मरकुस 1 - याम्फुबप्तिस्मा पिघुबा युहन्नाडे़ॽ परचार ले़ःॽपॽआ ( मत्ति ३:१-१२ ; लुका ३:१-१८ ; युहन्ना १:१९-२८ ) 1 निवाहाङ्मि पसा येसु मुक्ति पिघुबा हाङ्बा खिरिस्टमि टुम्बेॽ सुसमाचार इडोॽ तरिक्पुॽइये। 2 अगमबक्ता यसैयामि नेॽचिराबेॽ साप्पॽआडोॽ-“खाक्से, हे़ने़ए़ राम टोङ्मामि के़ए़ दुत हे़ने़ए़ पोम्बेॽ पाङ्इनुङे।” 3 खेप्सानुमे, रे़क्रे़क्मा ठाउँबेॽ इक्को बेॽए सेम्लाडे़ॽ इडोॽ लुमे़ॽनिङ्सिये, “परभु लेङ्इये राम टोक्सानुमे, खो रामढाम राम सोझो टोक्सानुमे।” 4 याॽमिजि बप्तिस्मा पिसाङ युहन्ना रे़क्रे़क्मा ठाउँबेॽ खाङ्मुसा। खोसे़ॽ याॽमिजि इडोॽ लुसाङ परचार ले़टुजि, “हे़निङ पाप ले़ःॽमा लेॽनुङ बप्तिस्मा लासानुमे। मोबा हे़निङ्हा चोप पापमि आम्लाङ निवाहाङ्डे़ॽ पिये।” 5 यहुदिया ठाउँनुङ यरुसलेम सहरबेॽहा चोप याॽमिजि युहन्नाबेॽ लेस्सामि। खोजिडे़ॽ टाङ्बा टाङ्बामि पापि योम्बोक लेॽनुङ युहन्नाबाङ यरदन होङ्माबेॽ बप्तिस्मा लासुजि। 6 युहन्नाडे़ॽ उटमि उनिबाङ आक्पॽआ चेॽ चाक्सुए। सुम्रिकपेॽ साउकमि थोङ्माइ हिःगुए, खोसे़ॽ बेॽए सिगिकडोॽमा सलहनुङ याॽवमामि खुदो चोसुहा। 7 खोसे़ॽ याॽमिजि इडोॽ लुसुजि, “काबाङ ए़क्साङ लेङ्घुबा चाहिँ काबाङ बेॽलो सक्तिदाङ्बा ले़ये। कागो खोमि पोम्बेॽ पोॽयुनुङ राङ्सुपमि तुना हेम्मारोमासो ले़ःॽङानि। 8 के़ॽ हे़निङ योङाडे़ॽ बप्तिस्मा पिसुङ, तर खोसे़ॽको हे़निङ पबित्रा होङ्निवाडे़ॽ बप्तिस्मा पिये।” येसुडे़ॽ बप्तिस्मा लाबॽआ ( मत्ति ३:१३–४:११ ; लुका ३:२१-२२ ; ४:१-१३ ) 9 युहन्नाडे़ॽ इडोॽ परचार ले़ःॽमे़ॽनिङ्सिमाबेॽ येसु गालिलमि नासरत सहरबाङ मोबेॽ लेस्सा। मोबा येसुडे़ॽसो मोडोक्पेॽनोॽ युहन्नामि हुकबाङ यरदन होङ्माबेॽ बप्तिस्मा लासु। 10 मोडोक्पेॽ येसु योङाबाङ पाखाबेॽ आप्मासोरोॽ थाङ्सिरि हेम्बोक्नुङ पबित्रा होङ्निवा उख्रिॽवाडोॽमा खोसोक्पेॽ उङ्मे़ॽसिबॽआ खाङ्डोक्टु। 11 मोबा थाङ्सिरिबाङ इडोॽ लुबॽआ सेम्ला खेम्मुसा, “इगो के़ए़ नम्नम ले़ःॽपॽआ पसा ले़ये, हे़न्नुङ का बेॽलो साप्थाङ्इटिङे।” 12 मोबाङ्सोरोॽनोॽ पबित्रा होङ्निवाडे़ॽ येसु रे़क्रे़क्मा ठाउँबेॽ चिक्खे़ॽटु। 13 खो सैतानडे़ॽ रिक्पोङ याकठोक पापबेॽ रेम्एम्मा योगु। मोबेॽ खो नाम्भुङ्लाबेॽहा जन्तुजिनुङ पेना मोडोक्पेॽ थाङ्सिरिदुतजि लेन्नुङ येसुमि सेवा ले़टुजि। येसुडे़ॽ रिबाङ ङा सेॽखुबाजि के़ःॽपॽआ ( मत्ति ४:१२-२२ ; लुका ४:१४-१५ ; ५:१-११ ) 14 ए़क्साङ युहन्ना तिरिङ्गा खिमबेॽ राःप्खे़ॽनुङ ए़क्साङ येसुडे़ॽ निवाहाङ्मि सुसमाचार याॽमिजि परचार ले़ःॽसाङ गालिलबेॽ लेस्सा। 15 खोसे़ॽ लुसु, “हागो बेला लिबेटे़, निवाहाङ्मि राज्य के़क्पेॽनोॽ लेङ्इटे़। हागो पाप ले़ःॽमा लेॽनुङ सुसमाचारबेॽ बिस्वास ले़टानुमे।” 16 गालिल टोम्लिॽवामि के़क्पेॽ राम्मे़ॽनिङ्सिमाबेॽ येसुडे़ॽ सिमोननुङ खोमि निसा अन्दरियास ङा सेॽमामि याङ्घामा राप्मे़ॽनिङ्सिबॽआ खाङ्डोक्टु। मोजि ङा सेॽखुबाजि ले़टाजे। 17 मोबा येसुडे़ॽ माहाजि लुसुजि, “कानुङ राप्साजे, के़ॽ हे़निङ याॽमि काबेॽ लाःप्खुबा टोङ्इन्जिम्ने़।” 18 खोजिडे़ॽ इगो खा खेम्मासोरोॽ याङ्घामा मोबेॽनोॽ याःॽयानुङ येसुनुङ राम्बोगाजि। 19 मोबा फेरि येसु ए़डे़ॽ मेॽयोङ राम्घे़ॽमाबेॽ जब्दियामि निप्पाङ पसाजि याकुबनुङ युहन्ना नाउबेॽ खाङ्डोक्टु। खोजि मोबेॽ पेन्नुङ नाःक्खे़ॽपॽआ याङ्घामा ठिःॽमे़ॽनिङ्सिडाजि। 20 मोडोक्पेॽनोॽ येसुडे़ॽ खोजिसो के़डुजि। मोबा माहाजिडे़ॽसो नाउबेॽ खोजिमि पाबानुङ हाइखा योम्बोक ले़ःॽखुबाजि याःॽयानुङ खोजि चाहिँ येसुनुङ खडाजि। मङे़ॽमा चाबे़ॽ राःप्पॽआ इक्को याॽमि येसुडे़ॽ नुबोक्पॽआ ( लुका ४:३१-३७ ) 21 येसु माहा चोङ्साजिनुङ कफरनहुम लुमे सहरबेॽ रुक्मासोरोॽनोॽ नाजामे याकपेॽ खो यहुदिजि सुम्ढाम सभा खिमबेॽ पे़खे़ॽनुङ याॽमिजि सिक्छे पिबोगुजि। 22 मोबेॽ येसुमि सिक्छे खेम्नुङ याॽमिजि खरि मिनामि इन्ढोङ्होङ खोसे़ॽ यहुदि धारमिक खा इःॽखुबाजिडे़ॽ इःॽपॽआडोॽ ने़ॽनि, तर बेॽए अधिकारनुङ सिक्छे इःडुजे। 23 मोडोक्पेॽनोॽ यहुदिजि सुम्ढाम खिमबेॽहाजिबेॽ मङे़ॽमा चाबे़ॽ राःप्पॽआ इक्को याॽमि टुसे़, मो वोसा, 24 “हे, नासरतबेॽए येसु, हे़ने़ॽ कानिङ इमाङ्डे ले़ःॽमा योॽइये ? इमा हे़ने़ॽ कानिङ नासि ले़ःॽसिॽ लेङ्इटे़ ? हे़न निवाहाङ्डे़ॽ पाङ्बॽआ पबित्रा याॽमि ले़ये लुनुङ के़ॽ लेनुङे़।” 25 तर येसुडे़ॽ मो मङे़ॽमा चाप योबु, “योङ उगे, मोबा आक्को याॽमिबाङ खे़प्पेसे।” 26 मोडोक्पेॽनोॽ मो याॽमि टेन्डिॽखे़ॽलो चेप्आनुङ मङे़ॽमा चाप बेॽए सेम्लाडे़ॽ वोसाङ खे़ॽपेसा। 27 इघा चोप खा खाङ्घुबा याॽमिजि खरि मिन्नुङ काबोगामि, “ने़ॽनि इगोगो इमाङ्डे ? इगोगो चोङ खालमा सिक्छेरे ले़ए़। इगो याॽमिडे़ॽ अधिकारनुङ मङे़ॽमा चापजि खे़ॽपेसे लुन्डुए मोबा माहाजि इगोसे़ॽ लुबॽआडोॽ खे़ॽपेम्मे।” 28 मोबा येसुमि इडोक्मा योम्बोकमि खा गालिलनुङ मोमि किॽयु मिॽयु मुक्खडा। येसुडे़ॽ बेॽलो टुक्खुबाजि नुबोक्पॽआ ( मत्ति ८:१४-१७ ; लुका ४:३८-४१ ) 29 मोबा येसु यहुदिजि सुम्ढाम खिमबाङ खे़ॽमासोरोॽ याकुबनुङ युहन्ना सोरि चिक्मानुङ ओङ्लाम सिमोननुङ अन्दरियासमि खिमबेॽ खडामि। 30 मो याक सिमोनमि नाम्मा ए़चे़ॽमे़ॽ रुङ्घाकपेॽ नेगिगा। येसु लेम्मासोरोॽ खिमबेॽहा याॽमिजिडे़ॽ खो इगो खा खेम्मेॽटुजि। 31 येसुडे़ॽ खोमि के़क्पेॽ खे़ॽनुङ सिमोनमि नाम्मामि हुकपेॽ राःप्नुङ येःपोगु, मोबा खो ए़चे़ॽमे़ॽ लेप्पेसु। मोबा खोसे़ॽ चाबाङ्जि चामा उङ्मा टोङ्नुङ हिक्सुजि। 32 मो युडा नम आघे़ॽनुङ ए़क्साङ याॽमिजिडे़ॽ चोप खालहा टुक्खुबाजि, मङे़ॽमा चाबे़ॽ राःप्पॽआजि येसुबेॽ लाजे़डुजि। 33 मोबा मो सहरबेॽहा बेॽलो याॽमिजि खिमबेॽ सुप्सामि। 34 येसुडे़ॽ बेॽलो खालहा टुक्खुबाजि नुबोगुजि। मोबा बेॽलो याॽमिजिबाङ मङे़ॽमा चापजि यिॽहाक्सुजि। माहा मङे़ॽमा चापजिडे़ॽ येसु लेसुजे। मोडोगे़ॽ येसुडे़ॽ माहा मङे़ॽहा चापजि मे़ङ्कामेॽटुजि। येसुडे़ॽ गालिलबेॽ सिक्छे पिबॽआ ( लुका ४:४२-४४ ) 35 वागियाराम माक्मि नम टे़ःॽमा याक्लोनोॽ येसु पुःक्के़ॽनुङ साङ्गासुमा ठाउँबेॽ खे़ॽनुङ पारथना ले़टु। 36 मोबा सिमोननुङ खोमि लङ्गामजि येसु योक्सिॽ खडामि। 37 खोजिडे़ॽ येसु चुप्नुङ लुसुजि, “चोबे़ॽ हे़न योक्मे़ॽनिङ्सिम्मे।” 38 इगो खा खेम्नुङ येसुडे़ॽ खोजि इडोॽ लुसुजि, “हागो आबानिङे, कानिङ केॽयोङ मेॽयोङ्हा हाइखा खिम्डेमबेॽ खे़ॽमा, मोबेॽहा याॽमिजिसो के़ॽ सुसमाचार खेम्मेॽमा खे़म्मे। इन्ढोङ्होङ इगो योम्बोकमि लागिनोॽ का लेङ्इटिङे।” 39 मोबा येसु गालिलबेॽहा यहुदिजि सुम्ढाम सभा खिमराजि परचार ले़ःॽसाङ्नुङ मङे़हा चापजि याॽमिजिबाङ यिक्साङ राप्सा। सुक्टुबाङे़ॽ सुक्पॽआ याॽमि नुबोक्पॽआ ( मत्ति ८:१-४ ; लुका ५:१२-१६ ) 40 सुक्टुबाङे़ॽ सुक्पॽआ इक्को याॽमि येसुमि सराङ्बेॽ पोॽयुनुङ लुसु, “हे़ने़ॽ का नुबोक्मा मिॽङाहोङ का चोखो टोङ्हेये।” 41 इडोक्मा खा खेम्नुङ येसुमि निवा नम्नावे़ॽ टिबु। मोबा मो याॽमिसोक्पेॽ हुक युङ्नुङ लुसु, “के़ॽ हे़न चोखो लिसे मिॽइन्ने।” 42 मोडोक्पेॽनोॽ मो सुक्टुबाङे़ॽ सुक्पॽआ नुघडा। 43 मोबा सोरोॽनोॽ येसुडे़ॽ मो याॽमि इडोॽ नुरोॽ लुनुङ पाक्सु। 44 “खाक्से, इगो खा असासो ए़ॽलुमेयो! तर आमटाङ्बा याडाङ्बाबेॽ खे़ॽनुङ खाङ्जिमुसे। मोबा हे़न चोखो लिबॽआ खा याॽमिजि खाङ्मुमामि लागि मोसाडे़ॽ पिबॽआ आग्याडे़ॽ लुडिडोॽ मन्दिरबेॽ बलि पिसे।” 45 तर मो याॽमि मोबाङ खे़ॽनुङ टाङ्बा नुबोक्पॽआ खा चोप याॽमिजि खेम्मेॽटुजि। इडोॽ लिबॽआसे़ॽ येसुडे़ॽ फेरि सहरराजि खे़ॽनुङ परचार मे़ले़ःॽहेसु। मोडोगे़ॽ येसु साङ्गासुमा ठाउँराजि खे़ॽनुङ पेम्बोगा, तर मोबेॽसो याॽमिजि किॽयु मिॽयुराम लेम्बोगामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.