मरकुस 6 - याम्फुनासरतबेॽहा याॽमिजिडे़ॽ येसु बिस्वास मे़ले़ःॽपॽआ ( मत्ति १३:५३-५८ ; लुका ४:१६-३० ) 1 मोबा येसु मो ठाउँ याःॽयानुङ याक्लो टाङ्बा पेम्बॽआ सहर नासरतबेॽ खडा। खोमि चोङ्साजिसो सोरि खडामि। 2 नाजामे यिडे़ॽ येसुडे़ॽ यहुदिजि सुम्ढाम खिमबेॽ खे़ॽनुङ सिक्छे इःडुजि। खोसे़ॽ इःॽपॽआ सिक्छे खेम्खुबा चोप याॽमिजि खरि मिन्साङ खोजि टाङ्बा इडोॽ काबोगामि, “इगो याॽमिडे़ॽ इघा चोप खा हाम्बाङ लेसुहा ? इगो इडोक्मा निवा असे़ॽ पिसुए ? इगोसे़ॽ इडोक्हा सक्तिनुङ्हा योम्बोक इन्डोॽ ले़ःॽहेन्डुहा ? 3 इगोगो मरियम लुमे मेॽनामिॽमि पसा सिकरमि योम्बोक ले़ःॽखुबा ने़ॽनेन्डे ? इमा इगो याकुब, योसेफ, यहुदानुङ सिमोनमि वावा ने़ॽनेन्डे ? इगोमि सम्समा निसाजिसो इगोबेॽ कानिङ्नुङ्नोॽ टुम्मे!” इडोॽ लुसाङ येसुडे़ॽ ले़ःॽपॽआ योम्बोक खाङ्नुङ सुरकडामि। 4 मोबा येसुडे़ॽ माहाजि लुसुजि, “अगमबक्ताजि हाइखा ठाउँबेॽहा याॽमिजिडे़ॽ आदर ले़न्डुजे तर खोमि खिमबेॽहाजि, टाङ्बाङ्जिनुङ खिम्डेमबेॽहा याॽमिजिडे़ॽ चाहिँ खो आदर ले़टुजिने।” 5 मोबेॽ येसुडे़ॽ कोहि कोहि टुक्खुबाजिसोक्पेॽ हुक युङ्नुङ नुबोगुजि। मोबाङ हाइखा इमाङ्सो खरिहा योम्बोक मे़ले़ःॽहेसु। 6 मोबा खोमि खिम्डेमबेॽहा याॽमिजिडे़ॽ बिस्वास मे़ले़ःॽपॽआ खाङ्नुङ येसु खरि मिना। मोबा खो खिम्डेमराजि सिक्छे इःॽसाङ खडा। येसुडे़ॽ चोङ्साजि परचार ले़ःॽसिॽ पाङ्बॽआ ( मत्ति १०:५-१५ ; लुका ९:१-६ ) 7 खोसे़ॽ खोमि बारो जना चोङ्साजि के़ःॽनुङ मङे़हा चापसोक्पेॽ अधिकार ले़ःॽमे बोल पिसुजि। मोबा माहाजि निप्पाङ निप्पाङ पाक्सुजि। 8 येसुडे़ॽ माहाजि लुसुजि “हे़निङे़ॽ रामबेॽ पाप्मिहा इमाङ्सो ए़ॽखिमे़, इक्को टोङ्इरारेॽ याङ्मे़, चामा, चब्रा, याङ इमाङ्सो ए़क्खिमे़। 9 सराङ्बेॽ राङ्सुप चाक्सानुमे, मोबा चाङ्बॽआ चेॽबाङ हाइखा ए़क्खिसानुमे।” 10 येसुडे़ॽ माहाजि हागोसो लुसुजि, “हे़निङ खे़ॽनुङ याक्लो हाम्बे खिमबेॽ पे़खे़न्डानिङे मो ठाउँबाङ टेमा याकठोक मो खिमबेॽनोॽ पेनानिङे। 11 इडोॽ हे़निङ खे़ॽमाबेॽ मो ठाउँबेॽहा याॽमिजिडे़ॽ हे़निङ स्वागत मे़ले़ःॽमिहोङ मोबा हे़निङ्मि खा मे़खेप्सुजिहोङ माहाजिमि खिम्डेमबाङ खे़ॽमाबेॽ हे़निङ्मि सराङ फे़क्माबेॽ किःक्पॽआ आक्खामाडे़ॽ खोजिमि बिरोधबेॽ गबाहि पिमामि मोबेॽनोॽ फाप्युङ्आमे़।” 12 मोबा ए़क्साङ चोङ्साजि खे़ॽनुङ याॽमिजि “पापबाङ निवाहाङ्लाम टेसानिङे” लुसाङ परचार ले़टुजि। 13 माहाजिडे़ॽ मङे़हा चापडे़ॽ राःप्पॽआ याॽमिबाङ मङे़हा चापजि यिगुजि मोबा टुक्खुबाजि केवा सिःॽनुङ नुबोगुजि। बप्तिस्मा पिघुबा युहन्ना सेॽनेबॽआ ( मत्ति १४:१-१२ ; लुका ९:७-९ ) 14 हाङ्बा हेरोदडे़ॽसो येसुडे़ॽ ले़ःॽपॽआ योम्बोकमि टुम्बेॽ मुक्पॽआ खा खेम्डोक्टु। इघा खा चोपराजि मुक्खडा इन्डोक जनाडे़ॽ इडोॽ लुसुजि, “बप्तिस्मा पिघुबा युहन्ना सिबॽआबाङ हिङ्बोॽइटा, मोडोगे़ॽनोॽ खोबाङ इडोक्हा सक्तिनुङ्हा योम्बोक लिमे़ॽनिङ्सिये।” 15 तर इन्डोक जनाडे़ॽ चाहिँ लुसुजि, “इगो एलिया ले़ए़” फेरि हाइखाजिडे़ॽ लुसुजि, “इगोगो उहिलेहा अगमबक्ताडोॽमा इक्को ले़ए़।” 16 तर हेरोदडे़ॽ इगो खा खेम्नुङ लुसु, “इगोगो युहन्नारेॽ ले़ए, इगोमि निन्डवाँ के़ॽनोॽ चेम्मेॽपॽआ ले़टे़, मोनोॽ हिङ्बोॽइटा।” 17-18 इन्ढोङ्होङ हेरोदडे़ॽ खोम निसामि बनिमा हेरोदियास लुमे मेॽनामिॽ खोसे़ॽ फुङ्सया ले़ःॽपॽआ ले़टे़। तर युहन्नाडे़ॽ हेरोद इडोॽ लुबॽआ ले़टे़, “आम्निसा फिलिपमि बनिमा हे़ने़ॽ फुङ्सया ले़ःॽमा फे़न्निबा।” मोडोगे़ॽ हेरोदियास सुरकडा खो साप्थाङ्मेॽमामि लागि हेरोदडे़ॽ युहन्ना राःप्नुङ तिरिङ्गा खिमबेॽ से़क्पॽआ ले़टे़। 19 युहन्नाडे़ॽ मोडोॽ लुबॽआसे़ॽ खोनुङ हेरोदियास सुरके़ॽपॽआ ले़टे़। खोसे़ॽ युहन्ना सेॽनेमा मिॽटुए, तर मे़सेॽटोक्पॽआ ले़टे़। 20 इन्ढोङ्होङ हेरोदडे़ॽ युहन्ना धरमिनुङ पबित्रा याॽमि ले़ये लुनुङ लेसुए, मोडोगे़ॽ हेरोदडे़ॽ युहन्ना नुरोॽ युङ्बॽआ ले़टे़। हाङ्बा हेरोदडे़ॽ युहन्नामि खा खेम्माबेॽ खो बेॽलो किस्सिडे़ मोडोक्रोसो खोमि खा नुरोॽ निवा टिनुङ खेप्सुए। 21 तर इक्याक इडोक्मा बेला लेस्सा। हाङ्बा हेरोदडे़ॽ खो टोक्पॽआ याकमि बेॽए भत्तेर टिसु। मोबेॽ बेॽहा बेॽहा सासकजि, तिरिङ्गाजिमि एप्पाजि मोबा गालिलमि बेॽहा बेॽहा याॽमिजि के़ःॽपॽआ ले़टामे। हेरोदियासडे़ॽ खोमि खा हेरोदनुङ लुडोक्टु। 22 हेरोदियासमि सम्समा पसामि हेरोदनुङ खोमि चाबाङ्जिमि पोम्बेॽ नुरोॽ सिम्आसा। मोसे़ॽ सिम्आबॽआ हेरोदनुङ चाबाङ्जिडे़ॽ सारो नेन्जानुङ लुसु, मोबा हाङ्बा हिरोदडे़ॽ लुसु, “आयु हे़ने़ॽ कानुङ इमाङ थोक ङागुहोङ्सो के़ॽ हे़न पिन्ने़ ङागे लुसु।” 23 फेरिसो हाङ्बा हेरोदडे़ॽ हेन्ज्रुङ हे़न्साङ इडोॽ लुसु, “हे़ने़ॽ कानुङ काङ्मि राज्यमि हे़क ङाःगुहोङ्सो पिन्ने़।” 24 मोबा मो पिच्छाडे़ॽ खोम्माबेॽ आप्नुङ सिप्सु, “मामा, आयु के़ॽ इमाङ ङाःक्मे ?” खोम्मे़ॽ लुसु, “बप्तिस्मा पिघुबा युहन्नामि निन्डवाँ ङाःगे!” 25 मोबा सोरोॽनोॽ मो पिच्छा हत्तरो होङ्सिॽयु हाङ्बा हेरोदबेॽ खे़ॽनुङ लुसु, “का हागोनोॽ बप्तिस्मा पिघुबा युहन्नामि निन्डवाँ थालाबेॽ युङ्नुङ पिमा।” 26 इगो खा खेम्नुङ हाङ्बा हेरोद बेॽए सोकबेॽ सिट्टा। मोढे़ॽलो चाबाङ्जिमि पोम्बेॽ हे़न पिन्ने़ लुनुङ बाचा ले़ःॽपॽआसे़ॽ आक्कोगो पिनानि मे़लुहेसु। 27 मोडोगे़ॽ हाङ्बे़ॽ खोमि तिरिङ्गा लुसु, “खे़ॽनुङ युहन्नामि निन्डवाँ चेङ्आप्टे।” मोबा मो तिरिङ्गा खे़ॽनुङ युहन्नामि निन्डवाँ चेङ्आप्टु। 28 मोबा थालाबेॽ युहन्नामि निन्डवाँ लाजे़ॽनुङ मो पिच्छा पिसु। मो पिच्छाडे़ॽ चाहिँ लाघे़ॽनुङ खोम्मा पिसु। 29 इगो खा खेम्नुङ युहन्नामि चोङ्साजि तिरिङ्गा खिमबेॽ खे़ॽनुङ खोमि सिगुयाक लाघे़ॽनुङ येःॽमाबेॽ युक्सुजि। येसुडे़ॽ ङाउम हजार याॽमिजि हिङ्बॽआ ( मत्ति १४:१३-२१ ; लुका ९:१०-१७ ; युहन्ना ६:१-१४ ) 30 मोबा बारो जना चोङ्साजि येसुबेॽ टेजानुङ खोजिडे़ॽ ले़ःॽपॽआ चोप योम्बोकमि टुम्बेॽ खेम्मेॽटुजि। 31 मोबा येसुडे़ॽ माहा चोङ्साजि लुसुजि, “कानिङ सङ्गासुमा ठाउँबेॽ खे़ॽनुङ इॽछोॽ नाजामा” इन्ढोङ्होङ मोबेॽ बेॽलो याॽमिजि लेस्सामेनुङ खडामेसे़ॽ येसुनुङ चोङ्साजिडे़ॽ चामासो मे़न्चायाक्हेसामि। 32 मोडोगे़ॽ खोजि नाउबेॽ साङ्नुङ खुस्रिङ्मु सङ्गासुमा ठाउँबेॽ खडामि। 33 येसुनुङ खोमि चोङ्साजि खे़ॽमे़ॽनिङ्सिबॽआ खा हाइखा याॽमिजिडे़ॽ खाङ्डोक्नुङ खोजि खे़ॽपॽआ ठाउँ चोबे़ॽ लेडोक्टुजि। मोबा चोप सहरबाङ बेॽलो याॽमिजि पिन्साङ खे़ॽनुङ खोजिबाङ्सो याक्लो मो ठाउँबेॽ रुक्टुजि। 34 येसु मो ठाउँबेॽ रुक्नुङ नाउबाङ ओरला लिमाबेॽ बेॽलो याॽमिजि गोठ्ला मे़ॽनिङ्हा सामुजिडोॽ मोबेॽ सुम्बॽआ खाङ्डोक्नुङ खोमि निवा नम्नावे़ॽ टिबु, मोबा येसुडे़ॽ माहाजि बेॽलो खामि टुम्बेॽ इःडुजि। 35 नम किक्खे़ॽसिॽपोरोक्पॽआ खाङ्नुङ चोङ्साजिडे़ॽ येसु लुसुजि, “इगो ठाउँसो सङ्गासुमा ले़ये। हागोगो नमसो किक्खे़ॽसिॽपोरोइटे़। 36 इघा याॽमिजि बिदा पिसाजे। खोजि टाङ्बा किॽयु मिॽयु खे़ॽनुङ चामा इमाङ इन्जामिरो।” 37 तर येसुडे़ॽ माहाजि लुसुजि, “हे़निङे़ॽनोॽ खोजि चामा पिसानुमे।” तर चोङ्साजिडे़ॽ येसु लुसुजि, “इमा कानिङे़ॽ निच्चि सय सिसे़ङ्मि याङेॽ चरेपा इन्जे़ॽनुङ इघा याॽमिजि हिङ्माहाजि ?” 38 येसुडे़ॽ माहाजि सिप्सुजि, “हे़निङ्नुङ इन्डोक गोटा चरेपा टुहा ? खाङ्खाक्सानुमे!” चोङ्साजिडे़ॽ खाङ्नुङ लुसुजि, “ङाउम गोटा चरेपानुङ निच्चि ङा टुउ!” 39 मोबा ए़क्साङ येसुडे़ॽ चोङ्साजि लुसुजि। याॽमिजि खिरिडे़ङ डे़ङ चउरबेॽ पेम्मेॽटानुमे। 40 चोङ्साजिडे़ॽ याॽमिजि सये सये जनानुङ, ङाक्पोङ ङाक्पोङ जना खिरिडे़ङ डे़ङ पेम्मेॽटुजि। 41 मोबा येसुडे़ॽ माहा ङाउम चरेपानुङ निच्चि ङा याङ्मानुङ थाङ्सिरिॽटु खाङ्साङ निवाहाङ्नुङ आसिस ङाःगु मोबा चरेपा एॽनुङ चोङ्साजि हामेॽटुजि। मोडोक्नोॽ खोसे़ॽ माहा निच्चि ङासो हामेॽटुजि। 42 मोबा चोबे़ॽ उक्खारो चोसुजि। 43 मोबा एम्बॽआ चरेपानुङ ङामि टुक्रा चोङ्साजिडे़ॽ सुम्माबेॽको बारो ओक्खे़ङ लिसा। 44 मोबेॽ चाघुबाजि वडाङ्पसाजिरेॽनोॽ ङाउम हजार टुसामि। येसु योङासोक्पेॽ राम्बॽआ ( मत्ति १४:२२-३६ ; युहन्ना ६:१५-२१ ) 45 मोबासोरोॽ येसुडे़ॽ खोमि चोङ्साजि नाउबेॽ साङ्नुङ मे़ॽएरेङ बेथसेदा लुमे ठाउँबेॽ खोबाङ याक्लो पाक्सुजि। मोबा खोसे़ॽ चाहिँ सुम्बॽआ याॽमिजि बिदा ले़ःॽसिॽ मोबेॽ पेङ्यगा। 46 माहाजिनुङ हाघे़ॽनुङ ए़क्साङ येसु चाहिँ टोक्टोक्मे़ॽटु पारथना ले़ःॽसिॽ सक्सा। 47 युडारोसो येसु खोमटाङ्बा माहोङ्मामि के़क्पेॽनोॽ टुसे़। मोडोक्पेॽ चोङ्साजि साङ्बॽआ नाउ चाहिँ माहोङ्मामि रुम्बेॽ रुक्खे़ॽपॽआ ले़टे़। 48 येसुडे़ॽ खाङ्माबेॽ चोङ्साजि नाउ ठिमा सारो सिॽपॽआ खाङ्डोक्टु। इन्ढोङ्होङ खोजिमि नाउमि हाइकेलामबाङ हिॽवाबा लेम्मे़ॽनिङ्सिडे़ माक्मिसेल्लाम येसु योङासोक्पेॽ राम्साङ चोङ्साजिलाम आप्मे़ॽनिङ्सिडा, खो चोङ्साजिबाङ्सो पोम्बेॽ यङ्घे़ॽमा योगा। 49 चोङ्साजिडे़ॽ येसु योङासोक्पेॽ राम्मे़ॽनिङ्सिबॽआ खाङ्डोक्नुङ “माङे़ॽमा चाप ले़ए़!” मिॽनुङ किस्सिमावे़ॽ वोसामि। 50 इन्ढोङ्होङ माहाजि मो खाङ्नुङ सारोनोॽ किस्सिबॽआ ले़टामे। मोबा सोरोॽनोॽ येसुडे़ॽ माहाजि लुसुजि, “ए़क्किसिडानिङे, का येसुये, आट ले़टानिङे!” 51 मोबा ए़क्साङ येसु चोङ्साजि साङ्बॽआ नाउबेॽ सक्सा हिॽवाबासो एॽयुसा। इडोक्मा खाङ्नुङ चोङ्साजि छना खरि मिनामि। 52 येसुडे़ॽ चरेपामि टुम्बेॽ लुबॽआ खाडे़ॽ इमाङ लुबॽआ लुनुङ चोङ्साजिडे़ॽ मे़लेबॽआ ले़टे़। इन्ढोङ्होङ खोजिमि निवा रुङ्गोॽवाडोॽ छाक्टुवाक लिबॽआ ले़टे़। 53 मोबा येसु खोजिनुङ माहोङ्मा मे़ॽए़रेङ गनेसरेत लुमे ठाउँबेॽ रुक्नुङ चोङ्साजिडे़ॽ नाउ माहोङ्मामि के़क्पेॽ युक्सुजि। 54 येसुनुङ खोम चोङ्साजि नाउबाङ पाखे़ॽयु आप्मासोरोॽ याॽमिजिडे़ॽ येसु लुनुङ लेबेसुजि। 55 मोबा माहा याॽमिजिडे़ॽ येसु लेम्बॽआ खा चोपजि लुबेॽटुजि। मोबा याॽमिजिडे़ॽ हाम्बेॽ हाम्बेॽ येसु टुउ लुनुङ खेप्सुजे, मोबेॽ मोबेॽ खोजिडे़ॽ टुक्खुबाजि रुङ्घाकनुङ्नोॽ खिजे़डुजि। 56 इडोॽ येसु हाम्बे हाम्बे खिम्डेमनुङ, सहरराजि खडे़, मोबेॽ याॽमिजिडे़ॽ राम के़क्पेॽ टुक्खुबाजि युङ्बेॽटुजे। “माहा याॽमिजिडे़ॽ येसुमि चेॽरेॽनोहोङ्सो के़क्मा पिमा” लुनुङ खोनुङ बिन्ति ले़टुजि। मोबा खोमि चेॽरेॽ के़क्खुबाजिसो चोप नुबोगामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.