मरकुस 14 - याम्फुयेसु सेॽनेमा योक्पॽआ ( मत्ति २६:१-५ ; लुका २२:१-२ ; युहन्ना ११:४५-५३ ) 1 मोबा खावाडोॽमा खमिर मे़ॽनिङ्मा चरेपा चामे छुट्कारामि चाड लेम्मा नियाक याक्लो, एप्पा याडाङ्बाजिनुङ यहुदि धारमिक खा इःॽखुबाजिडे़ॽ येसु खुस्रिङ्मु सेॽनेमे दाउ योक्मे़ॽनिङ्सिडामि। 2 तर खोजिडे़ॽ मिॽटुजि “इगो चाडमि बेलाबेॽ इडोॽ ले़ःॽमाहोङ्गो याॽमिजिमि रुम्बेॽ हुल-दुङ्गा लिइ मिॽटुजि।” इक्को मेॽनामिॽडे़ॽ येसुमि निन्डवाँबेॽ जटामसिमि केवा सिःॽटिबेॽपॽआ ( मत्ति २६:६-१३ ; युहन्ना १२:१-८ ) 3 येसु बेथानियाबेॽ याक्लो सुक्टुबाङेॽ राःप्पॽआ सिमोनमि खिमबेॽ चामा चासिॽ पेम्माबेॽ इक्को मेॽनमिॽ रुङ्गोॽवाबाङ टोङ्बॽआ बतलबेॽ जटामसि से़ङ्से़ङ केवा याङ्मानुङ मोबेॽ लेस्सा, मो बतलनुङ केवा बेॽलो माहागो सिॽटे़। मो नाम्जानुहा केवामि बतल पोक्नुङ येसुमि निन्डवाँबेॽ चोप ओप्एम्बेॽटु। 4 तर मोबेॽ कोहि कोहिजि चेजेवे़ॽ कासामि, “आक्टोॽ महङ्गो केवा इन्ढोङ इगो मेॽनामिॽडे़ॽ के़न्डिपेन्डुए ? 5 इघा केवा इन्जानुङ गरिबजि हाबेॽमा नुडे़।” लुनुङ माहाजिडे़ॽ मो मेॽनामिॽ वोबुजि। 6 तर येसुडे़ॽ माहाजि लुसुजि, “योङ्मेॽटानुमे, इन्ढोङ हे़निङे़ॽ आक्को मेॽनामिॽ योप्मिन्डानुमे ? इगोसे़ॽ काङ्मि लागि इक्को नुबा योम्बोक ले़ए़टुए। 7 इन्ढोङ्होङ गरिबजिगो सानिङ्नोॽ हे़निङ्नुङ्नोॽ टुम्मे, हे़निङे़ॽ इन्डोक्पेॽहोङ्सो खोजिमि लागि नुबा योम्बोक ले़ःॽहेन्डानुमे, तर कागो सानिङ हे़निङ्नुङ टुङानि। 8 इगो मेॽनामिॽडे़ॽ इमाङ ले़ःॽहेसुए मोनोॽ ले़ए़टुए, इगोसे़ॽ का येःॽमाबेॽ युङ्मामि लागि याक्लोनोॽ नम्जानुये केवा सिःॽनुङ पोरोइटे़। 9 चइबानोॽ हे़निङ लुनिम्ने़, मक्खाम्डेमबेॽ हाम्बेॽ हाम्बेॽ इगो सुसमाचार खेम्मेये, मोबेॽ मोबेॽ इगो मेॽनामिॽडे़ॽ ले़ःॽपॽआ योम्बोक मिॽमामि लागि परचार लिये।” यहुदा इस्करियोत येसु राःप्मेॽमामि पोरोक्पॽआ ( मत्ति २६:१४-१६ ; लुका २२:३-६ ) 10 मोबा येसुमि बारो जना एप्पा चोङ्साजिबेॽ यहुदा इस्करियोत लुमे चाहिँ एप्पा याडाङ्बाजिबेॽ खे़ॽनुङ येसु राःमेॽमामि खा इःसिॽ खडा। 11 मोबा यहुदा इस्करियोतमि इडोक्मा खा खेम्नुङ एप्पा याडाङ्बाजि साप्थाङ्मानुङ खो इगो योम्बोकमि लागि याङ पिमामि राजि लिसामि। मो याकबाङ्नोॽ यहुदा इस्करियोतडे़ॽ येसु राःप्मेॽमामि दाउ खाङ्बोगु। येसुडे़ॽ चोङ्साजिनुङ ए़क्साङ्मा भत्तेर चाबॽआ ( मत्ति २६:१७-३० ; लुका २२:७-२३ ; युहन्ना १३:२१-३० ; १ कोरिन्थि ११:२३-२५ ) 12 खावाडोॽमा खमिर मे़ॽनिङ्मा चरेपा चामे चाडमि याक्लोए याक, खोजिडे़ॽ छुट्कारा चाडमि लागि पाठाडे़ॽ भोग पिसुजे। येसुमि चोङ्साजिडे़ॽ खो सिप्सुजि, “परभु, कानिङे़ॽ हे़ने़ए़ लागि छुट्कारा चाड हाम्बेॽटे पोरोक्मे़ ?” 13 मोबा येसुडे़ॽ खोमि निप्पाङ चोङ्साजि इडोॽ लुनुङ पाङ्हाक्सुजि, “हागो हे़न्जिङ सहरबेॽ खडाजे, मोबेॽ पस्नाबेॽ योङा खिमानुङ खे़ॽमे़ॽनिङ्सिबॽआ इक्को याॽमि हे़न्जिङे़ॽ चुप्मिन्जुए। मोमि ए़ङ्गुवा ए़ङ्गुवा खडाजे, 14 मो याॽमि हाम्बे खिमबेॽ पे़खे़ये, मो खिममि मायोङ्बा लुसाजे, ‘कानिङ्मि गुरुडे़ॽ इडोॽ लुटे़, के़ॽ काङ्मि चोङ्साजिनुङ छुट्कारामि चाडमि भत्तेर चामे कोठा हाम्बेॽटे टुये ?’ 15 मोबा खोसे़ॽ मेॽटोङ्ए तलाबेॽ हे़निङ चिक्खे़ॽनुङ नुरोॽ चाक्युङ्बॽआ इक्को बेॽएम्मा कोठा खाङ्मेॽये। मोबेॽनोॽ कानिङ चोपमि लागि छुट्कारा चाडमि भत्तेर पोरोक्मे़।” 16 मोबा माहा चोङ्साजि सहर खे़ॽमाबेॽ चइबानोॽ येसुडे़ॽ लुडिडोक्नोॽ चोप खा चुप्टुजि मोबा माहाजिडे़ॽ मोबेॽनोॽ छुट्कारा चाडमि भत्तेर पोरोगुजि। 17 युडा येसु खोमि बारो जना चोङ्साजिनुङ सोरि लेस्सा। 18 खोजि पेन्नुङ भत्तेर चामे़ॽनिङ्सिमाबेॽ येसुडे़ॽ इडोॽ लुसु, “के़ॽ चइबानोॽ हे़निङ लुनिम्ने़, इगोबेॽ कानुङ सोरि पेन्नुङ चाघुबाजिबाङ्नोॽ इक्कोसे़ॽ का धोका पिये।” 19 येसुमि इडोक्मा खा खेम्नुङ चोङ्साजि दुःखि लिसामि, मोबा खोजिदाङ्बा पालोइ पालो काबोगामि इमा “मो धोका पिघुबा काडे ?” 20 येसुडे़ॽ माहाजि लुसुजि, “हे़निङ बारो जनाबेॽ इक्कोसे़ॽ का धोका पिये। खो आइ कानुङ्नोॽ थालाबेॽ चरेपा चामे़ॽनिङ्सिये। 21 इन्ढोङ्होङ याॽमिमि पसागो साप्पॽआडोॽ सिमानोॽ खे़ये। तर इनामा मो धोका पिघुबा। मो याॽमिगो इगो मक्खाम्डेमबेॽ मे़न्टोक्पॽआहोङ्सो नुडे़।” 22 मोबा खोजि चामे़ॽनिङ्सिमाबेॽ येसुडे़ॽ चरेपा याङ्नुङ निवाहाङ ओहाक पिसु, मोबा चरेपा एॽनुङ चोङ्साजि पिसाङ लुसुजि, “इगो के़ए़ हिङा मिॽनुङ चासानुमे।” 23 मोबा फेरि येसुडे़ॽ खोरिया ठेॽनुङ निवाहाङ ओहाक पिसु, मोबा चोप चोङ्साजिडे़ॽ मो खोरियाबाङ उक्सुजि। 24 मोबा येसुडे़ॽ फेरि लुसुजि, “इगो चोङ करारमि के़ए़ हरि ले़ये, इगो बेॽलो याॽमिजिमि लागि ले़ये। 25 चइबानोॽ हे़निङ लुनिम्ने़, निवाहाङ्मि राज्यबेॽ चोङ लिनुङ ए़क्साङ्रेॽ के़ॽ फेरि अङ्गुरमि खे़वाँ उङ्इनुङे।” 26 मोबा खोजिडे़ॽ इक्को भजन सेम्लुनुङ ए़क्साङ जैतुन टोक्टोक्मालाम खडामि। येसुडे़ॽ पत्रुस अरति पिबॽआ ( मत्ति २६:३१-३५ ; लुका २२:३१-३४ ; युहन्ना १३:३६-३८ ) 27 मोडोक्पेॽ येसुडे़ॽ खोम चोङ्साजि लुसुजि, “का दुःखबेॽ सिॽमाबेॽ हे़निङ चोबे़ॽ का याःॽयान्डानिङे, धारमिक नेॽचिराबेॽ इडोॽ साप्पॽआ ले़ये- ‘के़ॽ गोठ्ला मोइनुङे मोबा सामुजि किॽयु मिॽयु चिःॽखे़म्मे।’ 28 “तर का सिबॽआबाङ हिङ्बोक्नुङ हे़निङ्बाङ याक्लो का गालिल खे़ए़ङे।” 29 मोडोक्पेॽनोॽ पत्रुसडे़ॽ येसु लुसु, “चोबे़ॽ हे़न याःॽयामिहोङ्सो के़ॽ चाहिँ हे़न याःॽयानानि।” 30 मोबा येसुडे़ॽ खो लुसु, “चइबानोॽ हे़न लुन्ने़, आइसेन्डा सुमखेॽ वापा ओःक्मा याक्लो हे़ने़ॽ का सुमखेॽ लेङानि लुये।” 31 तर पत्रुसडे़ॽ हागोसो बेॽलो लुसु, “हे़न्नुङ सोरि सिमा सिॽहोङ्सो के़ॽ हे़न मोडोॽ लुनानि।” मोबा हाइखा चोप चोङ्साजिडे़ॽसो मोडोक्नोॽ लुसुजि। येसुडे़ॽ गेतसमनि चोप्लिङ्बेॽ पारथना ले़ःॽपॽआ 32 मोबा ए़क्साङ येसु खोमि चोङ्साजि गेतसमनि लुमे चोप्लिङ्बेॽ खडा। मोबेॽ खोसे़ॽ चोङ्साजि लुसुजि, “के़ॽ पारथना ले़टिङ्लो हे़निङ इगोबेॽनोॽ पेन्डिक्सानिङो।” 33 मोबा येसुडे़ॽ पत्रुस, याकुबनुङ युहन्ना सोरि चिक्खे़ॽटु। मोबेॽ खो बेॽलो खेःबेॽ सिॽटा। 34 मोबा येसुडे़ॽ खोम चोङ्साजि इडोॽ लुसुजि, “खेप्सानुमे, के़ए़ निवा सिघे़ॽलो टुक्मे़ॽनिङ्सिये। हे़निङ इगोबेॽ मे़इम्रेॽ पेनानिङो।” 35 मोबा खो चाहिँ ए़डे़ॽ मेॽयोङ उःक्युनुङ निवाहाङ इडोॽ लुसाङ पारथना ले़ःॽपोगु, “इगो काबेॽ लेन्सिॽ पोरोइटे़ खेः सेम्मा नुउहोङ काबाङ सेम्बेबेॽमा।” 36 खोसे़ॽ इडोॽ लुसु, “पाबा, हे़ने़ॽको चोप खा ले़ःॽहेन्डुए, इगो खेः काबाङ सेम्बेबेॽमा। तर के़ॽ मिॽपॽआडोॽ ने़ॽनि, हे़ने़ॽ मिॽपॽआडोक्नोॽ लिरो।” 37 येसु खोम चोङ्साजि टुढामबेॽ टेजामाबेॽको खोजि इम्डिखे़ॽपॽआ चुप्टुजि। येसुडे़ॽ पत्रुस लुसु, “सिमोन, इमा हे़न इम्डिघे़ॽपेटे़ ? इमा इच्छोॽसो मे़इम्रेॽ पेङ्हेनिबा ? 38 हे़निङ लेङ्सिॽपोरोक्पॽआ खेःबेॽ मे़सिॽलो लुनुङ पारथना ले़टानिङे। हे़निङ्मि निवागो कानुङ खे़ॽमा पोरोइटे़, तर हिङा चाहिँ पाङ्सुये।” 39 फेरिसो येसु मो ठाउँबेॽनोॽ खे़ॽनुङ मोडोक्नोॽ पारथना ले़टु। 40 येसु पारथना ले़ःॽनुङ टेजामाबेॽ माहा चोङ्साजि फेरिसो इम्सिबॽआ चुप्टुजि। खोजि इम्मे़ॽ टुम्मिक टुम्मिक ले़टामि, मोडोगे़ॽ माहाजिडे़ॽ येसु इमाङ्सो मे़लुहेसुजि। 41 इडोॽ येसु सुमखेॽनोॽ चोङ्साजिबेॽ टेजामाबेॽ इम्डिखे़ॽपॽआ चुप्टुजि। मोबा येसुडे़ॽ लुसुजि, “इमा हे़निङ हागोसो नाजामे़ॽनिङ्सिन्डानिङे ? हागो बेला लिबेटे़। याॽमिमि पसा राःप्नुङ पापि याॽमिजिमि हुकपेॽ पिमे बेला लिसा। 42 हागो पुकडानिङे, खडि! खाक्सानुमे, याॽमिमि पसा धोका पिघुबा याॽमि के़क्पेॽ लेम्बेटे़।” येसु याॽमिजिडे़ॽ राःप्पॽआ ( मत्ति २६:४७-५६ ; लुका २२:४७-५३ ; युहन्ना १८:३-१२ ) 43 येसु यामुमे़ॽनिङ्सिमाबेॽ बारो जना चोङ्साजिबेॽए यहुदा इस्करियोत चोङ्सा मोबेॽ लेस्सा। खोनुङ फेयानुङ टोङ्इरा याङ्घुबाजिमि इक्को हुलनोॽ टुसामि। माहाजि एप्पा याडाङ्बाजि, यहुदि धारमिक खा इःखुबाजिनुङ सरकारि डायोङ्बाजिडे़ॽ पाङ्बॽआ ले़टामे। 44 येसु राःप्मेॽखुबा यहुदा इस्करियोतडे़ॽ मो याॽमि इडोॽ लुबॽआ ले़टा, “असा के़ॽ मोइ चानुङे, मोनोॽ येसु ले़ये हे़निङे़ॽ राःप्खे़ॽटानुमे।” 45 मोबा यहुदा इस्करियोत येसुबेॽ खे़ॽनुङ, “सेवा गुरु लुसाङ!” मोइ चोसु। 46 मोडोक्पेॽनोॽ तिरिङ्गाजिडे़ॽ येसु राःबुजि। 47 तर खोमि के़क्पे़ॽ येःप्खुबा इक्को याॽमिडे़ॽ फेया रिक्नुङ चोप्पाङ एप्पा याडाङ्बामि सेउतेमि ने़ए़क पे़क्पेबेॽटु। 48 येसुडे़ॽ माहाजि लुसुजि, “इमा का खुसुबाङ्डे मिॽटानिङे ? हे़निङ फेयानुङ टोङ्इरा खिमानुङ लेङ्इटानिङे। 49 का सानिङ्नोॽ मन्दिरबेॽ सिक्छे पिमाबेॽ हे़निङ्नुङ्नोॽ सोरि टुसिङा मोडोक्पेॽ हे़निङे़ॽ मे़राबानिङे। तर धारमिक नेॽचिराबेॽ साप्पॽआ खा पुरा लिरो लुनुङ इडोॽ लिटे़।” 50 मोडोक्पेॽनोॽ येसुमि चोप चोङ्साजि खो याःॽयानुङ चिपेसामि। 51 मोडोक्पेॽ इक्को वेन्जा पिच्छा, येसुमि ए़ङ्गुवा ए़ङ्गुवा खे़ॽमे़ॽनिङ्सिडा। खोसे़ॽ सुतिमि चेॽरेॽ चाङ्बॽआ ले़टा, मोबा येसु राःप्खुबाजिडे़ॽ खोसो राःबुजि। 52 तर खोसे़ॽ खोमि चेॽनोॽ याःॽयानुङ उक्चुङ्रे़क चिःॽखडा। यहुदिजिमि बेॽहाजि सुम्ढाम ठाउँबेॽ येसु ( मत्ति २६:५७-६८ ; लुका २२:५४-५५ , ६३-७१ ; युहन्ना १८:१३-१४ , १९-२४ ) 53 मोबा माहाजिडे़ॽ येसु राःप्नुङ चोप्पाङ एप्पा याडाङ्बामि खिमबेॽ चिॽखे़ॽटुजि। मोबेॽ एप्पा याडाङ्बाजि, यहुदि धारमिक नियम इःॽखुबाजिनुङ अगुवाजि सुम्बॽआ ले़टामि। 54 पत्रुस चाहिँ येसु ओःबाङ्नोॽ टिङ्साङ चोप्पाङ एप्पा याडाङ्बामि सोॽलुङ्बेॽ पे़ए़ना। मोबेॽ मन्दिर हुङ्घुबाजिनुङ पेन्नुङ मि हुङ्बोगा। 55 मोबा एप्पा याडाङ्बानुङ मोबेॽ सुम्खुबा चोबे़ॽ येसु सेॽनेमामि आप्टिक योक्पोगुजि तर माहाजिडे़ॽ इमाङ्सो मे़न्चुप्टुजि। 56 येसुमि बिरोधबेॽ बेॽलो याॽमिजिडे़ॽ मे़ॽनोक्हा खामि साक्छि पिसुजि, तर माहाजिमि खानोॽ मे़न्टोक्सा। 57 मोबा ए़क्साङ्सो इन्डोक जना येपोक्नुङ येसुमि बिरोधबेॽ इडोक्मा आप्टिक टिसुजि। 58 “याॽमिडे़ॽ टोङ्बॽआ इगो मन्दिर योबेनुङ याॽमिमि हुक मे़ॽनिङ्नोॽ के़ॽ सुम याकपेॽ टोङ्इनुङे लुबॽआ कानिङे़ॽ खे़म्इटुङ्मे।” 59 तरसो खोजिडे़ॽ येसुमि टुम्बेॽ लुबॽआ साक्छि इक्को मे़न्डोक्सा। 60 मोबा ए़क्साङ चोप्पाङ एप्पा याडाङ्बाडे़ॽ चोपमि पोम्बेॽ येःपोक्नुङ येसु सिप्सु, “इमा हे़ने़ॽ इमासो लुसुने ? इघाजिडे़ॽ हे़न टिबॽआ दोसमि टुम्बेॽ लुमाहा इमाङ्सो काप्टुनिहा ?” 61 तर येसु योङ उगा। फेरिसो चोप्पाङ एप्पा याडाङ्बाडे़ॽ इडोॽ लुनुङ सिप्सु, “इमाङ हे़न चइबानोॽ पबित्रा निवाहाङ्मि पसा खिरिस्टनोॽ ले़ये ?” 62 येसुडे़ॽ लुसु, “इँहिॽ कानोॽ ले़ङे, मोबा इक्याक हे़निङे़ॽ याॽमिमि पसा चोप्पाङ बेॽएम्मा निवाहाङ्मि चुप्थिङ्लाम पेम्बॽआनुङ नान्द्रुङ्माबेॽहा खिम्मिॽवानुङ उङ्मे़ॽनिङ्सिबॽआ खाङ्डोइन्डानुमे।” 63 मोबा चोप्पाङ एप्पा याडाङ्बाडे़ॽ खोमि चेॽ नाःक्साङ लुसु, “लो साप्तु, हागो कानिङ इगोबाङ हाइखा परमान इमाङ्सो पाप्निबा। 64 इगोसे़ॽ निवाहाङ्मि बेजेत ले़ःॽपॽआ खा हे़निङे़ॽ खेम्बेसानुम। हे़निङ्मि इमाङ लुमा टुहा ?” मोबा माहाजि चोबे़ॽ इगोगो सेॽनेमारोमा अपराधि ले़ये लुसुजि। 65 मोबा कोहि याॽमिजिडे़ॽ येसु चेःॽपोगुजि मोबा खोमि मिक चेॽटे़ॽ टे़क्नुङ मोक्पोगुजि मोबा लुसुजि, “लो अगमबानि इःसे, हे़न असे़ॽ मोगे़ ?” मन्दिर हुङ्घुबाजिडे़ॽसो येसु मोगुजि। पत्रुसडे़ॽ येसु लेसुङ्नि लुबॽआ ( मत्ति २६:६९-७५ ; लुका २२:५६-६२ ; युहन्ना १८:१५-१८ , २५-२७ ) 66 पत्रुस सोॽलुङ्बेॽ पेम्मे़ॽनिङ्सिडा। मोडोक्पेॽ चोप्पाङ एप्पा याडाङ्बामि इक्को सेउतेनि मोबेॽ लेस्सा। 67 मोबा मोसे़ॽ पत्रुस नुरोॽ वाःप्साङ लुसु, “हे़नसो येसुनुङ्नोॽ टुसे़ ने़ॽनेन्डे ?” 68 तर पत्रुसडे़ॽ मो इडोॽ लुसु, “ने़ॽनि, हे़ने़ॽ इमाङ खा इःन्डुए, के़ॽको इमाङ्सो मे़लेसुङ।” मोबा पत्रुस येपोक्नुङ राम्डेमलाम खडा मोडोक्पेॽनोॽ वापा ओगा। 69 मोनोॽ सेउतेनिडे़ॽ फेरिसो पत्रुस खाङ्डोक्टु मोबा मोबेॽ येःप्खुबा याॽमिजिनुङ इडोॽ लुसु, “इगो याॽमिगो माहाजिबेॽएनोॽ इक्को ले़ये।” 70 तर पत्रुसडे़ॽ फेरिसो कागो ने़ॽनि लुसु। इॽछोॽ ए़क्साङ मोबेॽहाजिबाङ इक्को याॽमिडे़ॽ पत्रुस लुसु, “हे़नसो माहाजिबेॽ इक्को ले़ये। इन्ढोङ्होङ हे़नसो गालिलिनोॽ ले़ये।” 71 तर पत्रुसडे़ॽ किरिया हे़क्साङ लुसु, “हे़निङे़ॽ असामि टुम्बेॽ इगो खा इःमे़ॽनिङ्सिन्डानुमे मो याॽमि के़ॽ लेसुङ्नि।” 72 मोडोक्पेॽनोॽ हाइको खेपमा वापा ओगा, मोबा याक्लो येसुडे़ॽ इडोॽ लुबॽआ खा पत्रुसडे़ॽ मिॽटोक्टु, “निघे़ॽ वापा ओःक्मा याक्लो हे़ने़ॽ का सुमखेॽ लेङानि लुये।” मोबा पत्रुस बेॽलो हे़क्हे़क मिन्साङ हाबा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.