फिलेमोन 1 - याम्फु1 येसु खिरिस्टमि लागि कैदि लिबॽआ का पावलनुङ तिमोथि निसाबाङ इगो पत्रा कानिङ्मि नुबा लङ्गाम फिलेमोन साप्मे़ॽनिङ्सिनुङे। 2 मोबा कानिङ्मि सम्समा निसा अप्फिया, कानिङ्मि लङ्गाम अरखिप्पसनुङ हे़ने़ए़ खिमबेॽ सुम्नुङ सङ्गति ले़ःॽखुबा चोप बिस्वासिजि, 3 इगो कानिङ्मि पाबा निवाहाङ्नुङ परभु येसु खिरिस्टडे़ॽ अनुग्रहानुङ सान्ति पिरो! फिलेमोनमि नम्नमनुङ बिस्वास 4 निसा फिलेमोन, के़ॽ पारथना ले़ःॽमाबेॽ हे़न मिॽनुङ काङ्मि निवाहाङ सानिङ ओहाक पिनुङे़। 5 इन्ढोङ्होङ परभु येसुबेॽ हे़ने़ए़ बिस्वासमि टुम्बेॽनुङ निवाहाङ्बेॽ बिस्वास ले़ःॽखु याॽमिजि हे़ने़ॽ नम्नम ले़ःॽपॽआ खा खेम्इटुङे। 6 हे़ने़ए़ बिस्वासमि सङ्गतिडे़ॽ खिरिस्टबेॽ टुबॽआ कानिङ्हा चोप नुबा खा नुरोॽ लेहेमे निवा बेॽलो लिरो लुनुङ के़ॽ आम्मि लागि सानिङ पारथना ले़नुङे। 7 के़ए़ निसा, हे़ने़ए़ नम्नमबाङ के़ॽ बेॽलो हाङ्हाङ्नुङ हौसला चुप्मिटुङे, इन्ढोङ्होङ हे़ने़ॽ ले़ःॽमे़ॽ निवाहाङ्मि याॽमिजि फेरि हाङ्हाङ लिटामे। ओनेसिमसमि लागि बिन्ति 8 मोडोगे़ॽ हे़ने़ॽ इमाङ ले़ःॽमा खे़ये, मो ले़टे लुनुङ हे़न आग्या पिमामि खिरिस्टबेॽ के़ॽ बोल चुप्नुङ्सो, 9 के़ए़ नम्नमडे़ॽ ले़ःॽमे़ॽ हे़न बिन्ति ले़न्ने़। का ठाॽपा पावल, मोबा खिरिस्ट येसुमि लागि से़क्सिघे़ॽपॽआ इक्को कैदि याॽमि, 10 का तिरिङ्गा खिमबेॽ टुमाबेॽ खोमि लागि खिरिस्टबेॽ पाबा लिटिङे। 11 ओनेसिमस याक्लो आम्मि लागि योम्बोक मे़ॽनिङ्मा ले़टे़, तर आयु आम्मि लागि मोबा काङ्मि लागिसो योम्बोकनुङ्मा लिटे़। 12 खो के़ॽ नम्नम मिॽपॽआ याॽमि ले़ये, खोनोॽ हे़नबेॽ पाङ्मे़ॽनिङ्सिनुङे। 13 का सुसमाचारमि लागि से़क्सिघे़ॽपॽआ बेलाबेॽ हे़ने़ए़ साटो ओनेसिमसनोॽ काङ्मि हेरचाह ले़ःॽखुबा कानुङ्नोॽ युङ्मागो मिॽटुङे। 14 तर हे़न मे़न्सिम्लेॽ काङ्दाङ्बे़ॽ इडोॽ ले़ःॽमा मे़मिॽटुङ। इन्ढोङ्होङ का भलाइ ले़ःॽमा हे़न कर मे़न्सिॽलो, तर आमटाङ्बे़ॽ ले़टे मिॽइन्ने़। 15 सखे हे़न्जिङ सानिङ सोरि पेम्मामि लागि इक्याक नियाक ओनेसिमस हाघे़ॽपॽआ ले़टे़। 16 हागो खो सेउते ने़ॽनि, तर सेउतेबाङ्सो बेॽलो नम्नम मिॽपॽआ बिस्वासि निसाडोॽमा ले़ये। खो के़ॽ बेॽलो नम्नम ले़ए़टुङे। हिङाबेॽनुङ परभुबेॽसो खो छना इन्डोक बेॽलो हे़ने़ए़ लागि पाप्मिये। 17 मोडोगे़ॽ हे़ने़ॽ का लङ्गाम मिॽइङाहोङ का ले़टिडोक्नोॽ खोसो ले़टे। 18 खोसे़ॽ हे़ने़हा इमाङ इमाङ नासि ले़ःॽपॽआहोङ्सो, अथबा खोसे़ॽ हे़ने़ए़ फोङ्मा टुहोङ्सो माहा चोप हिसाब काङ्मि निङ्बेॽ युङ्बेॽमा। 19 का पावल, काङ्मिनोॽ हुगे़ॽ इगो खा साप्मे़ॽनिङ्सिनुङे, मो सिङि के़ॽनोॽ फोङ्इनुङे। के़ॽ हे़न लुमा पाप्निबा, आमटाङ्बे़ॽसो काङ्मि फोङ्मा टुहा। 20 मोडोगे़ॽ के़ए़ निसा, परभुबेॽ काङ्मि लागिसो इगो ले़ःॽपेॽमा। खिरिस्टबेॽ काङ्मि निवा हाङ्हाङ लिहेरो। 21 हे़न के़ॽ लुबॽआ खा नुरोॽ पालना ले़ःॽखु ले़येन्से़ॽ के़ॽ लुबॽआबाङ्सो बेॽलो हे़ने़ॽ ले़न्डुए मिॽनुङ इगो पत्राबेॽ साप्मे़ॽनिङ्सिनुङे। 22 इगो खानुङ्नोॽ हाइको खासो हे़न लुन्ने़, हे़निङ्मि पारथनाडे़ॽ कासो हे़न टुढाम ठाउँबेॽ लेङ्हेङा लुमे आसा युङ्इटुङे। मोबा काङ्मि लागिसो पेन्ढाम कोठा पोरोक्पेॽमायो। 23 येसु खिरिस्टबेॽ कानुङ सोरि कैदि लिबॽआ इपाफरासडे़ॽ हे़निङ सेवायो लुटे़। 24 मोडोक्नोॽ कानुङ योम्बोक ले़ःॽखुबा मरकुस, अरिस्तारखस, डेमास मोबा लुकाडे़ॽसो सेवायो लुटामे। 25 परभु येसु खिरिस्टमि अनुग्रहा हे़निङ चोपनुङ सानिङ टुरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.