मरकुस 9 - याम्फु1 मोबा येसुडे़ॽ हागोसो लुसुजि, “चइबानोॽ, के़ॽ हे़निङ लुनिम्ने़, इगोबेॽ येःप्खुबाजिबेॽ कोहि कोहि टुम्मे, माहाजिडे़ॽ निवाहाङ्मि राज्य बेॽए सक्तिबेॽ लेम्बॽआ मे़ङ्खाङ्लो सिमिने।” येसुमि नरिङ फेङ्घे़ॽपॽआ ( मत्ति १७:१-१३ ; लुका ९:२८-३६ ) 2 चुक्चि याक ए़क्साङ येसुडे़ॽ पत्रुस, याकुबनुङ युहन्नारेॽ सोरि चिक्मानुङ इक्को आग्लो टोक्टोक्मे़ॽटु खडामि। मोबेॽ असासो माॽआडामि। मोबा चोङ्साजिडे़ॽ खाङ्ये खाङ्येॽनोॽ येसुमि नरिङ फेङ्घडा। 3 खोमि चे़ॽ मिगे़ॽ मे़ङ्खाङ्हेरो उथ्रिॽमा लिसा, आक्ठे़ॽलो उथ्रिॽमा चेॽको इन्डोक वासोक्माबेॽसो लिनिबा। 4 मोडोक्पेॽनोॽ मोसानुङ एलियासो खाङ्मुसाजि, मोबा येसुनुङ यामुसाजि। 5 इगो खाङ्नुङ पत्रुसडे़ॽ येसु लुसु, “कानिङ इगोबेॽ लेम्बॽआ सारो नुबा लिसा। कानिङे़ॽ इगोबेॽ सुम्जि पुङ्सुॽवा टोङ्मा, इक्को हे़ने़ए़ लागि, इक्को मोसामि लागि, मोबा इक्को एलियामि लागि।” 6 खोजि बेॽलो किस्सिबॽआसे़ॽ पत्रुसडे़ॽ इमाङ लुमे़ लुनुङ निवे़ॽ मे़लेसु। 7 मोबेॽ खिम्मिॽवा लेन्नुङ खोजि टे़गुजि। मोबा मो खिम्मिॽवा होङ्सिॽयुरा इडोॽ कासा, “इगो के़ए़ नम्नम ले़ःॽपॽआ पसा ले़ये, खोसे़ॽ लुबॽआ खेप्सानुमे!” 8 इडोॽ काबॽआ खेम्नुङ चोङ्साजिडे़ॽ किॽयु मिॽयु खाङ्माबेॽ येसुबाङ हाइखा असासो माडामि। 9 येसुनुङ खोमि सुमबाङ चोङ्साजि मो टोक्टोक्माबाङ उङ्मे़ॽनिङ्सिमाबेॽ येसुडे़ॽ खोम चोङ्साजि लुसुजि, का याॽमिमि पसा सिबॽआबाङ मे़हिङ्बोक्लो आयु हे़निङे़ॽ खाङ्बॽआ खा असासो ए़ॽलुमे लुसुजि। 10 माहाजिडे़ॽ मो खा खोजिमि निवाबेॽनोॽ युक्सुजि। तर सिबॽआबाङ हिङ्बोक्मे लुबॽआ खा चाहिँ इमाङ्डे लुनुङ खोजिदाङ्बा काबोगामि। 11 मोबा माहा चोङ्साजिडे़ॽ येसु सिप्सुजि, “यहुदि धारमिक नियम इःॽखुबाजिडे़ॽ इन्ढोङ याक्लो एलिया लेम्मा खे़ये लुनुङ लुन्डुजे ?” 12 येसुडे़ॽ माहाजि लुसुजि, “चइबानोॽ एलिया याक्लो लेङ्इये, मोबा चोप खा टोङ्इन्डुहा। तर याॽमिमि पसाडे़ॽ बेॽलो खेः आङ्नुङ चोपजिबाङ हेला लिये लुमे लुनुङ धारमिक नेॽचिराबेॽ इन्ढोङ साप्पॽआ ? 13 खाक्सानुमे, हे़निङ लुनिम्ने़, एलियागो लेम्बेटे़। खोमि टुम्बेॽ धारमिक नेॽचिराबेॽ इमाङ साप्पॽआ ले़टा मोडोक्नोॽ याॽमिजिडे़ॽ खो इमाङ ले़ःॽमा मिॽटुजि मोडोक्नोॽ ले़टुजि।” चाबे़ॽ राःप्पॽआ याॽमि नुबोक्पॽआ ( मत्ति १७:१४-२१ ; लुका ९:३७-४३ ) 14 खोजि हाइखा चोङ्साजि टुढामबेॽ लेम्माबेॽको बेॽलो याॽमिजि सुम्बॽआ ले़टामि, खोजिनुङ यहुदि धारमिक नियम इःॽखुबाजि छलफल ले़ःॽमे़ॽनिङ्सिबॽआ खाङ्डोक्टु। 15 येसु मोबेॽ रुक्मासोरोॽ माहा चोप याॽमिजिडे़ॽ खो खाङ्डोक्नुङ खरि मिनामि, मोबा येसुबेॽ पिङ्खे़ॽनुङ सेवा ले़टुजि। 16 मोबा येसुडे़ॽ खोमि चोङ्साजि सिप्सुजि, “इमाङ खामि टुम्बेॽ हे़निङ इघाजिनुङ खा इःमे़ॽनिङ्सिन्डानिङे ?” 17 माहा याॽमिजिबाङ इक्कोसे़ॽ येसु लुसु, “गुरु, के़ए़ पसा कुबा टोङ्घुबा चापडे़ॽ राःप्मिटुए, मो हे़ने़ए़म्बेॽ चिक्चे़टुङे। 18 के़ए़ पसा मो मङे़ॽमा चाबे़ॽ राःप्माबेॽ मोसे़ॽ खो भुइबेॽ चेप्नुङ याबुकबाङ चेःॽमा ठे़ए़न्डुए, मोबा के़ङ इःक्मानुङ टेन्डिॽ खे़ये। इगो खा हे़ने़हा चोङ्साजिसो लुसुङ्जिङ, तर खोजिडे़ॽ मे़नुबोक्हेसुजि।” 19 मोबा येसुडे़ॽ माहाजि वोबुजि, “होउ बिस्वास मे़ॽनिङ्हा याॽमिजि, का इन्डोक्लो हे़निङ्नुङ पेङ्इङे ? खोइ आक्को पिच्छा काबेॽ लाप्टानुमे।” 20 माहाजिडे़ॽ मो पिच्छा येसुमि पोम्बेॽ चिक्चे़डुजि। येसु खाङ्मासोरोॽ मङे़ॽमा चाबे़ॽ मो पिच्छा भुइबेॽ चेप्नुङ याबुकबाङ चेःॽमा ठे़ःॽसाङ किॽयु मिॽयु काङ्डुबोगा। 21 येसुडे़ॽ मो पिच्छामि पाबा सिप्सु, “इगो पिच्छा इनाम्बाङ्डे इडोॽ लिबॽआ ?” खोम्बाडे़ॽ लुसु, “ओङे़कबाङ्नोॽ इडोॽ ले़ये।” 22 “मङे़ॽमा चाबे़ॽ घरि घरि मिनुङ योङाबेॽ राःप्एङ्इटुए। हे़ने़ॽ नुबोक्हेन्डुहोङ कानिङ सोक्पेॽ नम्नावा ले़ःॽनुङ इगो मङे़ॽमा चाप यिक्पेबेॽमाना।” 23 येसुडे़ॽ मो याॽमि लुसु, “इन्ढोङ हेन्डुएहोङ लुन्डुए ? बिस्वास ले़ःॽखुबामि लागि चोपनोॽ योम्बोक लिहेहा।” 24 इडोक्मा खा खेम्मासोरोॽ मो पिच्छामि पाबाडे़ॽ लुसु, “के़ॽ बिस्वास ले़नुङे, काङ्मि बिस्वासबेॽ बोल पिमायो।” 25 मोबा येसुडे़ॽ बेॽलो याॽमिजि खोबेॽ पिङ्आप्पॽआ खाङ्डोक्नुङ खोसे़ॽ मङे़ॽमा चाप योप्साङ लुसु, “हे़न कुबानुङ बहिरो टोङ्घुबा मङे़ॽमा चाप, इगो पिच्छाबाङ खे़ॽपेसे, मोबा हागोएम्बाङ ए़क्साङ इन्डोक्पेॽसो आक्कोबेॽ ए़ॽटेआप्ने।” 26 मोबा मो मङे़ॽमा चाप विज्रिॽवा वोसाङ मो पिच्छा चेप्आनुङ खे़प्पेसा। मो पिच्छा चाहिँ टेन्डिॽखे़ॽनुङ सिघे़ॽपॽआडोक्नोॽ लिसा। मोडोगे़ॽ कोहिजिडे़ॽको सिघडा होला मिॽटुजि। 27 तर येसुडे़ॽ मो पिच्छामि हुक राःप्नुङ येपोक्माराप्टु मोबा खो येःपोगा। 28 मोबा येसु खिमहोङ्सिॽयु पे़खडा, मोबेॽ खोमि चोङ्साजिडे़ॽ खो सिप्सुजि, “कानिङे़ॽ चाहिँ इन्ढोङ मो मङे़ॽमा चाप मे़यिक्हेबॽआ ?” 29 येसुडे़ॽ माहाजि लुसुजि, “इडोक्मा मङे़ॽमा चाप पारथना मे़ॽनिङ यिक्हेमिने।” येसुडे़ॽ फेरि टाङ्बा सिमे खामि टुम्बेॽ इःबॽआ ( मत्ति १७:२२-२३ ; लुका ९:४३-४५ ) 30 मो ठाउँबाङ येसु चोङ्साजिनुङ गालिलमि राम लिसाङ हाइके ठाउँ खडामि। इगो खा असे़ॽसो मे़लेसुजिरो लुनुङ येसुडे़ॽ मिॽटुए। 31 इन्ढोङ्होङ येसुडे़ॽ खोमि चोङ्साजिरेॽनोॽ इःॽमा मिॽटुजे। खोसे़ॽ माहाजि लुसुजि, “याॽमिमि पसा हागो राःप्नुङ याॽमिजिमि हुकपेॽ पिन्डुजे, मोबा माहाजिडे़ॽ खो सेॽनेन्डुजे, तर खो सुम याकपेॽ फेरि हिङ्बोॽइये।” 32 तर येसुडे़ॽ असामि टुम्बेॽ इःबॽआ होला, मो खा चोङ्साजिडे़ॽ मे़लेसुजि, मोबा फेरि येसुनुङ सिम्सो मे़सिम्हेसुजि। असा चाहिँ बेॽएम्मा ? ( मत्ति १८:१-५ ; १०:४२ ; लुका ९:४६-५० ) 33 खोजि कफरनहुम सहरबेॽ लेन्नुङ, खिमहोङ्सिॽयु टुमाबेॽ, येसुडे़ॽ खोमि चोङ्साजि सिप्सुजि, “असिॽ रामबेॽ आप्मे़ॽनिङ्सिमाबेॽ हे़निङे़ॽ इमाङ खाडे इःमे़ॽनिङ्सिडानुमे ?” 34 तर चोङ्साजिडे़ॽ इमाङ्सो मे़लेसुजि, इन्ढोङ्होङ मोडोक्पेॽ “खोजिबेॽ असा चाहिँ बेॽएम्मा” लुनुङ काबॽआ ले़टे़। 35 मोबा येसु पेन्नुङ खोमि बारो जना चोङ्साजि के़ःॽनुङ लुसुजि, “असा चोप्पाङ बेॽएम्मा लिमा योॽइये, मोसे़ॽ चोप्पाङ ए़डेम्मा लिनुङ चोपमि सेवा ले़ःॽमा खे़ये।” 36 मोबा ए़क्साङ येसुडे़ॽ इक्को एडे़ॽमा पिच्छा माहा चोङ्साजिमि पोम्बेॽ खिसाङ चोङ्साजि लुसुजि, 37 “असे़ॽ काङ्मि निङ्बेॽ इडोक्हा ओङे़कजि स्वागत ले़न्डुए मोसे़ॽ कानोॽ स्वागत ले़ये, का स्वागत ले़ःॽखुबे़ॽ का पाङ्खुबा पाबानोॽ स्वागत ले़न्डुए।” 38 युहन्नाडे़ॽ येसु लुसु, “गुरु, इक्को याॽमिडे़ॽ हे़ने़ए़ निङ्बेॽ मङे़ॽमा चापजि यिक्मे़ॽनिङ्सिबॽआ कानिङे़ॽ खाङ्डोक्टुङ्मा। मोबा कानिङे़ॽ खो मोडोॽ एले़टे लुसुङ्मा, इन्ढोङ्होङ खो कानिङ्मि याॽमि मे़ले़टा।” 39 येसुडे़ॽ माहाजि लुसुजि, “खो ए़ॽसेगानुमे, इन्ढोङ्होङ के़ए़ निङ्बेॽ सक्तिहा योम्बोक ले़ःॽखुबाजिडे़ॽ चान्डोनोॽ का बिरोध ले़ःॽमिनिबा। 40 कानिङ्मि बिरोध मे़ले़ःॽखुबाजि कानिङ्मि लङ्गामजिनोॽ मिॽमा खे़म्मे। 41 चइबानोॽ के़ॽ हे़निङ लुनिम्ने़, असे़ॽ के़ए़ निङ्बेॽ नम्नम ले़ःॽनुङ हे़निङ इक्खोरिया योङा पिम्मे, मोसे़ॽ इनाम चुप्मिन्डुए।” पाप योम्बोकबाङ इन्डोक्टे जोगालिमे ? ( मत्ति १८:६-९ ; लुका १७:१-२ ) 42 “तर असे़ॽ काबेॽ बिस्वास ले़ःॽखुबा इक्को ए़डे़म्मा पिच्छा पाप ले़ःॽमेन्डुए, मोमि लागिगो बोरु इक्को बेॽएम्मा लघे बेॽलाबेॽ हिःक्नुङ माहोङ्माबेॽ राप्एम्मा नुये। 43 हे़ने़ए़ इक्को हुगे़ॽ पाप ले़ःॽमेॽहोङ, मो हुक चेन्नुङ राप्पेसे, निच्चि हुकनुङ खेःलोकबेॽ खे़ॽमाबाङ्गो, इक्को हुक मे़ॽनिङ थाङ्सिरि खे़ॽमानोॽ चुये। 44 मो खेःलोकबेॽको इक्को फिबासो सिघे़ॽनिबा, मोबेॽ मिसो सिनिबा। 45 हे़ने़ए़ इक्को सराङेॽ पाप ले़ःॽमेॽहोङ मो सराङ चेन्नुङ राप्पेसे, इन्ढोङ्होङ इक्को सराङ मे़ॽनिङ्नोॽ थाङ्सिरिबेॽ खे़ॽमा चुये। 46 मो खेःलोकबेॽको इक्को फिबासो सिघे़ॽनिबा मोबेॽए मिसो इन्डोक्पेॽसो सिघे़ॽनिबा। 47 मोबा आक्टोॽनोॽ हे़ने़ए़ मिगे़ॽ हे़न पाप ले़ःॽमेयेहोङ मो मिक रिक्नुङ राप्पेसे इक्कोरेॽनोॽ मिकनुङ हे़न निवाहाङ्मि राज्यबेॽ खे़ॽमा चुये। 48 मो खेःलोकबेॽको इन्डोक्पेॽसो मि सिघे़ॽने मोबेॽहा फिबाजिसो सिघे़ॽमिने। 49 “युमडे़ॽ चोप बलिदान सुद्ध टोङ्डिडोॽ, चोप याॽमिजि खेःमि मिडे़ॽ सुद्ध टोङ्इये। 50 युम नुबा खा ले़ये, तर युममि युम लुयेनोॽ मे़खे़ॽहोङ फेरि इन्डोक्टे मो युम लुये टोङ्मे ? मोडोक्नोॽ हे़निङ टाङ्बानुङ टुहा युमडोॽमा नुबा खा जोगा ले़ःॽयुक्सानुमे, चोप याॽमिजिनुङ नुरोॽ टोङ्जासानिङे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.