Biblia Todo Logo
Bìoball air-loidhne

- Sanasan -

मरकुस 15 - याम्फु


येसु पिलातसमि पोम्‍बेॽ
( मत्‍ति २७:१-२ , ११-२६ ; लुका २३:१-५ , १३-२५ ; युहन्‍ना १८:२८–१९:१६ )

1 माक्‍मिॽ सेम्‍लाम एप्‍पा याडाङ्‌बाजि, यहुदि धारमिक नियम इःॽखुबाजि, डायोङ्‌बाजिनुङ एप्‍पा यहुदिजि सुम्‍ढाम खिमबेॽहा याॽमिजि मोत्‍ता हुप्‍नुङ येसु हिगुजि, मोबा पिलातसमि पोम्‍बेॽ चिॽखे़ॽटुजि।

2 पिलातसडे़ॽ येसु सिप्‍सु, “इमा हे़न यहुदिजिमि हाङ्‌बाडे ?” येसुडे़ॽ लुसु, “हे़ने़ॽनोॽ आक्‍टोॽ लुमे़ॽनिङ्‌सिन्‍डुए।”

3 एप्‍पा याडाङ्‌बाजिडे़ॽ येसुमि टुम्‍बेॽ बेॽलो आप्‍टिक टिसुजि।

4 मोडोगे़ॽ पिलातसडे़ॽ येसु फेरि सिप्‍सु, “इमा हे़न सोक्‍पेॽ इघाजिडे़ॽ टिबॽआ आप्‍टिक चइबानोॽ ले़ये, इन्‍ढोङ कानिबा ? खाक्‍से हे़न खोजिडे़ॽ इढे़ॽलो आप्‍टिक टिमे़ॽनिङ्‌सिम्‍मे।”

5 तरसो येसुडे़ॽ इमाङ्‌सो मे़लुसु। इडोॽ येसु योङ उक्‍पॽआ खाङ्‌नुङ पिलातससो खरि मिना।

6 तर छुट्‌कारामि चाडमि याकपेॽ पिलातसडे़ॽ सानिङ्‌नोॽ याॽमिजिडे़ॽ लुबॽआ इक्‍को कैदि लेॽपेमे चलन टुसे़।

7 मोबा मोडोक्‍पेॽ तिरिङ्‌गा खिमबेॽ हाइको इक्‍को बारब्‍बा निङ ले़ःॽखुबा कैदिसो टुसे़। मोसे़ॽ हाइखा याॽमिजिनुङ टोङ्‌नुङ हुलदुङ्‌गा लिमाबेॽ याॽमिसो सेॽपॽआ ले़टे।

8 मोबा बेॽलो याॽमिजि लेन्‍नुङ पिलतास इडोॽ लुसुजि, सानिङ्‌डोक्‍नोॽ कानिङ्‌मि इक्‍को याॽमि कैदि लेप्‍पिॽमा खे़ये लुनुङ बिन्‍ति ले़टुजि।

9 मोबा पिलातसडे़ॽ माहा याॽमिजि सिप्‍सुजि, “मोडोक्‍होङ हे़निङ्‌मि लागि यहुदिजिमि हाङ्‌बा लेप्‍पेॽमेन्‍डे ?”

10 इन्‍ढोङ्‌होङ एप्‍पा याडाङ्‌बाजिडे़ॽ चेजेवे़ॽनोॽ येसु राःप्‍नुङ खोबेॽ चिक्‍चे़ॽपॽआ लुनुङ पिलातसडे़ॽ लेबेबॽआ ले़टे़।

11 तर एप्‍पा याडाङ्‌बाजिडे़ॽ मोबेॽहा याॽमिजि उक्‍सबा ले़ःॽनुङ “येसु ने़ॽनि, बारब्‍बा चाहिँ लेप्‍पिॽमा” लुमेॽटुजि।

12 पिलातसडे़ॽ फेरि माहाजि सिप्‍सुजि, “मोडोक्‍होङ हे़निङे़ॽ लुबॽआ यहुदिजिमि हाङ्‌बा चाहिँ के़ॽ इमाङ्‌डे ले़ॽमे ?”

13 खोजिडे़ॽ वोसाङ लुसुजि, “आक्‍को येसु चाहिँ काप्‍सिङ्‌बेॽ किङ्‌नेसे।”

14 पिलातसडे़ॽ माहाजि सिप्‍सुजि, “येसुडे़ॽ इमाङ आक्‍टोक्‍मा अपराध ले़ए़टुहोङ किङ्‌नेमे ?” तर माहाजि छना बेॽलो वोसाङ इडोॽ कासामि, “आक्‍को येसु काप्‍सिङ्‌बेॽ किङ्‌नेसे।”

15 मोबा पिलातसडे़ॽ माहा याॽमिजि साप्‍थाङ्‌मेॽमामि लागि बारब्‍बा लेप्‍पेसु। येसु कोरराडे़ॽ मोःक्‍नुङ हे़निङे़ॽनोॽ काप्‍सिङ्‌बेॽ किङ्‌नेसानुमे लुनुङ खोजि जिम्‍मा पिसुजि।


तिरिङ्‌गाजिडे़ॽ येसु सिःक्‍चाबॽआ
( मत्‍ति २७:२७-३१ ; युहन्‍ना १९:२-३ )

16 तिरिङ्‌गाजिडे़ॽ येसु रोमिजिडे़ॽ न्‍याय ले़ःॽठामबेॽ चिॽखे़ॽटुजि मोबेॽ हाइखासो बेॽलो तिरिङ्‌गाजि सुप्‍सामि।

17 माहा तिरिङ्‌गाजिडे़ॽ सिःक्‍चामामि येसु बैजनि रङ्‌मा चे़ॽ चाङ्‌एम्‍बेॽटुजि। मोबा चिजिङ्‌मि मुकुट टोङ्‌नुङ खोमि निन्‍डवाँबेॽ ओम्‍डिबेॽटुजि।

18 मोबा माहा तिरिङ्‌गाजिडे़ॽ येसु इडोॽ लुसुजि, “यहुदिजिमि हाङ्‌बामि ओहाङ” लुसाङ सेवा मुसुजि।

19 मोबा माहाजिडे़ॽ येसुमि निन्‍डवाँबेॽ इङ्‌भुडे़ॽ मोःक्‍नुङ चेःडुजि मोबा खोमि पोम्‍बेॽ ओप्‌युनुङ ढोग ले़टुजि।

20 मोबा इडोॽ येसु बेॽलो सिःक्‍चासेॽनुङ मो बैजनि रङ्‌मा चेॽ हेम्‍बेनुङ याक्‍लो खोसे़ॽ चाङ्‌बॽआ चेॽनोॽ चाङ्‌डिबेॽनुङ काप्‍सिङ्‌बेॽ किङ्‌नेमामि चिॽखे़ॽटुजि।


येसु काप्‍सिङ्‌बेॽ किङ्‌नेसिॽ चिक्‍खे़ॽपॽआ
( मत्‍ति २७:३२-४४ ; लुका २३:२६-४३ ; युहन्‍ना १९:१७-२७ )

21 मोबा कुरेनि देसबेॽ पेङ्‌खुबा अलेक्‍जेन्‍डरनुङ रुफसमि पाबा लुमे कुरेनि खिम्‍डेमबेॽ पेङ्‌खुबा सिमोन आप्‍मे़ॽनिङ्‌सिबॽआ खोजिडे़ॽ चुप्‍टुजि। माहा तिरिङ्‌गाजिडे़ॽ येसुमि काप्‍सिङ खो येॽयेॽ खिमेॽटुजि।

22 मोबा ए़क्‍साङ माहाजिडे़ॽ येसु गलगथा लुमे टोकटोक्‍माबेॽ चिक्‍चे़डुजि। गलगथा चाहिँ “खप्‍परे” लुबॽआ ले़ये।

23 मोबेॽ रुक्‍नुङ खोजिडे़ॽ येसु खिॽइये ठुबॽआ अङ्‌गुरमि मद्‌य उङ्‌मेॽटुजि। तर येसुडे़ॽ माहा मे़उक्‍सु।

24 माहा तिरिङ्‌गाजिडे़ॽ येसु काप्‍सिङ्‌बेॽ किङ्‌डिसुजि। मोबा माहा तिरिङ्‌गाजिडे़ॽ येसुमि चेॽ असामि भागबेॽ सिॽइये लुनुङ चिटठा एन्‍डुजि।

25 माहाजिडे़ॽ येसु काप्‍सिङ्‌बेॽ किङ्‌डिमाबेॽ माक्‍मिए नोक्‍चिबोङ काबॽआ ले़टे़।

26 येसुमि निन्‍डवाँसोङ्‌बेॽ आप्‍टिक टिबॽआ पत्‍राबेॽ “यहुदिजिमि हाङ्‌बा” लुनुङ साप्‍पॽआ ले़टे़।

27 तिरिङ्‌गाजिडे़ॽ येसुनुङ निप्‍पाङ खुसुबाङ्‌जिसो किङ्‌एन्‍डुजि। इक्‍को खोमि चुप्‍थिङ्‌लाम हाइको ए़ङ्‌सिङ्‌लाम किङ्‌डिसुजि।

28 [इडोॽ धारमिक नेॽचिराबेॽ साप्‍पॽआ खा पुरा लिसा। येसु अपराधि खुसुबाङ्‌जिडोक्‍नोॽ खाङ्‌मुसा।]

29 मो रामनोॽ लिसाङ खे़ॽखुबा याॽमिजिडे़ॽ खोजिमि निन्‍डवाँ हिॽलिॽ हिॽलिॽ हिॽमानुङ इडोॽ लुसाङ सिःक्‍चोसुजि, “लो खाक्‍सानुमे! मन्‍दिर योबेनुङ फेरि सुम याकपेॽनोॽ टोङ्‌हेखुबा!

30 लो हे़न आमटाङ्‌बा आक्‍को काप्‍सिङ्‌बाङ मिम्‍मु उक्‍से ?”

31 मोडोक्‍नोॽ एप्‍पा याडाङ्‌बाजिनुङ यहुदि धारमिक नियम इःॽखुजिडे़ॽसो येसु इडोॽ लुसाङ सिःक्‍चोसुजि, “इगोसे़ॽ हाइखाजिगो हिङ्‌मे़ॽटुजि तर खोमटाङ्‌बा मे़हिङ्‌मेॽहेसु।

32 इगो इस्‍राएलमि हाङ्‌बा खिरिस्‍ट ले़येहोङ आक्‍को काप्‍सिङ्‌बाङ मिम्‍मु उङ्‌रो, मो खाङ्‌नुङ बिस्‍वास ले़न्‍डुङ्‌मे।” येसुनुङ सोरि काप्‍सिङ्‌बेॽ किङ्‌एम्‍बॽआ खुसुबाङ्‌जिडे़ॽसो खो सिःक्‍चोसुजि।


येसु सिबॽआ
( मत्‍ति २७:४५-५६ ; लुका २३:४४-४९ ; युहन्‍ना १९:२८-३० )

33 लेन्‍डा इकबोङ निबोङ्‌बाङ सुमबोङ्‌ठोक मो देस चोप सेन्‍जुगुप लिसा।

34 सुमबोङ्‌राजि येसु बेॽए सेम्‍लाडे़ॽ वोसाङ इडोॽ कासा, “इलोइ, इलोइ, लामा सबखथनि ?” इगो लुबॽआ चाहिँ, “हे के़ए़ निवाहाङ, हे के़ए़ निवाहाङ हे़ने़ॽ का इन्‍ढोङ मिन्‍डेटिङे ?”

35 मोबेॽ किॽयु मिॽयु येःप्‍खुबा याॽमिजिडे़ॽ येसु इडोॽ काबॽआ खेम्‍नुङ लुसुजि, “खेप्‍सानुमे, आक्‍कोसे़ॽ एलिया के़ॽमे़ॽनिङ्‌न्‍डुए।”

36 मोबा इक्‍को याॽमि पिङ्‌घे़ॽनुङ ढिकिमि चोम्‍माराडोॽमा अङ्‌गुरमि सिडुवा खे़ँवाबेॽ वडाप्‍नुङ येसुमि याबुक्‍पेॽ टिबेॽसाङ इडोॽ लुसु, “इॽछोॽ योङ्‌मेॽमा एलिया लेन्‍नुङ इगो काप्‍सिङ्‌बाङ रिओक्‍इन्‍डुएन्‍डे, खाङ्‌खाङ्‌मा!”

37 तर मोडोक्‍पेॽनोॽ येसु बेॽए सेम्‍ले़ॽ वोनुङ खोमि सोःक्‍मा खडा।

38 मोडोक्‍पेॽनोॽ यरुसलेमबेॽए मन्‍दिरबेॽ टिबॽआ परदा मिन्‍डुराम मिम्‍मुठोक नाःक्‍खे़ॽनुङ निभे़ङ लिसा।

39 मोबा काप्‍सिङ्‌मि के़क्‍पेॽ येःप्‍खुबा तिरिङ्‌गामि एप्‍पाडे़ॽ येसुमि सोःक्‍मा खे़ॽपॽआ खाङ्‌नुङ लुसु, “चइबानोॽ इगो याॽमिगो निवाहाङ्‌मि पसानोॽ ले़टे़ ले़।”

40 माहा चोप खा ओबाङ कोहि मेॽनामिॽचिडे़ॽसो खाङ्‌मे़ॽनिङ्‌सिडुजे। माहाजिबेॽ मरियम मग्‍दलिनि, ए़डे़म्‍मा याकुबनुङ योसेफमि मामा मरियमनुङ सलोमि टुसामि।

41 मोबा हाइखासो बेॽलो मेॽनामिॽचि येसुनुङ सोरि यरुसलेमबेॽ लेम्‍बॽआ ले़टामि। माहाजिडे़ॽ येसु गालिलबाङ्‌नोॽ ए़ङ्‌गुवा ए़ङ्‌गुवा टिक्‍सुजेनुङ सेवा ले़टुजे।


येसुमि सिगुयाक येःॽमाबेॽ युङ्‌बॽआ
( मत्‍ति २७:५७-६१ ; लुका २३:५०-५६ ; युहन्‍ना १९:३८-४२ )

42 मो याक चाहिँ यहुदिमि नाजामे याकमि याक्‍लोए याक ले़टे़। मोमि लागि यहुदिजि पोरोक्‍मे़ॽनिङ्‌सिडामे, नमसो किॽखे़ॽसिॽ पोरोक्‍पॽआ ले़टे़।

43 बेॽहा यहुदिजि सुम्‍ढाम खिममि इक्‍को एप्‍पा याॽमि अरिमाथिया ठाउँबेॽए योसेफ मे़ङ्‌किस्‍सिरेॽ पिलातसमि पोम्‍बेॽ खे़ॽनुङ येसुमि सिगुयाक ङागु। खोसे़ॽ याक्‍लोएबाङ्‌नोॽ निवाहाङ्‌मि राज्‍य इन्‍डोक्‍पेॽ लेङ्‌इये लुनुङ हुङ्‌मे़ॽनिङ्‌सिडुए।

44 येसु सिघे़ॽपेबॽआ खा खेम्‍नुङ पिलातस खरि मिना। मोबा खोसे़ॽ रोमि तिरिङ्‌गामि एप्‍पा के़ःॽनुङ येसु चइबानोॽ सिघे़टे़ लुनुङ सिप्‍सु।

45 येसु चइबानोॽ सिघे़ॽपॽआ खा तिरिङ्‌गामि एप्‍पाबाङ लेडोक्‍नुङ पिलातसडे़ॽ येसुमि सिगुयाक योसेफ लाघे़ॽमेॽटु।

46 मोबा योसेफडे़ॽ सुतिमि चेॽ इन्‍जे़ॽनुङ येसुमि सिगुयाक काप्‍सिङ्‌बाङ रिओक्‍नुङ मो चेॽटे़ॽ यिबु, मोबा पहराबेॽ ओक्‍नुङ टोङ्‌बॽआ येःॽमाबेॽ युङ्‌नुङ इक्‍को बेॽएम्‍मा चेप्‍लेटि रुङ्‌गोॽवाडे़ॽ येःॽमामि राम्‍डेम से़क्‍टिसु।

47 मरियम मग्‍दलिनिनुङ योसेफमि मामा मरियमडे़ॽ येसु येःॽमाबेॽ युङ्‌बॽआ नुरोॽ निवाबेॽ युङ्‌साङ खाङ्‌मे़ॽनिङ्‌सिडुजे।

© 2023, Wycliffe Bible Translators, Inc. and Nepal Bible Society

Wycliffe Bible Translators, Inc.
Lean sinn:



Sanasan