मरकुस 16 - याम्फुयेसु सिघे़ॽपॽआबाङ हिङ्बोक्पॽआ ( मत्ति २८:१-८ ; लुका २४:१-१२ ; युहन्ना २०:१-१० ) 1 नाजामे याक ए़क्साङ मरियम मग्दलिनि, याकुबमि मामा मरियमनुङ सलोमिडे़ॽ येसुमि सिगुयाकपेॽ सिःॽमामि नाम्जानुए केवा इनुजि। 2 वागियाराम सातामि याक्लोए याक माक्मिसेल्लाम नम टे़ॽमासोरोॽ खोजि येसुमि येःॽमाबेॽ खडामि। 3 मोबा खोजि रामबेॽ खे़ॽमे़ॽनिङ्सिमाबेॽ मो “येःॽमा टे़क्पॽआ बेॽए रुङ्गोॽवा चाहिँ असे़ॽ हेम्बेॽये ?” लुनुङ खा मिॽसाङ खे़ॽमे़ॽनिङ्सिडामि। 4 तर मोबेॽ रुक्नुङ खाङ्माबेॽको येःॽमा टे़क्ठाम मोढे़ॽलो बेॽएम्मा रुङ्गोॽवा सेम्बेबॽआ खाङ्डोक्टुजि। 5 मोबा येःॽमा होङ्सिॽयु पे़ए़न्नुङ खाङ्माबेॽको उथ्रिॽमा चेॽ चाङ्खुबा इक्को वेन्जा याॽमि चुप्थिङ्लाम पेन्डिङ्बॽआ खाङ्डोक्टुजि मोबा माहाजि खरि मिनामि। 6 तर मोसे़ॽ खोजि इडोॽ लुसुजि, “खरि ए़मिनानिङे, काप्सिङ्बेॽ सिघे़ॽपॽआ नासरतबेॽए येसु हे़निङे़ॽ योक्मे़ॽनिङ्सिन्डानुमे, तर खोगो हिङ्बोक्नुङ इगोबाङ खे़ॽपेटे़। खो इगोबेॽ ए़ॽयोगानुमे, खाक्सानुमे खो इगोबेॽनोॽ युङ्बॽआ ले़टे़। 7 खडानिङे खोमि चोङ्सा पत्रुसनुङ हाइखा चोङ्साजिसो इगो खा लुबेॽटानुमे। येसु हे़निङ्मि पोम्बेॽ पोम्बेॽ गालिल खे़ॽमे़ॽनिङ्सिये, याक्लो खोसे़ॽ लुडिडोॽ मोबेॽनोॽ हे़निङे़ॽ खो चुप्मिन्डानुमे।” 8 मोबाङ खोजि येःॽमाबाङ किस्सिमानुङ खरि मिङ्साङ पाखे़ॽयु पिङ्खडामि। खोजिडे़ॽ असासो इमाङ्सो मे़लुहेसुजि। इन्ढोङ्होङ खोजि बेॽलो किस्सिबॽआ ले़टामे। येसु मरियम मग्दलिनिमि पोम्बेॽ खाङ्मुबॽआ ( मत्ति २८:९-२० ; लुका २४:१३-५३ ; युहन्ना २०:११-२३ ; एप्पा चोङ्सा १:४-११ ) 9 [सातामि याक्लोए याक आइताबारमि माक्मिॽ खो हिङ्बोक्नुङ चोप्पाङ याक्लो मरियम मग्दलिनि लुमे मेॽनामिॽमि पोम्बेॽ खाङ्मुसा। याक्लो मो मेॽनामिॽबाङ्नोॽ एच्चि गोटा मङे़ॽमा चाप येसुडे़ॽ यिक्पॽआ ले़टे़। 10 मो मरियम खोमि चोङ्साजि इगो खा लुसिॽ खे़ॽमाबेॽ खोजि बिलौना ले़ःॽसाङ हाःप्मे़ॽनिङ्सिडामि। 11 तर येसु हिङ्बोक्नुङ मरियमबेॽ खाङ्मुसा लुनुङ खोजि लुबेॽमाबेॽ मो खा खोजिडे़ॽ बिस्वास मे़ले़टुजि। येसु खोमि निप्पाङ चोङ्साबेॽ खाङ्मुबॽआ ( लुका २४:१३-३५ ) 12 मोबा ए़क्साङ निप्पाङ चोङ्साजि यरुसलेमबाङ खिम्डेमलाम खे़ॽमे़ॽनिङ्सिमाबेॽ येसुमि हाइको रुपबेॽ खाङ्मुसा। 13 मोबा मोजि टेघे़ॽनुङ मोबेॽ लिबॽआ चोप खा हाइखा चोङ्साजि लुबेॽटुजि। तर मोजिडे़ॽ लुबॽआ खासो माहाजिडे़ॽ बिस्वास मे़ले़टुजि। येसु खोम बारो जना चोङ्साजिबेॽ खाङ्मुबॽआ ( मत्ति २८:१६-२० ; लुका २४:३६-४९ ; युहन्ना २०:१९-२३ ; एप्पा चोङ्सा १:६-८ ) 14 मोबा ए़क्साङ इक्पोङ इक्को चोङ्साजि चामा चासिॽपोरोक्पॽआ बेलाबेॽ येसु खोजिमि रुम्बेॽ खाङ्मुसा। माहाजि बिस्वासबेॽ कमजोर ले़ःॽपॽआसे़ॽनुङ मोबा येसु सिघे़ॽपॽआबाङ हिङ्बोक्पॽआ खाङ्खुबाजिडे़ॽ लुबॽआ खाबेॽ बिस्वास मे़ले़ःॽपॽआसे़ॽ माहाजि मारे वोबुजि। 15 मोबा खोसे़ॽ माहाजि लुसुजि, “मक्खाम्डेमबेॽहा चोप याॽमिजि सुसमाचार परचार ले़टानुमे। 16 बिस्वास ले़ःॽनुङ बप्तिस्मा लाघुबाजिडे़ॽ मुक्ति चुप्मिन्डुजे, तर बिस्वास मे़ले़ःॽखुबाजि दन्डाबेॽ सिॽइम्मे। 17 बिस्वास ले़ःॽखुबाजिनुङ इडोक्हा चिङ्गा खाङ्मुये। खोजिडे़ॽ के़ए़ निङ्बेॽ मङे़हा चापजि यिॽइन्डुजे मोबा चोङ खाप्लाबेॽ यामुम्मे। 18 खोजिडे़ॽ पुसे़ॽचि हुगे़ॽ राःबुजिहोङ्सो, सिक्चानोॽ उक्सुजिहोङ्सो मोसे़ॽ खोजि इमाङ्सो लिमिनिबा। माहाजिडे़ॽ टुक्खुबाजि सोक्पेॽ हुक युङ्माबेॽ खोजि नुबोइम्मे।” येसु थाङ्सिरिॽटु खे़ॽपॽआ 19 इडोॽ खोमि चोङ्साजिनुङ खा इःसे़ॽनुङ परभु येसु थाङ्सिरिॽटु ठेॽपोॽखे़ॽनुङ निवाहाङ्मि चुप्थिङ्लाम पेना। 20 मोबा माहा चोङ्साजि खे़ॽनुङ चोप ठाउँबेॽ परचार ले़टुजि। परभुडे़ॽ खोजिमि हिङ्मवाबाङ योम्बोक ले़टु। माहाजिडे़ॽ परचार ले़ःॽपॽआ बचन खरिहा चिङ्गाबाङ चाइबमा ले़ये लुनुङ परमान ले़ःॽपेॽटु।] |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.