नोॽ के़ॽसो हे़निङ नम्नम ले़ए़निम्ने़। 9 हे़निङ्मि रुम्बेॽ बुद्धि, निवानुङ मोबाङ्सो बेॽलो इक्कोसे़ॽ हाइको नम्नम ले़ःॽखुसे़ॽचुसानिङे लुनुङ के़ॽ पारथना ले़नुङे। 10 इडोॽ लिहोङ हे़निङे़ॽ चोपबाङ नुबा मराम हाम्बे चाहिँ ले़ये लुनुङ लेहेन्डानुमे, मोबा खिरिस्ट लेम्माबेॽ हे़निङ पबित्रानुङ आप्टिक मे़ॽनिङ्हा याॽमिजि लिहेन्डानिङे। 11 मोबा निवाहाङ्मि महिमानुङ ओहाङ्मि लागि येसु खिरिस्टबाङ लेङ्इये नुबा योम्बोक हे़निङ्मि हिङ्मवाबेॽ बेॽलो खाङ्मुहा। पावल से़क्सिघे़ॽमाबेॽ छना सुसमाचार परचार लिसा 12 वावानिसानुङ नानुसाजि, हे़निङे़ॽ इगो खा लेसानुमे लुनुङ के़ॽ मिॽइनुङे। कासोक्पेॽ लेम्बॽआ इघा चुङ्जामा खेःडे़ॽको छना बेॽलो सुसमाचार परचार लिमा राप्मिटे़। 13 के़ॽ खिरिस्टमि सुसमाचार परचार ले़ःॽपॽआसे़ॽ तिरिङ्गा खिमबेॽ से़क्सिघे़टिङे लुमे खा चोप तिरिङ्गाजिनुङ हाइखा चोप याॽमिजिडे़ॽसो लेन्डुजे। 14 मोबा के़हा बेॽलो वावानिसाजि का से़क्सिघे़ॽमाबेॽ खोजि परभुबेॽ बोलियो लिटामे, मोबा मे़ङकिस्सिरेॽ निवाहाङ्मि बचन खेम्मेॽमामि लागि आँटिलो लिटामे। 15 मोबेॽ इक्को निप्पाङ याॽमिजिबेॽ चेजेवा के़ःॽनुङ परचार ले़ए़टुजे, तर इन्डोक जना याॽमिजिडे़ॽ चाहिँ नुबा निवाडे़ॽनोॽ खिरिस्टमि टुम्बेॽ परचार ले़ए़टुजे। 16 सुसमाचार जोगा ले़ःॽमामि लागिनोॽ का इगोबेॽ टुङे लुनुङ लेघुबाजिडे़ॽ चाहिँ परचारमि योम्बोक नम्नमनुङ ले़न्डुजे। 17 हाइखाजिडे़ॽ चाहिँ नुबा निवा खिनुङ ने़ॽनि तर का से़क्सिघे़ॽपॽआ ठाउँबेॽ छना बेॽलो खेः आङ्मेॽमामि लागि मङे़ॽमा निवाडे़ॽ खिरिस्टमि परचार ले़न्डुजे। 18 इमाङ्होङ्सो इगो खाबेॽ का चाहिँ साप्थाङ्इङे। नुबा निवाबाङ परचार लिहोङ्सो मङे़ॽमा निवाबाङ परचार लिहोङ्सो खिरिस्टमिनोॽ परचार लिये, इगो खाबेॽ चइबानोॽ का साप्थाङ्इङे, 19 इन्ढोङ्होङ के़ॽ लेनुङे़, हे़निङ्मि पारथनानुङ येसु खिरिस्टमि होङ्निवाडे़ॽ पिबॽआ सहायताडे़ॽ का इगोबाङ लेॽखे़ङे। 20 के़ॽ मिॽइटुङेनुङ आसा ले़ए़टुङे का इन्डोक्पेॽसो ङेम्मा सिॽङानि। के़ॽ सिघे़ॽमा सिॽहोङ्सो, का हिङ्डोक्ङाहोङ्सो का बेॽलो साहसि लिङेनुङ सानिङ्डोक्नोॽ आयुसो काङ्मि हिङ्मवाबाङ खिरिस्टमि सम्मान लिये। 21 इन्ढोङ्होङ का हिङ्मा खिरिस्टमि योम्बोक ले़ःॽमामि लागि ले़ये। सिमागो काङ्मि लागि छना नुबानोॽ लिये। 22 तर का हिङ्ङानोॽहोङ्सो काङ्मि लागि नुबा लिये खिरिस्टमि लागि हाइखा बेॽलो योम्बोक ले़टोक्इन्डुङे। तरसो के़ॽ सिमानुङ हिङ्मा हाम्बे चाहिँ सेम्मा खे़ये, मो लुहेसुङ्नि। 23 कागो इमा ले़ःॽमे ले़ःॽमे लिटिङे। इगो मक्खाम्डेम याःॽयानुङ खिरिस्टनुङ सोरि पेम्मासो का सारो मिङ्इङे। खोनुङ पेम्मा चोप्पाङ नुबा ले़ये। 24 तर हे़निङ्मि लागि चाहिँ का हिङ्डुङ्घे़ॽमानोॽ नुबा ले़ये। 25 इगो खामि टुम्बेॽ के़ॽ चइबानोॽ लेनुङे़। हे़निङ बिस्वासबेॽ वाबोक्मामि लागिनुङ हे़निङ बेॽलो हाङ्हाङ्मि लागि का हिङ्इङे। 26 मोबा का फेरि हे़निङ्बेॽ लेम्माबेॽ हे़निङे़ॽ खिरिस्ट येसुमि छना बेॽलो ओहाङ ले़ःॽहेन्डानुमे। 27 चोप्पाङ बेॽए खा लुबॽआ चाहिँ हे़निङ्मि चाल चलन सुसमाचार परचार ले़ःॽमारोमा लिमा खे़ये। मोडोगे़ॽ का हे़निङ्बेॽ लेङ्ङासो मे़लेङ्ङासो हे़निङ चाहिँ इक्को होङ्निवाबेॽ बोलियो लिसानिङे। मोबा इक्कोनोॽ योम्बोक ले़ःॽमे निवा खिनुङ बेॽलो याॽमिजिडे़ॽ बिस्वास ले़टुमिरो मिॽनुङ सुसमाचारमि परचार ले़ःॽपॽआ के़ॽ खेम्मा मिॽइनुङे। 28 हे़निङ्मि बिरोध ले़ःॽखुबाजिनुङ ए़डे़ॽवासो ए़क्किसिडानिङे। इडोॽ ले़टानुमहोङ बिरोध ले़ःॽखुबाजि नासि लिमे खा पक्का लियेनुङ हे़निङे़ॽ चाहिँ उद्धार चुप्मे खा पक्का लिये। मो उद्धार चाहिँ निवाहाङ्बाङ्ए ले़ये। 29 इन्ढोङ्होङ हे़निङे़ॽ खिरिस्टबेॽ बिस्वासरेॽनोॽ ले़ःॽमे ने़ॽनि, तर खोमि लागि दुःख आङ्साङ खोमि सेवा ले़ःॽमे नुबा मौकासो चुप्मिटानुमे। 30 याक्लोहा याकपेॽ के़ॽ आङ्बॽआ चुङ्जामा खेः हे़निङे़ॽ खाङ्इटानुमेनुङ मो आयुसो के़ॽ आङ्मे़ॽसिनुङे मो खेः हे़निङ चोबे़ॽसो आङ्मे़ॽसिन्डानुमे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.