मरकुस 7 - याम्फुरितिथितिमि टुम्बेॽ सिक्छे ( मत्ति १५:१-९ ) 1 यरुसलेम सहरबाङ लेम्बॽआ फरिसिनुङ यहुदि धारमिक खा लेघुबाजि येसुमि किॽयु मिॽयु सुप्सामि। 2 मोबा येसुमि कोहि चोङ्साजिडे़ॽ हुक मे़वासोक्लेॽ चामे़ॽनिङ्सिबॽआ माहाजिडे़ॽ खाङ्डोक्टुजि। 3 इन्ढोङ्होङ फरिसिनुङ चोप यहुदिजि खोजिमि टुबालाबाजिमि चलनडोॽ हुक मे़वासोक्लेॽ मे़न्चासामे। 4 खोजि हाटाबाङ लेन्नुङ नुहाबा मे़लिरेॽ चामिने। इडोॽरेॽनोॽ ने़ॽनि, खोजिडे़ॽ इडोक्हा बेॽलो चलन ले़न्डुजे, चामा याक्लो चाढाम खोङ्खोरिया चोखो टोङ्नुङ्रेॽ चाम्मे, 5 मोबा फरिसिनुङ यहुदि धारमिक नियम इःॽखुबाजिडे़ॽ येसु सिप्सुजि, “हे़ने़हा चोङ्साजि टुबा पाबाजिडे़ॽ ले़ःॽपॽआ चलनडे़ॽ लुबॽआडोॽ असुद्ध हुगे़ॽ चाम्मे ?” 6 मोबा येसुडे़ॽ माहाजि लुसुजि, “अगमबक्ता यसैयाडे़ॽ हे़निङ कप्टिजिमि टुम्बेॽ ठिक्कै साप्मिटुए ‘इघा याॽमिजिडे़ॽ याबुगे़ॽरेॽ का आदर ले़म्मे, तर खोजिमि निवा चाहिँ काबाङ ओः टुहा। 7 इघाजिडे़ॽ मे़ॽनोक काङ्मि ओहाङ ले़न्डुजे इन्ढोङ्होङ इघाजिडे़ॽ इःॽमाबेॽ याॽमिजिडे़ॽ टोङ्बॽआ नियमरेॽनोॽ इःन्डुजे।’ 8 हे़निङ निवाहाङ्डे़ॽ पिबॽआ आग्या चाहिँ ले़टानुम्नि, याॽमिजिडे़ॽ इःॽपॽआ नियम चाहिँ पालना ले़न्डानुमे।” 9 येसुडे़ॽ फेरिसो लुसुजि, “हे़निङ इन्डोक चेन्दुबा ले़न्डानिङे टाङ्बामि रितिथिति ले़ःॽमामि लागि निवाहाङ्डे़ॽ पिबॽआ आग्या मेॽयोङ सेङ्इन्डानुमे। 10 मोसाडे़ॽ इडोॽ लुटे़, ‘टाङ्बामि पाबा मामामि आदर ले़ःॽमे।’ मोबा ‘असे़ॽ पाबा मामामि टुम्बेॽ मङे़हा खा इःन्डुहा, मो याॽमि चइबानोॽ सेॽनेमा खे़ये।’ 11 तर हे़निङ फरिसिजिडे़ॽ चाहिँ इडोक्हा खा इःन्डानुमे, कोहि याॽमिडे़ॽ टाङ्बामि पाबा मामाजि इडोॽ लुन्डुजे, ‘के़ॽ हे़निङ इमा इमा ले़ःॽमा खडे़ माहा चोप खा निवाहाङ ले़ःॽपेटुङे’ बलिदान ले़ःॽपेटुङे, पिमा खा पिबेटुङे लुमे खा, 12 इडोॽ हे़निङे़ॽ याॽमिजि टाङ्बामि पाबा मामामि लागि इमाङ्सो ले़ःॽमेॽटानुम्ने। 13 इडोॽ ताङ्बामि याक्लोहा रितिथिति चलन याॽमिजि ले़ःॽमेॽनुङ निवाहाङ्डे़ॽ पिबॽआ आग्या चाहिँ लेॽपेन्डानुम। मोबा हाइखा योम्बोक मे़ॽनिङ्हा चलन चाहिँ ले़न्डानुमे।” येसुडे़ॽ असुद्ध खामि टुम्बेॽ इःॽपॽआ ( मत्ति १५:१०-२० ) 14 येसुडे़ॽ फेरि चोप याॽमिजि के़ःॽनुङ लुसुजि, “लो चोबे़ॽ के़हा खा नुरोॽ निवा टिनुङ खेप्सानुमे, लेयागानुमे। 15 पाखे़ॽयुबाङ हिङाहोङ्सिॽयु पे़खे़ॽनुङ याॽमि निवाहाङ्मि पोम्बेॽ असुद्ध टोङ्हेसुनिबा। तर याॽमिबाङ पाखे़ॽयु आप्मिहा खाडे़ॽ चाहिँ याॽमि असुद्ध टोङ्इये। 16 असामि खेम्ढाम ने़ए़क टुहा मोसे़ॽ इगो खा निवा टिनुङ खेप्सुरो।” 17 मोबा येसु माहा याॽमिजि याःॽयानुङ खिमहोङ्सिॽयु पे़खे़ॽनुङ ए़क्साङ, खोमि चोङ्साजिडे़ॽ मो खानवाडे़ॽ लुमायोक्पॽआ खा इमाङ्डे लुनुङ सिप्सुजि। 18 येसुडे़ॽ चोङ्साजि लुसुजि, “इमा हे़निङे़ॽसो के़ॽ लुबॽआ खा मे़लेसानुमे ? चाबॽआ खाडे़ॽ याॽमि असुद्ध टोङ्निबा लुनुङ हे़निङे़ॽसो लेसानुम्ने ? 19 इन्ढोङ्होङ माहा खागो याॽमिमि निवाहोङ्सिॽयु खे़ॽनिहा, तर रुङ्माबेॽ खे़ए़हा मोबाङ्सो ए़क्साङ पाखे़ॽयु खे़ॽपेहा।” (इडोॽ येसुडे़ॽ चोप चामे खा चोखो ले़ये लुनुङ नुरोॽ इःबेॽटुजि।) 20 येसुडे़ॽ हागोसो लुसुजि, “याॽमि होङ्सिॽयुराम पाखे़ॽयु आप्मिहा खाडे़ॽ चाहिँ याॽमि असुद्ध टोङ्इये। 21 इन्ढोङ्होङ चोप खालहा मङे़हा खा निवा होङ्सिॽयुरामनोॽ लेङ्इहा मोबा मोसे़ॽ याॽमि मङे़हा योम्बोक ले़ःॽमेये, मङे़हा योम्बोक लुबॽआ फुङ्सया याक्लोए बेभिचार, याॽमि सेॽमे, 22 खिक्तुबाङ, दुस्ट, रेम्डेॽमा, टाङ्बा खुसि ले़ःॽमे, फुङ्सया ए़क्साङ बेभिचार, चेजेवा, सिःक्चामे, काङायोङ्बा लिमा, उम्बरिङ, 23 इघा चोप खा याॽमिमि निवाहोङ्सिॽयुराम लेङ्इहा इघासे़ॽनोॽ याॽमि असुद्ध टोङ्इये।” अयहुदि जातिमा मेॽनामिॽमि बिस्वास ( मत्ति १५:२१-२८ ) 24 मोबा येसु टुरोसनुङ सिदोन सहरमि चेन्जरुमलाम खे़ॽनुङ इक्को खिमहोङ्सिॽयु पे़खडा। इन्ढोङ्होङ खो मोबेॽ लेङ्इटे़ लुमे खा असे़ॽसो मे़लेसुजिरो लुनुङ खोसे़ॽ मिॽटुए। तर खो बेॽलो मे़ङ्कुम्हेसा। 25 मोडोक्पेॽनोॽ इक्को मेॽनामिॽडे़ॽ येसुमि टुम्बेॽ खेम्नुङ खोबेॽ लेस्सा। मोबा सराङ्बेॽ पोप्युसा। मो मेॽनामिॽमि पसा मङे़ॽमा चाबे़ॽ राःप्पॽआ ले़टा। 26 मो मेॽनामिॽ सिरियामि फोनिके ठाउँबेॽए अहुयदि जातिमा ले़टे़, खो गिरिक खाप्लाबेॽ यामुसे़। मोबा खोसे़ॽ “के़ए़ पसाबाङ मङे़ॽमा चाप यिक्पेबेॽमा लुनुङ” येसु बिन्ति ले़टु। 27 येसुडे़ॽ मो मेॽनामिॽ लुसु, “याक्लो टाङ्बामि पसाजि चामा हिङ्मा खे़म्मे, इन्ढोङ्होङ पसाजिमि चामा लानुङ हुःॽवाजि पिमा फे़न्निबा!” 28 मोबा मो मेॽनामिॽडे़ॽ इडोॽ लुसु, “इँहिॽ गुरु, खागो आक्टोॽनोॽ ले़ये! तर हुःॽवाडे़ॽसो पिच्छाजिडे़ॽ सुःक्पॽआ चामागो कुःप्चोहेन्डुजे गो!” 29 मो मेॽनामिॽमि इडोक्मा खा खेम्नुङ येसुडे़ॽ खो लुसु, “हे़ने़ॽ लुबॽआसे़ॽ ढुक्का लिनुङ खिम खडे, हे़ने़ए़ सम्समा पसाबाङ मङे़ॽमा चाप खे़ॽपेटे़।” 30 मोबा खो खिमबेॽ रुक्माबेॽको खोमि पसा नुबोक्नुङ रुङ्घाक्पेॽ नुरोॽ इम्डिङ्बॽआ चुप्टु। चइबानोॽ खोमपसा मङे़ॽमा चाबे़ॽ लेप्पेबॽआ ले़टा। येसुडे़ॽ कुबा नुबोक्पॽआ 31 येसु टुरोस सहरबाङ राम्बोक्नुङ सिदोन सहर लिसाङ डेकापोलिसमि चेन्जरुममि रुम्बाङ गालिल महोङ्माबेॽ खडा। 32 मोबेॽहा याॽमिजिडे़ॽ ने़ए़क मे़खेम्खुबा, मे़यामुखुबा इक्को कुबा येसुबेॽ चिक्चे़डुजि। मोबा “मोसोक्पेॽ हुक युङ्बेॽमाना” लुनुङ येसु बिन्ति ले़टुजि। 33 मोबा येसुडे़ॽ खो मो ठाउँबाङ मेॽयोङ चिक्खे़ॽनुङ मोमि ने़ए़कपेॽ येसुमि हुक्खे़ॽवासि टिसु। मोबा हुक्खे़ॽवासिबेॽ चेःॽमा टिनुङ मोमि रेम के़गु। 34 मोबा ए़क्साङ थाङ्सिरिॽटु खाङ्नुङ सोःक्मा सासाङ इडोॽ लुसु, “इफ्फाता” इगो लुबॽआ चाहिँ “हेम्बोगे” लुबॽआ। 35 मोडोक्पेॽनोॽ मोमि ने़ए़क खेम्बोगा, यामुहेसानुङ खो नुरोॽ यामुबुगा। 36 येसुडे़ॽ मोबेॽ टुघुबा चोप लुसुजि “इगो खा असासो ए़ॽलुमे” लुनुङ माहाजि आग्या पिसुजि। तर खोसे़ॽ याॽमिजि इन्डोक बेॽलो ए़ॽलुसानुमो लुबॽआ ले़टे़, मोडोक्नोॽ बेॽलो खोजिडे़ॽ माहा खा लुसाङ राप्सामे। 37 इगो खा खेम्खुबा चोबे़ॽ खरि मिन्नुङ लुसुजि, “खोसे़ॽ चोप योम्बोक नुरोॽ ले़न्डुए। खोसे़ॽ ने़ए़क मे़खेम्खुबाजि खेम्खुबा टोङ्हेन्डुजेनुङ कुबाजि यामुहेखुबा टोङ्हेन्डुजे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.